Tag: Ukarine

ဇူလိုင် ၃၁၊ ၂၀၂၃

M-Media 

-ယူကရိန်းငြိမ်းချမ်းရေးအတွက် ကမ္ဘာ့ခေါင်းဆောင်တွေ ပါ၀င်မယ့် ထိပ်သီးအစည်းအ၀ေးကို မကြာခင် ဆော်ဒီအာရေဗျမှာ ကျင်းပသွားဖို့ ရှိနေပါတယ်။ 

ဒီအစည်းအ၀ေးကို ယူကရိန်း၀န်ကြီးချုပ် ဇယ်လင်စကီးက စီစဥ်တာပါ။ ဇယ်လင်စကီးရဲ့လက်ထောက် အန်ဒရီ ယာမက်က အစည်းအ၀ေးမှာ ကမ္ဘာ့နိုင်ငံတော်တော်များများက ခေါင်းဆောင်တွေ ပါ၀င်မယ်လို့ မနေ့က ထုတ်ပြန်ပါတယ်။ 

သြဂုတ် ၅ ရက် ဒါမှမဟုတ် ၆ ရက်နေ့က ဂျစ်ဒါမြို့မှာ ကျင်းပဖို့ စီစဥ်နေကာ နိုင်ငံပေါင်း ၃၀ လောက် တက်ရောက်မယ်လို့ သတင်းတွေ ထွက်နေပါတယ်။ 

အစည်းအ၀ေးမှာ ဆွေးနွေးမယ့် အခြေခံအချက် ၁၀ ချက်ကို ဇယ်လင်စကီးက အဆိုပြုထားပါတယ်။ ယူကရိန်းရဲ့ နယ်မြေပိုင်ဆိုခွင့်ကို ထိန်းသိမ်းရေး၊ ရုရှားတပ်တွေ ထွက်ခွာရေး၊ အကျဥ်းသားအားလုံး ပြန်လွှတ်ရေး၊ ကျူးကျော်မှုအတွက် တာ၀န်ရှိသူတွေကို အရေးယူရေး၊ ယူကရိန်းရဲ့ လုံခြုံရေးကို အာမခံပေးရေး စတာတွေ ပါ၀င်ပါတယ်။ 

လက်ရှိ ယူကရိန်းက ကြုံတွေ့နေရတဲ့ ပြဿနာကို ဖြေရှင်းရေးသာမက နောက်ထပ် ဒီလိုပြဿနာမျိုး ကမ္ဘာကြီးမှာ မဖြစ်ပွားနိုင်ရေး ဒီအစည်းအ၀ေးက အုတ်မြစ်ချနိုင်ဖို့ ယူကရိန်းက မျှော်လင့်နေပါတယ်။ 

ဒီအစည်းအ၀ေးမှာ ရုရှားနိုင်ငံကို ဖိတ်ကြားမှာမဟုတ်ဘူးလို့လည်း သတင်းပြန့်နေပါတယ်။ 

အိမ်ရှင်အဖြစ်ဆောင်ရွက်မယ့် ဆော်ဒီအာရေဗျဘက်ကတော့ ဘာမှ မထုတ်ပြန်သေးပါဘူး။ 

Ref: Reuters 

မေ ၁၉၊ ၂၀၂၃

M-Media 

-ရုရှားရဲ့ ကျူးကျော်မှုကို ခံနေရတဲ့ ယူကရိန်းသမ္မတ ဗိုလိုဒီမာ ဇယ်လင်စကီးဟာ ဆော်ဒီအာရေဗျကို ဒီကနေ့မှာ ရုတ်တရက် ရောက်ရှိလာပါတယ်။ 

ဒါဟာ သူ့ရဲ့ ပထမဆုံး ဆော်ဒီခရီးစဥ်ဖြစ်ပြီး နှစ်နိုင်ငံဆက်ဆံရေး၊ ယူကရိန်းနဲ့ အာရပ်ကမ္ဘာအကြား ဆက်ဆံရေး တိုးမြှင့်ဖို့ ဖြစ်တယ်လို့ ဇယ်လင်စကီးက သူ့ရဲ့ Twitter စာမျက်နှာမှာ ရေးသားခဲ့ပါတယ်။ 

ဆော်ဒီမှာ အာရပ်လိဂ် ထိပ်သီးအစည်းအ၀ေး ကျင်းပနေတာ ဖြစ်ပါတယ်။ 

ရုရှားသိမ်းထားတဲ့ ခရိုင်းမီးယားက နိုင်ငံရေးအကျဥ်းသားတွေ ကိစ္စ၊ ယူကရိန်းပြည်သူတွေ နေရပ်ပြန်နိုင်ရေး၊ စွမ်းအင်ဆိုင်ရာ ပူးပေါင်းဆောင်ရွက်ရေး ကိစ္စတွေ ဆွေးနွေးသွားမယ်လို့ ဇယ်လင်စကီးက ဆိုပါတယ်။ 

ယူကရိန်းအရေးမှာ ဆော်ဒီက အရေးပါတဲ့ အခန်းကဏ္ဍကနေ ပါ၀င်ကူညီပေးနေပြီး၊ နှစ်နိုင်ငံဆက်ဆံရေး နောက်တစ်ဆင့်မြှင့်ဖို့ အဆင်သင့်ရှိနေတယ်လို့လည့် ထည့်သွင်းရေးသားခဲ့ပါတယ်။ 

ဆော်ဒီဟာ ရုရှားနဲ့ ကောင်းမွန်တဲ့ ဆက်ဆံရေး ရှိပြီး ယူကရိန်းသုံ့ပန်းတွေ လွတ်မြောက်ရေး၊ ယူကရိန်းက လယ်ယာထွက်ကုန်တွေ ပြည်ပတင်ပို့နိုင်ရေး စတာတွေအတွက် ကြား၀င်ကူညီပေးထားပါတယ်။ 

ဒါ့အပြင် အတိဒုက္ခရောက်နေတဲ့ ယူကရိန်းပြည်သူတွေအတွက် ကန်ဒေါ်လာ သန်း ၄၀၀ ဖိုးထက်မနည်း လှူဒါန်းထားပါတယ်။ 

Ref: Aljazeera 

ဖေဖော်၀ါရီ ၁၊ ၂၀၂၃

M-Media 

-အမေရိကန်ဟာ ယူကရိန်းကို ကန်ဒေါ်လာ သန်း ၂ ထောင်ကျော်ဖိုးရှိမယ့် စစ်ရေးအကူအညီ ထပ်ပေးဖို့ ရှိနေပြီး အရင်က မပေးခဲ့ဖူးတဲ့ တာ၀ေးပစ်ဒုံးကျည်နစ်တွေ ပါ၀င်မှာ ဖြစ်ပါတယ်။ 

ဒီအကူအညီကို အခုတစ်ပတ်အတွင်း သမ္မတက လူသိရှင်ကြားထုတ်ပြန်သွားမယ်လို့ အမေရိကန်အစိုးရ တာ၀န်ရှိသူတွေက ပြောပါတယ်။ 

ပေးပို့မယ့် လက်နက်တွေမှာ နာမည်ကျော် ပက်ထရီယော့ ဒုံးခွင်းစနစ် အစိတ်အပိုင်းတွေ၊ ပဲ့ထိန်းဒုံးကျည်တွေ၊ ရုရှားတင့်ကားတွေကို အထိနာစေခဲ့တဲ့ ဂျာဗလင်တင့်ဖျက်ဒုံးတွေ ပါ၀င်မှာပါ။ 

ကီလိုမီတာ ၁၅၀ (၉၄ မိုင်) အထိ ပစ်ခတ်နိုင်မယ့် GLSDB ဒုံးကျည်စနစ် အခုတစ်ခေါက်ပေးပို့မှုမှာ ပါ၀င်လာမှာဖြစ်ပြီး ရုရှားရဲ့ နောက်တန်းအထိ ပစ်ခတ်နိုင်မယ့် လက်နက်မျိုး ဖြစ်ပါတယ်။ အရင်က ဒီလိုလက်နက်မျိုး အမေရိကန်က မထောက်ပံ့ဖူးပါဘူး။ 

အခုကူညီမှုကို အမေရိကန်အစိုးရက ဖွဲ့စည်းထားတဲ့ ယူကရိန်းကူညီရေးအဖွဲ့ (USAI) က ဦးဆောင်ပြုလုပ်တာပါ။ ဒီအဖွဲ့ဟာ အမေရိကန်စစ်တပ်မှာ ရှိနေတဲ့ လက်နက်တွေထက် ပြင်ပက လက်နက်တွေကို ၀ယ်ပေးတာဖြစ်ပါတယ်။

အခုတစ်ခေါက်ကူညီမှုမှာ စစ်မြေပြင်ဆေးရုံ ၃ ရုံ တည်ဆောက်နိုင်မယ့် ဆေး၀ါးပစ္စည်းအစုံအလင်လည်း ပါ၀င်မှာဖြစ်ပါတယ်။

ပြီးခဲ့တဲ့နှစ် ဖေဖော်၀ါရီ ၂၄ ရက်နေ့ ရုရှားက ကျူးကျော်တိုက်ခိုက်ပြီးနောက်ပိုင်း အမေရိကန်က ရုရှားထံ ပေးပို့ခဲ့တဲ့ စစ်ရေးအကူအညီဟာ ကန်ဒေါ်လာ ၂၇.၂ ဘီလီယံဖိုး ရှိပြီဖြစ်ပါတယ်။ 

Ref: Reuters 

ဇန်န၀ါရီ ၄၊ ၂၀၂၃

M-Media 

-ရုရှားက ကျူးကျော်သိမ်းပိုက်ထားတဲ့ Donetsk ဒေသ မာကစ်ဗ်ကာမြို့က စစ်စခန်းတစ်ခုကို တိုက်ခိုက်မှုမှာ ရုရှားစစ်သား ၄၀၀ သေဆုံးခဲ့တယ်လို့ ယူကရိန်းဖက်က ထုတ်ပြန်ပါတယ်။ 

တိုက်ခိုက်မှုဟာ ဇန်န၀ါရီ ၁ ရက်နေ့က ဖြစ်ပွားခဲ့တာဖြစ်ပြီး ရုရှားဖက်ကလည်း ဒီကိစ္စကို အတည်ပြုပါတယ်။ ဒါပေမယ့် သေဆုံးသူက ၈၉ ဦးရှိတယ်လို့ ရုရှားကဆိုပြီး ယူကရိန်းရဲ့ တိုက်ခိုက်မှုကြောင့် ထိခိုက်သေဆုံးမှုကို ရုရှားက ၀န်ခံရာမှာ အများဆုံးပမာဏလည်း ဖြစ်ပါတယ်။ 

ဒုံးကျည် ၆ လုံး ပစ်ခတ်ခဲ့တာဖြစ်ပြီး စစ်သားတွေဟာ ဖုန်းသုံးနေတဲ့အတွက် တည်နေရာကို ယူကရိန်းဖက်က အလွယ်ကူ ရှာဖွေနိုင်တယ်လို့ ရုရှားက ဆိုပါတယ်။ ရှေ့တန်းမှာ စစ်သားတွေ ဖုန်းမသုံးဖို့ ရုရှားစစ်တပ်က အမိန့်ထုတ်ထားတာပါ။ 

အခု အဖြစ်အပျက်မှာ ဒီအမိန့် ချိုးဖောက်သူတွေကို အရေးယူဖို့ ရုရှားက စီစဥ်နေပါတယ်။  

သေဆုံးသူတွေထဲမှာ ထိပ်တန်းတပ်မှူးတစ်ချို့ ပါ၀င်တယ်လို့လည်း သတင်းတွေ ထွက်လာပါတယ်။ 

အမေရိကန်က ထောက်ပံ့ပေးထားတဲ့ Himars ဒုံးကျည်စနစ်နဲ့ ယူကရိန်းရဲ့ ဒီတိုက်ခိုက်မှုမှာ စစ်စခန်းအပြင် ဘေးနားက စစ်လက်နက်သိုလှောင်ရုံလည်း လုံး၀ ပျက်ဆီးသွားပါတယ်။ 

Ref: BBC

ဒီဇင်ဘာ ၂၁၊ ၂၀၂၂

M-Media 

-ရုရှားရဲ့ လေကြောင်းက တိုက်ခိုက်မှုဒဏ်ကို အကြီးအကျယ် ခံစားနေရတဲ့ ယူကရိန်းကို အဆင့်မြင့် ပက်ထရီယော့ ဒုံးခွင်းစနစ်တွေ ထောက်ပံ့တော့မယ်လို့ အမေရိကန်က ထုတ်ပြန်ကြေငြာပါတယ်။ 

ဒါဟာ ရုရှားရဲ့ ယူကရိန်းကျူးကျော်စစ်မှာ အပြောင်းအလဲ ကြီးကြီးမားမား ဖြစ်လာနိုင်တဲ့ လမ်းစလည်း ဖြစ်ပါတယ်။ 

ယူကရိန်းကို ကန်ဒေါ်လာ ၁.၈ ဘီလီယံဖိုးရှိမယ့် လက်နက်တွေ ထပ်မံထောက်ပံ့ဖို့ စီစဥ်နေတယ်လို့ အမေရိကန်အစိုးရ တာ၀န်ရှိသူတစ်ဦးက ဒီနေ့မှာ ထုတ်ဖော်ပြောဆိုခဲ့ပါတယ်။ 

အဲဒီထောက်ပံ့မှုမှာ နာမည်ကျော် အဆင့်မြင့် ပက်ထရီယော့ ဒုံးခွင်းစနစ် ပါ၀င်လာမှာပါ။ 

ရုရှားဟာ ပြီးခဲ့တဲ့ သီတင်းပတ်အနည်းငယ်ကစပြီး ယူကရိန်းကို လေကြောင်းက တိုက်ခိုက်မှု တိုးမြှင့်လုပ်ဆောင်ခဲ့ပြီး လျှပ်စစ်ဓာတ်အားပေးစက်ရုံ၊ အဓိကလမ်းမကြီး စတဲ့ အရေးပါတဲ့ အခြေခံ အဆောက်အဦးတွေကို ပစ်မှတ်ထားတာ ဖြစ်ပါတယ်။ 

ယူကရိန်းသမ္မတ ဇယ်လင်စကီးဟာ ၀ါရှင်တန်ကို သွားရောက်ကာ ကန်သမ္မတ ဂျိုးဘိုင်ဒန်နဲ့ တွေ့ဆုံဖို့ရှိတယ်လို့ သတင်းတွေ ထွက်နေပါတယ်။ 

ပက်ထရီယော့ ဒုံးခွင်းစနစ်ဟာ အကွာအ၀ေး ၇၀ ကီလိုမီတာ (၄၃ မိုင်) လောက်အထိ ခြေရာခံကာ အမြင့် ၂၄ ကီလိုမီတာ (၁၅ မိုင်) မှာရှိတဲ့ ဒုံးကျည်တွေ၊ လေယာဥ်တွေ၊ ဒရုန်းတွေကို တိတိကျကျဖျက်ဆီးနိုင်စွမ်း ရှိပါတယ်။ 

အမေရိကန်နဲ့ အနောက်နိုင်ငံတွေက လက်နက်ထောက်ပံ့မှုကြောင့် ရုရှားဟာ ယူကရိန်းကျူးကျော်စစ်မှာ ထိထိရောက်ရောက် တိုက်ခိုက်နိုင်ခြင်း မရှိတော့ဘဲ သိမ်းယူထားတဲ့ နယ်မြေတစ်ချို့ကို စွန့်လွှတ်ရတဲ့အထိ ဖြစ်ခဲ့ပါတယ်။ 

Ref: Reuters