Tag: WuhanVirus

ဇူလိုင် ၂၇၊ ၂၀၂၁
M-Media

-တရုတ်နိုင်ငံထုတ် ကိုဗစ်ကာကွယ်ဆေး Sinovac ကို နှစ်ကြိမ်ထိုးပြီးနောက် ရရှိလာတဲ့ ကိုယ်ခံစွမ်းအားဟာ ၆ လကြာတဲ့အခါမှာ ကိုဗစ်ကို မကာကွယ်နိုင်တဲ့ ပမာဏအထိ ကျဆင်းသွားနိုင်တာကို လေ့လာမှုသစ်တစ်ခုမှာ တွေ့ခဲ့ရပါတယ်။

တရုတ်နိုင်ငံ ကျန်းဆူပြည်နယ် ​ကပ်ရောဂါထိန်းချုပ်ရေးစင်တာနဲ့ နိုင်ငံတစ်ဝှမ်း အခြားကျန်းမာရေးအဖွဲ့အစည်းတွေက သုတေသနပညာရှင်တွေ ပေါင်းပြီး အသက် ၁၈ နှစ်ကနေ ၅၉ နှစ် ရှိသူ ၅၀၀ ကျော်လောက်ကို လေ့လာခဲ့တာပါ။

Sinovac ကာကွယ်ဆေးကို ၂ ပတ် ဒါမှမဟုတ် ၄ ပတ်ခွာကာ ၂ ကြိမ်ထိုးပေးပြီးတဲ့နောက် ၆ လအကြာ ကိုယ်ခံစွမ်းအားကို လေ့လာရာမှာ သု​တေသနမှာပါဝင်သူ ၁၆.၉ ရာခိုင်နှုန်းကနေ ၃၅.၂ ရာခိုင်နှုန်းလောက်အထိသာ ကိုဗစ်တိုက်ဖျက်နိုင်တဲ့ ကိုယ်ခံစွမ်းအားမျိုး ရှိတာကို တွေ့ခဲ့ရပါတယ်။

လေ့လာမှုမှာ ပါဝင်ခဲ့တဲ့ အဖွဲ့တစ်ချို့ကို ဒုတိယတစ်ကြိမ်ထိုးပြီးနောက် ၆ လအကြာ တတိယတစ်ကြိမ် ထပ်ထိုးပြီး စမ်းသပ်ခဲ့ပါတယ်။ တတိယအကြိမ်ထိုးပြီး ၂၈ ရက်အကြာမှာ ရရှိတဲ့ ကိုယ်ခံစွမ်းအားဟာ ဒုတိယအကြိမ်ထိုးပြီး ၄ ပတ်မြောက်မှာ ပေါ်ထွက်လာတဲ့ ကိုယ်ခံစွမ်းအားထက် ၃ ဆ ကနေ ၅ ဆအထိ မြင့်တက်လာတာကိုလည်း လေ့လာမှုမှာ တွေ့ခဲ့ရပါတယ်။

Sinovac နှစ်ကြိမ်ထိုးပြီး ၆ လအကြာမှာရှိတဲ့ ကိုယ်ခံစွမ်းအားဟာ ပိုမိုကူးစက်လွယ်တဲ့ ပုံပြောင်းကိုဗစ်အပေါ် ဘယ်လောက်အထိ သက်ရောက်မှုရှိလဲဆိုတာကိုတော့ ဒီလေ့လာမှုမှာ မစမ်းသပ်ခဲ့ဘဲ တတိယတစ်ကြိမ်ထိုးပြီး ရလာမယ့် ကိုယ်ခံစွမ်းအားအကြောင်းကိုလည်း နောက်ထပ် လေ့လာမှုလုပ်ဖို့ လိုအပ်တယ်လို့ သုတေသနပညာရှင်တွေက ပြောကြားခဲ့ပါတယ်။

တရုတ်နိုင်ငံ Sinovac ဆေးဟာ ကိုဗစ်တိုက်ဖျက်ရေးမှာ အမှန်တကယ် ထိရောက်မှုရှိလားဆိုတဲ့ မေးခွန်းဟာ အရင်ကတည်းက ရှိခဲ့ပြီး အာရှနိုင်ငံတစ်ချို့မှာတော့ Sinovac အစား အခြား ကိုဗစ်ကာကွယ်ဆေးကို ရွေးချယ် အသုံးပြုလာကြပါတယ်။

Ref : Reuters

ဇူလိုင် ၂၂၊ ၂၀၂၁

M-Media 

– Pfizer နဲ့ AstraZeneca ကိုဗစ်ကာကွယ်ဆေး နှစ်ကြိမ်ထိုးထားရင် လတ်တလော ကမ္ဘာတစ်ဝှမ်း ဆိုးဆိုးဝါးဝါး ပြန့်နှံ့ကူးစက်နေတဲ့ ပုံပြောင်း Delta ကိုဗစ်ကို ထိထိရောက်ရောက် ကာကွယ်နိုင်တယ်လို့ လေ့လာမှုအသစ်တစ်ရပ်မှာ တွေ့ရပါတယ်။ 

ဒီလေ့လာမှုကို အင်္ဂလန်ကျန်းမာရေးဝန်ကြီးဌာနက ပြုလုပ်ပြီး New England ဆေးပညာဂျာနယ်မှာ မနေ့က ဖော်ပြခဲ့တာပါ။ ဒါပေမယ့် တစ်ကြိမ်တည်းထိုးထားကတော့ ထိထိရောက်ရောက် ကာကွယ်နိုင်မှု မရှိဘူးလို့ လေ့လာမှုက ဆိုပါတယ်။ 

ပုံပြောင်းကိုဗစ် Delta ကို Pfizer နဲ့ AstraZeneca တို့က ထိထိရောက်ရောက် ကာကွယ်ပေးနိုင်တယ်လို့ မြေပြင်အချက်အလက်တွေကို ကိုးကားပြီး ယူကေ ကျန်းမာရေးဝန်ကြီးဌာနက မေလမှာ ထုတ်ပြန်ခဲ့ကာ အခုတွေ့ရှိချက်အသစ်က အချက်အလက်ကို ပိုမို ခိုင်မာစေတာ ဖြစ်ပါတယ်။

Pfizer နှစ်ကြိမ်ထိုးရင် ပုံပြောင်းကိုဗစ် Delta ကို ၈၈ ရာခိုင်နှုန်း၊ Alpha ကို ၉၃.၇ ရာခိုင်နှုန်း ကာကွယ်နိုင်ပြီး AstraZeneca နှစ်ကြိမ်ထိုးရင်တော့ Delta ကို ၆၇ ရာခိုင်နှုန်း၊ Alpha ကို ၇၄.၅ ရာခိုင်နှုန်း ကာကွယ်နိုင်တယ်ဆိုတာ အခု လေ့လာမှုအသစ်မှာ တွေ့ရပါတယ်။

Pfizer နဲ့ AstraZeneca တို့ကို တစ်ကြိမ်တည်းထိုးထားရင် ပုံပြောင်း Delta ကိုဗစ်ကို ၃၆ ရာခိုင်နှုန်းနဲ့ ၃၀ ရာခိုင်နှုန်း အသီးသီး ကာကွယ်ပေးနိုင်ပါတယ်။ 

Ref: The Star

ဇူလိုင် ၅၊ ၂၀၂၁
M-Media

-ထွက်ရှိပြီးသား ကိုဗစ်ကာကွယ်ဆေးတွေကို တစ်ကြိမ်စီ ပေါင်းစပ်ထိုးနှံတာဟာ ကိုခံစွမ်းအားကို ပိုမိုကောင်းမွန်စေတယ်လို့ ယူကေက လေ့လာမှုတစ်ခုမှာ တွေ့ခဲ့ရပါတယ်။

Com-Cov လို့ အမည်ပေးထားတဲ့ အဲ့ဒီလေ့လာမှုဟာ Pfizer နဲ့ AstraZeneca တို့ နှစ်ကြိမ်စီထိုးတာ၊ တစ်ကြိမ်ကို တစ်မျိုးစီထိုးတာတွေရဲ့ သက်ရောက်မှုကို စမ်းသပ်ခဲ့တာပါ။

ပေါင်းစပ်ထိုးနှံမှုအားလုံးဟာ ကိုယ်ခံစွမ်းအား ကောင်းမွန်တာတွေ့ရပြီး၊ ကိုဗစ်ကာကွယ်ဆေး ထိုးနှံမှုကိုလည်း ပိုမိုလွယ်ကူ အဆင်ပြေစေလိမ့်မယ်လို့ ပညာရှင်တွေက သုံးသပ်ပါတယ်။

AstraZeneca နှစ်ကြိမ်ထိုးထား​ပြီးတဲ့သူတွေဟာ တစ်ခြားကိုဗစ်ကာကွယ်ဆေး ထပ်ထိုးမယ်ဆိုရင် ကိုဗစ်ကာကွယ်နိုင်တဲ့ ကိုယ်ခံစွမ်းအား ပိုမိုကောင်းမွန်နိုင်လိမ့်မယ်ဆိုတဲ့ သဲလွန်စတစ်ခုကိုလည်း ဒီလေ့လာမှုမှာ တွေ့ခဲ့ရပါတယ်။

ယူကေ ကျန်းမာရေးဌာန တာဝန်ရှိသူ ပရော်ဖက်ဆာ ဂျိုနသန် ဗန် တမ်က လက်ရှိ ယူ​ကေမှာ ကာကွယ်ဆေးတစ်မျိုးတည်း နှစ်ကြိမ် ထိုးပေးနေမှုကို ပြောင်းလဲမှာ မဟုတ်ပေမယ့် အနာဂတ်မှာတော့ ပေါင်းစပ်ထိုးပေးတာမျိုး လုပ်သွားနိုင်တယ်လို့ ပြောကြားခဲ့ပါတယ်။

တစ်ချို့နိုင်ငံတွေမှာ ကိုဗစ်ကာကွယ်ဆေးနှစ်မျိုး ပေါင်းစပ်ထိုးပေးတာမျိုးကို လုပ်ဆောင်နေပါတယ်။ စပိန်နဲ့ ဂျာမနီတို့မှာဆိုရင် ပထမတစ်ကြိမ် AstraZeneca ထိုးပေးထားတဲ့ သူတွေကို ဒုတိယတစ်ကြိမ်မှာ Pfizer ဒါမှမဟုတ် Moderna mRNA ထိုးပေးတာမျိုး လုပ်ဆောင်နေပါတယ်။

ကိုဗစ်ဝင်ရောက်မှုကို တားဆီးနိုင်မယ့် ကိုယ်ခံစွမ်းအား အပြည့်အ၀ရဖို့အတွက် ကာကွယ်ဆေး နှစ်ကြိမ်ထိုးရတာ ဖြစ်ပါတယ်။

Ref : BBC