အောက်တိုဘာ ၁၁၊ ၂၀၁၆
M-Media
– အစ္စရေးအနေဖြင့် ပါလက်စတိုင်းပိုင်နက်များအား သိမ်းယူခြင်း၊ ပါလက်စတိုင်းပိုင်နက်တွင် တရားမ၀င် အခြေချအိမ်ယာများ တည်ဆောက်ခြင်းတို့နှင့် ပတ်သက်၍ ကုလသမဂ္ဂလုံခြုံရေးကောင်စီမှာ ယခုလနှောင်းပိုင်းတွင် အထူးဆွေးနွေးမှုနှစ်ခု ပြုလုပ်သွားမည်ဟု ပါလက်စတိုင်း နိုင်ငံခြားရေးဝန်ကြီးက ပြောကြားခဲ့သည်။
“ဒီပြဿနာအတွက် ပါလက်စတိုင်းဘက်က ခိုင်ခိုင်မာမာ ပြောကြားသွားမှာပါ။ အစ္စရေးက အရေးမလုပ်တဲ့ နိုင်ငံတကာက ရှုတ်ချကြောင်း ကြေငြာချက်တွေကို ကျွန်တော်တို့ ထပ်ပြီး လက်မခံတော့ပါဘူး။ အဲဒီကြေငြာချက်တွေက ပါလက်စတိုင်းနိုင်ငံ ထူထောင်ဖို့ဆိုတဲ့ အလားအလာတွေကို မှေးမှိန်စေတဲ့ အစ္စရေးရဲ့ လုပ်ရပ်တွေကိုသာ ပိုမြန်သွားစေတာပါ” ဟု ၀န်ကြီး အလ်-မာလီကီက ယမန်နေ့တွင် ပြောကြားခဲ့သည်။
အောက်တိုဘာ ၁၅ ရက်နေ့နှင့် ၂၄ ရက်နေ့တွင် ကျင်းပပြုလုပ်မည့် အဆိုပါ အထူးအစည်းအဝေးများ၌ ပါလက်စတိုင်းပိုင်နက်များအတွင်း အစ္စရေးက ဆောက်လုပ်ထားသည့် တရားမ၀င်အခြေချအိမ်ယာများကို ဆန့်ကျင်သည့် ဆုံးဖြတ်ချက်မူကြမ်းကို တင်သွင်းသွားမည်ဟုလည်း ၎င်းက ထည့်သွင်းပြောကြားခဲ့သည်။
အဆိုပါအစည်းအဝေးတွင် အဓိကထားမည့် အကြောင်းအရင်းနှင့်ပတ်သက်၍ ကနဦးဆွေးနွေးမှုများ စတင်ပြုလုပ်နေပြီး၊ ပါလက်စတိုင်းတာဝန်ရှိသူများမှာ အီဂျစ်၊ ဆော်ဒီ၊ ယူအေအီး၊ ဘာရိန်းနိုင်ငံတို့နှင့်အတူ ဆုံးဖြတ်ချက်မူကြမ်းကို ပြင်ဆင်နေသည်ဟု ၎င်းက ဆိုသည်။
၁၉၆၇ ခုနှစ်နောက်ပိုင်းကတည်းက အစ္စရေးမှာ ပါလက်စတိုင်းပိုင်နက်များတွင် တရားမ၀င်အခြေချအိမ်ယာများ ဆောက်လုပ်လာခဲ့ပြီး လက်ရှိတွင် အဆိုပါအိမ်ယာပေါင်း ၂၃၀ ၌ နေထိုင်သူမှာ သန်းဝက်ကျော် ရှိလာခဲ့ပြီဖြစ်သည်။
နိုင်ငံတကာဥပဒေအရ ထိုအိမ်ယာများမှာ တရားမ၀င်ဘဲ ရပ်တန့်ရန် နိုင်ငံတကာ၏ တောင်းဆိုမှုများကိုလည်း အစ္စရေးက လိုက်နာခဲ့ခြင်းမရှိသည်သာမက တိုးချဲ့ဆောက်လုပ်မှုများပင် ပြုလုပ်ခဲ့သည်။ ထိုကိစ္စကြောင့် ၂၀၁၄ ခုနှစ်တွင် ပြုလုပ်ခဲ့သည့် အစ္စရေး-ပါလက်စတိုင်း ငြိမ်းချမ်းရေးဆွေးနွေးပွဲမှာ ပျက်ပြယ်ခဲ့ကြသည်။
Ref: Press TV
