Tag: US

နို၀င်ဘာ ၁၆၊ ၂၀၂၂

M-Media 

-၂၀၂၄ ခုနှစ်မှာ သမ္မတအဖြစ် ပြန်လာမယ်လို့ အမေရိကန်သမ္မတဟောင်း ဒေါ်နယ်ထရမ့်က ပြောကြားလိုက်ပါတယ်။

ရွေးကောက်ပွဲကော်မရှင်မှာ သမ္မတအဖြစ် ၀င်ရောက်ယှဥ်ပြိုင်ဖို့ မနေ့က စာရင်းသွင်းခဲ့ပြီး ညပိုင်းမှာ ဖလော်ရီဒါက သူပိုင်တဲ့ Mar-a-Lago ကလပ်မှာ ဟောပြောပွဲလုပ်ခဲ့ပါတယ်။ 

သမ္မတဂျိုးဘိုင်ဒန်လက်ထက်မှာ တိုင်းပြည်ဟာ အဖက်ဖက်က ကျဆင်းနေပြီး၊ ပြီးခဲ့တဲ့ ၂ နှစ်အတွင်း သန်းနဲ့ချီတဲ့ အမေရိကန်ပြည်သူတွေ ဆင်းရဲဒုက္ခ ခံစားနေရတယ်လို့ ထရမ့်က ပြောပါတယ်။ 

“အမေရိကကို ကြီးကျယ်မြင့်မြတ်အောင် ပြန်လုပ်ဖို့အတွက် သမ္မတအဖြစ် ၀င်ရောက်ယှဥ်ပြိုင်မှာဖြစ်ကြောင်း ကျွန်တော် ကြေငြာလိုပါတယ်”

နာရီ၀က်ကြာမြင့်တဲ့ သူ့ရဲ့ ဟောပြောပွဲမှာ ဘိုင်ဒန်အစိုးရလက်ထက် နယ်စပ်လုံခြုံရေး လျော့ရဲပြီး၊ စွမ်းအင် မလုံလောက်မှုတွေရှိလာကာ၊ ရာဇ၀တ်မှုတွေ ထူပြောလာတယ်လို့ ထရမ့်က ပြစ်တင်ပြောဆိုခဲ့ပါတယ်။

ပြီးခဲ့တဲ့တစ်ပတ် သက်တမ်း၀က်ရွေးကောက်ပွဲမှာ ရီပက်ဘလစ်ကန်ပါတီ ကိုယ်စားလှယ်လောင်းတွေ အခြေအနေမကောင်းခဲ့ဘဲ ပါတီတာ၀န်ရှိသူတွေက ထရမ့်ရဲ့ လုပ်ရပ်တွေကြောင့် ပါတီရဲ့ပုံရိပ် ကျဆင်းသွားတဲ့အတွက် ဒီလိုဖြစ်တာလို့ ၀ေဖန်ခဲ့ကြပါတယ်။

အင်ဒိုနီးရှားနိုင်ငံ ဘာလီမြို့မှာ G20 အစည်းအ၀ေး တက်ရောက်နေတဲ့ သမ္မတ ဂျိုးဘိုင်ဒန်ကလည်း ၂၀၂၄ ခုနှစ် သမ္မတရွေးကောက်ပွဲကို ထပ်မံ ၀င်ရောက်ယှဥ်ပြိုင်သွားမယ်လို့ မနေ့က ကြေငြာခဲ့ပါတယ်။

Ref: BBC 

အောက်တိုဘာ ၂၈၊ ၂၀၂၂

M-Media 

-ထိပ်တန်း ဆိုရှယ်မီဒီယာကုမ္ပဏီ Twitter ကို ၀ယ်ယူပြီးပြီးချင်းမှာပဲ အီလွန်မက်စ်ဟာ စီအီးအို ပရဂ် အဂ်ရာ၀ါလ်နဲ့ အခြား အမှုဆောင်အရာရှိ နှစ်ဦးကို ရာထူးကနေ ထုတ်ပယ်လိုက်ပါတယ်။ 

Twitter ကို ၀ယ်ဖို့ ဧပြီလမှာ အီလွန်မက်စ်က ကမ်းလှမ်းခဲ့ပြီး ကနဦး ဆွေးနွေးမှုတွေ လုပ်ခဲ့ကြပါတယ်။ ဒါပေမယ့် နောက်ပိုင်းမှာ ဒီအရောင်းအ၀ယ် ပျက်သွားပြီဆိုတဲ့ သတင်းမျိုး ထွက်ပေါ်လာခဲ့ပြီး Twitter ဘက်က တရားစွဲဆိုမှုတွေတောင် လုပ်ခဲ့ပါတယ်။

အခုတော့ ကန်ဒေါ်လာ ၄၄ ဘီလီယံနဲ့ ၀ယ်ယူပြီးသွားပြီလို့ ဒီကိစ္စကို သိရှိသူတွေက မီဒီယာတွေကို ပြောကြားခဲ့ပါတယ်။

မနေ့က စီအီးအို အဂ်ရာ၀ါလ်နဲ့အတူ အထုတ်ခံလိုက်ရသူ နှစ်ဦးက ကုမ္ပဏီ ဘဏ္ဍာရေးဆိုင်ရာ အကြီးအကဲ နဒ်ဆီဂါလ်နဲ့ မူ၀ါဒရေးရာ အကြီးအကဲ ဗီဂျာယာ ဂဒ်ဒီတို့ ဖြစ်ပါတယ်။ 

လွတ်လပ်စွာပြောဆိုခွင့်ကို မြှင့်တင်နိုင်ဖို့အတွက် Twitter ရဲ့ ပို့စ်တင်မှုဆိုင်ရာ စည်းမျဥ်းစည်းကမ်းတွေကို ပြန်လည်သုံးသပ်မယ်လို့ အီလွန်မက်စ်က ပြောကြားဖူးပါတယ်။ 

ကုမ္ပဏီကို ပိုင်ဆိုင်ပြီးပြီးချင်းမှာ အရေးပါသူတွေကို ထုတ်ပယ်လိုက်မှုကြောင့် အီလွန်မက်စ်ရဲ့ Twitter နဲ့ပတ်သက်တဲ့ မူ၀ါဒတွေကို ကျွမ်းကျင်သူတွေက စောင့်ကြည့်လာကြပါတယ်။ 

Ref: CNN

အောက်တိုဘာ ၂၃၊ ၂၀၂၂

M-Media 

-အမေရိကန်ပြည်ထောင်စု မစ္စစီပီ နေ့ကလေးထိန်းကျောင်းက ဆရာမ ၅ ဦးဟာ ကလေးငယ်တွေအပေါ် ညှင်းပမ်းမှုနဲ့ တရားစွဲဆို ခံလိုက်ရပါတယ်။ 

သရဲမျက်နှာဖုံးတွေ၀တ်ကာ ကလေးတွေကို ခြောက်လှန့်ပြီး ငြိမ်အောင် ထိန်းခဲ့တဲ့အတွက် ဖြစ်ပါတယ်။ 

Lil’ Blessings Child Care & Learning Center နေ့ကလေးထိန်းစင်တာက ဆရာမတွေ ဟောလို၀င်းပွဲက သရဲမျက်နှာဖုံး၀တ်ပြီး ကလေးတွေကို ခြောက်လှန့် ထိန်းကြောင်းနေတဲ့ ဗီဒီယို ၂ ခု စက်တင်ဘာလနဲ့ အခုလအစောပိုင်းမှာ ဆိုရှယ်မီဒီယာပေါ် ပြန့်နှံ့ခဲ့ပြီး ၀ေဖန်မှုတွေလည်း ရှိလာပါတယ်။ 

အခင်းဖြစ်ပွားတဲ့ မွန်ရိုခရိုင် ရဲတပ်ဖွဲ့အကြီးအကဲ ကီဗင် ကရွတ်က ဆရာမ ၄ ဦးကို ကလေးငယ်တွေ ညှင်းပမ်းမှု စွဲချက် ၃ ခုနဲ့ တရားစွဲဆိုခဲ့ပြီး အခြားတစ်ဦးကို တိုင်ကြားဖို့ ပျက်ကွက်မှုနဲ့ တရားစွဲဆိုခဲ့တယ်လို့ ပြောပါတယ်။ 

ဒီလို ခြောက်လှန့်မှုကြောင့် အသက် ၂ နှစ်အရွယ် သမီးဖြစ်သူမှာ စိတ်ဒဏ်ရာရနေပြီး ညဖက်တွေမှာ ကြောက်လန့်ကာ အိပ်မပျော်ဖြစ်နေတယ်လို့ မိခင်တစ်ဦးဖြစ်တဲ့ ကာတီလင် ဂျွန်ဆင်က ပြောပါတယ်။ 

“မျက်နှာဖုံး၀တ်ထားထား မထားထား သူတို့ရဲ့ အပြုအမူက လက်ခံနိုင်စရာ မရှိပါဘူး။ ကျွန်မ သွေးတွေဘာတွေတောင်တိုးတယ်။ ကလေးအတွက်လည်း စိတ်မကောင်းဘူး။ ဒေါသထွက်ရပါတယ်”

ရဲအရာရှိ ကရွတ်က အခုလို တရားစွဲဆိုမှုဟာ တစ်ခြားသူတွေ သင်ခန်းစာယူဖို့ဖြစ်တယ်လို့ ထည့်သွင်းပြောဆိုခဲ့ပါတယ်။

Ref: Washington Post

အောက်တိုဘာ ၂၂၊ ၂၀၂၂

M-Media

-ပြီးခဲ့တဲ့နှစ်က လွှတ်တော်ကို လူအုပ်ကြီးက ၀င်ရောက်စီးနင်း တိုက်ခိုက်မှုနဲ့ပတ်သက်ပြီး လာရောက်ရှင်းလင်းဖို့ အမေရိကန်သမ္မတဟောင်း ဒေါ်နယ်ထရမ့်ကို လွှတ်တော် စုံစမ်းစစ်ဆေးရေး ကော်မတီက ဆင့်ခေါ်လိုက်ပါတယ်။ 

ထရမ့်ဟာ နို၀င်ဘာရွေးကောက်ပွဲရှုံးနိမ့်မှုကို လက်မခံဘဲ လှုံ့ဆော်မှုတွေ ပြုလုပ်ခဲ့တဲ့အတွက် သူ့ကိုထောက်ခံသူတွေဟာ ၀ါရှင်တန်က လွှတ်တော်အဆောက်အဦးကို ၀င်ရောက်စီးနင်း တိုက်ခိုက်တဲ့အထိ ဆိုးရွားခဲ့ပါတယ်။ 

ဒီကိစ္စကို စုံစမ်းစစ်ဆေးနေတဲ့ လွှတ်တော် အထူးကော်မတီက လာရောက်ဖြရှင်းဖို့ ထရမ့်ကို ဆင့်ခေါ်လိုက်ပါတယ်။ 

“ခင်ဗျားဟာ ရွေးကောက်ပွဲရလဒ်ကို ပြောင်းလဲဖို့ ကြိုးစားတဲ့ တစ်ဦးတည်းသော အမေရိကန်သမ္မတဖြစ်ပြီး ဒီကိစ္စမှာ အဓိက တာ၀န်ရှိသူလည်းဖြစ်ပါတယ်။ ဒီလုပ်ရပ်တွေဟာ အခြေခံဥပဒေနဲ့ ဆန့်ကျင်ပြီး တရားမ၀င်ဘူးဆိုတာ ခင်ဗျားလည်း သိပြီးသားပါ” လို့ ဆင့်ခေါ်စာမှာ ဖော်ပြထားပါတယ်။ 

ကော်မတီဟာ စုံစမ်းစစ်ဆေးမှုနဲ့ပတ်သက်တဲ့ စာရွက်စာတမ်းတစ်ချို့ကိုလည်း ထရမ့်ဆီက တောင်းထားပါတယ်။ နို၀င်ဘာ ၄ ရက်နေ့မတိုင်မီ ဒီစာရွက်စာတမ်းတွေကို ပေးရမှာဖြစ်ပြီး နို၀င်ဘာ ၁၄ ရက်နေ့မှာ ကော်မတီရှေ့မှောက် မေးမြန်းစစ်ဆေးခံရမှာဖြစ်ပါတယ်။ 

ထရမ့်ရဲ့ရှေ့နေက ကော်မတီဟာ စံနှုန်းတွေကို မလိုက်နာဘဲ နို၀င်ဘာလအတွင်းလုပ်မယ့် ကြားဖြတ်ရွေးကောက်ပွဲကို အာရုံလွှဲဖို့အတွက် ဒီလို ဆောင်ရွက်တာလို့ ပြစ်တင်၀ေဖန်ခဲ့ပါတယ်။ 

ထရမ့်အနေနဲ့ ကော်မတီရဲ့ ဆင့်ခေါ်မှုကို မလိုက်နာရင် တရားရေးဌာနရဲ့ ရာဇ၀တ်မှုဆိုင်ရာ စုံစမ်းစစ်ဆေး တရားစွဲဆိုခြင်းကို ခံရမှာ ဖြစ်ပါတယ်။ 

Ref: BBC