အောက်တိုဘာ ၁၆၊ ၂၀၁၅
M-Media
– ရင်သားကင်ဆာနှင့်ပတ်သက်သည့် အသိပညာပေးမှုကို မြှင့်တင်သည့်အနေဖြင့် ဆော်ဒီရှိ တက္ကဆီကုမ္ပဏီတစ်ခုမှာ အမျိုးသမီးခရီးသည်များကို ကင်ဆာနှင့်ပတ်သက်၍ စစ်ဆေးမှုများပြုလုပ်ရန် ဆေးရုံသို့ အခမဲ့လိုက်ပို့ပေးသည့် လှုပ်ရှားမှုကို စတင်ခဲ့သည်ဟု သိရသည်။
Easy Taxi ကုမ္ပဏီနှင့် Zahra Brest Cancer အသင်းတို့ ပူးပေါင်းကာ ဂျစ်ဒါနှင့် ရီယဒ်တို့တွင် ယမန်နေ့က စတင်ဆောင်ရွက်ခဲ့ခြင်းဖြစ်ပြီး ကင်ဆာရှိ၊ မရှိ စမ်းသပ်စစ်ဆေးမှုများကိုလည်း အဆိုပါ ကင်ဆာအသင်းကပင် ဆေးရုံများ၌ အခမဲ့ စစ်ဆေးမှုများ ပြုလုပ်ပေးခြင်းဖြစ်သည်။
“စောစောစီးစီး စမ်းသပ်စစ်ဆေးမှု၊ ပညာပေးမှု၊ ကူညီပံ့ပိုးပေးမှု စတာတွေကို ပြုလုပ်ပေပြီး အမျိုးသမီးတွေ ရင်သားကင်ဆာအန္တရာယ်ကို တွန်းလှန်ဖို့ အခွင့်အရေးပေးတဲ့ Zahra Breast Cancer လို ထိရောက်မှုရှိပြီး၊ လေးစားအားကျဖွယ်ကောင်းတဲ့ အသင်းအဖွဲ့မျိုးနဲ့ ပူးပေါင်းဆောင်ရွက်ခွင့်ရတဲ့တွက် ကျွန်တော်တို့ အင်မတန်မှ ဂုဏ်ယူမိပါတယ်” ဟု ဆော်ဒီ Easy Taxi မှ အထွေထွေမန်နေဂျာ ယူဂျန် ဘရစ်က်စီယက်စ်က ပြောကြားခဲ့သည်။
ထိုဝန်ဆောင်မှုကို ရင်သားကင်ဆာ အသိပညာပေးရေးလ ဖြစ်သော အောက်တိုဘာ လကုန်အထိ ဆောင်ရွက်ပေးသွားမည်ဖြစ်သည်။ အမျိုးသမီးများမှာ ထိုကင်ဆာရောဂါနှင့်ပတ်သက်၍ သတိပြုမိကြသော်လည်း ရောဂါကို စောစောပိုင်းအဆင့်များတွင် သိရှိရန် မကြိုးစားကြပေ။
ကင်ဆာရောဂါ ရှိ၊ မရှိ သွားရောက်စစ်ဆေးရန်အတွက် ဆော်ဒီအမျိုးသမီးများမှာ Easy Taxi အခမဲ့စီးနင်းခွင့်ကို အီမေးလ်ဖြင့် ရယူနိုင်မည်ဖြစ်သည်။
Eazy Taxi တက္ကဆီမှာ ဒီဇင်ဘာတွင်ပြုလုပ်မည့် မြူနီစီပယ်ရွေးကောက်ပွဲ အမျိုးသမီးများ မဲသွားထည့်ရာတွင် ရီယာ့ဒ်၊ ဂျစ်ဒါ၊ ဒန်မမ်နှင့် အလ်-ခိုဘာရ်မြို့များ၌ မဲရုံများသို့ အခမဲ့ ပို့ဆောင်ပေးသွားမည်ဟု ပြီးခဲ့သည့် စက်တင်ဘာလအတွင်း ကြေငြာခဲ့သည်။
Ref: Alarabiya
