Tag: Ukarine

ဒီဇင်ဘာ ၂၊ ၂၀၂၂

M-Media

-သမ္မတပူတင်ဟာ ယူကရိန်းစစ်ပွဲရပ်စဲရေး ဆွေးနွေးဖို့ လမ်းဖွင့်ထားတယ်လို့ ရုရှားသမ္မတရုံး ပြောရေးဆိုခွင့်ရှိသူ ဒီမီထရီ ပက်စ်ကော့ဗ်က ပြောပါတယ်။ 

ဒါပေမယ့် ယူကရိန်းထံက သိမ်းပိုက်ထားတဲ့ ဒေသ ၄ ခုကို ရုရှားရဲ့ ပိုင်နက်အဖြစ် လက်ခံပေးရမယ်လို့ ဆိုပါတယ်။ 

အမေရိကန်သမ္မတ ဂျိုးဘိုင်ဒန်က ပူတင်အနေနဲ့ စစ်ပွဲရပ်ရေး ဆွေးနွေးချင်တယ်ဆိုရင် ဆွေးနွေးဖို့အသင့်ပဲလို့ ကြာသာပတေးနေ့က ပြောကြားထားတာပါ။ 

ဒီကနေ့ပြုလုပ်တဲ့ သတင်းစာရှင်းလင်းပွဲမှာ ပက်စ်ကော့ဗ်က သမ္မတပူတင်ဟာ ရုရှားရဲ့ အကျိုးစီးပွားကို မထိခိုက်စေတဲ့ ဆွေးနွေးမှုမျိုးကို အရင်ကတည်းက အခုအချိန်အထိ လမ်းဖွင့်ထားတယ်လို့ ဘိုင်ဒန်ရဲ့ မှတ်ချက်ကို တုန့်ပြန် ပြောဆိုခဲ့ပါတယ်။ 

ရုရှားဟာ ယူကရိန်းဒေသ ၄ ခုဖြစ်တဲ့ Donetsk၊ Luhansk၊ Kherson နဲ့  Zaporizhia တွေကို သိမ်းပိုက်ပြီး စက်တင်ဘာလမှာ အတုအယောင် ပြည်သူ့ဆန္ဒခံယူပွဲလုပ်ကာ ပိုက်နက်ထဲ သွတ်သွင်းခဲ့တာ ဖြစ်ပါတယ်။

Ref: Aljazeera

အောက်တိုဘာ ၃၊ ၂၀၂၂
M-Media

-နိုင်ငံအရှေ့ပိုင်း Donetsk ဒေသက မဟာဗျူဟာကျတဲ့ လီမန်မြို့ကို ယူကရိန်းတပ်ဖွဲ့တွေက ရုရှားလက်ထဲကနေ ပြန်လည် သိမ်းပိုက်နိုင်ခဲ့ပါတယ်။

လီမန်ဟာ ရုရှားရဲ့ထောက်ပို့လမ်းကြောင်းအတွက် အလွန်အရေးပါတဲ့ မြို့တစ်ခုပါ။ ယူကရိန်းတပ်ဖွဲ့တွေဟာ စနေနေ့က မြို့ကို ၀ိုင်းထားလိုက်ပြီး ရုရှားတပ်တွေ ဆုတ်ခွာသွားတဲ့ တနင်္ဂနွေနေ့မှာ ပြန်သိမ်းနိုင်ခဲ့ပါတယ်။

Donetsk အနောက်ခြမ်း Kharkiv ဒေသက အဓိကမြို့တွေကို ယူကရိန်းတပ်ဖွဲ့တွေက ပြီးခဲ့တဲ့လမှာ ပြန်လည်သိမ်းယူနိုင်ခဲ့ပြီး အခုတစ်ကြိမ် နောက်ထပ် အောင်ပွဲတစ်ခု ထပ်မံ ရရှိတာဖြစ်ပါတယ်။

ယူကရိန်းတပ်တွေဟာ Donetsk အရှေ့ခြမ်းက Luhansk ဒေသကို တန်ပြန်ထိုးစစ်ဆင်ဖို့လည်း ရှိနေပါတယ်။

Donetsk နဲ့ Luhansk ဒေသ နှစ်ခုစလုံးဟာ ရုရှားပိုင်နက်တွေဖြစ်တယ်လို့ သမ္မတပူတင်က ပြီးခဲ့တဲ့တစ်ပတ်မှာပဲ ကြေငြာခဲ့ပါတယ်။

Ref: Reuters

စက်တင်ဘာ ၂၉၊ ၂၀၂၂
M-Media

-ရုရှားက သိမ်းပိုက်ထားတဲ့ ယူကရိန်းအရှေ့ပိုင်းက ဒေသ ၄ ခုမှာ ရုရှားနိုင်ငံထဲ ၀င်ရောက်ရေး ပြည်သူဆန္ဒခံယူပွဲ ပြီးဆုံးသွားပြီဖြစ်ပါတယ်။

၅ ရက်တာ ကြာမြင့်ခဲ့တဲ့ အဲဒီပြည်သူ့ဆန္ဒခံယူပွဲမှာ စစ်သားတွေက တစ်အိမ်တက်ဆင်း မဲဆန္ဒ လိုက်လံကောက်ခံခဲ့တာပါ။

ယူကရိန်းပိုက်နက်ရဲ့ ၁၅ ရာခိုင်နှုန်းလောက်ရှိတဲ့ ဒေသလေးခုအတွင်း ရုရှားနဲ့ ပူးပေါင်းလိုတဲ့ မဲဆန္ဒရှင်အရေအတွက်ဟာ ၈၇ ရာခိုင်နှုန်းကနေ ၉၉ ရာခိုင်နှုန်းအထိ ရှိတယ်လို ရုရှားက ခန့်အပ်ထားတဲ့ အုပ်ချုပ်ရေးအဖွဲ့က ထုတ်ပြန်ပါတယ်။

ယူကရိန်းနဲ့ အနောက်နိုင်ငံတွေက ဒီပြည်သူ့ဆန္ဒခံယူပွဲဟာ ခြိမ်းခြောက်ပြီး မဲထည့်ခိုင်းတဲ့ တရားမ၀င်တဲ့ ဟန်ပြလုပ်ရပ်သာဖြစ်တယ်လို့ တုန့်ပြန်ပြောဆိုထားပါတယ်။

ဆန္ဒခံယူပွဲလုပ်ခဲ့တဲ့ဒေသတွေက ရုရှားလိုလားသူ ခေါင်းဆောင်တွေဟာ သူတို့ဒေသကို ရုရှားပိုင်နက်အဖြစ် ကြေငြာပေးဖို့ ရုရှားသမ္မတ ဗလာဒီမီရ်ပူတင်ကို တောင်းဆိုထားပြီး မကြာခင်မှာ မော်စကိုသွားကာ အပြီးသတ်ကိစ္စတွေ ဆောင်ရွက်ဖို့ ရှိနေပါတယ်။

သမ္မတပူတင်ရဲ့ အကြံပေး မီခေလို ပိုလ်ဒိုယက်က မိမိတို့ရဲ့ပိုင်နက်ကို စစ်ရေးနည်းလမ်းနဲ့ လွတ်မြောက်စေလိုက်တာလို့ ကင်ပွန်းတပ်ပါတယ်။

ရုရှားထိပ်တန်းခေါင်းဆောင်တွေက ယူကရိန်းအရှေ့ခြိမ်းဒေသတွေ ရုရှားပိုင်နက်ထဲရောက်လာရင် ကာကွယ်နိုင်ရေး နျူလက်နက်အသုံးပြုဖို့ ၀န်လေးနေမှာ မဟုတ်ဘူးလို့ ပြီးခဲ့တဲ့တစ်ပတ်မှာ ပြောကြားထားပါတယ်။

Ref: Reuters

စက်တင်ဘာ ၁၆၊ ၂၀၂၂
M-Media

-ရုရှားလက်ထဲကနေ ပြန်သိမ်းနိုင်ခဲ့တဲ့ Izyum မြို့ မှာ လူ ၄၀၀ လောက် အစုလုံအပြုံလိုက် မြှုပ်နှံထားတဲ့ နေရာတစ်ခုကို တွေ့ရှိခဲ့ပြီး သေဆုံးသူတွေဟာ အရပ်သားတွေလားဆိုတာ သိရဖို့ အလောင်းဖော် စစ်ဆေးမှုတွေ လုပ်ဆောင်နေပါတယ်။

ယူကရိန်းစစ်တပ်ရဲ့ လျှက်တစ်ပြတ် တန်ပြန်ထိုးစစ်မှာ နိုင်ငံအရှေ့ပိုင်း အဓိကကျတဲ့ မြို့တစ်ချို့ကို အခုတစ်ပတ်အစောပိုင်းမှာ ပြန်သိမ်းနိုင်ခဲ့ပါတယ်။ အဲဒီအထဲမှာ Izyum မြို့က ရုရှားတပ်တွေ ထောက်ပို့လမ်းကြောင်းအတွက် အချက်အခြာကျတဲ့ ဒေသပါ။

မြို့ပြင် တောအုပ်မှာတွေ့ရတဲ့ အစုလိုက်အပြုံလိုက် မြှုပ်နှံထားတဲ့ နေရာမှာ ယူကရိန်းအာဏာပိုင်တွေက အလောင်းတွေ ပြန်ဖော်ပြီး စစ်ဆေးမှုတွေ လုပ်ဆောင်နေပါတယ်။

လတ်တလော စစ်ဆေးမှုတွေအရ အလောင်းအများစုဟာ အရပ်သားတွေဖြစ်တယ်လို့ ယူကရိန်း ရဲတပ်ဖွဲ့အကြီးအကဲက ဒီကနေ့မှာ ပြောကြားခဲ့ပါတယ်။ မြှုပ်နှံထားတဲ့အထဲမှာ စစ်သားအလောင်းတွေ ပါ၀င်နိုင်ပေမယ့် အခုအချိန်အထိ မတွေ့သေးဘူးလို့လည်း သူက ဆိုပါတယ်။

ရုရှားက ကျူးကျော်မှုစတင်တဲ့ ဖေဖော်၀ါရီလမှာတင် Izyum မြို့ကို သိမ်းနိုင်ခဲ့တာပါ။ မြို့တော်ကိဗ်နားက Bucha ဒေသ၊ ရုရှားနဲ့ကပ်နေတဲ့ Mariupol၊ အခု Izyum မှာ ရုရှားတပ်တွေ ပြန်ထွက်သွားတဲ့အချိန် လူတွေ အစုလိုက်အပြုံလိုက် သတ်ဖြတ်မြှုပ်နှံထားတဲ့နေရာတွေကို တွေ့ခဲ့ရပါတယ်။

မနေ့က နေ့စဥ်မိန့်ခွန်းမှာ ယူကရိန်းသမ္မတ ဇယ်လင်စကီးက ရုရှားဟာ ဒီသတ်ဖြတ်မှုတွေအတွက် တာ၀န်ယူရလိမ့်မယ်လို့ ထည့်သွင်းပြောဆိုခဲ့ပါတယ်။

Ref: BBC