Tag: Ukarine

မတ် ၇၊ ၂၀၂၂

M-Media

-ပိုလန်အပါအ၀င် နေတိုးအဖွဲ့၀င် အနည်းဆုံး ၃ နိုင်ငံက ရုရှားလုပ် တိုက်လေယာဥ်တွေ ယူကရိန်းထံ လွှဲပြောင်းပေးနိုင်ရေး အမေရိကန်အစိုးရက စီစဥ်နေပါတယ်။ 

စနေနေ့က အမေရိကန်လွှတ်တော်အမတ် ၃၀၀ လောက်နဲ့ ဖုန်းခေါ်ဆိုမှုအတွင်း ယူကရိန်းသမ္မတ ဗိုလိုဒီမာ ဇယ်လင်စကီးက ယူကရိန်းလေတပ်အတွက် တိုက်လေယာဥ်တွေ ထောက်ပံ့ပေးဖို့ မေတ္တာရပ်ခံခဲ့တာပါ။

ယူကရိန်းလေတပ်သားတွေဟာ ရုရှားတိုက်လေယာဥ်တွေကို ကျွမ်းကျွမ်းကျင်ကျင် မောင်းတတ်တဲ့အတွက် နေတိုးအဖွဲ့၀င် နိုင်ငံတွေမှာရှိတဲ့ တိုက်လေယာဥ်အဟောင်းတွေ ပေးဖို့ တောင်းဆိုခဲ့တာဖြစ်ပါတယ်။ 

ယူကရိန်းကို လေယာဥ်မပျံသန်းရဇုန် သတ်မှတ်ပေးဖို့ တောင်းဆိုတာကို နေတိုးအဖွဲ့က မလိုက်လျောတဲ့အတွက် ရုရှားရဲ့ ကျူးကျော်မှုကို ကာကွယ်ရေး အခုနည်းလမ်းနဲ့ ကူညီပေးသင့်တယ်လို့လည်း ဇယ်လင်စကီးက ထည့်သွင်းပြောဆိုခဲ့ပါတယ်။

အမေရိကန်အစိုးရက နေတိုးအဖွဲ့၀င် ပိုလန်နိုင်ငံနဲ့ ဒီကိစ္စကို ဆွေးနွေးနေပါတယ်။ ပိုလန်က သူတို့မှာရှိတဲ့ ရုရှားလုပ် တိုက်လေယာဥ်တွေကို ယူကရိန်းထံ ပေးပို့ရမှာဖြစ်ပြီး အစားထိုးအနေနဲ့ အမေရိကန်က F16 တိုက်လေယာဥ်တွေ ပြန်ပေးရမှာ ဖြစ်ပါတယ်။ 

အမေရိကန် နိုင်ငံခြားရေး၀န်ကြီး အန်တိုနီ ဘလင်ကန်က နေတိုးအဖွဲ့၀င်နိုင်ငံတစ်ချို့ဟာ ယူကရိန်းထံ တိုက်လေယာဥ်တွေ ပေးပို့ဖို့ သဘောတူထားကြတယ်လို့ တနင်္ဂနွေနေ့မှာ ပြောကြားခဲ့ပါတယ်။

Ref : CBS News 

မတ် ၁၊ ၂၀၂၂
M-Media

-ယူကရိန်းကို ကျူးကျော်မှုမှာ ရုရှားက စစ်အင်အားရဲ့ ၇၅ ရာခိုင်နှုန်းအထိ အသုံးပြုလာတယ်လို့ စစ်ရေးကျွမ်းကျင်သူတွေက သုံးသပ်ပါတယ်။

ရုရှားဟာ ယူကရိန်းကို တိုက်ခိုက်နေတာ ၆ ရက်မြောက်ရှိလာပြီဖြစ်ပါတယ်။ အစပိုင်းက စစ်အင်အားရဲ့ ၄၀ ရာခိုင်နှုန်းကိုသာ ပို့ခဲ့ပေမယ့် အခုအချိန်မှာတော့ ၇၅ ရာခိုင်နှုန်းလောက် အသုံးပြုနေတယ်လို့ အမေရိကန် ကာကွယ်ရေး၀န်ကြီးဌာန ကျွမ်းကျင်သူတွေက သုံးသပ်ပါတယ်။

တိကျမှုအားနည်းပြီး ထိခိုက်မှု ပြင်းထန်တဲ့ grad ဒုံးကျည်တွေ၊ အဆင့်ဆင့် ပေါက်ကွဲတဲ့ cluster ဗုံးတွေကို အသုံးပြုပြီး အရပ်သားတွေနေထိုင်တဲ့နေရာကို ပစ်မှတ်ထားတိုက်ခိုက်နေတယ်လို့ သတင်းတွေ ထွက်နေပါတယ်။ အထူးသဖြင့် ရုရှားထိုးစစ်ကြီးမားတဲ့ ယူကရိန်းအရှေ့မြောက်ပိုင်းက ဒုတိယမြို့တော် ခါကစ်ဗ်မှာပါ။

မြို့တော်ကိဗ်ကို သိမ်းဖို့ ရုရှားက ကြိုးစားနေပေမယ့် ယူကရိန်းတပ်ဖွဲ့တွေက အပြင်းအထန် ခုခံထားနိုင်ပါတယ်။ တင့်ကားတွေ၊ အမြောက်တွေ၊ လက်နက်တပ်ယာဥ်တွေ ပါ၀င်တဲ့ ယာဥ်တန်းရှည်ကြီး တစ်ဖြည်းဖြည်းနဲ့ နီးကပ်လာတဲ့ ပုံတွေကိုလည်း နိုင်ငံတကာ သတင်းမီဒီယာတွေက ဖော်ပြနေကြပါတယ်။

အဂ်ါနေ့က ရုရှားနဲ့ ယူကရိန်းတို့အကြား ဆွေးနွေးမှုတွေ လုပ်ခဲ့ပေမယ့် တိကျတဲ့ ရလဒ်တော့ မရခဲ့ပါဘူး။

Ref: BBC

မတ် ၄၊ ၂၀၂၂
M-Media

-ယူကရိန်းအရှေ့ပိုင်းက ဥရောပရဲ့ အကြီးဆုံး နျူဓာတ်အားပေး စက်ရုံ ‘ဇာဖိုရေးရှား’ ကို ရုရှားတပ်တွေက သိမ်းပိုက်လိုက်ပါတယ်။

ဇာဖိုရေးရှား နျူဓာတ်အားပေးစက်ရုံဟာ သောကြာနေ့က ရုရှားတပ်ဖွဲ့တွေရဲ့ ဗုံးကြဲတိုက်ခိုက်မှုကြောင့် မီးအကြီးအကျယ်လောင်နေပြီး၊ ဥရောပမှာ နောက်ထပ် နျူအန္တရာယ်တစ်ခု ရင်ဆိုင်ရတော့မလားဆိုတဲ့ စိုးရိမ်မှုတွေလည်း မြင့်တက်နေပါတယ်။

ယူကရိန်းသမ္မတ ဇယ်လင်စကီးက ဒီတိုက်ခိုက်မှုဟာ နျူကလီးယား အကြမ်းဖက်မှုဖြစ်တယ်လို့ ရုရှားကို ဝေဖန်ပြစ်တင်ခဲ့ပါတယ်။ ယူကရိန်းမှာ ၁၉၈၆ ခုနှစ်က ချာနိုဘိုင်း နျူဓာတ်အားပေးစက်ရုံ ပေါက်ကွဲကာ ဓာတ်ရောင်ခြည် ယိုစိမ့်မှုဖြစ်ပွားခဲ့ပြီး ကမ္ဘာ့အဆိုးရွားဆုံး နျူပြဿနာတွေထဲက တစ်ခုအဖြစ် မှတ်တမ်းဝင်ခဲ့ပါတယ်။

ဇာဖိုရေးရှား စက်ရုံကို ရုရှားရဲ့ အခုတိုက်ခိုက်မှုဟာ ချာနိုဘိုင်း နျူစက်ရုံပြဿနာထက် ၆ ဆလောက်ကြီးမယ့် အန္တရာယ်မျိုး ဖြစ်တယ်လို့လည်း ယူကရိန်းသမ္မတက ထည့်သွင်းပြောဆိုခဲ့ပါတယ်။

အမေရိကန်၊ နေတိုးအဖွဲ့နဲ့ ကမ္ဘာ့ခေါင်းဆောင်တွေကလည်း ရုရှားကို ပြစ်တင်ရှုတ်ချခဲ့ကြပါတယ်။

တိုက်ခိုက်မှုကြောင့် ဇာဖိုရေးရှားနျူစက်ရုံက ဓာတ်ရောင်ခြည်ယိုစိမ့်မှု မရှိသေးဘူးလို့ နိုင်ငံတကာ အနုမြူစွမ်းအင်အေဂျင်စီ (IAEA) က ထုတ်ပြန်ထားပါတယ်။ ရုရှားတပ်ဖွဲ့တွေဟာ ဇာဖိုရေးရှား နျူဓာတ်အားပေးစက်ရုံကို သောကြာ​နေ့ညပိုင်းမှာ သိမ်းပိုက်လိုက်ပြီး ယူကရိန်းအာဏာပိုင်တွေက ဒါကို အတည်ပြုခဲ့ပါတယ်။

ရုရှားဟာ စွန့်ပစ်ထားတဲ့ ချာနိုဘိုင်း နျူဓာတ်အားပေးစက်ရုံကိုလည်း သိမ်းပိုက်ထားပါတယ်။

Ref: BBC