News @ M-Media

Tag: WuhanVirus

  • အင်ဒိုနီးရှားတွင် တရုတ်ထုတ် ကိုဗစ်ကာကွယ်ဆေးထိုးထားသည့် ဆရာဝန် ၂၀ သေဆုံး

    အင်ဒိုနီးရှားတွင် တရုတ်ထုတ် ကိုဗစ်ကာကွယ်ဆေးထိုးထားသည့် ဆရာဝန် ၂၀ သေဆုံး

    ဇွန် ၂၈၊ ၂၀၂၁
    M-Media

    -တရုတ်ထုတ် ကိုဗစ်ကာကွယ်ဆေး SinoVac ထိုးထားပြီးသူ ဆရာဝန် ၂၀ လောက် ကိုဗစ်ရောဂါနဲ့ သေဆုံးခဲ့တယ်လို့ အင်ဒိုနီးရှား ကျန်းမာရေးဌာနက ထုတ်ပြန်ပါတယ်။

    ကိုဗစ်ကပ်ရောဂါ စတင်ဖြစ်ပွားကတည်းက အင်ဒိုနီးရှားမှာ ဆရာဝန် ၄၀၁ ဦး ကိုဗစ်နဲ့ သေဆုံးခဲ့ပါတယ်။ အဲဒီအထဲက အယောက် ၂၀ ဟာ SinoVac ကာကွယ်ဆေး ၂ ကြိမ်အပြည့် ထိုးထားသူတွေဖြစ်ပြီး ၁၀ ဦးက ဇွန်လအတွင်း သေဆုံးခဲ့တာ ဖြစ်ပါတယ်။

    SinoVac ကိုဗစ်ကာကွယ်ဆေးကို ကမ္ဘာ့နိုင်ငံ တော်တော်များများမှာ အသုံးပြုနေပြီး အခုအဖြစ်အပျက်က ဒီဆေးရဲ့ အန္တရာယ်ကင်းမှုအပေါ် မေးခွန်းတွေ ပေါ်ပေါက်လာစေပါတယ်။

    အင်ဒိုနီးရှား ကျန်းမာရေးဌာနက နိုင်ငံအတွင်းရှိနေတဲ့ ဆရာဝန်တွေရဲ့ ၉၀ ရာခိုင်နှုန်းကို SinoVac ကာကွယ်ဆေး ထိုးပေးထားပြီး အခုသေဆုံးမှုအတွက် စုံစမ်းစစ်ဆေးမှုတွေ လုပ်ဆောင်နေတယ်လို့ ထုတ်ပြန်ခဲ့ပါတယ်။

    SinoVac ကာကွယ်ဆေးဟာ ဆေးရုံတက်ရလောက်အောင် ပြင်းထန်တဲ့ ကိုဗစ်လက္ခဏာ ခံစားရမှု၊ ကိုဗစ်ကြောင့် သေဆုံးမှုတွေကို ထိထိရောက်ရောက် ကာကွယ်​ပေးနိုင်တယ်လို့ ဒီဆေးကိုအသုံးပြုနေတဲ့ ဘရာဇီးလ်နဲ့ ချီလီတို့က ထုတ်ပြန်ခဲ့ပါတယ်။

    Ref: AFP

  • အိန္ဒိယတွင် ကိုဗစ်ဗားရှင်းအသစ်တစ်ခု ထပ်ပေါ်လာ

    အိန္ဒိယတွင် ကိုဗစ်ဗားရှင်းအသစ်တစ်ခု ထပ်ပေါ်လာ

    ဇွန် ၂၃၊ ၂၀၂၁
    M-Media

    -ပြည်နယ် ၃ ခုမှာ တွေ့လာရတဲ့ ပုံပြောင်း ကိုဗစ်ဗိုင်းရပ်စ်အသစ် Delta plus ဟာ စိုးရိမ်စရာဖြစ်ပြီး သတိထားစောင့်ကြည့်ဖို့ လိုအပ်တယ်လို့ အိန္ဒိယနိုင်ငံက ထုတ်ပြန်ပါတယ်။

    အိန္ဒိယမှာ လက်ရှိ ဒီပုံပြောင်းကိုဗစ် ကူးစက်ထားသူ အနည်းဆုံး ၂ ဒါဇင်လောက် ရှိနေတာ ဖြစ်ပါတယ်။​

    ပြည်ထောင်စုအစိုးရ ကျန်းမာရေးဝန်ကြီး ရာဂျစ် ဘူရှန်က Delta plus ဟာ ကူးစက်မှုနှုန်း ပိုမြင့်ပြီး စစ်ဆေးမှုတွေ တိုးမြှင့်လုပ်ဆောင်ဖို့ ပြည်နယ်တွေကို အကြံပြုခဲ့ပါတယ်။

    ပုံပြောင်းကိုဗစ်ကြောင့် အိန္ဒိယဟာ ဧပြီလနဲ့ မေလမှာ ဒုတိယလှိုင်းကို အကြီးအကျယ်ခံစားခဲ့ရပြီး လူ သိန်းချီသေဆုံးကာ ကျန်းမာရေးစောင့်ရှောက်မှုစနစ်လည်း ပြိုလဲလုနီးနီး ဖြစ်ခဲ့ပါတယ်။

    လက်ရှိမှာ နိုင်ငံတစ်ဝှမ်း ကာကွယ်ဆေးထိုးမှု အရှိန်မြှင့်ဆောင်ရွက်နေပြီး တနင်္လာနေ့က တစ်ရက်အတွင်း စုစုပေါင်း လူ ဦးရေ ၈.၆ သန်းကို ကာကွယ်ဆေးထိုးပေးနိုင်ခဲ့ပါတယ်။

    အိန္ဒိယမှာ ကိုဗစ်ကူးစက်သူ စုစုပေါင်း ၃၀.၀၃ သန်းရှိပြီး သေဆုံးသူကတော့ ၄ သိန်းနီးပါး ရှိလာပြီဖြစ်ပါတယ်။

    Ref: Reuters

  • ကမ္ဘာ့နိုင်ငံများကို ကိုဗစ်ကာကွယ်ဆေး အလုံးရေ သန်း ၅၀၀ အမေရိကန်က လှူမည်

    ကမ္ဘာ့နိုင်ငံများကို ကိုဗစ်ကာကွယ်ဆေး အလုံးရေ သန်း ၅၀၀ အမေရိကန်က လှူမည်

    ဇွန် ၁၀၊ ၂၀၂၁
    M-Media

    -အခုနှစ်ကနေ လာမယ့်နှစ်ကုန်အထိ ကမ္ဘာ့နိုင်ငံပေါင်း ၁၀၀ ကို ကိုဗစ်ကာကွယ်ဆေးအလုံးရေ သန်း ၅၀၀ ထောက်ပံ့ပေးအပ်သွားဖို့ အမေရိကန်က စီစဉ်နပါတယ်။

    ဒီအတွက် လိုအပ်တဲ့ ကာကွယ်ဆေးတွေရဖို့ သမ္မတဘိုင်ဒန်အစိုးရဟာ ပြည်တွင်း ကာကွယ်ဆေးကုမ္ပဏီတွေနဲ့ သဘောတူစာချုပ် ချုပ်ဆိုခဲ့ပြီး မနက်ဖြန် လန်ဒန်မှာပြုလုပ်မယ့် G7 ထိပ်သီးအစည်းအဝေးမှာ တရားဝင် ထုတ်ပြန်ဖို့ ရှိနေပါတယ်။

    အမေရိကန်ဟာ Pfizer and BioNTech ကုမ္ပဏီကနေ အခုနှစ်အတွင်း ကာကွယ်ဆေးအလုံးရေ သန်း ၂၀၀၊ လာမယ့်နှစ်မှာ သန်း ၃၀၀ အရင်းစျေးနဲ့ မှာယူထားတာ ဖြစ်ပါတယ်။

    G7 အဖွဲ့အပါအဝင် ချမ်းသာတဲ့နိုင်ငံတွေက ဆင်းရဲတဲ့နိုင်ငံတွေကို ကိုဗစ်ကာကွယ်ဆေး ထောက်ပံ့ပေးဖို့ ကမ္ဘာ့ခေါင်းဆောင်ဟောင်း ၁၀၀ က ပြီးခဲ့တဲ့တစ်ပတ်မှာ စာထုတ်တောင်းဆိုပြီးနောက်ပိုင်း အမေရိကန်ရဲ့ ဒီအစီအစဉ် ပေါ်ပေါက်လာတာ ဖြစ်ပါတယ်။

    ကမ္ဘာ့ကျန်းမာရေးအဖွဲ့ WHO က ကမ္ဘာတစ်ဝှမ်း ကိုဗစ်ကာကွယ်​ဆေး ၁၁ ဘီလီယံလောက် လိုအပ်မယ်လို့ ခန့်မှန်းထားပါတယ်။

    Ref: Aljazeera

  • ကိုဗစ်ကာကွယ်ဆေး တစ်နေ့လျှင် လူတစ်သန်းထိုးနိုင်အောင် အင်ဒိုနီးရှားက ဆောင်ရွက်မည်

    ကိုဗစ်ကာကွယ်ဆေး တစ်နေ့လျှင် လူတစ်သန်းထိုးနိုင်အောင် အင်ဒိုနီးရှားက ဆောင်ရွက်မည်

    ဇွန် ၉၊ ၂၀၂၁
    M-Media

    -ဇူလိုင်လမှာ တစ်နေ့ကို လူတစ်သန်းလောက် ကိုဗစ်ကာကွယ်ဆေးထိုးနိုင်အောင် ဆောင်ရွက်သွားမယ်လို့ အင်ဒိုနီးရှားသမ္မတ ဂျိုကိုဝီဒိုဒိုက ပြောကြားလိုက်ပါတယ်။

    အင်ဒိုနီးရှားဟာ အရှေ့တောင်အာရှမှာ ကိုဗစ်ကပ်ရောဂါဒဏ်ကို အဆိုးရွားဆုံး ခံစားရတဲ့နိုင်ငံဖြစ်ပြီး ၁.၈၇ သန်း ကူးစက်ကာ သေဆုံးသူက ၅ သောင်းကျော် ရှိပါတယ်။

    ကာကွယ်ဆေးထိုးနှံမှုကိုတော့ အခုနှစ်အစောပိုင်းမှာ စတင်ခဲ့ပြီး လက်ရှိ အင်ဒိုနီးရှားမှာ Sinovac၊ Sinopharm နဲ့ AstraZeneca ကာကွယ်ဆေးတစ်မျိုးမျိုး ၂ ကြိမ်ထိုးထားသူ အနည်းဆုံး ၁၁.၄၃ သန်း ရှိပါတယ်။

    ဂျကာတာတောင်ဘက် ဒီပို့မြို့ကို ဒီကနေ့ သွားရောက်မှုအတွင်း သမ္မတ ဂျိုကိုဝီဒိုဒိုက ဇွန်လအတွင်း တစ်နေ့ကို လူ ၇ သိန်း ကာကွယ်ဆေးထိုးပေးနိုင်အောင် စီစဉ်မှာဖြစ်ပြီး နောက်လမှာတော့ အရေအတွက် ထပ်တိုးသွားမယ်လို့ ပြောကြားခဲ့ပါတယ်။

    “ဇူလိုင်လမှာ တစ်နေ့ လူတစ်သန်းလောက်ကို ကာကွယ်ဆေးထိုးပေးနိုင်မှာ ဖြစ်ပါတယ်”

    အင်ဒိုနီးရှားမှာ စုစုပေါင်း လူဦးရေ သန်း ၂၇၀ ရှိပြီး အခုနှစ်အကုန်မှာ ၁၈၁.၅ သန်းလောက်ကို ကာကွဆေးထိုးပေးနိုင်ဖို့ အစိုးရက ရည်မှန်းထားပါတယ်။ မေလ ၃၁ ရက်နေ့အထိ အင်ဒိုနီးရှားမှာ ​ကိုဗစ်ကာကွယ်ဆေး အလုံးရေ ၇၆ သန်း အဆင်သင့်ထိုးနိုင်တဲ့အနေအအထားမှာ ရှိနေတာဖြစ်ပါတယ်။

    ကာကွယ်ဆေးထိုးနှံမှုလုပ်ငန်းကို တိုးမြှင့်လုပ်ဆောင်နေပေမယ့် ပုံပြောင်းကိုဗစ် ပြန့်နှံ့မယ့်အန္တရာယ် ရှိနေတယ်လို့ ကျွမ်းကျင်သူတွေက သတိပေးထားပါတယ်။

    Ref: CNA

  • ကိုဗစ်တိုက်ဖျက်ရေး ချမ်းသာသည့်နိုင်ငံများက ကူညီပေးရန် ကမ္ဘာ့ခေါင်းဆောင်ဟောင်းများ တောင်းဆို

    ကိုဗစ်တိုက်ဖျက်ရေး ချမ်းသာသည့်နိုင်ငံများက ကူညီပေးရန် ကမ္ဘာ့ခေါင်းဆောင်ဟောင်းများ တောင်းဆို

    ဇွန် ၇၊ ၂၀၂၁
    M-Media

    -ကိုဗစ်ဗိုင်းရပ် ပုံပြောင်းပြီး ကမ္ဘာကြီးအပေါ် နောက်ထပ် ခြိမ်းခြောက်လာနိုင်ချေကို တားဆီးဖို့အတွက် ချမ်းသာတဲ့နိုင်ငံတွေက ဆင်းရဲတဲ့နိုင်ငံတွေကို ကူညီပေးကြဖို့ ကမ္ဘာ့ခေါင်းဆောင်ဟောင်းတွေက တိုက်တွန်းလိုက်ပါတယ်။

    ကမ္ဘာ့နိုင်ငံတွေက သမ္မတဟောင်းတွေ၊ ဝန်ကြီးချုပ်ဟောင်းတွေနဲ့ နိုင်ငံခြာရေးဝန်ကြီးဟောင်း ၁၀၀ လောက်က ဖွံ့ဖြိုးပြီးနိုင်ငံများအဖွဲ့ G7 ကို စာနဲ့ မေတ္တာရပ်ခံ တောင်းဆိုလိုက်တာဖြစ်ပါတယ်။

    G7 ထိပ်သီးအစည်းအဝေးကို အခုတစ်ပတ် သောကြာနေ့ကျရင် အင်္ဂလန်နိုင်ငံမှာ ပြုလုပ်မှာပါ။

    ၂၀၂၀ ခုနှစ်မှာ ကိုဗစ်တိုက်ဖျက်ရေး ကမ္ဘာ့နိုင်ငံတွေ ပူးပေါင်းဆောင်ရွက်မှု မအောင်မြင်ခဲ့ပေမယ့် ၂၀၂၁ ခုနှစ်က ခေတ်သစ်တစ်ခုကို ဖော်ဆောင်နိုင်လိမ့်မယ်လို့ ခေါင်းဆောင်ဟောင်းတွေရဲ့စာမှာ ဖော်ပြထားပါတယ်။

    “ဝင်ငွေအလယ်အလတ်၊ ဝင်ငွေနိမ့်ပါးတဲ့နိုင်ငံတွေမှာ ကာကွယ်ဆေး လွယ်လွယ်ကူကူ အဆင်သင့်ရအောင် G7 နဲ့ G20 နိုင်ငံတွေက ကူညီပေးတာမျိုးဟာ အလှူဒါနဆိုတာမျိုးထက် နိုင်ငံတိုင်းရဲ့ မဟာဗျူဟာအကျိုးစီးပွား ဖြစ်ပါတယ်”

    ဒီမေတ္တာရပ်ခံစာကို လက်မှတ်ရေးထိုးခဲ့သူတွေထဲမှာ ဗြိတိန်ဝန်ကြီးချုပ်ဟောင်း ဂေါ်ဒွန်ဘရောင်းနဲ့ တိုနီဘလဲ၊ ကုလသမဂ္ဂ အတွင်းရေးမှူးချုပ်ဟောင်း ဘန်ကီမွန်တို့လည်း ပါဝင်ပါတယ်။

    လာမယ့် ၂ နှစ်အတွင်း ကမ္ဘာတစ်ဝှမ်းမှာ ကိုဗစ်ကပ်ရောဂါကို တိုက်ဖျက်ဖို့ ကန်ဒေါ်လာ ဘီလီယံ ၃၀ လောက် ကုန်ကျမှာဖြစ်ပြီး G7 နိုင်ငံတွေက ဒီကုန်ကျစားရိတ်အတွက် ထည့်ဝင်ဖို့လည်း ကမ္ဘာ့ခေါင်းဆောင်ဟောင်းတွေက တိုက်တွန်းခဲ့ပါတယ်။

    “G7 နိုင်ငံတွေက ဒီလိုထည့်ဝင်တာဟာ အလှူဒါနပြုတာမျိုးတင် မကဘဲ ပုံပြောင်းကိုဗစ် ပြန့်နှံ့ကာ လူသားတွေထံ တစ်ကျော့ပြန် ခြိမ်းခြောက်လာမှုကို ကိုယ်တိုင်ကိုယ်ကျ ကာကွယ်တာ ဖြစ်ပါတယ်။ ယူကကေ လူတစ်ယောက် တစ်ပတ်ကို ပြား ၃၀ လောက်သာ ထည့်ဝင်ရမယ့် ပမာဏဟာ မဖြစ်စလောက်ဖြစ်ပေမယ့် ကမ္ဘာကြီးအတွက် အကောင်းဆုံး အာမခံမူဝါဒအတွက် ထည့်ဝင်တာမျိုးပါ” လို့ ဗြိတိန်ဝန်ကြီးချုပ်ဟောင်း ဂေါ်ဒွန် ဘရောင်းက ပြောကြားခဲ့ပါတယ်။

    Ref: Reuters