News @ M-Media

Blog

  • စစ်ကောင်စီနှင့် ပူးပေါင်းတိုက်ခိုက်နေမှုကို ရပ်တန့်ရန် အိန္ဒိယသူပုန်များကို မြန်မာတော်လှန်ရေးအဖွဲ့များ သတိပေး

    စစ်ကောင်စီနှင့် ပူးပေါင်းတိုက်ခိုက်နေမှုကို ရပ်တန့်ရန် အိန္ဒိယသူပုန်များကို မြန်မာတော်လှန်ရေးအဖွဲ့များ သတိပေး

    စက်တင်ဘာ ၁၉၊ ၂၀၂၁
    M-Media

    (ဓာတ်ပုံ – မဏိပူရ ခွဲထွက်ရေးအဖွဲ့ PLA ၏ အခမ်းအနားတစ်ခု မြင်ကွင်း)

    -အာဏာသိမ်းစစ်ကောင်စီနဲ့ ပူးပေါင်းပြီး မြန်မာပြည်သူလူထုအပေါ် တိုက်ခိုက်နေတာတွေကို ရပ်တန့်ဖို့အတွက် ပြည်သူ့ကာကွယ်ရေးတပ်ဖွဲ့ (PDF) တွေက အိန္ဒိယ ခွဲထွက်ရေးသူပုန်တွေကို သတိပေးလိုက်ပါတယ်။

    အာဏာသိမ်းမှုဆန့်ကျင်ရေး လူထုလှုပ်ရှားမှုတွေကို စစ်ကောင်စီတပ်တွေက အကြမ်းဖက်နှိမ်နှင်းရာမှာ မြန်မာနိုင်ငံပိုင်နက်အတွင်း အခြေစိုက်လှုပ်ရှားနေတဲ့ မဏိပူရခွဲထွက်ရေးသူပုန်တွေကို အသုံးပြုတယ်ဆိုတဲ့သတင်းတွေ ဧပြီလကတည်းက ထွက်နေတာဖြစ်ပါတယ်။

    အိန္ဒိယနယ်စပ် တမူးမြို့နဲ့ စစ်ကိုင်းတိုင်းဒေသကြီးအတွင်းမှာ လှုပ်ရှားနေတဲ့ ပြည်သူ့ကာကွယ်ရေးတပ်ဖွဲ့ (PDF) တွေက စစ်ကောင်စီနဲ့ ပူးပေါင်းနေတာတွေကို ချက်ခြင်းရပ်တန့်ဖို့အတွက် ပြီးခဲ့တဲ့တစ်ပတ်မှာ မဏိပူရသူပုန်တွေကို သတိပေးခဲ့ပါတယ်။

    “သိပ်မကြာခင်မှာ ကျွန်တော်တို့ အနိုင်ရတော့မယ်လို့ ယုံကြည်တယ်။ ဒီမိုကရေစီ ပြန်လည်ကျင့်သုံးပြီဆိုတာနဲ့ သူပုန်တွေကို မြန်မာနိုင်ငံမှာ လက်မခံတော့ဘူးဆိုတာ ဒီစာနဲ့ အသိပေးလိုပါတယ်။ စစ်ကောင်စီတပ်တွေကို ကူညီနေတာ၊ ပူးပေါင်းဆောင်ရွက်နေတာတွေကို ချက်ခြင်းရပ်တန့်ဖို့ သတိပေးလိုက်ပါတယ်” လို့ PDF အဖွဲ့တွေရဲ့ ကြေငြာချက်မှာ ဖော်ပြထားပါတယ်။

    စစ်ကောင်စီတပ်တွေနဲ့ ပူးပေါင်းဆောင်ရွက်မှု ဆက်လုပ်နေမယ်ဆိုရင် မြန်မာနိုင်ငံမှာ ဒီမိုကရေစီရရှိရေး မလိုလားသူတွေရဲ့စာရင်းထဲကို ထည့်ပြီး နောက်လာနောက်သားတွေကို အသိပေးသွားမယ်လို့လည်း ကြေငြာချက်က ဆိုပါတယ်။

    အိန္ဒိယနိုင်ငံအရှေ့မြောက်ပိုင်းက ပြည်နယ်တွေမှာ ခွဲထွက်ရေးလိုလားတဲ့ သူပုန်အဖွဲ့အစည်းတွေ ရှိနေပြီး အာသံပြည်နယ်က ခွဲထွက်ရေးအဖွဲ့ United Liberation Front of Assam (ULFA)၊ မဏိပူရပြည်နယ်က ခွဲထွက်ရေးအဖွဲ့ People’s Liberation Army of Manipur (PLA) တို့အပါအဝင် တစ်ချို့အဖွဲ့တွေဟာ မြန်မာနိုင်ငံမှာ အခြေစိုက်ထားတယ်လို့ အိန္ဒိယအစိုးရက ဆိုပါတယ်။

    Ref: New Indian Express

  • IS နှင့်ဆက်နွယ်သည့် စစ်သွေးကြွခေါင်းဆောင်တစ်ဦးကို အင်ဒိုနီးရှားက အသေပစ်ခတ်ဖမ်းဆီး

    IS နှင့်ဆက်နွယ်သည့် စစ်သွေးကြွခေါင်းဆောင်တစ်ဦးကို အင်ဒိုနီးရှားက အသေပစ်ခတ်ဖမ်းဆီး

    စက်တင်ဘာ ၁၉၊ ၂၀၂၁
    M-Media

    -IS အကြမ်းဖက်အဖွဲ့နဲ့ ဆက်နွယ်နေတဲ့ စစ်သွေးကြွခေါင်းဆောင်တစ်ဦးကို အသေပစ်ခတ် ဖမ်းဆီးနိုင်ခဲ့တယ်လို့ အင်ဒိုနီးရှားစစ်တပ်က ထုတ်ပြန်ပါတယ်။

    နိုင်ငံအရှေ့ပိုင်း ဆူလာ၀ေစီကျွန်းမှာ စနေနေ့က စစ်တပ်နဲ့ ရဲတပ်ဖွဲ့ ပူးပေါင်းပြီး အကြမ်းဖက်မှု တန်ပြန်စစ်ဆင်ရေး ပြုလုပ်စဥ်အတွင်း East Indonesia Mujahideen (MIT) အဖွဲ့နဲ့အပြန်အလှန် ပစ်ခတ်မှု ဖြစ်ပွားခဲ့ကာ ခေါင်းဆောင် အလီကာလိုရာကို အသေဖမ်းဆီးနိုင်ခဲ့တာပါ။

    “အလီကာလိုရာဟာ အလိုအရှိဆုံး အကြမ်းဖက်ခေါင်းဆောင်ဖြစ်ပြီး MIT ရဲ့ ခေါင်းဆောင်လည်း ဖြစ်ပါတယ်” လို့ ဆူလာ၀ေစီဒေသ စစ်တပ်အကြီးအကဲ ဗိုလ်မှုးချုပ် ဖာရစ် မက်ရက်ဖ်က ပြောပါတယ်။

    အစ်ကရီမာလို့ အမည်တွင်တဲ့ အခြားစစ်သွေးကြွခေါင်းဆောင် ဂျာကာ ရမ်ဒန်လည်း ပစ်ခတ်မှုအတွင်း သေဆုံးခဲ့ပြီး အခြား ၄ ဦးကို လိုက်လံရှာဖွေနေတယ်လို့ အင်ဒိုနီးရှားစစ်တပ်ရဲ့ ထုတ်ပြန်ချက်မှာ ဖော်ပြထားပါတယ်။

    IS အကြမ်းဖက်အဖွဲ့ကို သစ္စာခံတယ်လို့ ကြေငြာထားတဲ့ MIT အဖွဲ့ခေါင်းဆောင်ဟောင်း ဆန်တိုဆိုကို ၂၀၁၄ ခုနှစ်မှာ အင်ဒိုနီးရှားစစ်တပ်က အသေပစ်ခတ် ဖမ်းဆီးပြီးတဲ့နောက် အလီကာလိုရာက ခေါင်းဆောင်ဖြစ်လာပြီး ၁၀ နှစ်လောက် တိမ်းရှောင်နေခဲ့တာ ဖြစ်ပါတယ်။

    MIT အဖွဲ့ဟာ အင်ဒိုနီးရှား လုံခြုံရေးတပ်ဖွဲ့တွေနဲ့ လူနည်းစု ခရစ်ယာန်တွေကို ပစ်မှတ်ထားတဲ့ တိုက်ခိုက်မှုတော်တော်များများကို လုပ်ဆောင်ခဲ့တဲ့အဖွဲ့ ဖြစ်ပါတယ်။

    ခေါင်းဆောင် အလီကာလိုရာသေဆုံးသွားပြီး အဖွဲ့၀င်တွေကလည်း ထွက်ပြေးနေရတဲ့အတွက် MIT အဖွဲ့ဟာ ဆက်လက် ရှင်သန်နိုင်ဖွယ်မရှိတော့ဘူးလို့ ကျွမ်းကျင်သူတွေက သုံးသပ်ပါတယ်။

    Ref : Aljazeera

  • ကိုဗစ်ကုသရေးအတွက် အာဆီယံက မြန်မာကို အကူအညီများပေးပို့

    ကိုဗစ်ကုသရေးအတွက် အာဆီယံက မြန်မာကို အကူအညီများပေးပို့

    စက်တင်ဘာ ၁၈၊ ၂၀၂၁
    M-Media

    -ကိုဗစ်ကပ်ရောဂါ ကုသရေးအတွက် အထောက်အကူဖြစ်စေမယ့် ဆေးဝါးပစ္စည်း စုစုပေါင်း ကန်ဒေါ်လာ ၁.၁ သန်းဖိုးကို အာဆီယံအဖွဲ့က မြန်မာနိုင်ငံဆီ ပေးပို့လိုက်ပါတယ်။

    မြန်မာနိုင်ငံက ကြက်ခြေနီအဖွဲ့ကို ပေးအပ်ခဲ့တာဖြစ်ပြီး မြန်မာနိုင်ငံကို လူသားချင်း စာနာထောက်ထားမှုဆိုင်ရာ ကူညီထောက်ပံ့မှု ပြုလုပ်သွားမယ်လို့ ဩဂုတ်လ ၁၈ ရက်နေ့မှာ အာဆီယံအဖွဲ့က ကတိပြုခဲ့ပြီးတဲ့နောက် ပထမဆုံး ပေးပို့မှုဖြစ်တယ်လို့ အာဆီယံ အတွင်းရေးမှူးရုံးက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

    အခုပေးပို့လိုက်တဲ့ အကူအညီတွေဟာ အင်ဒိုနီးရှား၊ ဖိလစ်ပိုင်၊ ထိုင်း၊ တူရကီနဲ့ Temasek Foundation International တို့က လှူဒါန်းတာဖြစ်ပါတယ်။

    အာဆီယံ အထွေထွေအတွင်းရေးမှူး ဒါတွန် လင်ဂျွတ်ဟိုက အကူအညီဟာ အာဆီယံအဖွဲ့အစည်းရဲ့ စည်းလုံးမှုစိတ်ဓာတ်ကို ဖော်ညွှန်းတာဖြစ်ပြီး ပြည်သူအခြေပြု အာဆီယံအသိုင်းအ၀ိုင်းဖြစ်ရေး ဆောင်ရွက်ရာမှာ မြန်မာပြည်သူတွေကို တစ်ဖက်တစ်လမ်းကနေ ကူညီပံ့ပိုးပေးတာဖြစ်တယ်လို့ ပြောကြားခဲ့ပါတယ်။

    လှူဒါန်းတဲ့နိုင်ငံတွေနဲ့ အဖွဲ့အစည်းတွေကို ကျေးဇူးတင်ကြောင်း ဒါတွန်လင်ဂျွတ်ဟိုကပြောကြားခဲ့ပြီး အကူအညီတွေဟာ အတိဒုက္ခရောက်နေတဲ့အချိန်မှာ မြန်မာပြည်သူတွေ ထိခိုက်ခံစားရမှုတွေ လျော့ကျဖို့ အထောက်ဖြစ်စေလိမ့်မယ်လို့လည်း ဆိုပါတယ်။

    ဒါ့အပြင် လူသားချင်းစာနာထောက်ထားမှုဆိုင်ရာ အကူအညီ အဆင့် ၁ ချက်ခြင်းပေးဖို့ပို့နဲ့ နောက်ပိုင်း အဆင့် ၂ ကိုပါ ဆောင်ရွက်သွားဖို့လည်း အထွေထွေအတွင်းရေးမှူးက တိုက်တွန်းခဲ့ပါတယ်။

    အဆင့် ၂ အကူအညီပေးရေးမှာ ဘရူနိုင်း၊ ကမ္ဘောဒီးယား၊ စင်ကာပူ၊ ဗီယက်နမ်နဲ့ အခြား အလှူရှင်နိုင်ငံတွေ အဖွဲ့အစည်းတွေကနေ ပေးပို့လှူဒါန်းမှာ ဖြစ်ပါတယ်။

    Ref: The Star

  • ဆော်ဒီကျောထောက်နောက်ခံပြု ကားကုမ္ပဏီ လျှပ်စစ်ကားလောကတွင် စံချိန်သစ်တစ်ခု ရရှိ

    ဆော်ဒီကျောထောက်နောက်ခံပြု ကားကုမ္ပဏီ လျှပ်စစ်ကားလောကတွင် စံချိန်သစ်တစ်ခု ရရှိ

    စက်တင်ဘာ ၁၈၊ ၂၀၂၁
    M-Media


    -ဆော်ဒီအာရေဗျက ကျောထောက်ခံပြု လျှပ်စစ်ကားကုမ္ပဏီ Lucid Motors က ထုတ်လုပ်တဲ့ ကားမော်ဒယ်သစ်တစ်ခုဟာ လျှပ်စစ်ကားနယ်ပယ်မှာ အဝေးဆုံး မောင်းနိုင်တဲ့စံချိန်ကို ရရှိခဲ့ပါတယ်။

    ဒီကားကို Lucid Air Dream Edition R လို့ အမည်ပေးထားပြီး မိုင်ပေါင်း ၅၂၀ အထိ ဘထ္ထရီအားသွင်းစရာမလိုဘဲ မောင်းနိုင်တဲ့ မှတ်တမ်းကို နိုင်ငံတကာ သဘာ၀ပတ်ဝန်းကျင် ထိန်းသိမ်းစောင့်ရှောက်ရေး အေဂျင်စီ (EPA) ကနေ ရရှိခဲ့တာဖြစ်ပါတယ်။

    ဒါဟာ လျှပ်စစ်ကားလောကကို ဦးဆောင်နေတဲ့ Tesla ရဲ့ မိုင် ၁၀၀ ကျော်မောင်းနိုင်တဲ့ စံချိန်ကို ကျော်သွားတာလည်း ဖြစ်ပါတယ်။

    Lucid Motors ဟာ အမေရိကန် ကုမ္ပဏီတစ်ခုဖြစ်ပြီး ၂၀၁၉ ခုနှစ် ဧပြီလမှာ ဆော်ဒီ နိုင်ငံပိုင် ရင်းနှီးမြှုပ်နှံမှုအဖွဲ့ (PIF) က ကန်ဒေါ်လာ ၁ ဘီလီယံ ရင်းနှီးမြှုပ်နှံခဲ့ကာ ရှယ်ယာ ၆၇ ရာခိုင်နှုန်းကို ပိုင်ဆိုင်ထားပါတယ်။ ၂၀၂၄ ခုနှစ်ရောက်ရင် Lucid Motors က ဆော်ဒီအာရေဗျမှာ ကားတွေထုတ်လုပ်ဖို့ စီစဉ်ထားပါတယ်။

    Lucid Motors ရဲ့ စီအီးအိုး ပီတာ ရော်လင်ဆန်က EPA ကနေ ဒီလို အသိအမှတ်ပြုမှုမျိုး ရရှိတဲ့အတွက် အလွန်အမင်း ဝမ်းမြောက်မိကြောင်း၊ ဘထ္ထရီကြီးကြီးထည့်နိုင်ရင် ဝေးဝေးသွားနိုင်မယ်ဆိုတဲ့ သဘောတရားကို ကျော်ဖြတ်စွမ်းဆောင်ပြနိုင်တဲ့ ဒီအောင်မြင်မှုဟာ လျှပ်စစ်ကားလောကမှာ မှတ်တိုင်သစ် စိုက်ထူလိုက်တာဖြစ်ကြောင်း ပြောကြားခဲ့ပါတယ်။

    Lucid Air Dream Edition R ကားဟာ လော့စ်အိန်ဂျလိစ်ကနေ ဆန်ဖရန်စစ္စကို၊ အဲဒီကမှတစ်ဆင့် Lucid ရုံးချုပ်ရှိရာ နယူးဂျာစီက နီ၀ါ့က်မြို့ စုစုပေါင်း ၄၄၅ မိုခရီးကို အဲကွန်းတောက်လျှောက်ဖွင့်ကာ တစ်နာရီ ၆၇ မိုင် အမြန်နှုန်းအထိ စမ်းသပ်မောင်းနှင်ပြခဲ့တာ ဖြစ်ပါတယ်။

    ဒီကားကို လာမယ့်နှစ်မှာ စျေးကွက်တင်ဖို့ စီစဉ်ထားပြီး တန်ဖိုး ဒေါ်လာ ၇ သောင်း ကျသင့်မှာဖြစ်ကာ လက်ရှိအချိန်အထိ ကြိုတင်အမှာ ၁၁၀၀၀ သာ ရရှိထားပါတယ်။ EPA ရဲ့ အခု အသိအမှတ်ပြုမှုကြောင့် အမှာတွေ ပိုရလာလိမ့်မယ်လို့ ကုမ္ပဏီက မျှော်လင့်ထားပါတယ်။

    Ref: Arab News

  • ကာဘူလ်းမြို့မှ အရပ်သား ၁၀ ဦးသေဆုံးသည့် တိုက်ခိုက်မှုအတွက် အမေရိကန် ပြန်တောင်းပန်

    ကာဘူလ်းမြို့မှ အရပ်သား ၁၀ ဦးသေဆုံးသည့် တိုက်ခိုက်မှုအတွက် အမေရိကန် ပြန်တောင်းပန်

    စက်တင်ဘာ ၁၈၊ ၂၀၂၁
    M-Media

    -ပြီးခဲ့တဲ့လနှောင်းပိုင်း အာဖဂန်နစ္စတန် မြို့တော် ကာဘူးလ်မှာ အရပ်သား ၁၀ ဦးသေဆုံးခဲ့တဲ့ လေကြောင်းတိုက်ခိုက်မှုဟာ မှားယွင်းလုပ်ဆောင်မိတာဖြစ်ပြီး ဒီအတွက်တောင်းပန်တယ်လို့ အမေရိကန်က မနေ့မှာ ထုတ်ပြန်လိုက်ပါတယ်။

    ဩဂုတ်လ ၂၉ ရက် ကာဘူးလ်လေဆိပ်ကအနီးက အိမ်တစ်အိမ်ကို ပစ်မှတ်ထားတဲ့ အဲဒီတိုက်ခိုက်မှုဟာ လေဆိပ်ကို အသေခံဗုံးခွဲမယ့် IS အဖွဲ့ဝင်တစ်ဦးကို တားဆီးဖို့ ပြုလုပ်တာဖြစ်တယ်လို့ အစောပိုင်းမှာ အမေရိကန်က ထုတ်ပြန်ထားတာပါ။

    ဒီတိုက်ခိုက်မှုအတွင်း ၁၀ ဦး သေဆုံးခဲ့ကာ အများစုက ကလေးငယ်တွေ ဖြစ်ပြီး သူတို့တွေဟာ သာမန်အရပ်သားတွေဖြစ်တယ်လို့ သတင်းတွေ ကျယ်ကျယ်ပြန့်ပြန့် ထွက်ခဲ့ပြီးတဲ့နောက် အမေရိကန်စစ်တပ်က စုံစမ်းစစ်ဆေးမှု ပြုလုပ်ခဲ့တာပါ။

    အမေရိကန် အလယ်ပိုင်းစစ်ဌာနအကြီးအကဲ ဗိုလ်ချုပ် ဖရန့် မက်ကန်ဇီက သေဆုံးသွားသူတွေဟာ IS အဖွဲ့နဲ့ သက်ဆိုင်မှုမရှိဘူးလို့ သောကြာနေ့မှာ ပြောကြားခဲ့ပါတယ်။

    “စုံစမ်းစစ်ဆေးမှု တွေ့ရှိချက်တွေ၊ အဖွဲ့အစည်းအသီးသီးရဲ့ လေ့လာဆန်းစစ်မှုတွေကို သေသေချာချာ လေ့လာသုံးသပ်ပြီးတဲ့နောက် တိုက်ခိုက်မှုအတွင်း ကလေးငယ် ၇ ဦးအပါအဝင် အရပ်သား ၁၀ ဦးထက်မနည်း သေဆုံးခဲ့တယ်ဆိုတာကို ကျွန်တော် လက်ခံအတည်ပြုလိုက်ပါတယ်”

    ကျန်ရစ်သူမိသားစုတွေကို တောင်ပန်ကြောင်း ဗိုလ်ချုပ်မက်ကင်ဇီက ပြောကြားခဲ့ပြီး အာဖဂန်ပြည်သူတွေကို ကယ်ဆယ်ရေးလုပ်ဆောင်နေတဲ့ ကာဘူးလ်လေဆိပ်က အမေရိကန်စစ်တပ် တိုက်ခိုက်ခံရမယ့်အန္တရာယ်ကို တားဆီးနိုင်မယ်လို့ ယုံကြည်တဲ့အတွက် တိုက်ခိုက်မှုကို လုပ်ဆောင်ခဲ့တာဖြစ်တယ်လို့ ဆိုပါတယ်။

    “ကျွန်တော်တို့မှားသွားတယ်။ အဲ့ဒီအတွက်လည်း နှစ်နှစ်ကာကာကို တောင်းပန်ပါတယ်။ ဒီတိုက်ခိုက်မှု၊ နောက်ဆက်တွဲရလဒ်တွေအတွက် စစ်ဆင်ရေးဆိုင်ရာ တပ်မှူးဖြစ်တဲ့ ကျွန်တော့်မှာသာ အပြည့်အ၀တာဝန်ရှိပါတယ်”

    အမေရိကန်ကာကွယ်ရေးဝန်ကြီး လွိုက်အော်စတင်ကလည်း တိုက်ခိုက်မှုအတွက် မနေ့က တောင်းပန်ခဲ့ပြီး နောက်ပိုင်းပြုလုပ်မယ့် အလားတူတိုက်ခိုက်မှုတွေမှာ ဒီလို မှားယွင်းမှု မဖြစ်စေဖို့အတွက် လုပ်ထုံးလုပ်နည်းတွေ ပြောင်းလဲသွားမယ်လို့ ပြောကြားခဲ့ပါတယ်။

    “ကျွန်တော်တို့ တောင်းပန်ပါတယ်။ ဒီဆိုးရွားတဲ့ အမှားကနေ သင်ခန်စာလည်း ယူသွားမှာပါ”

    Ref: Aljazeera