ဒီဇင်ဘာ ၉၊ ၂၀၁၉
M-Media
-မွတ်စလင်နိုင်ငံတွေအနေနဲ့ ပြည်သူလူထုရဲ့ လူနေမှုအဆင့်အတန်း ပိုမိုကောင်းမွန်အောင် ဆောင်ရွက်ကာ အစ္စလာမ်ကမ္ဘာက ဆင်းရဲမွဲနေသူတွေကိုလည်း ကြည့်ရှုကယ်ထုတ်ကြဖို့ တူရကီသမ္မတ အာဒိုဂန်က တိုက်တွန်း ပြောဆိုလိုက်ပါတယ်။
OIC အဖွဲ့ရဲ့ ပထမဆုံးအကြိမ် ရင်းနှီးမြှုပ်နှံမှုဆိုင်ရာ ညီလာခံ High-Level Public and Private Investment Conference ကို မနေ့က အစ္စတန်ဘူလ်မြို့မှာ စတင်ကျင်းပခဲ့ပါတယ်။ အဖွင့်မိန့်ခွန်းမှာ အာဒိုဂန်က မိမိတို့ရဲ့ ကြွယ်၀မှုတွေကို ဆင်းရဲသူတွေထံ မျှဝေသွားဖို့ လိုအပ်ကြောင်း ပြောကြားခဲ့ပါတယ်။
“အစ္စလာမ်သာသနာရဲ့ စတုတ္ထမဏ္ဍိုင်ဖြစ်တဲ့ ဇကားသ်သတ်မှတ်ချက်အတိုင်းသာ လှူဒါန်းကြမယ်ဆိုရင် မွတ်စလင်နိုင်ငံတွေမှာ သူဆင်းရဲဆိုတာ ရှိမှာမဟုတ်ပါဘူး။ OIC အဖွဲ့ဝင်နိုင်ငံတွေက လူဦးရေရဲ့ ၂၁ ရာခိုင်နှုန်းဖြစ်တဲ့ လူပေါင်း သန်း ၃၅၀ လောက်ဟာ အလွန်အမင်း ဆင်းရဲမွဲတေတဲ့ အခြေအနေမျိုးမှာ ဘ၀တွေကို ရင်ဆိုင်ဖြတ်သန်းနေရပါတယ်။ မွတ်စလင်တိုင်းပြည်တွေအနေနဲ့ ဒီကိစ္စတွေကို ပိုမိုအလေးထားပြီး ပွင့်ပွင့်လင်းလင်း ဆွေးနွေးဖို့ လိုအပ်ပါတယ်”
မွတ်စလင်နိုင်ငံတွေထဲမှာ ဆင်းရဲချမ်းသာ ကွာဟာမှုဟာ အဆ ၂၀၀ ဝန်းကျင်လောက် မြင့်မားနေတာ၊ တိုင်းပြည်ဝင်ငွေနဲ့ ဖွံ့ဖြိုးတိုးတက်ရေးအပိုင်းမှာ လိုအပ်ချက်တွေ ရှိနေတာတွေကိုလည်း အာဒိုဂန်က ထောက်ပြခဲ့သလို၊ OIC အဖွဲ့ဝင်နိုင်ငံတွေအချင်းချင်း ပူးပေါင်းဆောင်ရွက်သွားကြဖို့လည်း တိုက်တွန်းခဲ့ပါတယ်။
“သဘာ၀သယံဇာတရင်းမြစ်တွေ ပေါများပြီး၊ မဟာဗျူဟာကျတဲ့ ဒေသတွေမှာ ရှိနေတဲ့ မွတ်စလင်တိုင်းပြည်တွေဟာ အလားအလာကောင်းတွေ ရှိနေပါတယ်။ ကမ္ဘာ့လူဦးရေရဲ့ ၂၄ ရာခိုင်နှုန်းဖြစ်တဲ့ သန်းပေါင်း ၁၇၀၀ သော လူဦးရေကလည်း ကြီးမားလွန်းတဲ့ လူ့စွမ်းအားအရင်းအမြစ် ဖြစ်ပါတယ်”
ကမ္ဘာ့ရေနံထုတ်လုပ်မှုရဲ့ ၆၅ ရာခိုင်နှုန်း၊ ဓာတ်ငွေ့ထုတ်လုပ်မှုရဲ့ ၅၅ ရာခိုင်နှုန်း၊ ယူရေနီယံရင်းမြစ်ရဲ့ ၄၀ ရာခိုင်နှုန်းဟာ မွတ်စလင်နိုင်ငံတွေကဖြစ်ပြီး ကမ္ဘာ့ ဂျုံ၊ အသီးအနှံ ထုတ်လုပ်မှုတွေမှာလည်း အဓိကအခန်းကဏ္ဍကနေ ပါဝင်နေကြောင်း တူရကီသမ္မတက ထည့်သွင်းပြောဆိုခဲ့ပါတယ်။
မွတ်စလင်နိုင်ငံတွေမှာ ဆင်းရဲမွဲတေမှု လျော့ချရေးအတွက် ထိရောက်တဲ့ ပူးပေါင်းဆောင်ရွက်မှုတွေ အလျင်အမြန်လုပ်ဆောင်ဖို့၊ မွတ်စလင်နိုင်ငံတွေအားလုံး ပါဝင်တဲ့ မဟာမိတ်အဖွဲ့တစ်ခု ဖွဲ့စည်းဖို့ကိုလည်း အာဒိုဂန်က တိုက်တွန်းခဲ့ပါတယ်။
High-Level Public and Private Investment Conference ညီလာခံကို တူရကီ ရင်းနှီးမြှုပ်နှံမှုရုံးကနေ ကမကထပြု ကျင်းပတာဖြစ်ပြီး ၂ ရက်တာကြာမြင့်ကာ နိုင်ငံပေါင်း ၅၆ နိုင်ငံက လူ ၁၂၀၀ လောက် တက်ရောက်ခဲ့ကြပါတယ်။
Ref: Daily Sabah
