Tag: Yangon

ဒီဇင်ဘာ ၂၇၊ ၂၀၁၃
M-Media
သီရိ

ရန်ကုန်  ။         ။          မကွေးတိုင်းဒေသကြီး ဂန့်ဂေါမြို့နယ်အတွင်းရှိ ကျဲ၊ နုံးကြီး၊ ကန့်သတ် ကျေးရွာများရှိ ယာမြေများကို ကာကွယ်ရေးပစ္စည်းစက်ရုံ (ကပစ-၂၃) မှသိမ်းယူထားခြင်းနှင့် စစ်ကိုင်းတိုင်းဒေသကြီး ပုလဲမြို့နယ် ချင်ပြစ်ကျင်းကျေးရွအုပ်စု နွယ်အင်းကျေးရွာတွင် တည်ရှိသော လှိုင်းချောင်း ရေလှောင်တမံ စီမံကိန်းမှ မြေယာသိမ်းခံတောင်သူများ၏ သတင်းစာရှင်းလင်းပွဲကို ဒီဇင်ဘာလ ၂၇-ရက်နေ့တွင် MJN ရုံးခန်း၌ ပြုလုပ်ခဲ့သည်။

မကွေးတိုင်းဒေသကြီး ဂန့်ဂေါခရိုင် ဂန့်ဂေါမြို့နယ် ကျောရွာ၏မြောက်ဖက် ၁၄ မိုင်ခန့်အကွာဝင် တပ်မတော် ကာကွယ်ရေး ပစ္စည်းစက်ရုံ အမှတ် (၂၃) စက်ရုံကြီးများ တည်ဆောက်နိုင်ရန် အတွက် ၂၀၀၇/၂၀၀၈ ခုနှစ်တွင် လယ်ယာမြေများ ပေါ်သို့ဖြတ်ကာ စတင်ဖောက်လုပ်ခဲ့ ပါသည်။ “ကပစ-၂၃ တည်ဆောက်ဖို့အတွက် ရွာသုံးရွာကိုသိ မ်းဆည်းထားတယ်၊ ဧက ၁၄၀၃.၈၁ ကိုသိမ်းထားတယ် သူတို့ပြောတာ တပ်မတော် အနာဂတ်စီမံကိန်းတဲ့ ဒါကို
ကျွန်တော်တို့ နှောင့်ယှက်လိုခြင်း မရှိပါဘူး ဒါပေမဲ့ကျွန်တော်တို့ကို နစ်နာကြေးဆိုပြီး ပေးတာတွေက တစ်ဧကကို (၁၁၈) ကျပ်ပဲပေးတယ် ပြောတော့ တောင်သူတွေကို မနစ်နာစေရပါဘူးတဲ့ ၂၀၀၉ မှာ ခေတ်ကာလပေါက်ဈေးမှာ ၁ ဧကကို ၃၅သိန်းရှိတယ်။
အိမ်တွေနဲ့ပတ်သက်ပြီးလျော်ကြေးပေးတော့လည်း မျှတမှု မရှိဘူး ကျွန်တော်တို့ကတော့ ဆုံးရှုံးသွားတဲ့ လယ်ယာမြေတွေကို ၂၀၀၈/၂၀၀၉ ပေါက်ဈေးအတိုင်း လိုချင်တာပေါ့ဗျာ စက်ရုံဆောက်ပြီး သုံးလို့ရနေသေးတဲ့ လယ်ယာမြေတွေကိုလည်း ပြန်လိုချင်တယ် ” ဟု လယ်ယာမြေ သိမ်းခံထားရသော ကန့်သတ်ရွာသား ဦးအောင်နိုင်ဦး မှ ပြောကြားသွားခဲ့ပါသည်။

လှိုင်းချောင်းရေလှောင်တမံ တည်ဆောက်စဉ်က ဒေသခံတောင်သူများသည် လယ်ဧကပေါင်း ၃၅၀-ကျော်ကို နစ်နာကြေး လုံးဝမရရှိဘဲ အသိမ်းခံခဲ့ ကြရသည်။ ရေသောက်ဧရိယာ ဧက ၁၀၀၀ ကျော်ရေဝေပေးနိုင်မည်ဟု တမံ တည်ဆောက်စဉ်ကသတ်မှတ်ခဲ့သော်လည်း တမံပြီးစီးသည့်နေ့ မှစ၍ ယနေ့ထက်တိုင် ၁ ဧကကိုပင် ရေပေးနိုင်ခြင်း မရှိခဲ့ပါ။ ထိုတမံတည်ဆောက်ခြင်း ကြောင့် ဒေသခံတောင်သူများ လယ်ယာမြေဧက ၃၅၀ ကျော် သိမ်းဆည်း ဆုံးရှုံး နစ်နာခဲ့ရသည်။ “တောင်သူတွေမှာဆုံးရှုံးမှုတွေနဲ့ ရင်ဆိုင်နေရတယ်၊ အိမ်ရှိ လူကုန်ထွက်ပြီး အလုပ်လုပ်နေရတယ်၊ ကျောင်းတက်မယ့် ကလေးငယ်တွေတောင် ကျောင်းမှာ မရှိသလောက်ဖြစ်နေတယ်၊ ဆုံးရှုံးသွားတဲ့လယ်ယာတွေကိုလျော်ကြေး မပေးတဲ့အပြင် မြေတွေကိုကော်ဖို့ ဘူဒိုဆာ နဲ့ထိုးတာကို တစ်အိမ်ကို ကျပ် ၅၀၀ ပြန်ကောက်တယ်၊ ကျွန်တော်တို့ကတော့ လယ်ယာမြေကိုပြန် လိုချင်တယ် အဲလိုမှမဟုတ်ရင်လဲ ကာလပေါက်ဈေးနဲ့ညီတဲ့ လျော်ကြေးငွေကို လိုချင်တယ်၊ မရ ရအောင် ကျွန်တော်တို့ လုပ်ဆောင်သွားမှ ဖြစ်ပါတယ်။ ”
ဟု ဦးညီညီအောင်မှ ပြောကြားခဲ့ပါသည်။

ဒီဇင်ဘာ ၂၂၊ ၂၀၁၃
M-Media
သူရိန်

ရန်ကုန် ။          ။         ရန်ကုန်မြို့တော်စည်ပင်သာယာရေးကော်မတီက ၂၀၁၃-ခုနှစ်၊ ဒီဇင်ဘာလ ၃-ရက်နေ့တွင် ခေါ်ယူတင်ပြခဲ့သော မြို့ပြစီမံကိန်း တွင် မြို့နယ်အလိုက် မြေအသုံးချမှု သက်ဆိုင်ရာဇုန်များ သတ်မှတ်ခြင်းပါဝင်ပြီး အထပ်မြင့်ဆောက်လျှင် အဆောက်အဦ အမြင့်၏သုံးပုံတစ်ပုံကို ချန်လှန်ရန်၊ အထပ်-၂၀ ထက်မပိုသော အဆောက်အဦများသာဆောက်ရန်တို့ ပါဝင်နေခြင်းတို့ကြောင့်  ရှင်းလင်းပွဲတွင် ဆောက်လုပ်ရေးလုပ်ငန်းရှင် အများစုကလက်မခံရခြင်းဖြစ်ပြီး သဘောထားကွဲလွဲမှုဖြစ်ပေါ်ခဲ့ကြောင်း သိရသည်။

ရန်ကုန်မြို့တော်အတွင်း အထပ်မြင့် အဆောက်အအုံများ ဆောက်လုပ်ရာတွင် အများဆုံး အထပ်-၂၀ အထိသာခွင့်ပြုရန် မြို့တော်စည်ပင်မှ အဆိုပြုထားကြောင်း သတင်းများထွက်ပေါ်လာပြီးနောက် မြို့တော်စည်ပင်နှင့် ဆောက်လုပ်ရေးလုပ်ငန်းရှင်တို့အကြား မတူကွဲပြားသည့် အမြင်အမျိုးမျိုးရှိနေကြသည်။

အဆိုပါကိစ္စနှင့်ပတ်သက်၍ “လူမှုဘ၀တိုးတက်ဖို့အထပ်မြင့်သွားရင် လူနေမှုဘ၀ကျဆင်းသွားမယ်ဆိုတာ ဘယ်လိုတွေးလဲတော့ မသိဘူး။ အာဆီယံနှင့်ယှဉ်ရင် မြန်မာနိုင်ငံမှာ ကွန်ဒိုမီနီယံစစ်စစ် တိုက်ရှိရင်ပြပါ။ တကယ်တော့ ဒါဟာ Responsibility ပါ။ Responsibility ကိုတာဝန်မယူတဲ့အတွက် အထပ်မြင့်မဆောက်ရတော့ဘူးလား။ အထပ်၂၀ထက်ပိုတဲ့ အဆောက်အအုံတွေ ရန်ကုန်မြို့ကြီးမှာမရှိရတော့ဘူးလား။ ထိန်းချုပ်မှုကောင်းပါတယ်။ လုပ်တာကောင်းပါတယ်။ ဒါပေမယ့် စနစ်ကို အကောင်အထည်ဖော်ဖို့အရမ်းအရေးကြီးတယ်ဆိုတာ ပြောချင်ပါတယ်။ ကျွန်တော်တို့ ရန်ကုန်မြို့ကြီးကိုသိပ်ချစ်ပါတယ်။ ရန်ကုန်မြို့ကြီးလှအောင် စဉ်းစားနေသောသူသည် အကျဉ်းတန်အောင်မလုပ်သင့်ပါဘူး ” ဟု နိုင်ဂရုပ်ဆောက်လုပ်ရေးမှ ဦးကျော်နိုင်ဦးက သုံးသပ်ပြောကြားသည်။

ရန်ကုန်မြို့တော်အတွင်း ဇုန် ၁၁-ခုခွဲကာ မြို့မြေအသုံးချမှုဇုန်များအဖြစ် ခွဲခြမ်းစိတ်ဖြာမည်လည်းဖြစ်သည်။ လူနေသီးသန့်ဇုန်တွင် ဆိတ်ငြိမ်ရပ်ကွက်   (low-density residential areas) သတ်မှတ်မှုလည်းပါဝင်ပါသည်။

ဇုန်မြေခွဲခြားမှုနှင့်ပတ်သက်၍လည်း တန်းဖိုးနည်းအိမ်ရာများကို ဆောက်လုပ်ခဲ့သူ ဦးကိုကိုထွေး(တော်ဝင်ကုမ္ပဏီ)က  “အထပ်မြင့်ကိုဆောက်တဲ့အခါ လက်ရှိအခြေအနေနဲ့ ကိုက်ညီတဲ့ လူအများလက်ခံတဲ့ အယူအဆ Concept တွေထည့်သင့်တယ်။ အခုဇုန်တစ်ခုကိုသတ်မှတ်လိုက်တဲ့အခါ  လမ်းဟိုဘက်ခြမ်းက အထပ်၂၀ အဆောက်အဦရှိတယ်။ ကျန်တဲ့ အဆောက်အဦတွေက ၃-ထပ်ပဲဆောက်ရမယ်ဆိုရင် ဒါဟာဘာကြောင့် ဒိလိုဖြစ်ရတာလဲ။ ဖြစ်သင့်သလား။ ဥပဒေဖြစ်လာမှာလား။ မညီမျှရင်ဥပဒေဖြစ်လာမှာမဟုတ်ပါဘူး။ အခုဇုန်တွေသတ်မှတ်တာက ဥပဒေနဲ့ အညီသတ်မှတ်တာကိုတော့ ကြိုဆိုပါတယ်။ ”ဟု၎င်း၏ အမြင်ကို မျှဝေပါတယ်။

မြေအသုံးချမှုဇုန်များခွဲခြားသတ်မှတ်ခြင်းဖြင့် ရန်ကုန်မြို့၏ ရေရှည်တည်တံ့သော ဖွံ့ဖြိုးတိုးတက်မှုကို ဖော်ဆောင်နိုင်မှာဖြစ်ပြီး မြို့နေလူထု၏ လူမှုဘ၀ပတ်ဝန်းကျင်တင့်တယ်စေရန်၊ ပြည်တွင်းပြည်ပရင်းနှီးမြှပ်နှံသူများ၏ စိတ်ဝင်စားမှုကိုရေရှည် ထိန်းသိမ်းနိုင်ရန်အတွက် ဖြစ်သည်ဟုသိရသည်။

ထိုကဲ့သို့မြို့နယ်အလိုက် မြေအသုံးပြုမှုဇုန်များ ခွဲခြမ်းလိုက်ခြင်းကြောင့် အနာဂတ်ကာလတွင် ရန်ကုန်မြို့ပတ်ဝန်းကျင်နှင့် မြို့ပြသွင်ပြင်လက္ခဏာများကြောင့် နိုင်ငံတကာမှပိုမိုစိတ်ဝင်စားသော မြို့ကြီးတစ်မြို့ဖြစ်လာဖွယ်ရှိကြောင်းလည်း ထပ်မံ သိရှိရပါသည်။

ဒီဇင်ဘာ ၂၁-၂၀၁၃
M-Media
သီရိ

ရန်ကုန်   ။       ။      မြန်မာနိုင်ငံလူငယ်စွန့်ဦးတီထွင်လုပ်ငန်းရှင်များ (MYEA) ၏စီစဉ်မှုဖြင့် လေးကြိမ်မြောက် မြန်မာ့အလုပ်အကိုင် အခွင့်အလမ်း ပြပွဲကို ဒီဇင်ဘာ ၂၁-ရက်မှ ၂၃-ရက်အထိ နံနက် ၉-နာရီမှ ညနေ ၅-နာရီထိ ရန်ကုန်မြို့ ဦးဝိစာရလမ်းရှိ တပ်မတော်ခန်းမတွင် ကျင်းပလျက်ရှိပါသည်။

အဆိုပါပြပွဲကို ယနေ့ ဒီဇင်ဘာ ၂၁-ရက်နေ့ နံနက် ၁၀-နာရီတွင် အခမ်းနားကိုစတင်ဖွင့်လှစ်ခဲ့ပါသည်။ ထို့နောက် အခမ်းအနားကို အလုပ်သမား အလုပ်နှင့် လူမှုဖူလုံရေးဝန်ကြီးဌာန ပြည်ထောင်စုဒုတိယ၀န်ကြီး ဦးထင်အောင်၊ ရန်ကုန်တိုင်းဒေသကြီးအစိုးရအဖွဲ့ လျှပ်စစ်နှင့် စက်မှုလက်မှုဝန်ကြီး ဦးဥာဏ်ထွန်းဦး၊ လူမှုဖူလုံရေးအဖွဲ့မှ ဦးစိုးမင်း၊မြန်မာနိုင်ငံကုန်သည်စက်မှုအသင်းချုပ်မှ ဥက္ကဌ ဦးဝင်းအောင်နှင့် မြန်မာနိုင်ငံ စွန့်ဦးတီထွင် လုပ်ငန်းရှင်များအသင်း ဥက္ကဌ ဦးဝဖြိုးတို့မှ ဖဲကြိုးဖြတ်ဖွင့်လှစ်ခဲ့ပြီး အလုပ်သမားအလုပ်ကိုင်နှင့်လူမှုဖူလုံရေးဝန်ကြီးဌာန ပြည်ထောင်စုဝန်ကြီး ဦးအေးမင်းမှ စက်ခလုပ်နှိပ်ပြီးအခမ်းနားအားဖွင့်လှစ်ပေးခဲ့ပါသည်။

မြန်မာနိုင်ငံလူငယ်စွန့်ဦးတီထွင်လုပ်ငန်းရှင်များအသင်း ဥက္ကဌ ဦးဝေဖြိုးမှ “ယနေ့ပြုလုပ်တဲ့ စတုတ္တအကြိမ် အလုပ်ကိုင်ခွင့်လမ်းပြပွဲကို မြန်မာနိုငံတွင် ၀န်ထမ်းကောင်းများရရှိရန် ခက်ခဲနေသည့် လုပ်ငန်းရှင်များနှင့် အလုပ်ကိုင်ကောင်းများရရှိရန်ရှာဖွေနေသည့် လူငယ်များနှင့် တစ်နေရာတည်းတွင် တိုက်ရိုက်တွေ့ဆုံနိုင်ရန်၊ လူငယ်လူရွယ်များအတွက်အလုပ်ကိုင်အခွင့်အလမ်းများပိုမိုသိရှိနိုင်ရန်၊ အလုပ်ရှာဖွေနေကြသောလူငယ်များကိုအချိန်ကုန် ငွေကုန် သက်သာစွာဖြင့် တစ်နေရာတည်းတွင် အလုပ်ရှင်များ၊ ကုမ္မဏီများနှင့် တွေ့ဆုံကာ တိုက်ရိုက် အင်တာဗျူးများပြုလုပ်ကျင်းပနိုင်ရန် ဒီပွဲကို ပြုလုပ်ကျင်းပရခြင်းဖြစ်ပါတယ် ” ဟုပွဲကျင်းပရသည့်ရည်ရွယ်ချက်ကို ပြောကြားခဲ့ပါသည်။

ဆက်လက်ပြီး အလုပ်အကိုင်နှင့် လူမှုဖူလုံရေးဝန်ကြီးဌာန ပြည်ထောင်စုဝန်ကြီး ဦးအေးမြင့် မှ အလုပ်ကိုင်အခွင့်လမ်းများနှင့်ပတ်သက်ပြီး ရှင်းလင်း တင်ပြခဲ့ပါသည်။ ပြပွဲရက်အတွင်း စီးပွားရေးနယ်ပယ်မှလူသိထင်ရှားအောင်မြင်ကျော်ကြားနေသည့် စီးပွားရေးလုပ်ငန်းရှင်များက လူငယ်များ အတွက် အလုပ်ကိုင်နှင့် ပက်သက်၍ အကြံပေးဆွေးနွေးခြင်း များ၊ CV ဖောင်များလက်ခံခြင်း၊ အင်တာဗျူးများပြုလုပ်ခြင်း၊ အလုပ်အကိုင် ခန့်အပ် ခြင်းများကို ပြုလုပ်သွားမည်ဖြစ်ပါသည်။ အဆိုပါပြပွဲတွင် အလုပ်ကိုင်ပြခန်းပေါင်း ၁၃၀ ကျော်ကို ထည့်သွင်းပြသထားပါကြောင်းသိရပါသည်။

အလုပ်ကိုင်ခွင့်အလမ်းပြပွဲများကို ၂၀၁၁ခုနှစ်မတ်လတွင် UMFCCI တွင် ပထမဆုံးကြိမ်ဖြစ်ပြသခဲ့ပြီး ဒုတိယအကြိမ်အဖြစ်၂၀၁၂ ခုနှစ် သြဂုတ်လ တွင် တပ်မတော်ခန်းမ၌ လည်းကောင်း၊ တတိယအကြိမ်အဖြစ် ၂၀၁၃ခုနှစ် ဇွန်လတွင် တပ်မတော်ခန်းမ၌လည်းကောင်းကျင်းပခဲ့သည်။

ဒီဇင်ဘာ ၁၉၊ ၂၀၁၃
M-Media
ပြည့်ပြည့်

ရန်ကုန် ။        ။   ရန်ကုန်တိုင်း မရမ်းကုန်းမြို့နယ်တွင် ယနေ့ နံနက် ၂း၃၀-နာရီခန့်က မီးလောင်ကျွမ်းမှု တစ်ခုဖြစ်ပွားခဲ့ပြီး အိမ်ခြေ ၁၅-လုံး မီးလောင် ကျွမ်းခဲ့ကြောင်း သိရသည်။

ဖြစ်ပွားပုံမှာ မရမ်းကုန်းမြို့နယ် ၉-ရပ်ကွက်၊ သူရလမ်း၊ အမှတ်-၉၀ အိမ်ရှင် ဒေါ်ခင်သန်း၏နေအိမ်အောက်ထပ်တွင် ငှားရမ်းနေထိုင်သူ ကိုမျိုးမြင့်အောင် မှ နေအိမ်အိပ်ခန်းအတွင်း လျှပ်စစ်မီးပူအား မီးပလပ်ထိုးထားရာမှ အပူလွန်ကဲကာ အကြော်ကြော်ရာတွင် အသုံးပြုသည့် အနီးရှိ ပွဲအိတ်များကို မီးကူးစက်ခဲ့သဖြင့် ၅၅-မိနစ်ခန့် မီးလောင်ကျွမ်းမှုတွင် အဆိုပါအိမ်နှင့် ၀န်းကျင်ရှိ အိမ်ခြေ ၁၅-လုံး မီးလောင်ကျွမ်းခဲ့ခြင်းဖြစ်ပြီး မီးပေါ့ဆသူ ကိုမျိုးမြင့်အောင်အား မရမ်းကုန်းမြို့မ ရဲစခန်းမှ (ပ)၅၁၉/၂၀၁၃၊ ပုဒ်မ ၂၈၅ ဖြင့် အမှုဖွင့် အရေးယူဆောင်ရွက်ထားကြောင်းသိရသည်။

အဆိုပါ မီးလောင်ကျွမ်းမှုကြောင့် ငွေကျပ် ၇၃-သိန်းခန့်ဆုံးရှုံးပြီး၊ အိမ်ထောင်စု ၄၅-စု၊ လူဦးရေ ၂၀၈-ဦး အိုးမဲ့အိမ်မဲ့ဖြစ်ကာ မစိုးရိမ်ဘုန်းကြီး ကျောင်းဝင်း အတွင်း ဓမ္မာရုံတွင် ကယ်ဆယ်ရေးစခန်းဖွင့်လှစ်ထားပြီး ၎င်းဒုက္ခသည်များအတွက် ကူညီရေးများ လုပ်ဆောင်လျက်ရှိသည်။

ကိုးကား ။  ရန်ကုန်တိုင်းရဲတပ်ဖွဲ့ အင်တာနက်စာမျက်နှာ