ဒီဇင်ဘာ ၁၉၊ ၂၀၂၁
M-Media
-ဥရောပနိုင်ငံတွေမှာ ပုံပြောင်းကိုဗစ် အိုမီခရွန် (Omicron) ကူးစက်မှု သိသိသာသာ မြင့်တက်လာပြီး နယ်သာလန်နိုင်ငံမှာ နိုင်ငံတစ်ဝှမ်း လော့ဒေါင်းပြန်ချခဲ့သလို၊ ဗြိတိန်ကလည်း အနီးကပ်စောင့်ကြည်ရမယ့် အခြေအနေအဖြစ် ကြေငြာခဲ့ပါတယ်။
နယ်သာလန်မှာ တနင်္ဂနွေနေ့ကစလို့ လာမယ့်နှစ် ဇန်နဝါရီ အလယ်ပိုင်းအထိ လော့ဒေါင်းအမိန့် ထုတ်ပြန်လိုက်ပါတယ်။ ခရစ္စမတ်နဲ့ နှစ်သစ်ကူးပွဲတော် လုံး၀ လုပ်လို့ရတော့မှာမဟုတ်သလို၊ စျေးဆိုင်တွေ၊ ဘားတွေ၊ ဖျော်ဖြေရေးစင်တာတွေ၊ အများပြည်သူသုံး အဆောက်အဦးတွေအားလုံးကိုလည်း ပိတ်မှာ ဖြစ်ပါတယ်။
အသုဘကလွဲပြီး အခြားလူစုလူဝေတွေလည်း လုပ်လို့ရမှာ မဟုတ်ပါဘူး။ ဒီကာလအတွင်း ကျောင်းတွေကိုလည်း ပိတ်ထားမှာပါ။
တစ်အိမ်ကို ဧည့်သည်နှစ်ဦးသာ လာရောက်ခွင့်ရှိမှာဖြစ်ပြီး ပွဲတော်ကာလအတွင်း ၄ ဦးထက် မပိုရဘူးလို့ လော့ဒေါင်းစည်းမျဉ်းသစ်မှာ ဖော်ပြထားပါတယ်။ နယ်သာလန်ဝန်ကြီးချုပ် မာ့က်ရက်တီက ဒီလော့ဒေါင်းဟာ လိုအပ်တဲ့အတွက် လုပ်ဆောင်ရတာဖြစ်တယ်လို့ ပြောကြားခဲ့ပါတယ်။
ယူကေမြို့တော် လန်ဒန်မှာ ကိုဗစ်အိုမီခရွန် ကူးစက်ပြန့်နှံ့မှုဟာ စောင့်ကြည့်ရမယ့် စိုးရိမ်စရာပြဿနာဖြစ်တယ်လို့ မနေ့က ကြေငြာခဲ့ပါတယ်။
လန်ဒန်မြို့တော်ဝန် ဆာဒစ်ခန်းက ကိုဗစ်ကူးစက်မှုကြောင့် ဆေးရုံတွေ၊ မီးသတ်နဲ့ ရဲဌာနလို အများပြည်သူ ဝန်ဆောင်မှုကဏ္ဍတွေမှာ ဝန်ထမ်းနည်းပါးကုန်တာဟာ အလွန်အမင်း စိုးရိမ်ဖွယ်ရာဖြစ်တယ်လို့ ပြောကြားခဲ့ပါတယ်။
ကာကွယ်ဆေး ၂ ကြိမ်ထိုးထားပြီးသူတွေ တတိယအကြိမ် Booster ထိုးကြဖို့၊ လုံး၀မထိုးရသေးတွေကလည်း မြန်မြန်လာထိုးကြဖို့ ဆာဒစ်ခန်းက တိုက်တွန်းခဲ့ပါတယ်။ ယူကေမှာ အိုမီခရွန်ကူးစက်မှုဟာ ပြီးခဲ့တဲ့ရက်ပိုင်းမှာ သိသိသာသာ မြင့်တက်လာတာ ဖြစ်ပါတယ်။
ပြင်သစ်၊ အိုင်ယာလန်နဲ့ ဂျာမနီတို့မှာ အိုမီခရွန်ကူးစက်မှု ကာကွယ်ရေး ကိုဗစ်စည်းကမ်းတွေကို ပိုမိုတင်းကြပ်ထားပြီး ပြင်သစ်ဝန်ကြီးချုပ်က လာမယ့်နှစ် ပြင်သစ်မှာ အိုမီခရွန်ကူးစက်မှု အကြီးအကျယ် ဖြစ်ပွားနိုင်ချေရှိတယ်လို့ သတိပေးထားပါတယ်။
ဥရောပမှာ ကိုဗစ်ကူးစက်သူ စုစုပေါင်း ၈၉ သန်းရှိကာ သေဆုံးသူ ၁.၅ သန်း ရှိပါတယ်။
Ref: BBC
