Tag: US

ဇန်န၀ါရီ ၂၄၊ ၂၀၁၇
M-Media

– နိုင်ငံပေါင်း ၁၂ နိုင်ငံပါဝင်ပြီး ကမ္ဘာ့စီးပွားရေး၏ ၄၀ ရာခိုင်နှုန်းခန့်ရှိသည့် ပစိဖိတ်ဖြတ်ကျော် မိတ်ဖတ်သဘောတူညီချက် (TPP) မှ နှုတ်ထွက်ကြောင်း ဥပဒေကဲ့သို့ အာဏာတည်သောအမိန့်ကို အမေရိကန်သမ္မတ ဒေါ်နယ်ထရမ့်က လက်မှတ်ရေးထိုးလိုက်သည်ဟု သိရသည်။

ယမန်နေ့က လက်မှတ်ထိုးလိုက်ခြင်းဖြစ်ပြီး ရွေးကောက်ပွဲကတိတစ်ခုကို ဖော်ဆောင်လိုက်ခြင်းလည်းဖြစ်သည်။

“ဒီကိစ္စနဲ့ ပတ်သက်ပြီး ကျွန်တော်တို့ ပြောနေတာ ကြာပါပြီ” ဟု ထရမ့်က လက်မှတ်ရေးထိုးပြီးနောက် ပြောကြားခဲ့ပြီး အမေရိကန်အလုပ်သမားများအတွက် ကြီးကျယ်သည့် ဆောင်ရွက်မှုဖြစ်သည်ဟုလည်း ဆိုသည်။

ထို့ပြင် ထရမ့်မှာ စစ်တပ်မှလွဲ၍ အခြားသော အလုပ်အကိုင်များကို ဖက်ဒရယ်အစိုးရက ခန့်အပ်မှုကို ရပ်တန့်သည့် အမိန့်ကိုလည်း လက်မှတ်ရေးထိုးခဲ့ကာ၊ နိုင်ငံခြားတိုင်းပြည်များတွင် ကိုယ်ဝန်ဖျက်ချရေး ဆောင်ရွက်ပေးနေသော သို့မဟုတ် ထိုကိစ္စနှင့်ပတ်သက်၍ အသိပညာပေးနေသော အစိုးရမဟုတ်သည့် အဖွဲ့များ ဖက်ဒရယ်အစိုးရထံမှ ရန်ပုံငွေ ရယူမှုကို ပိတ်ပင်သည့် ညွှန်ကြားချက်ကိုလည်း လက်မှတ်ရေးထိုးခဲ့သည်။

သြစတေးလျ၊ ဘရူးနိုင်း၊ ကနဒါ၊ ချီလီ၊ ဂျပန်၊ မလေးရှား၊ မက္ကဆီကို၊ နယူးဇီလန်၊ ပီရူး၊ စင်ကာပူ၊ အမေရိကန်တို့ ပါဝင်သည့် အဆိုပါ TPP ကုန်သွယ်ရေး သဘောတူညီချက်ကို အိုဘားမားအစိုးရလက်ထက်တွင် ပါဝင်ခဲ့သော်လည်း အမေရိကန်လွှတ်တော်က အတည်မပြုရသေးပေ။

ထို့ပြင် တရုတ်ကို ယှဉ်ပြိုင်ရန် ရည်ရွယ်သည့် အဆိုပါသဘောတူညီချက်မှာ အသက်မ၀င်သေးဘဲ အမေရိကန်၏ နှုတ်ထွက်မှုကြောင့် အကောင်အထည် ပေါ်လာမည့် အခြေအနေ မရှိတော့ပေ။

Ref : Aljazeera

ဇန်န၀ါရီ ၂၁၊ ၂၀၁၇
M-Media

– အမေရိကန်၏ ၄၅ ယောက်မြောက် သမ္မတသစ် ဒေါ်နယ်ထရမ့် ကျမ်းသစ္စာကျိန်ဆိုမှု အခမ်းအနား ကျင်းပနေစဉ် တစ်ချိန်တည်းမှာပင် နိုင်ငံတစ်ဝှမ်းတွင် ထရမ့်ဆန့်ကျင်ရေး ဆန္ဒပြမှုများ ကျယ်ကျယ်ပြန့်ပြန့် ဖြစ်ပွားခဲ့သည်ဟု သိရသည်။

ထရမ့်မှာ မဲဆွယ်စဉ်ကာလအတွင်း မက္ကဆီကန်များ၊ လူမည်းများ၊ မွတ်စလင်များ၊ မသန်စွမ်းသူများနှင့် အမျိုးသမီးများကို ခွဲခြားစော်ကားပြောဆိုမှုများ ပြုလုပ်ခဲ့သည့်အတွက် ဝေဖန်မှုများနှင့် ရင်ဆိုင်ခဲ့ရပြီး၊ ပြိုင်ဘက် ဒီမိုကရက်တစ် သမ္မတလောင်း ဟီလာရီ ကလင်တန်ကိုလည်း ‘ရိုင်းစိုင်းသည့် အမျိုးသမီး’ ဟု ပြောကြားခဲ့သည်။

ယမန်နေ့ ကျမ်းကျိန်ပွဲအခမ်းအနားတွင် ၀ါရှင်တန်မြို့လယ်ကောင်၌ တပ်ဖွဲ့ဝင် ၂၈၀၀၀ ခန့်ဖြင့် လုံခြုံရေးကို တင်းကျပ်စွာ ချထားခဲ့သည်။

သို့သော်လည်း မြို့လယ်ကောင်တွင် လူ ၅၀၀ ခန့်မှာ ထရမ့်ဆန့်ကျင်ရေး ဆန္ဒပြမှု ပြုလုပ်ခဲ့ပြီး ဆန္ဒပြသူများမှာ ဈေးဆိုင်များ၊ ကားမှန်များ ရိုက်ခွဲခြင်းတို့လည်း ရှိခဲ့သည်။ ရဲတပ်ဖွဲ့က ငရုပ်ကောင်း စပရေးများဖြန်းကာ ဆန္ဒပြသူများကို နှိမ်နှင်းခဲ့ပြီး ရဲတပ်ဖွဲ့ ပြောရေးဆိုခွင့်ရှိသူ တစ်ဦးကမူ ဆန္ဒပြသူ ၉၅ ဦးခန့်ကို ဖမ်ဆီးထိန်းသိမ်းခဲ့သည်ဟု ဆိုသည်။

လူအုပ်ကြီးမှာ ‘လူမျိုးရေးခွဲခြားသူတွေကို ကြောက်အောင် ထပ်လုပ်ကြစို့’ ဟုလည်း ကြွေးကြော်ခဲ့ကြသည်။

“ကျွန်တော်ပေးချင်တဲ့ သတင်းစကားက ထရမ့်ဟာ ဒီနိုင်ငံကို ကိုယ်စားမပြုဘူး ဆိုတာပါပဲ။ သူဟာ အရင်းရှင် အကျိုးစီးပွားကိုပဲ ကိုယ်စားပြုပါတယ်” ဟု ငြိမ်းချမ်းစွာ ချီတက်ဆန္ဒပြမှုတွင် ပါဝင်ခဲသည့် အိုင်အိုဝါပြည်နယ်မှ ကက်သလစ် အကူအညီပေးရေး ၀န်ထမ်း ဒက်စ် မိုနက်စ်က ပြောကြားခဲ့သည်။

အိမ်ဖြူတော်နှင့် မနီးမဝေးတွင်လည်း ဆန္ဒပြသူများနှင့် ရဲတပ်ဖွဲ့အကြား ရုန်းရင်းဆန်ခတ်မှု ဖြစ်ပွားခဲ့ပြီး လမ်းဘေးကော်ဖီဆိုင်များမှ ထိုင်ခုံများဖြင့် ပစ်ပေါက်မှုများလည်း ရှိခဲ့သည်။

စောစောပိုင်းက Disrupt J20 ဟုခေါ်သည့် လစ်ဘရယ် တက်ကြွလှုပ်ရှားသူအဖွဲ့က ကျမ်းကျိန်ပွဲအခမ်းအနား ကြည့်ရှုရာ ရင်ပြင်သို့ သွားရောက်သည့် အဓိကလမ်းမရှိ စစ်ဆေးရေးဂိတ်များကို ရည်ရွယ်ချက်ရှိရှိ ပိတ်ဆို့ခဲ့ကြသည်။ နောက်ပိုင်းတွင် ရဲတပ်ဖွဲ့က ၎င်းတို့အား ဖယ်ရှားခဲ့သည်။

Disrupt J20 လှုပ်ရှားမှုကို စီစဉ်သူ ၀ါရှန်တန်မှာ အဲလ်လီ မက်ခရက်ကန်က မိမိတို့အုပ်စုမှာ ထရမ့်က အမျိုးသမီးများ၊ အထောက်အထားမရှိသည့် ပြောင်းရွှေ့အခြေချသူများနှင့် မွတ်စလင်များအပေါ် ခွဲခြားစော်ကားသော မှတ်ချက်များကို ဆန့်ကျင်ခြင်းဖြစ်သည်ဟု ဆိုသည်။

‘အမေရိကကို ကြီးကျယ်အောင်ထပ်လုပ်ပါ’ ဆိုသည့် စားတမ်းများပါဝင်သည့် အင်္ကျီများ၊ ဦးထုပ်များကို ၀င်ဆင်ထားသည့် ထရမ့်ထောက်ခံသူများကလည်း ၀ါရှန်တန်သို့ ချီတက်ခဲ့ကြသည်။

ထရမ့်အား ဆန့်ကျင်သော ဆန္ဒပြမှုနှင့် ထောက်ခံသော ချီတက်မှုတို့မှာ နိုင်ငံတစ်ဝှမ်းတွင် ဖြစ်ပွားခဲ့သည်။

Ref: Aljazeera

ဇန်န၀ါရီ ၁၁၊ ၂၀၁၇
M-Media

– မကြာခင်ရာထူးစွန့်လွှတ်ရတော့မယ့် အမေရိကန်သမ္မတ ဘာရက်အိုဘားမားဟာ သူ့ရဲ့နောက်ဆုံးမိန့်ခွန်းကို ဒုတိယဇာတိဖြစ်တဲ့ ချီကာဂိုမှာ ယမန်နေ့က မျက်ရည်လည်ရွဲနဲ့ ပြောသွားခဲ့ပါတယ်။

၈ နှစ်တာ သမ္မတသက်တမ်းအတွင်း သူ့ရဲ့ အောင်မြင်မှုတွေကို ပြန်လည်အမှတ်ရစေကာ တိုင်းပြည်ညီညွတ်ဖို့ အဓိကထားပြောသွားခဲ့တာဖြစ်ပြီး ရွေးကောက်ပွဲ ဆောင်ပုဒ်ဖြစ်တဲ့ ‘ကျွန်တော်တို့ လုပ်နိုင်တယ်’ ဆိုတာကို ဒီတစ်ခေါက်မှာတော့ ‘ကျွန်တော်တို့ လုပ်နိုင်ခဲ့တယ်’ ဆိုတာနဲ့ အစားထိုးခဲ့ပါတယ်။

အီရန်နဲ့ နျူသဘောတူညီချက် ရရှိခဲ့တာ၊ ကျန်းမာရေးစောင့်ရှောက်မှု ပြုပြင်ပြောင်းလဲရေးအကြောင်းတွေကို အနှစ်ချုပ်ပြောကြားခဲ့ပေမယ့် သူ့ရဲ့ မိန့်ခွန်းအများစုဟာ ဒေါ်နယ်ထရမ့်ရဲ့ အံ့ဖွယ်ရွေးကောက်ပွဲအနိုင်ကြောင့် တုန်လှုပ်ခဲ့ရတဲ့ အမေရိကန်ပြည်သူတွေကို အားပေးတာတွေ ဖြစ်ပါတယ်။

နောက်ပြီး ပြည်သူတွေအနေနဲ့ ထိုင်မနေကြဖို့၊ ဒီမိုကရေစီအတွက် တိုက်ပွဲဝင်ကြဖို့နဲ့ ပြန်လည်စုစည်းကြဖို့လည်း အိုဘားမားက တိုက်တွန်းခဲ့ပါတယ်။

“ကျွန်တော်တို့ အပြင်ပန်း မတူညီမှုတွေရှိနေပေမယ့် စည်းလုံးရမှာပါ။ ဆုံးရှုံးမှု ဒါမှမဟုတ် အောင်မြင်မှုဒဏ်ကို ကျွန်တော်တို့အားလုံး အတူတကွ ခံစားရမှာပါ။ ကျွန်တော်တို့တိုင်းပြည်ရဲ့ ဒီမိုကရေစီ သဘောတရားတွေကို ပြန်လည်တည်ဆောက်ရေး ဆောင်ရွက်ရာမှာ ကျွန်တော်တို့အားလုံးဟာ ပါတီစွဲမထားဘဲ အင်တိုက်အားတိုက် ပါဝင်ဆောင်ရွက်ရပါမယ်”

သမ္မသစ် ဒေါ်နယ်ထရမ့်ဟာ အိုဘားမား ချန်ထားခဲ့တဲ့ ပေါ်လစီတွေကို ဖျက်ပစ်ဖို့ ကြုံးဝါးထားပြီး အိုဘားမားကိုလည်း ပုဂ္ဂိုလ်ရေးအရ တိုက်ခိုက်ခဲ့သူပါ။ အမေရိကန် ထောက်လှမ်းရေးဌာနကတော့ ရွေးကောက်ပွဲမှာ ထရမ့်အနိုင်ရဖို့အတွက် ရုရှားက ကူညီပေးခဲ့တယ်ဆိုပြီး ထူးခြားတဲ့ စွပ်စွဲပြောဆိုမှုလည်း ရှိထားပါတယ်။

အိုဘားမားရဲ့ ဒီမိုကရက်တစ်ပါတီဟာ အိမ်ဖြူတော်၊ အထက်လွှတ်တော်၊ အောက်လွှတ်တော်တို့မှာ နေရာအနည်းစုသာ ရရှိခဲ့ပြီး ရုန်းကန်ရမယ့်အနေအထားမှာ ရှိနေပါတယ်။

အိုဘားမားကတာ့ ဒီမိုကရက်ပါတီ ရှေ့ဆက်ရင်ဆိုင်ရမယ့်ကိစ္စကို အားလုံးနဲ့ဆိုင်တဲ့ စိန်ခေါ်မှုလို့ အိုဘားမားက ကင်ပွန်းတပ်ခဲ့ပါတယ်။

“ကိုယ်ရည်ကိုယ်သွေးပေါ်မှာ ယုံကြည်မှု၊ အာဏာထက် အခွင့်အရေးက အရေးပါဆုံးဖြစ်တယ်ဆိုတဲ့ ခံယူမှု” တွေဟာ ‘စီးပွားပျက်ကပ်ကြီးအတွင်း ဖက်စစ်ဝါဒ၊ မင်းမဲ့ဝါဒရဲ့ သွေးဆေင်မှုကို ခုခံနိုင်စေခဲ့ပြီး အခြားသော ဒီမိုကရေစီနိုင်ငံတွေနဲ့ ဒုတိယကမ္ဘာစစ်အပြီး တည်ငြိမ်မှုကို တည်ဆောက်စေနိုင်ခဲ့တယ်’ လို့လည်း အိုဘားမားက ထည့်သွင်းပြောကြားခဲ့ပါတယ်။

ရုရှားဟာ ထရမ့်အနိုင်ရမှုမှာ ကူညီခဲ့တယ်ဆိုတဲ့ အမေရိကန်တွေရဲ့ ထင်မြင်ယူဆချက်နဲ့ပတ်သက်ပြီး “အခုအချိန်မှာ ဒီကိစ္စဟာ စိန်ခေါ်မှုဖြစ်လာနေပါပြီ။ ပထမတုန်းကတော့ အစ္စလာမ်ကို ကိုယ်စားပြုပါတယ်ဆိုတဲ့ အကြမ်းဖက် အယူသည်းသမားတွေက စိန်ခေါ်မှုဖြစ်ခဲ့ပြီး၊ သိပ်မကြာသေးခင်ကပဲ လွတ်လပ်တဲ့ဈေးကွက်စနစ်၊ ဒီမိုကရေစီစနစ်နဲ့ လူမှုအဖွဲ့အစည်းတွေဟာ သူတို့ရဲ့ အာဏာကို ခြိမ်းခြောက်တဲ့အရာတွေအဖြစ် မှတ်ယူကြတဲ့ နိုင်ငံရပ်ခြား မြို့ကြီးတွေက ရေပေါ်စီလူတန်းစားတွေဟာ စိန်ခေါ်မှု ဖြစ်လို့လာခဲ့ပါပြီ” လို့ ပြောကြားခဲ့ပါတယ်။

“ကျွန်တော်တို့ ဒီမိုကရေစီကို ခြိမ်းခြောက်နေတဲ့ ဒီဘေးအန္တရာယ်တွေက ကားဗုံးခွဲမှုတစ်ခု ဒါမှမဟုတ် ဒုံးကျည်တစ်ခုထက်ကို ပိုထိရောက်ပါတယ်”

ထောက်ခံသူများသို့ နှုတ်ဆက်စကား

အိုဘားမားက ထောက်ခံသူတွေအနေနဲ့ သူ့ရဲ့ အမွေအနှစ်ကို ဆက်လက်ထိန်းသိမ်းထားဖို့၊ အမေရိကန်တွေအားလုံးဟာ တစ်စုတစ်ဖွဲ့တည်းဆိုတာကို မမေ့ဖို့လည်း ပြောကြားခဲ့ပါတယ်။

“မိန့်ခွန်းမှာ သူပေးချင်တဲ့ တာက – အရှုံးမပေးနဲ့ ဆိုတာပါ။ ဒီမှာရောက်နေတဲ့ ပရိတ်သတ်တိုင်းက ထရမ့်ကို သမ္မတအဖြစ် မလိုလားကြပါဘူး။ ဒီထက်ပိုတာက ထရမ့်ဟာ သမ္မနေရာနဲ့ မထိုက်တန်ဘူးလို့ ခံစားရတာပါ။ ဒီမှာ လူတိုင်း ခံစားနေရတာက ကြောက်ရွံ့မှုပါပဲ” လို့ အဲဒီ မိန့်ခွန်းပြောကြားမှုနေရာကို ရောက်ရှိနေတဲ့ အလ်ဂျာဇီးရားသတင်းထောက် ပတ္တီ ကူလဟိန်းက ပြောကြားခဲ့ပါတယ်။

အဲဒီမိန့်ခွန်းမှာ အိုဘားမားရဲ့ဇနီး မီရှဲ အိုဘားမား၊ ဒုတိယသမ္မတ ဂျိုး ဘိုင်ဒန်နဲ့ ဇနီးတို့နဲ့လည်း ပါဝင်ခဲ့ပြီး ဒုတိယသမ္မတဟာ သူ့ရဲ့မိသားစုလည်းဖြစ်တယ်လို့ ပြောကြားခဲ့ပါတယ်။

သူ့ရဲ့မိသားစုကို ချီးကျူးဂုဏ်ပြုတဲ့အချိန်မှာတော့ အိုဘားမားဟာ မျက်ရည်ကျခဲ့ပြီး ဇနီးဖြစ်သူဟာ သူ့ရဲ့ အကောင်းဆုံး သူငယ်ချင်းလို့လည်း ပြောကြားခဲ့ပါတယ်။

“မင်းဟာ မတောင်းဆိုခဲ့တဲ့ နေရာတစ်ခုကို တာဝန်ယူဆောင်ရွက်ခဲ့ရပြီး ကျက်သရေရှိမှု၊ ရဲရင့်မှု၊ စတိုင်ကျမှု၊ ဟာသဉာဏ်ရွှင်ရွှင်မှု ကိုယ်တိုင် အောင်မြင်အောင် ဆောင်ရွက်နိုင်ခဲ့ပါတယ်။ မင်းဟာ စံနမူနာယူစရာဖြစ်တာကြောင့် မျိုးဆက်သစ်တွေဟာ မင်းကိုကြည့်ပြီး မြင့်မြင့်မားမား မျှော်မှန်းကြမှာပါ။ မင်းဟာ ကိုယ့်ကို ဂုဏ်တက်စေခဲ့သလို၊ တိုင်းပြည်ကိုလည်း ဂုဏ်တက်စေခဲ့ပါတယ်” လို့ အိုဘားမားက သူ့ဇနီးကို ရည်ညွှန်းပြီး ပြောကြားခဲ့ပါတယ်။

Quinnipiac တက္ကသိုလ်ရဲ့ စစ်တမ်းကောက်ယူမှုအရ ပြည်သူ ၅၅ ရာခိုင်နှုန်းက အိုဘားမားကို လက်ခံနေဆဲဖြစ်ပြီး ထရမ့်ဟာ ဆိုးဆိုးဝါးဝါးအလုပ်တွေလုပ်မယ်လို့ ၅၁ ရာခိုင်နှုန်းက ထင်မှတ်နေကြပါတယ်။

Ref: Aljazeera