ဒီဇင်ဘာ ၂၈၊ ၂၀၁၆
M-Media
– အစိုးရတပ်များနှင့် ကုလက အကြမ်းဖက်အဖွဲ့အစည်းဟု ကြေငြာထားသည့် အဖွဲ့များအကြား တိုက်ခိုက်နေသည့် နေရာများမှလွဲ၍ ဆီးရီးယားနိုင်ငံတစ်ဝှမ်းတွင် အပစ်ရပ်ရေးအတွက် တူရကီနှင့် ရုရှားတို့က သဘောတူညီခဲ့ကြသည်ဟု သိရသည်။
အဆိုပါသဘောတူညီမှုကို Anadolu သတင်းအေဂျင်စီက ယနေ့တွင် ဖော်ပြခဲ့ခြင်းဖြစ်ပြီး လက်ရှိတွင် အပစ်ရပ်ရေးအစီအစဉ်ကို ဆီးရီးယား၏ ပြိုင်ဘက်အဖွဲ့များထံ တင်ပြထားကာ ယနေ့ညသန်းခေါင်ယံ GMT ၂၂ နာရီတွင် အသက်ဝင်မည်ဟု ပြောကြားခဲ့သည်။
အမည်မဖော်လိုသည့် သတင်းရင်းမြစ်ကမူ အဆိုပါ အပစ်ရပ်ရေး သဘောတူညီချက်တွင် အကြမ်းဖက်အဖွဲ့အစည်းများ မပါကြောင်း ယခုအပစ်ရပ်ရေး အောင်မြင်ပါက တူရကီနှင့် ရုရှားတို့၏ လမ်းညွှန်မှုဖြင့် ကာဇက်စတန်နိုင်ငံ အက်စ်တာနာမြို့တွင် နိုင်ငံရေးဆွေးနွေးပွဲ ပြုလုပ်သွားမည်ဖြစ်ကြောင်း ပြောကြားခဲ့သည်။
ဆီးရီးယား အတိုက်အခံခေါင်းဆောင်တစ်ဦးဖြစ်သူ ဆာမီ နက်စ်ဟာရ်ကမူ ထိုကဲ့သို့ အပစ်ရပ်ရေးကို အကောင်အထည်ဖော်မှုမှာ တူရကီအစိုးရက ဆောင်ရွက်နေသည့် ကြိုးပမ်းအားထုတ်မှုများထဲမှ အကြီးဆုံးဖြစ်သည်ဟု ချီးကျူးခဲ့သည်။
တူရကီ၊ ရုရှားနှင့် အီရန်တို့မှာ ပြီးခဲ့သည့်သီတင်းပတ်က မော်စကို၌ တွေ့ဆုံခဲ့ပြီး အာဆတ်အစိုးရနှင့် အတိုက်အခံများအကြား ငြိမ်းချမ်းရေးအတွက် အာမခံပေးသူများအဖြစ် ဆောင်ရွက်သွားမည်ဟု သဘောတူညီခဲ့သည်။
Ref: Aljazeera
