Blog

မတ် ၄၊ ၂၀၂၂
M-Media

-စစ်ခေါင်းဆောင်တွေ ဝင်ငွေအဓိကရနေတဲ့ စီးပွားရေးဦးပိုင်လီမိတက် (MEHL) ရုံးချုပ်အဆောက်အဦးကို နေပြည်တော်မှာ ဆောက်လုပ်နေပြီး လုံခြုံရေးအခြေအနေ စိုးရိမ်ရတဲ့အတွက်ဖြစ်တယ်လို့ ဒီကိစ္စနဲ့ နီးစပ်သူတွေက မီဒီယာကို ပြောပါတယ်။

မြန်မာ့စီးပွားရေး ကော်ပိုရေးရှင်း (MEC) နဲ့ MEHL တို့ဟာ စစ်ခေါင်းဆောင်​တွေ ထိန်းချုပ်ထားတဲ့ လုပ်ငန်းစုတွေဖြစ်ပြီး ဒေါ်လာဘီလီယံချီရတဲ့ လုပ်ငန်းတွေအပါအဝင် မြန်မာနိုင်ငံက စီးပွားရေးလုပ်ငန်း တော်တော်များများကို လုပ်ကိုင်နေတာဖြစ်ပါတယ်။

ဒီလုပ်ငန်းစုက ရရှိတဲ့ဝင်ငွေတွေဟာ စစ်တပ်ရဲ့ လူ့အခွင့်အရေးချိုးဖောက်မှုတွေ၊ ပြည်သူလူထုအပေါ် နှိပ်စက်ညှင်းပမ်းမှုတွေကို အထောက်အကူပြုနေတယ်လို့ နိုင်ငံတကာအဖွဲ့အစည်းတွေက ထောက်ပြ ဝေဖန်ထားပါတယ်။

MEHL က လုပ်ကိုင်နေတဲ့ လုပ်ငန်းတွေထဲမှာ မြ၀တီဘဏ်နဲ့ စစ်တပ်အငြိမ်းစားရန်ပုံငွေလုပ်ငန်းတွေ ပါဝင်ပြီး ရုံးချုပ်တွေက ရန်ကုန်မြို့ ဗိုလ်တစ်ထောင်မြို့နယ်မှာ ရှိနေတာဖြစ်ပါတယ်။

နေပြည်တော် ဥတ္တရသီရိမြို့နယ် မန္တလေးလမ်းမှာ MEHL က ၁၀ ထပ် ရုံးချုပ်အဆောက်အဦးတစ်ခု ဆောက်လုပ်နေတယ်လို့ အငြိမ်းစားဗိုလ်မှူးတစ်ဦးအပါအဝင် ရင်းမြစ်နှစ်ခုက ဧရာ၀တီသတင်းဌာနကို ပြောကြားခဲ့ပါတယ်။

တည်ဆောက်နေတဲ့နေရာဟာ နေပြည်တော်က လူစည်ကားတဲ့နေရာတစ်ခုလည်း ဖြစ်ပါတယ်။ ဆောက်လုပ်မှုကို ဇန်နဝါရီက စတင်ခဲ့ပြီး လက်ရှိမှတော့ ဖောင်ဒေးရှင်းပိုင်း ပြီးသွားပြီလို့ ဒေသခံတွေက အတည်ပြု ပြောဆိုပါတယ်။

နေပြည်တော်ကသာ သူတို့အကျိုးစီးပွားကို လုံခြုံစေမယ့် နေရာဖြစ်တယ်လို့ စစ်ကောင်စီက ယူဆတဲ့အတွက် ဒီလိုရွှေ့ပြောင်းတာဖြစ်မယ်လို့ အငြိမ်းစားဗိုလ်မှူးက ပြောကြားခဲ့ပါတယ်။

၂၀၂၁ ခုနှစ် ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း ပြည်သူလူထုဟာ စစ်တပ်ပိုင် စီးပွားရေးလုပ်ငန်းတွေကို အဓိကထား ဆန့်ကျင် သပိတ်မှောက်လာကြပြီး တိုက်ခိုက်ဖျက်ဆီးမှုတွေပါ ရှိလာတာ ဖြစ်ပါတယ်။

Ref: Irrawaddy English

မတ် ၂၊ ၂၀၂၂
M-Media

-နော်၀ေ ဆက်သွယ်ကုမ္ပဏီ Telenor က မြန်မာနိုင်ငံမှာရှိတဲ့ သူတို့ရဲ့ ဆက်သွယ်ရေးလုပ်ငန်းကို ရောင်းချရာမှာ မြန်မာဘဏ်တွေမှာ သိမ်းဆည်းထားတဲ့ ကန်ဒေါ်လာ သန်း ၁၀၀ လွှဲပြောင်းပေးဖို့လည်း ပါ၀င်တယ်လို့ ဒီကိစ္စနဲ့ နီးစပ်တဲ့ ရင်းမြစ်တွေကို ကိုးကားပြီး ရိုက်တာသတင်းဌာနက ဒီကနေ့မှာ ဖော်ပြပါတယ်။

အာဏာသိမ်းစစ်ကောင်စီနဲ့ ပူးပေါင်းလုပ်ဆောင်ရင် နိုင်ငံတကာအသိုင်းအ၀ိုင်းရဲ့ စီးပွားရေး ပိတ်ဆို့အရေးယူမှု ဒဏ်ကို ခံရမှာ၊ သုံးစွဲသူတွေရဲ့ အချက်အလက်တွေကိုတောင်းတာ၊ ကြားဖြတ်နားထောင်တဲ့ ဆော့ဖ်၀ဲ တပ်ဆင်တာလို လူ့အခွင့်အရေး ချိုးဖောက်မှုတွေ လုပ်ဆောင်ခိုင်းတာ၊ ၀န်ထမ်းတွေရဲ့ လုံခြုံရေးကို စိုးရိမ်ရတာတွေကြောင့် မြန်မာနိုင်ငံက ဆက်သွယ်ရေးလုပ်ငန်း ‘တယ်လီနောမြန်မာ’ ကို ရောင်းချတော့မယ်လို့ Telenor က ပြီးခဲ့တဲ့နှစ်မှာ ကြေငြာခဲ့ပါတယ်။

အစပိုင်းက လက်ဘနွန်အခြေစိုက် M1 ကုမ္ပဏီကို ဒေါ်လာ ၁၀၅ သန်းနဲ့ ရောင်းချမယ်လို့ ပြောခဲ့ပေမယ့် စစ်ကောင်စီက သူတို့နဲ့ နီးစပ်တဲ့ ‘ရွှေဗျိုင်းဖြူ ကုမ္ပဏီ’ နဲ့ ပူးတွဲ၀ယ်ယူဖို့ ညွှန်ကြားခဲ့ပါတယ်။ အဲဒီအထဲက ၅၅ သန်းကို ချက်ခြင်းပေးချေရမှာ မဟုတ်ဘဲ နောက်ထပ် ၅ နှစ်အတွင်း ပေးချေရမှာ ဖြစ်ပါတယ်။

ဒီအရောင်းအ၀ယ်နဲ့ နီးစပ်သူ ၃ ဦးက မြန်မာဘဏ်တွေမှာ အပ်နှံထားတဲ့ တယ်လီနောရဲ့ ၀င်ငွေ သန်း ၁၀၀ ကို ပိုင်ရှင်အသစ်တွေထံ လွှဲပြောင်းပေးရေးလည်း သဘောတူညီချက်မှာ ပါ၀င်တယ်လို့ ရိုက်တာသတင်းဌာနကို ပြောကြားခဲ့ပါတယ်။ ဒီအချက်ဟာ Telenor က မြန်မာနိုင်ငံကနေ အလျင်အမြန်ထွက်သွားဖို့ ကြိုးစားနေမှုကို မီးမောင်းထိုးပြနေတာလည်း ဖြစ်ပါတယ်။

လက်ရှိမှာ ဒီအရောင်းအ၀ယ်ကို စစ်ကောင်စီရဲ့ ကုန်သွယ်ရေးဌာနက အတည်ပြုထားပြီး၊ ပြည်ပ ရင်းနှီးမြှုပ်နှံမှုဌာနရဲ့ ခွင့်ပြုချက်ကို စောင့်ဆိုင်းနေတာ ဖြစ်ပါတယ်။

အခုပေါက်ကြားလာတဲ့ ဒေါလာ သန်း ၁၀၀ ကိစ္စကို Telenor က ဖြေကြားဖို့ ငြင်းဆန်ခဲ့ပြီး M1 ကုမ္ပဏီကလည်း ဒါဟာ အခြေအမြစ်မရှိတဲ့စကားဖြစ်တယ်လို့ ပြောကြားတုန့်ပြန်ခဲ့ပါတယ်။ ရွှေဗျိုင်းကုမ္ပဏီကလည်း ဖြေကြားဖို့ ငြင်းဆန်ခဲ့ပါတယ်။

Ref: Reuters