ဇန်န၀ါရီ ၃၊ ၂၀၁၇
M-Media
၂၀၁၆ အောက်တိုဘာ ၃ ရက် မြန်မာနိုင်ငံ အရှေ့မြောက်ပိုင်း ၀ ပိုင်နက်ရှိ ပန်ဆန်းမြို့ပြင် ရွာတစ်ရွာ၏ပွဲတော်ကို ရိုးရာဝတ်စုံဖြင့် တက်ရောက်နေသူများ
– တရုတ်ပြည်သည် ၎င်း၏ထိန်းချုပ်မှုလက်တံကို မြန်မာနိုင်ငံ၏ အင်အားအကြီးဆုံး တိုင်းရင်းသား လက်နက်ကိုင်အုပ်စု၏ ကိုယ်ပိုင်အုပ်ချုပ်ခွင့်ရ သီးသန့်နယ်မြေအပေါ်သို့ ဆန့်တန်းနေလျက်ရှိကြောင်း ဒေသခံရင်းမြစ်များက ရိုက်တာသတင်းဋ္ဌာနသို့ ပြောကြားသည်။
ကိုယ်ပိုင်နယ်မြေအဖြစ် ကြေငြာထားသော ၀ပြည်နယ်၏ နိုင်ငံခြားရေးမူဝါဒကို ဘေဂျင်းမှ အနီးကပ် စောင့်ကြည့်ထားသည်။ အုပ်ချုပ်ရေးပိုင်းတွင် ထိပ်တန်းအရာရှိများက အင်အား သုံးသောင်းရှိသော သွေးစည်းညီညွတ်သည့် ၀ပြည်တပ်မတော်- UWSA အား ထိန်းချုပ်ပဲ့ကိုင်ထားသည်။ အနောက်တိုင်းအစိုးရများနှင့်လည်း အဆက်အသွယ် ရှိကြသည်။ စီးပွားရေးနှင့် အကူအညီပေးရေးအုပ်စုများကိုလည်း အထိပါးမခံကြချေ။
မြန်မာနိုင်ငံအနေဖြင့် အထူးဒေသ ၂ အဖြစ် သိရှိထားကြသော ဝေလံခေါင်သီလှသည့် ယင်းနယ်မြေပိုင်နက်သည် ဘယ်လ်ဂျီယံနိုင်ငံမျှ အကျယ်အ၀န်းရှိပြီး လူဦးရေ ၆ သိန်း နေထိုင်လျက်ရှိသည်။ ဆယ်စုနှစ်များစွာ အနောက်တိုင်းသားတို့နှင့် နီးစပ်မှု ကျယ်ကျယ်ပြန့်ပြန့်ရှိရကား အောက်တိုဘာလအတွင်း ရိုက်တာသတင်းဋ္ဌာနက ထိုဒေသသို့ ရောက်ရှိနိုင်ခဲ့သည်။
ပြည်နယ်မြို့တော် ပန်ဆန်းတွင် မန်ဒရင်း(နိုင်ငံတကာသုံး တရုတ်ဘာသာစကား)သုံး လမ်းညွှန်များ၊ နေရာအနှံ့နီးပါး တွေ့ရသည့် တရုတ်စီးပွားရေးလုပ်ငန်းနှင့် ငွေကြေးဆိုင်ရာစာရွက်စာတမ်းများဖြင့် တရုတ်ပြည်၏လွှမ်းမိုးမှုမှာ တမဟုတ်ချင်း သိသာလွန်းလာသည်။
ဝတို့၏နိုင်ငံရေးအပေါ် တရုတ်တို့၏လွှမ်းမိုးမှုအကြောင်း မေးမြန်းသည်၌ ၀ ပြည်ပရေးရာဋ္ဌာန အကြီးအကဲ Zhao Guo An က “ကျွန်တော်တို့တစ်တွေအသုံးပြုတဲ့ ဘာသာစကားချင်း တူညီတယ်၊ အပြန်အလှန် ထိမ်းမြားမှု ပြုကြတယ်။ ဒါနဲ့ပတ်သက်ပြီး ကျွန်တော်တို့ ဘာမှမတတ်နိုင်ဘူး။ ကျွန်တော်တို့ တရုတ်ငွေကို အသုံးပြုကြတယ်၊ တရုတ်စကားပြောဆိုကြတယ်၊ တရုတ်ပြည်ထုတ်ကုန်တွေကို ဆင်ယင်အသုံးပြုကြတယ်။ မြန်မာပစ္စည်းဆိုတာ မရှိသလောက် ရှားပါးပါတယ်” ဟု ဖြေကြားသည်။
နှိုက်နှိုက်ချွတ်ချွတ် စူးစမ်းကြည့်လျှင် စီးပွားရေး၊ လူမှုရေးပတ်သက်မှုများထက် ပိုလွန်နေသော တရုတ်ပြည်၏ လက်တံကို တွေ့ရပေမည်။
စောင့်ကြည့်ခြင်းနှင့် နားစွင့်ခြင်း
——————————-
ဝပြည်နယ်စိုက်ပျိုးရေးဝန်ကြီး Lo Yaku အား ပြည်နယ်တွင်း မူးယစ်ဆေးများ အလုံးအရင်း ထုတ်လုပ်နေမှုသတင်းအပေါ် မေးမြန်းရာ သူ၏အတွင်းရေးမှူးနှင့် ၀ သတင်းဗျူရိုဝန်ထမ်းဖြစ်သူ I Feng က “ဒီမေးခွန်းကို မနေ့ကလည်း ဖြေကြားပြီးပါပြီ” ဟူ၍ ၀င်ရောက်စကားလွှဲခဲ့သည်။ သူတို့နှစ်ဦးစလုံးသည် ဒေသခံများမဟုတ်၊ တရုတ်ပြည်မှ လာရောက်သူများဖြစ်၏။
“မူးယစ်ဆေးတိုက်ဖျက်မှုကမ်ပိန်းပြီးဆုံးတဲ့နောက် ကျွန်တော်တို့အစိုးရအနေနဲ့ အဖွဲ့အစည်းတွေရော လူတစ်ဦးချင်းကိုရော တရုတ်ရင်းနှီးမြှုပ်နှံသူလုပ်ငန်းရှင်များကိုရော မူးယစ်ဆန့်ကျင်ရေးလှုပ်ရှားမှုထဲ ပါဝင်ကြဖို့ တိုက်တွန်းထားပြီးဖြစ်တယ်” ဟု ၀န်ကြီး၏နောက်ထပ်အတွင်းရေးမှူး ဖြစ်သူ တရုတ်ပြည်အရှေ့ဖျားကမ်းခြေရှိ ရှီကျန်းပြည်နယ်သား Chen Chun က ဆိုသည်။
ဝပြည်နယ်ထဲ ပထမဆုံး ၀င်ရောက်၍ သတင်းယူခွင့်ရခဲ့သော ရိုက်တာသတင်းအဖွဲ့က စစ်တပ်၏ထောက်ပံ့မှုမှသည် မူးယစ်စိတ်ကြွဆေးများအကြောင်းအထိ မေးမြန်းရာတွင်လည်း အလားတူအတိုင်း ၀၀န်ကြီး၏ တိုက်ရိုက်စကားမဟုတ်ဘဲ သူ့အား အဖော်ပြုနေသည့် တရုတ်ကိုယ်ရံတော်တစ်ဦးဦးထံမှ ပြန်ကြားခြင်းကို တွေ့မြင်ကြားသိခဲ့ရသည်။
ပန်ဆန်းအုပ်ချုပ်ရေးရပ်ဝန်းအတွင်း လုပ်ကိုင်နေကြသော ၎င်းတို့နှင့်အတူ အခြားတရုတ်နိုင်ငံသားများကို တွေ့ရသည့်အပေါ် သူတို့မှာ ၀အစိုးရ၏၀န်ထမ်းများသာဖြစ်ပြီး ဘေဂျင်းအတွက် အလုပ်လုပ်နေသူများမဟုတ်ကြဟု ရိုက်တာအား ပြောပြသည်။ သို့သော် သူတို့၏အနေအထားများက ၀ပြည်နယ်နှင့်ခေါင်းဆောင်များမှာ အိမ်နီးချင်းနိုင်ငံနှင့် လုံးထွေးနေကြောင်း မသိမသာဖော်ကျူးလျက်ရှိသည်။
“အစိုးရအဖွဲ့နဲ့ စီးပွားရေးလုပ်ငန်းအပြင် နေရာတိုင်းမှာ အနောက်တိုင်းနဲ့ အနီးကပ်ဆက်ဆံမှုမှန်သမျှအပေါ် တရုတ်ပြည်က စောင့်ကြည့်နားစွင့်နေသူတွေ ရှိနေကြတယ်။ ဒါမျိုးကို ကျွန်တော်တို့ အထူးသတိထားရတယ်။ တရုတ်ပြည်ရဲ့အမျက်မသင့်စေဖို့ပါ။ ၀ါရှင်တန်၊ ဘရပ်ဆဲလ်နဲ့ ဆက်ဆံရေးတွေအပြင် ၀နယ်မြေထဲဝင်ရောက်လာတဲ့ NGO တွေ၊ နိုင်ငံခြားသားမှန်သမျှအပေါ် မျက်စေ့ဒေါက်ထောက်စောင့်ကြည့်ပြီး တရုတ်ပြည်ကို သတင်းပို့လေ့ရှိပါတယ်” ဟု ထိလွယ်ရှလွယ်အရေးကြောင့် အမည်မဖော်လိုသူ ၀အစိုးရ၀န်ကြီးတစ်ဦးက ပြောပြသည်။
ရိုက်တာ၏မေးခွန်းတစ်ခုကိုဖြေကြားရာတွင် တရုတ်နိုင်ငံခြားရေးဝန်ကြီးက တရုတ်ပြည်သည် နွေးထွေးရင်းနှီးလှသည့် အိမ်နီးချင်းဖြစ်ကြောင်း၊ မြန်မာနိုင်ငံ၏ အချုပ်အခြာနှင့် ပိုင်နက်ကို လေးစားမှုရှိကြောင်း၊ မြန်မာ့ပြည်တွင်းရေးကိုလည်း ၀င်ရောက်စွက်ဖက်မှုမရှိကြောင်း ပြောကြားခဲ့သည်။
တံခါးဖွင့်ခြင်း၏နောက်ကွယ်
————————–
ဗမာပြည်ကွန်မြူနစ်ပါတီ CPB သည် တိုင်းရင်းသားစစ်တပ်များအဖြစ် ပြိုကွဲသွားပြီးနောက် ၀ပြည်နယ်ကို ၁၉၈၉ ခုနှစ်တွင် တည်ထောင်သည်။ ၎င်းအချိန်မှစပြီး မြန်မာဗဟိုအစိုးရဖက်တိမ်းညွှတ်သော UWSA က ကိုယ်ပိုင်အုပ်ချုပ်ခွင့်ရနယ်မြေအဖြစ် သတ်မှတ်ခဲ့သည်။
ဝအစိုးရ၏၀န်ကြီးနှစ်ဦး၏အဆိုအရ ဘေဂျင်းဖက်မှ တိုက်တွန်းမှုကြောင့် နိုင်ငံခြားဂျာနယ်လစ်များအုပ်စုငယ်တစ်ခုအား လာရောက်ရန် ရှားရှားပါးပါး ဖိတ်ခေါ်ချက် ဖြစ်လာခဲ့သည်။ ဤတွင် ဒီမိုကရေစီခေါင်းဆောင် ဒေါ်စုကြည် ဦးဆောင်သော အရပ်သားအစိုးရသစ်အပေါ် ရည်ရွယ်ချက်ရှိရှိ ထိခိုက်မှု အနည်းငယ်ရှိလာသည်။
ဝ နှင့်အတူ အခြားလက်နက်ကိုင်အုပ်စုများနှင့် သဘောတူညီချက်တစ်ရပ် ရယူနိုင်ရေးမှာ ဒေါ်စုကြည်၏ အကြီးမားဆုံး စိန်ခေါ်ချက်တစ်ရပ်ဖြစ်၏။ သူမသည် ဆယ်စုနှစ်များစွာကြာမြင့်နေသော တိုင်းရင်းသားပဋိပက္ခ အဆုံးသတ်ရေး၊ ၎င်းနှင့်တွဲပါနေသော မြန်မာ့ဥပဒေမဲ့နယ်စပ်ဒေသများရှိ မူးယစ်ဆေးထုတ်လုပ်ရေးဆိုင်ရာ ရှုပ်ထွေးပွေလီသည့် ပြဿနာများကို ဆုပ်ကိုင်ထားရသည်။
USWA သည် မြန်မာစစ်တပ်နှင့် နှစ်များစွာ တိုက်ပွဲဖြစ်ပွားမှု မရှိသလို၊ ၎င်း၏ခေါင်းဆောင်များသည် အမေရိကန်နှင့် အနောက်နိုင်ငံမှ မူးယစ်စိတ်ကြွဆေးများကို ပင်တိုင်ထုတ်လုပ်သည်ဆိုသော စွပ်စွဲချက်မျာအပေါ်ငြင်းပယ်ထားသည်။ ဒေါ်စုကြည်၏ ငြိမ်းချမ်းရေးလုပ်ငန်းစဉ်ထဲ အတွင်းကျကျ ပါဝင်ခြင်းကိုလည်း တိမ်းညွှတ်စပြုနေသည်။
“ကျွန်တော်တို့အတွက် တံခါးဖွင့်ဖို့ အချိန်တန်ပါပြီ။ မြန်မာနိုင်ငံမှာ နိုင်ငံရေးသရုပ်သကန်သစ်တစ်ရပ် ဖြစ်ထွန်းနေပါတယ်။ နိုင်ငံရေးစကားဝိုင်းထဲ ပါဝင်ဖို့၊ ပြင်ပကမ္ဘာကို တံခါးဖွင့်လှစ်ဖို့ ဖြစ်လာရတာပါပဲ” ဟု ၀အစိုးရအရာရှိတစ်ဦးဖြစ်သူ Nyi Rang က ဆိုသည်။
သုတေသီများ၏အဆိုအရ တရုတ်ပြည်၏ ကိုယ်ပိုင်အကျိုးစီးပွားလည်း ထိုအခင်းအကျင်းထဲ ပါဝင်နေ၏။
ဒေါ်စုကြည်သည် ပိတ်ဆို့ခံထားရသော တရုတ်ထောက်ပံ့မှု မြစ်ဆုံဆည်စီမံကိန်းကြီးအား ပြန်လည်စတင်လိမ့်မည်၊ အမေရိကန်၏ပိတ်ဆို့မှု ဖယ်ရှားပြီးနောက် အနောက်တိုင်းပြိုင်ဖက်များထံ လမ်းပွင့်သွားတော့မည့် နိုင်ငံတွင်း သယံဇာတဆိုင်ရာ အကျိုးစီးပွားတို့ကိုလည်း ကာကွယ်လိုလျက်ရှိသည်ဟု ဘေဂျင်းက မျှော်မှန်းထား၏။
“တရုတ်ပြည်ဟာ မြန်မာနိုင်ငံထဲ ရှုပ်ထွေးလှတဲ့ ကစားကွက်တစ်ခုကို ခင်းကျင်းနေပါတယ်။ မြန်မာနိုင်ငံရဲ့ အတိုင်းအတာတစ်ရပ်ထိရှိတဲ့ သူတို့ရဲ့စီးပွားရေး၊ ရောင်းဝယ်ဖောက်ကားမှုနဲ့ မဟာဗျူဟာဆိုင်ရာအကျိုးစီးပွားများအပေါ် ကာကွယ်ဖို့၊ လက်တံဆန့်တန်းဖို့ တရုတ်ပြည်က ရည်ရွယ်ဦးတည်ထားခဲ့တယ်။ တစ်ချိန်တည်းမှာပဲ သူတို့ရဲ့ အနောက်တောင်ဖက် နယ်စပ်ဒေသများတစ်လျှောက် မသိမသာ ၀င်ရောက်လာတဲ့ အနောက်တိုင်း သို့မဟုတ် ဂျပန်ရဲ့ အကျိုးစီးပွားတွေကိုလည်း တားဆီးထားနိုင်ဖို့ ဖြစ်ပါတယ်။ ဒီကြိုးရှည်ရှည်လှန်တဲ့ ကစားကွက်ထဲမှာ UWSA ဟာ သွေးစည်းညီညွတ်တဲ့ တိုင်းရင်းသားတပ်ပေါင်းစု ဖြစ်လာရေးအတွက် သံတမန်နည်းလမ်းမကျတဲ့ – အကြီးအကျယ် သြဇာလွှမ်းမိုးထားတဲ့ – မြှောက်ထိုးပင့်ကော်လုပ်ထားတဲ့ – စစ်ရေးအရ ကိုယ်တိုင်ပါဝင်ခြင်းကို ခေါင်းရှောင်ထားတဲ့ ငါးစာတစ်ခု ဟုတ်မဟုတ်ဆိုတာ မေးစရာမလိုလောက်အောင်ပါပဲ” ဟူ၍ လုံခြုံရေးအတိုင်ပင်ခံအဖွဲ့ IHS-Jane’ မှ ဘန်ကောက်အခြေစိုက်သုတေသီ Anthony Davis က ဆိုသည်။
လက်နက် အရောင်းအ၀ယ်များ
—————————–
ဝပြည်နယ်လေးသည် ခဲမဖြူ၊ အဖြိုက်နက် စသော သတ္ထုများနှင့် ရာဘာများကို ပြည်ပပို့ကုန်ပို့နိုင်ရေးအတွက် တရုတ်ပြည်အား အလွန်အကျွံ မှီခိုအားထားလျက်ရှိသည်။
အစိုးရပိုင်းရာထူးများကို ၀င်ရောက်နေရာယူထားသလို ယူနန်ပြည်နယ်မှ တရုတ်နိုင်ငံသားတို့က ဒေသတွင်းဈေးကွက်ထဲတွင် လွှမ်းမိုးထား၏။ ထို့အပြင် ၀ လူကုံထံများက သူတို့၏ကလေးငယ်များကို တရုတ်ကျောင်းများသို့လည်းကောင်း၊ သက်ကြီးရွယ်အိုများကို တရုတ်ဆေးရုံများသို့လည်းကောင်း ပို့ဆောင်နေပေသည်။
“ဒီနေရာမှာ ကျွန်တော်တို့ ဘာကိုမှ မထုတ်လုပ်ပါဘူး။ လုပ်သား၊ အစားအသောက်၊ အ၀တ်အထည်နဲ့ အသုံးပြုစရာတွေအားလုံးက တရုတ်ပြည်ကပဲ ဖြစ်တယ်။ စနေနေ့မနက်တိုင်း တောင်သူဈေးရှိတယ်ဆိုပေမယ့် အဲ့ဒီက ပျံကျဈေးသည်အများစုက တရုတ်ပြည်က လာရောက်ရောင်းချကြတယ်” ဟု ၀နယ်စပ်မှ နန်းသစ်မြို့ ခရိုင်မှူးက ပြောပြသည်။
တရုတ်ပြည်သည် လက်နက်ပစ္စည်းမျိုးစုံကို ၀ ထံသို့ ရောင်းချထားကြောင်း IHS-Jane’s Defence Weekly ကဲ့သို့သော စာစောင်၌ ကျွမ်းကျင်သူများက ကနဦးကပင် တင်ပြထားခဲ့သည်။ အမည်မဖော်လိုသည့် ၀ ၀န်ကြီးတစ်ဦးက ယင်းသတင်းနှင့်ဖြစ်စဉ်အချို့ကို ပထမဆံုးအကြိမ်အဖြစ် အတည်ပြုပြောကြားလိုက်သည်။
“၀ပြည်နယ်က စစ်သုံးထရပ်ကားတွေကို တရုတ်ပြည်ကနေ တိုက်ရိုက် ၀ယ်ယူခဲ့တယ်။ တရုတ်ပြည်ထွက် လက်နက်ငယ်တွေကိုတော့ လာအိုကတဆင့် ၀ယ်ယူခဲ့ခြင်းဖြစ်တယ်။ ဒီလက်နက်တွေထဲမှာ ရိုင်ဖယ်သေနတ်၊ အမြောက်တွေလည်း ပါဝင်ပါတယ်။ တရုတ်ပြည်အနေနဲ့ တိုက်ရိုက်မရောင်းချခြင်းက မြန်မာနိုင်ငံနဲ့ မျက်နှာမပျက်ချင်လို့ပဲ ဖြစ်ပါတယ်”။
တရုတ်ကာကွယ်ရေးဝန်ကြီးကမူ ၀တို့ထံ လက်နက်ရောင်းချခြင်းကို ငြင်းဆိုထား၏။
“တရုတ်နိုင်ငံအဖို့ မိမိရဲ့ဆက်နွှယ်တိုင်းပြည်ရဲ့ လတ်တလောကာကွယ်ရေးလိုအပ်ချက်အကျိုးဖြစ်တဲ့ ပြည်ပပို့ကုန်စစ်လက်နက်ပစ္စည်းဆိုင်ရာ မူဝါဒကို အစဉ်တစိုက် တင်းတင်းကြပ်ကြပ် လိုက်နာဆောင်ရွက်နေပါတယ်။ ဒီမူဝါဒဟာ ဒေသတွင်းနဲ့ ကမ္ဘာ့ငြိမ်းချမ်းရေး၊ လုံခြုံရေးနဲ့ တည်ငြိမ်မှုကို မထိခိုက်စေတဲ့၊ ဒီတိုင်းပြည်တွေရဲ့ ပြည်တွင်းရေးရာတွေအပေါ် ၀င်ရောက်မစွက်ဖက်တဲ့ မူဝါဒတစ်ခုဖြစ်ပါတယ်” ဟူ၍ သူက ရိုက်တာသို့ ပြောကြားခဲ့သည်။
(Antoni Slodkowski နှင့် Yimou Lee ရေးသားသော ရိုက်တာသတင်းဋ္ဌာနဆောင်းပါး Through reclusive Wa, China’s reach extends into Suu Kyi’s Myanmar ကို မြင့်မိုရ်မောင်မောင်မှ ဆီလျော်အောင် ပြန်ဆိုသည်။)
.
