Tag: WuhanVirus

မတ် ၄၊ ၂၀၂၀
M-Media

• ပြီးခဲ့တဲ့ ၂၄ နာရီအတွင်း COVID-19 ဗိုင်းရပ်စ်ဟာ ပိုလန်၊ မော်ရိုကို၊ အန်ဒိုရာ၊ အာမေးနီးယားနဲ့ အာဂျင်တီးနားနိုင်ငံတို့ကိုပါ ထပ်မံပြန့်နှံ့ခဲ့ပြီး ကမ္ဘာ့နိုင်ငံတွေကတော့ ဗိုင်းရပ်စ်ထိန်းချုပ်နိုင်ရေး ပိုမိုအားထုတ်လုပ် လုပ်ဆောင်လာကြပါတယ်။
• ဂျပန်ဆေးဝါးကုမ္ပဏီတစ်ခုဖြစ်တဲ့ Takeda က သူတို့ဟာ ကိုရိုနာဗိုင်းရပ်စ်ဒဏ်ကို ဆိုးဆိုးဝါးဝါး ခံစားနေရတဲ့သူတွေကို ကုသပေးဖို့အတွက် ဆေးဝါးတစ်ခု ထုတ်လုပ်နေတယ်လို့ ပြောကြားလိုက်ပါတယ်။
• ပြီးခဲ့တဲ့နှစ် ဒီဇင်ဘာလ ဗိုင်းရပ်စ် စတင်ပြန့်နှံ့ပြီးနောက်ပိုင်း လက်ဆေးဂျယ်ဘူးစျေး အဆမတန် မြင့်တက်သွားတာကို ထိန်းချုပ်သွားမယ်လို့ ပြင်သစ်ဘဏ္ဍာရေးဝန်ကြီးက ပြောကြားလိုက်ပါတယ်။ ဒီလိုစျေးတက်မှုဟာ လက်မခံနိုင်စရာဖြစ်ပြီး အစိုးရအနေနဲ့ ကြားဝင် ဆောင်ရွက်ပေးဖို့ ​ပြင်သစ် သမားတော်များသမဂ္ဂက တောင်းဆိုခဲ့ပြီးတဲ့နောက် ဒီလို ထုတ်ပြန်မှု ပေါ်ထွက်လာတာပါ။
• နိုင်ငံအတွင်း ဗိုင်းရပ်စ်ပြန့်နှံ့လာမှာကို စိုးရိမ်တဲ့အတွက် ခွဲစိပ်ခန်းသုံး နှာခေါင်းစည်းတွေ၊ ဆေးဘက်ဆိုင်ရာပစ္စည်းတွေ နိုင်ငံရပ်ခြား တင်ပို့မှုကို ရပ်ဆိုင်းသွားမယ်လို့ ရုရှားနိုင်ငံက မနေ့မှာ ကြေငြာလိုက်ပါတယ်။ ဒါပေမယ့် လူသားချင်း စာနာထောက်ထားမှုအရ တင်ပို့မှုတွေကိုတော့ ဆက်လက်ခွင့်ပြုမှာ ဖြစ်ပါတယ်။ အခြားနေရာက ကူးစက်လာသူတွေ ရုရှားမှာ ဆေးကုသမှုခံနေရတာမျိုး ရှိပေမယ့် ရုရှားနိုင်ငံအတွင်းမှာတော့ အခုအချိန်အထိ ကူးစက်မှု မရှိသေးပါဘူး။
• အိန္ဒိယနိုင်ငံမှာ မနေ့က ကူးစက်နေသူ ၁၄ ဦးကို ထပ်မံတွေ့ရှိခဲ့ပြီး စုစုပေါင်း ကူးစက်သူ ၂၈ ဦး ဖြစ်လာပါတယ်။ ဂျပန်နိုင်ငံ ဟိုကိုင်းဒိုးမှာ ကူးစက်နေသူအရေအတွက် ၈၂ ဦးအထိ ရှိလာသလို ဥရောပက ဂရိနိုင်ငံမှာလည်း ကူးစက်နေသူဟာ ၈ ဦး ဖြစ်လာပါတယ်။ မလေးရှားမှာတော့ မနေ့က ၁၄ ဦး ထပ်မံကူးစက်ခဲ့ပါတယ်။
• တရုတ်နိုင်ငံမှာတော့ မနေ့က ကူးစက်မှု ၁၂၅ ခု ရှိခဲ့ပြီး၊ သေဆုံးသူကတော့ ၃၈ ဦး ရှိလာပါတယ်။ ဒါ့ကြောင့် စုစုပေါင်းသေဆုံးသူ ၂၉၈၁ ဦး၊ ကူးစက်မှု ၈၀၂၇၀ ခု ရှိလာတာပါ။
• မနေ့က တောင်ကိုရီးယားမှာ ထပ်မံကူးစက်မှု ၅၁၆ ခု ရှိခဲ့ပြီး၊ ကူးစက်နေသူ ၅၃၂၈ ဦးအထိ ဖြစ်လာတာပါ။ သေဆုံးမှုကတော့ ၃၂ ဦး ရှိနေပါတယ်။
• ပြီးခဲ့တဲ့ ၂၄ နာရီအတွင်း အီတလီနိုင်ငံမှာ ဗိုင်းရပ်စ်ကြောင့် လူ ၂၇ ဦး သေဆုံးခဲ့ပြီး စုစုပေါင်း သေဆုံးသူအရေအတွက်ဟာ ၇၉ ဦးအထိ ရှိလာပါတယ်။ ဒါဟာ တရုတ်နိုင်ငံပြင်ပမှာ သေဆုံးမှုအများဆုံးဖြစ်ပြီး အီရန်နိုင်ငံကို ကျော်ဖြတ်သွားတာပါ။ ကူးစက်သူအရေအတွက်ကတော့ ၂၅၀၂ ဦးအထိ ရှိလာပါတယ်။ အာဏာပိုင်တွေက ဗိုင်းရပ်စ် ဆိုးဆိုးဝါးဝါး ပြန့်နှံ့နေတဲ့ ဒေသတွေကို အနီရောင်ဇုံအဖြစ်သတ်မှတ်ကာ ဆက်သွယ်မှုဖြတ်တောက်သွားဖို့ စီစဉ်နေပါတယ်။
• အီရန်မှာတော့ လွှတ်တော်အမတ်တွေရဲ့ ၈ ရာခိုင်နှုန်းဖြစ်တဲ့ ၂၃ ဦးမှာ ဗိုင်းရပ်စ်ကူးစက်နေကြောင်း တွေ့ခဲ့ရပြီး၊ ဒုတိယသမ္မတ အပါအဝင် အစိုးရအဖွဲ့က အနည်းဆုံး ၇ ဦးလည်း ကူးစက်နေပါတယ်။ နိုင်ငံတစ်ဝှမ်း စုစုပေါင်း ကူးစက်မှုဟာ ၂၃၀၀ ကျော်လာခဲ့ပြီး သေဆုံးသူကတော့ ၇၇ ဦး ရှိလာပါတယ်။ အီရန်အဓိပတိ အယာတိုလာ အလီခါမေနီက ပြည်သူတွေအနေနဲ့ ကျန်းမာရေးဝန်ကြီးဌာနရဲ့ လမ်းညွှန်မှုကို လိုက်နာကြဖို့ မနေ့မှာ ပြောကြားခဲ့ပြီး မကြာခင် ဒီရောဂါ ရပ်တန့်သွားလိမ့်မယ်လို့ ဆိုပါတယ်။

Ref: Aljazeera

(အီရန်နိုင်ငံ တီဟီရန်မြို့မှ မြင်ကွင်းတစ်ခု)

ဖေဖော်ဝါရီ ၂၉၊ ၂၀၂၀ (ညနေ ၅ နာရီခွဲ)
M-Media

• တောင်ကိုရီးယားနိုင်ငံမှာ မနေ့က COVID-19 ဗိုင်းရပ်စ် ကူးစက်သူ အရေအတွက်ဟာ ၅၉၄ ဦးရှိခဲ့ပြီး တစ်နေ့တာအတွင်း စံချိန်ကူးစက်မှုလည်း ဖြစ်ပါတယ်။ နိုင်ငံတစ်ဝှမ်း စုစုပေါင်းကူးစက်မှုအရေအတွက်ဟာ ၂၉၃၁ ဦးအထိ ရှိလာတာပါ။ အာဏာပိုင်တွေကတော့ မိမိတို့တိုင်းပြည်ဟာ အရေးပါတဲ့အချိန်ကာလတစ်ခုကို ရောက်ရှိနေပြီး ပြည်သူတွေအနေနဲ့ အိမ်ထဲမှာသာနေကြဖို့ တိုက်တွန်းထားပါတယ်။ တောင်ကိုရီးယားမှာ ဗိုင်းရပ်စ်ကြောင့် သေဆုံးသူအရေအတွက်ဟာ ၁၇ ဦးအထိ ရှိလာပါတယ်။
• တရုတ်နိုင်ငံမှာတော့ မနေ့က ကူးစက်မှု ၄၂၇ ခု ရှိခဲ့‌ပြီး သေဆုံးကတော့ ၄၇ ဦး ရှိပါတယ်။ ဒါ့ကြောင့် စုစုပေါင်း ကူးစက်မှု ၇၉၂၅၁ ဦး၊ သေဆုံးသူ ၂၈၃၅ ဦး ရှိလာပါပြီ။
• ထိုင်းနိုင်ငံမှာ မနေ့က လူတစ်ဦး ထပ်မံကူးစက်ခဲ့တာကြောင့် ကူးစက်သူအရေအတွက် ၄၂ ဦးအထိ ရှိလာပါတယ်။ စင်ကာပူမှာတော့ မနေ့က ၂ ဦးထပ်တွေ့ပြီး စုစုပေါင်း ကူစက်မှု ၉၈ ဦး ရှိလာတာပါ။ ၆၉ ဦးက ဗိုင်းရပ်စ်ကင်းစင်သွားတဲ့အတွက် ဆေးရုံကနေ ဆင်းသွားပြီး ၂၉ ဦးက ဆက်လက်ကုသမှု ခံယူနေပါတယ်။
• COVID-19 ဗိုင်းရပ်စ်ကြောင့် သေဆုံးသူအရေအတွက်ဟာ ၄၃ ဦးရှိလာပြီး နိုင်ငံတစ်ဝှမ်း ကူးစက်မှုကတော့ ၅၉၃ ဦးရှိတယ်လို့ အီရန်အာဏာပိုင်တွေက ဒီကနေ့မနက်ပိုင်းမှာ သတင်းထုတ်ပြန်ပါတယ်။ မနေ့ကတစ်ရက်တည်းမှာ လူ ၉ ဦးသေဆုံးပြီး ၂၀၅ ဦး ထပ်မံကူးစက်ခဲ့တာဖြစ်ပါတယ်။ ‌အီရန်ဟာ တရုတ်နိုင်ငံပြီးတဲ့နောက် သေဆုံးသူအများဆုံးနိုင်ငံ ဖြစ်လာပါတယ်။
• အမေရိကန်ပြည်ထောင်စုအနောက်ပိုင်း အော်ရီဂွန်ပြည်နယ်မှာ ဗိုင်းရပ်စ်ပြန့်နေတဲ့နိုင်ငံကို ခရီးသွားတာ၊ ကူးစက်နေသူတွေနဲ့ ဆက်သွယ်ပြောတာတွေ မရှိတဲ့ လူတစ်ဦးမှာ ဗိုင်းရပ်စ်ပိုးကူးစက်နေတာတွေကို မနေ့က တွေ့ခဲ့ရတာပါ။ ဒါဟာ ပြည်နယ်အတွင်း ပထမဆုံး တွေ့ရှိမှုဖြစ်ပြီး ဘာ့ကြောင့် ကူးစက်တယ်ဆိုတာ မသိရသေးဘူးလို့ အာဏာပိုင်တွေက ပြောပါတယ်။ သောကြာနေ့က အိမ်နီးချင်း ကယ်လီဖိုးနီးယားပြည်နယ်မှာ တွေ့ရတဲ့ ဒုတိယမြောက်ကူးစက်မှုကိုလည်း ဘာ့ကြောင့်လဲဆိုတာ အာဏာပိုင်တွေက မဖော်ထုတ်နိုင်သေးပါဘူး။
• မတ်လ ၁၄ ရက်နေ့မှာ အာဆီယံခေါင်းဆောင်တွေနဲ့ ပြုလုပ်ဖို့ စီစဉ်ထားတဲ့ ထိပ်သီးအစည်းအဝေးကို အမေရိကန်က ရပ်ဆိုင်းလိုက်ပါတယ်။ နိုဝင်ဘာလ ဘန်ကောက်မှာလုပ်တဲ့ ထိပ်သီးအစည်းအဝေးကို မတက်ရောက်နိုင်တာ‌ကြောင့် သမ္မတဒေါ်နယ်ထရမ့်ဟာ အာဆီယံခေါင်းဆောင်တွေကို လက်စ်ဗီးဂက်စ်မှာတွေ့ဖို့ ဖိတ်ခဲ့တာပါ။ ဒီ ထိပ်သီးအစည်းအဝေးကို ဘယ်တော့ပြန်ကျင်းပမလဲဆိုတာကိုတော့ အမေရိကန်က မထုတ်ပြန်ခဲ့ပါဘူး။
• အာဖရိကရဲ့ ဆဟာရဒေသအထိ ကူးစက်လာတာ၊ ကမ္ဘာ့ဘဏ္ဍာရေးစျေးကွက်တွေ သိသိသာသာ ကျဆင်းသွားတာတွေ ဖြစ်လာပြီးတဲ့နောက် ကမ္ဘာ့ကျန်းမာရေးအဖွဲ့ WHO က COVID-19 ဗိုင်းရပ်အန္တရာယ်ကို အမြင့်ဆုံးအဆင့်အထိ မြှင့်လိုက်ပါတယ်။ လက်ရှိမှာ ဗိုင်းရပ်စ်ဟာ အန်တာတိကတိုက်ကလွဲပြီး ကမ္ဘာ့တိုက်ကြီးအားလုံးကို ပြန့်နှံ့သွားပြီဖြစ်ပါတယ်။ WHO အကြီးအကဲ Tedros Adhanom Ghebreyesus က လက်ရှိအနေအထားမှာ လူ့အဖွဲ့အစည်းအတွင်း အလွယ်တကူ ပြန့်နှံ့တာမျိုးမဟုတ်သေးတဲ့အတွက် တားဆီးဖို့ အခွင့်အရေး ရှိသေးကြောင်း၊ အဓိကပြဿနာက ဗိုင်းရပ်စ်ပြန့်နှံမှုမဟုတ်ဘဲ ကောလဟာလတွေ ကြောက်ရွံ့မှုတွေသာဖြစ်ကြောင်း ပြောကြားခဲ့ပါတယ်။

Ref: Aljazeera, CNA