ဒီဇင်ဘာ ၅၊ ၂၀၁၃
ရန်ကုန် ။ ။ စာဆိုတော်နေ့ကျင်းပရေးကော်မတီ (ပသီ)မှ ကြီးမှူးကျင်းပသော စာဆိုတော်နေ့အခမ်းအနားတစ်ရပ်ကို ဒီဇင်ဘာလ ၄-ရက်နေ့ နေ့လည် ၂-နာရီမှ ၅း၃၀-နာရီအထိ ရန်ကုန်မြို့ ယုဇနဂါးဒင်းဟိုတယ်ခန်းမ၌ ကျင်းပပြုလုပ်ခဲ့ရာ တက်ရောက်သူ ၁၀၀၀ ၀န်းကျင်ခန့်ရှိခဲ့ပါတယ်။
စာဆိုတော်နေ့အခမ်းအနားတွင် ယခု ၂၀၁၃-ခုတွင် စာရေးဆရာများဖြစ်သည့် တစ်သက်တာစာပေဆုရ ဆရာကြီးသိပ္ပံမှူးတင်၊ ဒေါက်တာသန်းဝင်း (မောင်သန်းဝင်း – ရန်ကုန်တက္ကသိုလ်)နှင့် ဦးထွန်းဝင်း (ထွန်းဝင်း – ပုသိမ်)တို့က ဟောပြောခဲ့ကြပြီး၊ ကဗျာဆရာများဖြစ်သည့် ကိုအင်းဝ၊ မောင်ရင်ဆု၊ ကိုညီသွေးတို့က ကဗျာများ ရွတ်ဆိုခဲ့ကြပါတယ်။ စာဆိုတော်နေ့အခမ်းအနားတွင် ဟောပြောသည့် စာရေးဆရာသုံးဦး၏ ကိုယ်ရေးအထုပ္ပတ္တိအကျဉ်းကိုလည်း ဖတ်ကြားခဲ့ကြပါတယ်။
အခမ်းအနားမှာ ပသီအမျိုးသားသီချင်းဖြင့် ဂုဏ်ပြုသီဆိုခဲ့ပြီး နိုင်ငံတော် အလံအားလည်း အလေးပြုခဲ့ကြပါတယ်။ ထို့နောက် သဘာပတိ ဦးမြင့်ဝေ (စာရေးဆရာ တက္ကသိုလ်မြင့်ဝေ)က အမှာစကားပြောကြားပြီး အခမ်းအနားပြုလုပ်ရခြင်းကို ပြောခဲ့ပါတယ်။
ဆရာကြီး သိပ္ပံမှူးတင်မှ ဟောပြောရာတွင် ဆရာကြီးဦးရာဇတ်လို ပုဂ္ဂိုလ်များပေါ်ထွန်းခဲ့ပါက တိုင်းပြည်ကောင်းစားမည်ဖြစ်ပြီး၊ တိုင်းပြည်မှာ အမျိုးသားအထက်တန်း ကျောင်း ပေါ်လာအောင် ကြိုးပမ်းခဲ့သူဖြစ်ပြီး ကျောင်းသားများကို သူ့ကျွန်မခံလိုစိတ်နဲ့ တော်လှန်လိုစိတ်ဖြစ်အောင် မွေးထုတ်ပေးခဲ့သူလည်းဖြစ်ကြောင်း၊ ပသီဆိုိသူများ သည် သမိုင်းအရ အနှစ်နှစ်အလလ တိုင်းပြည်မှာ နေထိုင်ခဲ့ကြသူများဖြစ်တာကြောင့် နိုင်ငံခြားသားဟု ယူဆ၍ မရကြောင်း၊ နိုင်ငံကောင်းကျိုးအတွက် ပသီနှင့်တကွ ဘာသာစုံ လူမျိုးစုံ ၀ိုင်းဝန်းကြိုးပမ်းကြရန် ထည့်သွင်း ဟောပြောခဲ့ပါတယ်။
ဒေါက်တာသန်းဝင်းမှ မွတ်စလင်မ် စာဆိုတော်များဖြစ်သည့် စာဆိုတော်ကြီး ဆရာကြီးဦးနု၊ စာတော်ဖတ် ဦးဖိုးလှ၊ ကာတွန်းဦးဘကလေး(ရွှေတလေး)နှင့် သီပေါဘုရင် မိဖုရား စုဖုရားလတ်၏ အပျိုတော်များဖြစ်သည့် မြန်မာမွတ်စလင်မ်အပျိုတော်များအကြောင်းကို ဟောပြောခဲ့သည်။ ဦးထွန်းဝင်းမှ ပသီအမျိုးသားသမိုင်းကို ဟောပြောခဲ့ ပါတယ်။
“ဆရာကြီး ဦးရာဇတ်လို ပုဂ္ဂိုလ်သာ ကျွန်တော်တို့တိုင်းပြည်မှာ အများအစားပေါ်ထွန်းခဲ့ရင် ကျွန်တော်တို့တိုင်းပြည်အတွက် ကောင်းပြီ။ တို့တိုင်းပြည်မှာ သူ့ကျွန်မခံရ အောင် အင်္ဂလိပ်ကို ပြန်တော်လှန်နိုင်အောင် သင်ကြားပေးခဲ့တယ်။ မြန်မာစာသင်ချိန်မှလွဲပြီး ကျန်တဲ့အချိန်တွေမှာ အင်္ဂလိပ်လိုပြောရတယ်။ အင်္ဂလိပ်လိုမှ မတတ်ရင် အင်္ဂလိပ်ပြောတာ နားမလည်ပဲဖြစ်မှာကြောင့်လို့ဆိုတယ်။ ကျွန်တော် ဒီနေ့ သိပ္ပံစာရေးဆရာဖြစ်တာဟာ ဆရာကြီး ဦးရာဇတ်ကြောင့်ပါ။ ဆရာကြီးကျေးဇူးကြောင့် ကမ္ဘာ့သိပ္ပံကို အင်္ဂလိပ်လို ဖတ်နိုင်လို့သာ ကျွန်တော် သိပ္ပံစာရေးဆရာ ဖြစ်လာတာပါ။ ကျွန်တော်ဟာ ဆရာကြီးဦးရာဇတ်ရဲ့ တပည့်တစ်ယောက်ဖြစ်ခဲ့ပြီး ဆရာကြီး ရိုက်တာခံရဖူးပါတယ်။ ဆရာကြီးရိုက်တာဟာ မုန်းလို့မဟုတ်ပဲ ချစ်လို့ရိုက်ခဲ့တာပါ။ ဆရာကြီးဦးရာဇတ်ဟာ ကျောင်းသားတွေကို မရိုက်ခဲ့ဘူးဆိုတာ မဟုတ်ဘူး။ ရိုက်ခဲ့တယ်ဆိုတာ ကျွန်တော် ကိုယ်တိုင် ကိုယ်တွေ့မျက်မြင်ပါပဲ။ ကျွန်တော်အခု ပြောသွားတာတွေမှာ ဆရာကြီးဦးရာဇတ်လိုပုဂ္ဂိုလ်တွေရှိသော်လည်း ကျွန်တော်တို့ မိဘတိုင်းက၊ ကျွန်တော်တို့ နောင်လာနောက်သားတိုင်းက ခရောင်းတော သွားတဲ့အခါ သတ္တိရှိအောင် သင်မပေးနိုင်ရင် ကျွန်တော်တို့ တိုင်းပြည်ပျက်တော့မယ့် အချိန်အခါပါ။ “ဟု ဆရာကြီး သိပ္ပံမှူးတင်က ပြောခဲ့ပါတယ်။
“ကျွန်တော်က ငယ်ငယ်ကတည်းက မွတ်စလင်မ်တွေနဲ့ အများကြီး အတူနေခဲ့ရတဲ့အတွက် အီတီဆိုတာ ကြားဖူးခဲ့ပါတယ်။ အိဒ်နေ့တိုင်း အီတီတောင်းတယ်၊ စမိုင်စားတယ်ဆိုတာ ကျွန်တော် အဲ့ကတည်းကစားတာ ဒီနေ့ထိပဲ။ မွတ်စလင်မ် ပသီတွေနဲ့ ညီလိုကိုလို နေလာကြတာပါ။ ၀မ်းအိုဝမ်းဆိုလည်း ကျွန်တော်တို့နဲ့ ကျောင်းနေဖက်သူငယ်ချင်း။ ကျွန်တော့်ရဲ့ အမျိုးထဲမှာတောင် ပသီတွေရှိပါတယ်။ ကျွန်တော့်ဘကြီးက မန္တလေးက အမြောက်တန်းသူကို ယူထားတာပါ။ ကျွန်တော်တို့ဟာ တသက်လုံးအတူတူနေလာကြတာပဲ။ တချို့ မုတ်ဆိတ်တွေ ရှိချင်ရှိမယ်။ နောက် ဦးထုတ်လေးများ ဆောင်းတဲ့အခါဆောင်းတယ်။ အဲဒါကလွဲလို့ တစ်သက်လုံး ဒီလူတွေပဲဗျ။ အခုမှ ပြဿနာပုံစံ လုပ်တာ ကျွန်တော်တို့က နည်းနည်းလေးမှ လက်မခံဘူး။ ဒီလူတွေဟာ ကျွန်တော်တို့နဲ့ တသက်လုံး အတူနေလာတဲ့သူတွေ။ မြန်မာဘုရင်လက်ထက်ကတည်းက နေလာတဲ့ ပုဂ္ဂိုလ်တွေ။ သမိုင်းအရ အနှစ်နှစ်အလလ ကျွန်တော်တို့ တိုင်းပြည်မှာ နေလာခဲ့သူတွေ။ ကျွန်တော်တို့ဘာမှ နိုင်ငံခြားသားလို့ ယူဆလို့မရဘူး။ ကျွန်တော်တို့ရဲ့ ညီအစ်ကို မောင်နှမတွေပါပဲ။ ဘယ်သူဘာပြောပြော ကျွန်တော်တို့ ညီအစ်ကို မောင်နှမတွေပါ။” လို့ ဟောပြောမှုမှာ ပြောခဲ့ပါတယ်။
ဆက်လက်ပြီး “တစ်ခုတော့ရှိတယ်။ ကျွန်တော်တို့တိုင်းပြည်မှာ ကုသိုလ်ကံ မကောင်းစဉ်အချိန်အခါက အထင်အမြင်လွဲပြီး နှိပ်ကွပ်ခံရတာရှိတယ်။ ၁၉၆၀-ခုနှစ်က ဗိုလ်ချုပ်ကြီးနေ၀င်း ကျွန်တော့်ကို ပြောတာ ပြောချင်ပါတယ်။ ကျွန်တော် သင်တန်းတက်ပြီးပြန်လာတော့ ဗိုိလ်ချုပ်ကြီးနေ၀င်းတပ်ကိုရောက်တယ်။ သူက ‘ဟေ့ကောင် ဆိုရှယ်လစ်လမ်းစဉ်ဝင်ကွာ’တဲ့ ကျွန်တော်မ၀င်ချင်ဘူး။ ကျွန်တော် တစ်သက်လုံး ပါတီ မ၀င်ခဲ့ဘူး။ ဒီလူက သိပ်အကင်းပါးတယ်။ ဦးနေ၀င်းအကြောင်း ထဲထဲဝင်ဝင်သိပြီး ကျန်ရစ်ခဲ့သူက ကျွန်တော်နဲ့ တခြားတစ်ယောက်ပဲ ရှိတော့မယ်။ ၁၉၅၀-ခုနှစ်မှာ ဗိုလ်ချုပ် မောင်မောင်က မန္တလေး-ရန်ကုန် လမ်းမကြီး ဆောက်ဖို့ လုပ်တဲ့အခါမှာ တရုတ်က အလယ်က ကျွန်းမပါရင် မဆောက်ပါနဲ့တဲ့။ ကျွန်းမပါရင် နေထိုင်မှုစရိတ်နဲ့ သူ့ရဲ့ လုံခြုံရေးကို ထိခိုက်မှာစိုးတဲ့အတွက် မလုပ်ပါနဲ့ပြောတဲ့အခါ နီးရာဓါး ကြောက်တဲ့အတွက် ကျွန်တော်တို့ ဒီလိုဖြစ်တာ။”
“အခုလို စာဆိုတော်နေ့ ဟောပြောပွဲမှာ တက်ရောက်ပြောကြားခွင့်ရတာ ကျေးဇူးတင်ပါတယ်။ ဒါကြောင့် မွတ်စလင်မ်ရော၊ ဗုဒ္ဓဘာသာရော၊ ခရစ်ယာန်ရော၊ ရှမ်းရော၊ ကချင်ရော အားလုံးကိုပြောချင်တာ။ နိုင်ငံခြားကလူတွေ လာလိမ့်မယ်။ ကျွန်တော်တို့ညံ့ရင် ခံရမယ်။ အဲ့ဒီတော့ ကျွန်တော်တို့ ၀ိုင်းပြီးကြိုးစားကြဖို့လိုတယ်။ ဗိုလ်ချုပ် အောင်ဆန်းပြောတာ ကျွန်တော်တို့တိုင်းပြည်မှာ တိုးတက်ဖို့ ၀ိုင်းပြီး ကြိုးစားဖို့လိုတယ်။ ကြိုးစားတာ လွယ်လွယ်လေးပါ။ ဒါပေမယ့် ပြဲနေအောင် ကြိုးစားမှ ဖြစ်မှာပါတဲ့။ ဒါကြောင့် ကျွန်တော်တို့ဒီမှာ ရှိသမျှ ယောက်ျား – မိန်းမ၊ ပသီ၊ ဟိန္ဒူ၊ ခရစ်ယာန်၊ အကုန် ၀ိုင်းပြီးတော့ ပြဲနေအောင် ကြိုးစားကြရင် ကျွန်တော်တို့ တိုင်းပြည်ဟာ တိုးတက် ကောင်းမွန်လာမှာပါ။ ဒါကြောင့် အားလုံးဝိုင်းပြီး ကြိုးစားကြပါလို့”ဟောပြောမှု နိဂုံးချုပ်မှာ ပြောကြားသွားခဲ့ပါတယ်။
