ဧပြီ ၁၊ ၂၀၁၇
M-Media
– နာမည်ကျော် Iron Man ဇာတ်ကားထဲက ၀တ်စုံလို တစ်ကိုယ်တော် ပျံသန်းနိုင်မယ့် ၀တ်စုံတစ်ခုကို ဗြိတိန်ပညာရှင် ရစ်ချက် ဘရောင်းနင်းဆိုသူက တီထွင်ထုတ်လုပ်လိုက်ပါတယ်။
အမြင့်ပေ ထောင်ချီ တက်လို့ရပြီး တစ်နာရီကို မိုင်ရာနဲ့ချီ သွားနိုင်တဲ့ ဒီကိရိယာဟာ လူသားကို ဒေါင်လိုက်အနေအထားတိုင်း ပျံသန်းစေနိုင်မှာဖြစ်ပြီး ဟန်ချက်ထိန်းဖို့ကတော့ လူသား ခန္ဓာကိုယ်ကို အသုံးပြုရမှာ ဖြစ်တယ်လို့ ဘရောင်းနင်းက ဆိုပါတယ်။
လက်ရှိမှာ ဘရောင်းနင်းဟာ Gravity လို့ခေါ်တဲ့ နည်းပညာကုမ္ပဏီတစ်ခုကို ထူထောင်ထားပြီး တစ်ကိုယ်ရည် ပျံသန်းနိုင်မယ့် ‘ပျံသန်းလူသားနည်းပညာ’ အတွက်လည်း မှတ်ပုံတင်ထားပြီးပါပြီ။
ဒီနည်းပညာဟာ ခန္ဓာကိုယ်မှာ တပ်ဆင်နိုင်မယ့် ဂျက်အင်ဂျင်နဲ့ အထူးပြုလုပ်ထားတဲ့ ၀တ်စုံကို ပေါင်းစပ်ထားတာ ဖြစ်ပါတယ်။ ဒီဝတ်စုံမှာ ဂျက်အင်ဂျင်ငယ် ၆ လုံး ပါဝင်မှာဖြစ်ပြီး လက်နဲ့ ကျောကုန်းတို့မှာ တပ်ဆင်ထားမှာပါ။
ဗြိတိန် တော်ဝင်မရိန်းတပ်သားဟောင်းတစ်ယောက်ဖြစ်တဲ့ အသက် ၃၈ နှစ်အရွယ် ဘရောင်းနင်းဟာ လက်ရှိဝတ်စုံကို ၁၀ လကြာ ဖန်တီးခဲ့ရပြီး ဂရိဒဏ္ဍာရီသူရဲကောင်းတစ်ဦးဖြစ်တဲ့ Daedalus ရဲ့ အမည် မှည့်ခေါ်ထားပါတယ်။
“ဒီဝတ်စုံဟာ လေကြောင်းသမိုင်းမှာ အရေးကြီးတဲ့ အမှတ်အသားတစ်ခု ဖြစ်လာမှာပါ။ Daedalus ဟာ လေကြောင်းကဏ္ဍ၊ စီးပွားရေးနဲ့ ဖျော်ဖြေရေးကဏ္ဍတွေမှာ အဆုံးမရှိတဲ့ အဓိကနည်းပညာတစ်ခုရဲ့ အစလည်း ဖြစ်ပါတယ်။ ကျွန်တော်တို့ဟာ ကမ္ဘာကို ပြောင်းလဲသွားစေမယ့် နည်းပညာစီးပွားရေးတစ်ခု ဖန်တီးဖို့
တော်တော်လေး စိတ်အားထက်သန်နေပါတယ်။ လူသားပျံသန်းတဲ့စနစ်က ဖြစ်လာမယ့် အရာတွေရဲ့ အစမှာ ကျွန်တော်တို့ ရောက်ရှိနေတာပါ” လို့ ဘရောင်းနင်းက Daily Mail သတင်းစာကို ပြောကြားခဲ့ပါတယ်။
Ref: RT
