News @ M-Media

Tag: Ukarine

  • စစ်မှုထမ်းရန် ဆင့်ခေါ်လာလျှင် ၀င်တိုက်ပေးမည်ဟု နာမည်ကြီး ဘောလုံးသမားပြော

    စစ်မှုထမ်းရန် ဆင့်ခေါ်လာလျှင် ၀င်တိုက်ပေးမည်ဟု နာမည်ကြီး ဘောလုံးသမားပြော

    ဧပြီ ၆၊ ၂၀၂၄

    M-Media 


    -တိုင်းပြည်က စစ်မှုထမ်းဖို့ ဆင့်ခေါ်မယ်ဆိုရင် ကစားသမားဘ၀ကို ခဏရပ်နားကာ သွားရောက်တိုက်ပွဲ၀င်ပေးမယ်လို့ အာဆင်နယ်အသင်း နောက်ခံလူ အိုလက်ဇန်ဒါ ဇင်ချန်ကိုက ပြောပါတယ်။ 

    ဇင်ချန်ကိုဟာ ယူကရိန်းနိုင်ငံသားတစ်ဦးပါ။ ယူကရိန်းဟာ ၂၀၂၂ ခုနှစ် ဖေဖော်၀ါရီလကတည်းက ရုရှားရဲ့ ကျူးကျော်တိုက်ခိုက်မှုကို ခံနေရတာ ဖြစ်ပါတယ်။ 

    တိုင်းပြည်ရဲ့ ကာကွယ်ရေးကို ပိုမိုအားဖြည့်နိုင်ဖို့အတွက် ယူကရိန်းသမ္မတ ဇယ်လင်စကီးဟာ အမျိုးသားတွေ စစ်မှုထမ်းရမယ့် အနိမ့်ဆုံးအသက်ကို ၂၇ ခုနှစ်ကနေ ၂၅ နှစ်ကို လျှော့ချလိုက်ပါတယ်။  

    တိုင်းပြည်က ဆင့်ခေါ်လာမယ်ဆိုရင် ရှေ့တန်းမှာ တိုက်ပွဲ၀င်ဖို့ ၀န်လေးနေမှာမဟုတ်ဘူးလို့ ဇင်ချန်ကိုက ဘီဘီစီသတင်းဌာနရဲ့ အစီအစဥ်တစ်ခုမှာ ပြောကြားခဲ့ပါတယ်။ 

    ကျောင်းတုန်းက သူငယ်ချင်းတွေလည်း စစ်ပွဲမှာ ၀င်ရောက်တိုက်ခိုက်နေတယ်လို့ သူက ဆိုပါတယ်။ 

    “ပြတ်ပြတ်သားသားဖြေရရင် ကျွန်တော် စစ်မှုသွားထမ်းမှာပါ။ တစ်ကျောင်းတည်း အတူတက်ခဲ့ကြတဲ့၊ တစ်ကွင်းထဲမှာ အတူကစားခဲ့ကြတဲ့ သူငယ်ချင်းတွေ၊ အခု တိုင်းပြည်ကို ကာကွယ်နေရပြီ။ ရိုးရိုးသားသားပြောရရင် လက်ခံရခက်ပါတယ်။ ဒါပေမယ့် ဒါက အရှိတရားပဲ။ ကျွန်တော်တို့ အရှုံးပေးလိုက်လို့ မရပါဘူး” 

    ရုရှားရဲ့ ကျူးကျော်စစ်ကြောင့် အတိဒုက္ခရောက်နေကြတဲ့ ယူကရိန်းစစ်ဘေးရှောင်တွေကို ကူညီဖို့အတွက် ဇင်ချန်ကိုဟာ ကန်ဒေါ်လာ ၁ သန်း လှူဒါန်းထားပါတယ်။ 

    Ref: Sky News 

  • ခရိုင်းမီးယားကနေ ထွက်ပြေးရပြီဖြစ်တဲ့ ရုရှားရဲ့ ပင်လယ်နက်ရေတပ်

    ခရိုင်းမီးယားကနေ ထွက်ပြေးရပြီဖြစ်တဲ့ ရုရှားရဲ့ ပင်လယ်နက်ရေတပ်

    အောက်တိုဘာ ၇၊ ၂၀၂၃

    M-Media 


    -ခရိုင်းမီးယားမှာ အခြေစိုက်တဲ့ ရုရှားရဲ့ ပင်လယ်နက်ရေတပ်ဟာ ယူကရိန်းရဲ့ တန်ပြန်ထိုးစစ်ကို မခံနိုင်တဲ့အတွက် ပြောင်းရွှေ့ခဲ့ရပါတယ်။

    ၂၀၁၄ ခုနှစ် ခရိုင်းမီးယားကို ရုရှားက ကျူးကျော်သိမ်းပိုက်ပြီးနောက်ပိုင်း ရုရှားရဲ့ ပင်လယ်နက်ရေတပ်ဟာ ဆီဗက်စတိုပိုမြို့မှာ အဓိက အခြေစိုက်ပါတယ်။ 

    နောက်ဆုံးပေါ် တိုက်သင်္ဘောတွေ၊ ရေငုပ်သင်္ဘောတွေနဲ့ အခြား စစ်ရေယာဥ် အများအပြား ချထားခဲ့သလို၊ အရေးပါတဲ့ သင်္ဘောကျင်းတစ်ခုလည်း ဆီဗက်စတိုပိုမှာ ရှိပါတယ်။ 

    ၂၀၂၁ ခုနှစ် ယူကရိန်းကုန်းတွင်းပိုင်းကို ရုရှားက ထပ်မံကျူးကျော်တဲ့ အချိန်မှာ ခရိုင်းမီးယားက ရုရှားရေတပ်ဟာ ပင်လယ်နက်နဲ့ အဇော့ဗ်ပင်လယ်က ယူကရိန်းရဲ့ ရေပိုင်နက်တွေကို အပြီးတိုင် ပိတ်ဆို့ ထိန်းချုပ်နိုင်ခဲ့ပါတယ်။ 

    ယူကရိန်းရဲ့ အဓိကဆိပ်ကမ်းမြို့ အိုဒက်ဆာနဲ့ တောင်ပိုင်းက မြို့တွေကို ဒုံးကျည်တွေ၊ ဒရုန်းတွေနဲ့ အကြီးအကျယ်တိုက်ခိုက်တဲ့ ရုရှားရဲ့ စစ်ဆင်ရေးမှာ ဆီဗက်စတိုပိုအခြေစိုက် စစ်သင်္ဘောတွေက အခရာကျခဲ့ပါတယ်။

    ယူကရိန်းကထွက်လာတဲ့ ဂျုံစေ့၊ နေကြာဆီတင်သင်္ဘောတွေကို ခရိုင်းမီးယားက ရုရှားစစ်သင်္ဘောတွေက ဟန့်တားစစ်ဆေးခဲ့ကြပြီး ယူကရိန်းရဲ့ ငွေရလမ်းကို နှောက်ယှက်ခဲ့ကြပါတယ်။ 

    စစ်ရေးနဲ့ စီးပွားရေးမှာ ယူကရိန်းကို ဒုက္ခလှလှပေးခဲ့တဲ့ ပင်လယ်နက် ရေတပ်ဟာ အခုအချိန်မှာတော့ ခရိုင်းမီးယားကို စွန့်ခွာကာ ရုရှားရေပိုင်နက်ထဲကို ပြောင်းရွှေ့သွားကြပါပြီ။ 

    အောင်မြင်မှု 

    ပဲ့ထိန်းဒုံးကျည်တွေ ပစ်ခတ်နိုင်တဲ့ ဖရီးဂိတ်သင်္ဘောတွေ၊ ရေငုပ်သင်္ဘောတွေ အပါအ၀င် ရုရှားရဲ့ စစ်သင်္ဘော အနည်းဆုံး တစ်ဒါဇင်လောက် ဆီဗက်စတိုပို ဆိပ်ကမ်းကနေ ပြောင်းရွှေ့သွားခဲ့ကြတာကို ဂြိုဟ်တုဓာတ်ပုံအသစ်မှာ တွေ့ရပါတယ်။ 

    အများစုဟာ ဆီဗက်စတိုပို အရှေ့ဖက် ၁၈၆ မိုင်၀ေးတဲ့ ရုရှား ဆိပ်ကမ်း နိုဗိုရိုစီအစ်နဲ့ ရုရှားဖက်က ပင်လယ်နက်ဆိပ်ကမ်းတွေကို ရောက်သွားကြပါတယ်။ 

    ယူကရိန်းကို ဒုံးကျည်တွေနဲ့ ပစ်ခတ်နိုင်တဲ့ အကွာအ၀ေးမှာ ဒီသင်္ဘောတွေ မရှိကြတော့ပါဘူး။ 

    တန်ပြန်ထိုးစစ် 

    ယူကရိန်းဟာ မတ်လကစတင်ပြီး ရုရှားကို တန်ပြန်ထိုးစစ် ဆင်နွှဲလာတာပါ။  

    အနောက်နိုင်ငံတွေက ထောက်ပံ့တဲ့ ခရုဇ်ဒုံးကျည်တွေ၊ ပြည်တွင်းမှာ ထုတ်လုပ်တပ်ဆင်တဲ့ ဒရုန်းတွေဟာ ခရိုင်းမီးယားက ရုရှားရေတပ်ကို အကြီးအကျယ် ဒုက္ခပေးနိုင်ခဲ့ပါတယ်။ 

    ရုရှားရဲ့ နောက်ဆုံးပေါ်တိုက်သင်္ဘောတွေ၊ ရေငုပ်သင်္ဘောတွေနဲ့ စစ်သင်္ဘောငယ်တွေကို ယူကရိန်းက ဖျက်ဆီးနိုင်ခဲ့ပြီး ခရိုင်းမီးယားမှာ ချထားတဲ့ S400 ဒုံးခွင်းစနစ် နှစ်ခုလည်း ယူကရိန်းရဲ့တိုက်ခိုက်မှုအတွင်း ပျက်ဆီးသွားပါတယ်။ 

    S400 ဒုံးခွင်းစနစ်ဟာ လက်ရှိအချိန်မှာ ကမ္ဘာ့အကောင်းဆုံး လေကြောင်းရန် ကာကွယ်ရေးစနစ်တွေထဲက တစ်ခုဖြစ်ပါတယ်။ 

    ခရိုင်းမီးယားက ရုရှားရဲ့ အဓိကရေတပ်သင်္ဘောကျင်းနဲ့ ရေတပ် ရုံးချုပ်တို့ကိုလည်း ယူကရိန်းက ဖျက်ဆီးနိုင်ခဲ့ပါတယ်။ 

    ၂၀၁၅ ခုနှစ်ကတည်းက ရုရှားသိမ်းထားတဲ့ ပင်လယ််နက် ရေနံ၊ သဘာ၀ဓာတ်ငွေ့တူးစင်တစ်ခုကို ယူးကရိန်းတပ်ဖွဲ့တွေက မကြာခင်ကပဲ ပြန်သိမ်းနိုင်ခဲ့ပါတယ်။ 

    ခရိုင်းမီးယားမှာ ယူကရိန်းရဲ့ အောင်မြင်မှုတွေက ရုရှားကို အထိနာစေခဲ့ပါတယ်။ အိုဒက်ဆာလို အရေးပါတဲ့ ဆိပ်ကမ်းကို ရုရှားဖက်က တိုက်ခိုက်မှု မလုပ်နိုင်တော့သလို၊ ယူကရိန်းအရှေ့ပိုင်းနဲ့ တောင်ပိုင်းက ရုရှားတပ်တွေကို လက်နက်ခဲယမ်းနဲ့ ရိက္ခာထောက်ပံ့ပေးမှုတွေလည်း အားနည်းသွားပြီဖြစ်ပါတယ်။ 

    ယူကရိန်းရဲ့ အဓိကပို့ကုန်ဖြစ်တဲ့ ဂျုံနဲ့ နေကြာဆီတင် သင်္ဘောတွေ၊ နိုင်ငံတကာက သင်္ဘောတွေလည်း ပင်လယ်နက်မှာ ရုရှားရဲ့ နှောက်ယှက်စစ်ဆေးမှုရန်ကနေ ကင်းသွားပါပြီ။ 

    ဒီလိုအောင်မြင်မှုတွေနဲ့အတူ ခရိုင်းမီးယားကျွန်းဆွယ်ကို ရုရှားလက်ကနေ ယူကရိန်းက အပြီးတိုင် ပြန်လည်သိမ်းပိုက်နိုင်မလားဆိုတာ စောင့်ကြည့်သွားရမှာ ဖြစ်ပါတယ်။ 

    Ref: Aljazeera 

    https://www.aljazeera.com/news/2023/10/6/they-miscalculated-ukraine-turns-the-tables-on-russias-black-sea-fleet
  • ယူကရိန်းကို ရုရှားရဲ့ ကျူးကျော်မှုမှာ ဗီလိန်ဖြစ်လာတဲ့ အီလွန်မက်စ်

    ယူကရိန်းကို ရုရှားရဲ့ ကျူးကျော်မှုမှာ ဗီလိန်ဖြစ်လာတဲ့ အီလွန်မက်စ်

    စက်တင်ဘာ ၁၀၊ ၂၀၂၃

    M-Media 


    -ရုရှားက ယူကရိန်းမြို့တွေကို တိုက်ခိုက်ရာမှာ အီလွန်မက်စ်က သွယ်၀ိုက်ပြီး ပါ၀င်ပတ်သက်ခဲ့တယ်လို့ ယူကရိန်းသမ္မတရဲ့ အကြံပေး မီခိုင်လို ပိုဒိုလ်ယက်က ၀ေဖန်လိုက်ပါတယ်။ 

    စာရေးဆရာ ၀ေါလ်တာ အိုက်ဇက်ဆန် ရေးသားတဲ့ အီလွန်မက်စ်အထုပ္ပတ္တိမှာ ဖွင့်ချထားတဲ့ အချက်အလက်တစ်ချို့ကြောင့် မက်စ်အပေါ် ၀ေဖန်မှုတွေ မြင့်တက်လာပါတယ်။ 

    ခရိုင်းမီးယားက ရုရှားရေတပ်သင်္ဘောတွေကို ယူကရိန်းဒရုန်းတွေ တိုက်ခိုက်ဖို့သွားတဲ့အချိန် အီလွန်မက်စ်က သူ့ရဲ့ Star Link အင်တာနက်လိုင်းကို ဖြတ်တောက်ခိုင်းခဲ့တဲ့အကြောင်း စာအုပ်မှာ ထည့်သွင်းရေးသားထားတာပါ။ 

    ဒီလိုအင်တာနက် ဖြတ်လိုက်တာကြောင့် ယူကရိန်းရဲ့တိုက်ခိုက်မှု မအောင်မြင်ခဲ့ပါဘူး။ 

    မက်စ်က ဒီတိုက်ခိုက်မှုသာ အထမြောက်သွားရင် ရုရှားဖက်က ယူကရိန်းကို နျူနဲ့ တိုက်ခိုက်လာနိုင်တဲ့အတွက် ဒီလိုလုပ်လိုက်ရတာလို့ ပြောပါတယ်။ 

    “ဒီတိုက်ခိုက်မှုသာ အောင်မြင်သွားရင်း ရုရှား ရေတပ်သင်္ဘောအုပ် နစ်သွားမယ်။ အသေးစား ပုလဲဆိပ်ကမ်းတိုက်ခိုက်မှုမျိုး ဖြစ်ကာ အခြေအနေ ပိုဆိုးသွားမှာပါ။ ဒီလိုကိစ္စမျိုးမှာ ကျွန်တော်တို့စနက် မဖြစ်ချင်ပါဘူး” လို့ မက်စ်က ပြောပါတယ်။ 

    ၀ေဖန်

    ယူကရိန်းသမ္မတအကြံပေး ပိုဒိုလ်ယက်က မက်စ်ပိုင်တဲ့ ဆိုရှယ်မီဒီယာ X (ယခင် Twitter) မှာပဲ မက်စ်ကို ပေါ်ပေါ်ထင်ထင် ၀ေဖန်ခဲ့ပါတယ်။ 

    ခရိုင်းမီးယားက ရုရှားရေတပ်သင်္ဘောတွေအပေါ် ယူကရိန်းရဲ့ တိုက်ခိုက်မှုကို ခွင့်မပြုခဲ့တာကြောင့် အဲဒီရေတပ်သင်္ဘောတွေဟာ ယူကရိန်းမြို့တွေကို ဒုံးကျည်တွေနဲ့ ပစ်ခတ်နိုင်ခဲ့ပြီး အရပ်သားတွေ၊ ကလေးသူငယ်တွေ သေဆုံးခဲ့ကြောင်း၊ ဒီအဖြစ်အပျက်မှာ အီလွန်မက်စ်လည်း တာ၀န်ရှိကြောင်း ပိုဒိုလ်ယက်က ရေးသားခဲ့ပါတယ်။ 

    မက်စ်ကတော့ စာအုပ်ထဲက အကြောင်းကို ဆိုရှယ်မီဒီယာမှာ ပြန်ရှင်းပါတယ်။ 

    ခရိုင်းမီးယား ဆီဗက်စတိုပိုလ်က ရုရှား ရေတပ်သင်္ဘောတွေကို တိုက်ခိုက်ဖို့ ယူကရိန်းဒရုန်းတွေ သွားရောက်ချိန်မှာ ယူကရိန်းက Star Link အင်တာနက်လိုင်းကို အသုံပြုဖို့ တောင်းဆိုခဲ့ပြီး သူဖက်ကတော့ ခွင့်မပြုခဲ့ကြောင်း X (ယခင် Twitter) မှာ ရေးသားခဲ့ပါတယ်။ 

    အဓိက စစ်ပွဲတစ်ခုမှာ ပါ၀င်ပတ်သက်မှု ဖြစ်လာမှာကို စိုးရိမ်တဲ့အတွက် ဒီလိုလုပ်ရတာဖြစ်ပြီး သူ့မှာ ရွေးစရာမရှိဘူးလို့ မက်စ်က ဆိုပါတယ်။ 

    “(Star Link သုံးဖို့ တောင်းတာက) ကျောက်ချထားတဲ့ ရုရှားရေတပ်သင်္ဘောတွေကို မြှုပ်ပစ်ဖို့ အတွက်ပါ။ ဒီတောင်းဆိုမှုကိုသာ ကျွန်တော် ခွင့်ပြုလိုက်ရင် စစ်ပွဲဖြစ်စေတဲ့၊ အခြေအနေကို ပိုမိုဆိုးရွားးစေမယ့် အဓိက အဖြစ်အပျက်တစ်ခုမှာ Space X က ပါ၀င်ပတ်သက်သလို ဖြစ်သွားပါလိမ့်မယ်” 

    ယူကရိန်းတပ်ဖွဲ့တွေဟာ ရုရှားရဲ့ ကျူးကျော်စစ်ကို ခုခံမှုနဲ့ တန်ပြန်ထိုးစစ်တွေမှာ Star Link ရဲ့ အင်တာနက်၀န်ဆောင်မှုကို ၂၀၂၂ ခုနှစ် စစ်ပွဲစတင်ကတည်းက အားထားနေရတာ ဖြစ်ပါတယ်။   

    ယူကရိန်းစစ်ပွဲနဲ့ပတ်သက်ပြီး ရုရှားရဲ့ ၀ါဒဖြန့်မှုတွေမှာ X ဆိုရှယ်မီဒီယာက အဓိကအခန်းကဏ္ဍကနေ ပါ၀င်နေတယ်လို့လည်း ကျွမ်းကျင်သူတွေက ၀ေဖန်ပြောဆိုထားပါတယ်။ 

    အိုက်ဇက်ဆန်ရေးတဲ့ အထုပ္ပတ္တိစာအုပ်မှာ မက်စ်က Star Link ၀န်ဆောင်မှုဟာ စစ်ပွဲအတွက် မရည်ရွယ်ဘူးလို့ ပြောကြားခဲ့ပါတယ်။ 

    “Star Link ကို စစ်ပွဲမှာ အသုံးပြုဖို့ မရည်ရွယ်ပါဘူး။ လူတွေ ရုပ်ရှင်ကြည့်ဖို့၊ အပန်းဖြေဖို့၊ အွန်လိုင်းပညာရေးအတွက်၊ ငြိမ်းချမ်းရေးအတွက်သာ ရည်ရွယ်ပါတယ်။ ဒရုန်းတိုက်ခိုက်မှုအတွက် မဟုတ်ပါဘူး” 

    Ref: Aljazeera 

  • အူမာရော့ဗ် (သို့) ယူကရိန်းစစ်တပ်ကို ဦးဆောင်မယ့် ခရိုင်းမီးယားက တာတာမွတ်စလင်

    အူမာရော့ဗ် (သို့) ယူကရိန်းစစ်တပ်ကို ဦးဆောင်မယ့် ခရိုင်းမီးယားက တာတာမွတ်စလင်

    စက်တင်ဘာ ၉၊ ၂၀၂၃

    M-Media 


    -ယူကရိန်းအစိုးရဟာ ကာကွယ်ရေး၀န်ကြီးသစ်အဖြစ် ခရိုင်းမီးယားနွယ်ဖွား တာတာမွတ်စလင် ရက်စတမ် အူမာရော့ဗ်ကို ခန့်အပ်လိုက်ပါတယ်။ 

    အနောက်နိုင်ငံတွေက ပေးပို့တဲ့ ဒေါ်လာဘီလီယံချီ တန်ဖိုးရှိ လက်နက်အကူအညီတွေကို ကိုင်တွယ်နေရတဲ့ ယူကရိန်းစစ်တပ် ထိပ်ပိုင်းမှာ ခြစားမှုတွေ ကျယ်ကျယ်ပြန့်ပြန့် ဖြစ်ပေါ်နေတယ်ဆိုတဲ့ သတင်းကြောင့် သမ္မတ ဇယ်လင်စကီးဟာ စစ်တပ်ကို ပြုပြင်ပြောင်းလဲမှုတွေ လုပ်နေတာပါ။ 

    ၂၀၂၁ ခုနှစ် နို၀င်ဘာက စတင်ကာ ကာကွယ်ရေး၀န်ကြီးတာ၀န် ရယူခဲ့တဲ့ အိုလက်စကီ ရက်ဇ်နီကော့ဗ်လည်း ရာထူးကနေ နှုတ်ထွက်သွားခဲ့ပါတယ်။

    အောက်ခြေစစ်သားတွေအတွက် စားနပ်ရိက္ခာတွေ၊ ယူနီဖောင်းတွေ ၀ယ်ယူရာမှာ ထိပ်ပိုင်းဗိုလ်ချုပ်တွေက တင်ရိုက်တာတွေ ရှိနေပါတယ်။ စစ်ရေးစစ်ရာမှာလည်း ယူကရိန်းစစ်တပ် ထိပ်ပိုင်းခေါင်းဆောင်တွေဟာ ထိထိရောက်ရောက် စွမ်းဆောင်နိုင်ခြင်း မရှိပါဘူး။ 

    အနောက်နိုင်ငံတွေက မျှော်လင့်ချက်ကြီးကြီးထားတဲ့ ရုရှားအပေါ် တန်ပြန်တိုက်စစ်ဟာ နှမ်းထွက်မကိုက်ပါဘူး။ 

    ဇယ်လင်စကီးဟာ ကာကွယ်ရေး၀န်ကြီးဌာနနဲ့ စစ်တပ်အတွင်းက ခြစားမှု၊ စီမံခန့်ခွဲမှု ညံ့ဖျင်းတာတွေကို ကိုင်တွယ်နေပြီး ထိပ်ပိုင်းခေါင်းဆောင် တော်တော်များများကိုလည်း ထုတ်ပယ်ကာ အစားထိုးထားပါတယ်။

    ကာကွယ်ရေး၀န်ကြီးအသစ်က ဘယ်သူလဲ 

    ကာကွယ်ရေး၀န်ကြီးမဖြစ်ခင် အူမာရော့ဗ်ဟာ နိုင်ငံစီးပွားရေးကို အဓိကထိန်းကျောင်းတဲ့အဖွဲ့ State Property Fund အကြီးအကဲအဖြစ် တစ်နှစ် တာ၀န်ထမ်းဆောင်ခဲ့ပါတယ်။ 

    သူ့ရဲ့ စီစစ်ဆောင်ရွက်မှုတွေကြောင့် နိုင်ငံပိုင်ငွေ အလေအလွင့်ဖြစ်နေမှု တော်တော်များများကို တားဆီးနိုင်ခဲ့ပြီး ၀င်ငွေလည်း တိုးလာပါတယ်။  

    စာရင်းစစ်ဆေးမှုတွေ အကြီးအကျယ်လုပ်ဆောင်ကာ ခြစားမှု၊ စီမံခန့်ခွဲမှု အလွဲအမှားတွေကို တိုက်ဖျက်နိုင်တာကြောင့် အူမာရော့ဟာ ယူကရိန်းအစိုးရနဲ့ နိုင်ငံရေးအသိုင်းအ၀ိုင်းရဲ့ ချီးကျူးမှု၊ ယုံကြည်မှုကို ရရှိခဲ့ပါတယ်။ 

    အူမာရော့ဗ်ဟာ ယူကရိန်းသမ္မတ ဇယ်လင်စကီးရဲ့ Servant of the People ပါတီ၀င်မဟုတ်ဘဲ ဥရောပလိုလားတဲ့ Holos ပါတီ၀င်ဖြစ်ပါတယ်။ နိုင်ငံရေး၊ စီးပွားရေးနယ်ပယ်မှာ ကွန်ယက်ကောင်းကောင်း တည်ဆောက်ထားနိုင်ပြီး ရုရှားရဲ့ ကျူးကျော်မှုအတွင်း တိုင်းပြည်မနာစေမယ့် အောင်မြင်တဲ့ ဆွေးနွေးမှု တော်တော်များများကို လုပ်ဆောင်ထားနိုင်ပါတယ်။ 

    ရုရှားရဲ့ကျူးကျော်မှု တစ်လအကြာမှာ ပြုလုပ်တဲ့ ငြိမ်းချမ်းရေး ဆွေးနွေးမှုက ယူကရိန်းကိုယ်စားလှယ်အဖွဲ့မှာ အူမာရော့ဗ် ပါ၀င်ခဲ့ပါတယ်။ 

    ပင်လယ်နက်မှာ ပိတ်မိနေတဲ့ ယူကရိန်းဂျုံတွေ တင်ပို့ရောင်းချနိုင်ရေး၊ ရုရှားက ဖမ်းဆီးထားတဲ့ ယူကရိန်းစစ်သုံ့ပန်းတွေကို ပြန်လွှတ်ပေးရေး သူဦးဆောင်ကာ ရုရှားနဲ့ ဆွေးနွေးခဲ့ပြီး အောင်မြင်ခဲ့ပါတယ်။  

    ဇစ်မြစ်

    အူမာရော့ဗ်ကို ဥဇဘက်ကစ္စတန်နိုင်ငံ ဆမာရ်ကန်မြို့မှာ မွေးတာပါ။ သူမွေးစဥ်က ဥဇဘက်ကစ္စတန်ဟာ ဆိုဗီယက်လက်အောက််မှာ ရှိတဲ့အချိန် ဖြစ်ပါတယ်။ 

    ခရိုင်းမီးယားကျွန်းဆွယ်မှာမွေးတဲ့ တာတာအနွယ်ဖြစ်ပါတယ်။ 

    ခရိုင်းမီးယားတာတာတွေဟာ တူရကီစကားပြောကာ အစ္စလာမ်ဘာသာကို ကိုးကွယ်ကြသူတွေပါ။  ဆိုဗီယက်လက်ထက်က အလွန်ဖိနှိပ်ခံရပြီး ၁၉၄၀ ပြည့်နှစ်တွေမှာ အာရှအလယ်ပိုင်းနိုင်ငံတွေကို နှင်ထုတ်ခံခဲ့ရပါတယ်။ 

    အူမာရော့ဗ်ရဲ့ မိဘတွေက ဒီလိုဖိနှိပ်နှင်ထုတ်မှုကြောင့် ဥဇဘက်ကစ္စတန်ကို ရောက်ခဲ့ရတာပါ။ 

    ပါရှန်ပင်လယ်ကွေ့နိုင်ငံတွေ၊ တူရကီတို့နဲ့ သံတမန်ရေး၊ စီးပွားရေး အဆက်အသွယ် ပိုမိုကောင်းမွန်အောင် ဆောင်ရွက်ရာမှာ သူ တာတာလူမျိုးဖြစ်နေမှုက အားတစ်ခုဖြစ်ခဲ့တယ်လို့ အူမာရော့ဗ်က ဆိုပါတယ်။ 

    “ယူကရိန်းမွတ်စလင်တွေဟာ ယူကရိန်းလွတ်လပ်ရေးနဲ့ အချုပ်အခြာအာဏာအတွက် တိုက်ပွဲ၀င်နေကြတယ်ဆိုတာ ကျွန်တော်တို့ ပြသနိုင်ခဲ့ပါတယ်။ ရုရှားရဲ့ ၀ါဒဖြန့်မှုတွေသာ ကြားနေရတဲ့ အိုအိုင်စီနိုင်ငံတွေမှာ ဒါက သူတို့နှလုံးသားကို ထိစေတဲ့အချက် ဖြစ်ခဲ့ပါတယ်” လို့ Forbes သတင်းဌာနနဲ့ အင်တာဗျူးမှာ သူက ပြောကြားခဲ့ပါတယ်။  

    ဆိုဗီယက်ပြည်ထောင်စု ပြိုကွဲသွားပြီးနောက် ၁၉၉၁ ခုနှစ်မှာ အူမာရော့ဗ်မိသားစုဟာ ခရိုင်းမီးယားကို ပြန်လာခဲ့ပါတယ်။ ၂၀၁၄ ခုနှစ်အထိ နေထိုင်ခဲ့ပြီး ရုရှားက ကျူးကျော်သိမ်းပိုက်မှုအပြီးမှာတော့ အူမာရော့ဗ်ဟာ ယူကရိန်းပြည်မကို ပြောင်းလာပါတယ်။ 

    “သိမ်းပိုက်ခံ ကျွန်တော်တို့နယ်မြေတွေအားလုံး လွတ်မြောက်တဲ့တစ်နေ့ ခရိုင်းမီးယားကို ကျွန်တော် ပြန်မှာပါ”

    အူမာရော့ဗ်ဟာ ယူကရိန်း၊ တာတာ၊ ရုရှား၊ တူရကီနဲ့ အင်္ဂလိပ်စကားတွေကို ကျွမ်းကျွမ်းကျင်ကျင် ပြောတတ်သူလည်း ဖြစ်ပါတယ်။ 

    အူမာရော့ဗ်ကို ကာကွယ်ရေး၀န်ကြီးသစ် ခန့်အပ်မှုအပေါ် ယူကရိန်း နိုင်ငံရေးနဲ့ စစ်တပ်အသိုင်းအ၀ိုင်း၊ နိုင်ငံတကာအသိုင်းအ၀ိုင်းတွေက ကြိုဆိုကြပါတယ်။ 

    လွတ်လပ်တဲ့ ယူကရိန်း ခြစားမှုတိုက်ဖျက်ရေးအဖွဲ့ အကြီးအကဲ ဗီတာလီ ရှာဘူနင်က အူမာရော့ဗ်ကို ခန့်အပ်မှုဟာ သမ္မတဇယ်လင်စကီးရဲ့ အကောင်းဆုံး ဆုံးဖြတ်ချက်တွေထဲက တစ်ခုလို့ ပြောပါတယ်။ 

    “State Property Fund ဌာနမှာ အူမာရော့ဗ်နဲ့ သူ့အဖွဲ့က မဖြစ်နိုင်တာတွေကို လုပ်ပြခဲ့တာပါ”

    Ref: Washington Post

  • ခေတ်မီ အမေရိကန် တိုက်လေယာဥ်တွေ ရတော့မယ့် ယူကရိန်း

    ခေတ်မီ အမေရိကန် တိုက်လေယာဥ်တွေ ရတော့မယ့် ယူကရိန်း

    သြဂုတ် ၂၀၊ ၂၀၂၃

    M-Media 


    -နယ်သာလန်၊ ဒိန်းမတ်တို့ကနေတစ်ဆင့် ယူကရိန်းဟာ အမေရိကန်ရဲ့ F-16 အဆင့်မြင့်တိုက်လေယာဥ်တွေ ရရှိတော့မှာ ဖြစ်ပါတယ်။ 

    ယူကရိန်းဟာ ရုရှားရဲ့ ကျူးကျော်စစ်ကို ခုခံနေရတာ ၁၈ လကျော် ရှိနေပါပြီ။ F-16 တိုက်လေယာဥ်တွေ ရရှိတာဟာ တန်ပြန်ထိုးစစ် စနေတဲ့ ယူကရိန်းစစ်တပ်ကို ပိုမို အားကောင်းလာစေမှာ ဖြစ်ပါတယ်။

    F-16 တိုက်လေယာဥ်တွေ ယူကရိန်းကို လွှဲပြောင်းပေးဖို့ သဘောတူကြောင်း အမေရိကန်က ထုတ်ပြန်ထားပါတယ်။ 

    ယူကရိန်း တိုက်လေယာဥ်မှူးတွေဟာ ဒီတိုက်လောဥ်တွေကို မောင်းနိုင်ဖို့အတွက် အနည်းဆုံး ၆ လလောက် လေ့ကျင့်ရမှာ ဖြစ်ပါတယ်။ 

    ရုရှားက သိမ်းပိုက်ထားတဲ့ အရှေ့ပိုင်းဒေသတွေအပြင်၊ ရုရှားပြည်မကြီးနဲ့ မော်စကိုမြို့အထိပါ ယူကရိန်းက လက်ရှိမှာ  တိုက်ခိုက်ခိုက်မှုတွေ ပြုလုပ်လာနိုင်ပါတယ်။

    Ref: Defense News