Blog

ဩဂုတ် ၂၄၊ ၂၀၂၁
M-Media

-ကိုဗစ်ကြောင့် စစ်ဆေးရုံမှာ ဆေးကုသမှုခံယူနေရတဲ့ မြန်မာစစ်အာဏာရှင်ဟောင်း ဦးသန်းရွှေနဲ့ ဇနီးဟာ ကိုဗစ်ပျောက်ကင်းသွားတဲ့အတွက် ဆေးရုံကနေ ဆင်းသွားပြီလို့ ဆေးရုံတာဝန်ရှိသူတစ်ဦးက AP သတင်းဌာနကို အတည်ပြု ပြောကြားခဲ့ပါတယ်။

အသက် ၈၈ နှစ်အရွယ် ဦးသန်းရွှေနဲ့ ဇနီး ဒေါ်ကြိုင်ကြိုင်တို့ဟာ နေပြည်တော်က တိုက်ချောင်း စစ်ဆေးရုံမှာ အခုလအစောပိုင်းကစပြီး ဆေးကုသမှု ခံယူနေရတာပါ။ အာဏာသိမ်းစစ်ကောင်စီက ဒီသတင်းကို ထုတ်ပြန်ခြင်း မရှိပေမယ့် ပြည်တွင်းမီဒီယာတွေက အာဏာရှင်ဟောင်း ဇနီးမောင်နှံဟာ ပုံမှန် ဆေးစစ်မှုခံယူဖို့အတွက် ဆေးရုံတက်နေရတယ်လို့ ဖော်ပြပါတယ်။

နောက်ပိုင်းမှာ ဆေးရုံက အမည်မဖော်လိုသူ ဝန်ထမ်းတစ်ဦးက ဦးသန်းရွှေနဲ့ဇနီးတို့ ကိုဗစ်ကူးနေပြီး အပျော့စားရောဂါလက္ခဏာပြကာ စစ်ဆေးရုံက VIP ကုသဆောင်မှာ ကုသနေတယ်လို့ နိုင်ငံခြားသတင်းဌာနတစ်ခုကို အတည်ပြုပြောကြားခဲ့ပါတယ်။

ကိုဗစ်ပျောက်ကင်းသွားတဲ့ စစ်အာဏာရှင်ဟောင်း ဦးသန်းရွှေနဲ့ ဇနီး ဒေါ်ကြိုင်ကြိုင်တို့ဟာ သောကြာနေ့မှာ ဆေးရုံကနေ ဆင်းသွားပြီး ဆရာဝန်တွေ၊ သူနာပြုတွေက ပုံမှန် ကျန်းမာရေးစစ်ဆေးပေးနေတယ်လို့ အခြား ဆေးရုံဝန်ထမ်းတစ်ဦးက ဆိုပါတယ်။

စစ်အာဏာရှင် ဦးနေဝင်းနေရာကို ဆက်ခံခဲ့တဲ့ ဦးသန်းရွှေဟာ ၁၉၉၂ ခုနှစ်ကနေ ၂၀၁၁ ခုနှစ်အထိ တိုင်းပြည်ကို အုပ်စိုးခဲ့ပြီး ပြည်သူလူထုနဲ့ ရဟန်းသံဃာတွေအပေါ် ရက်ရက်စက်စက် ဖိနှိပ်ညှင်းပမ်းမှုကြောင့် အမည်ဆိုးနဲ့ ကျော်ကြားခဲ့သူဖြစ်ပါတယ်။ အာဏာရှင် ဦးသန်းရွှေလက်ထက်အတွင်း မြန်မာနိုင်ငံဟာ ပညာရေး၊ စီးပွားရေး၊ လူနေမှုအဆင့်အတန်း စသဖြင့် အဖက်ဖက်က နိမ့်ကျခဲ့ပါတယ်။

Ref: Daily Mail

ဩဂုတ် ၂၃၊ ၂၀၂၁
M-Media

-မြန်မာနိုင်ငံက အာဏာသိမ်းစစ်တပ်နဲ့ စစ်ဖက်ဆိုင်ရာ၊ နည်းပညာဆိုင်ရာ ပူးပေါင်းဆောင်ရွက်မှု တိုးမြှင့်ပြုလုပ်သွားဖို့ စီစဉ်နေတယ်လို့ ရုရှား ဒုတိယကာကွယ်ရေးဝန်ကြီး အလက်ဇန်းဒါးဖိုမင်က ပြောကြားလိုက်ပါတယ်။

မြန်မာစစ်တပ်ရဲ့ ကြည်း၊ ရေ၊ လေ ညှိနှိုင်းကွပ်ကဲရေးမှူး ဗိုလ်ချုပ်ကြီး မောင်မောင်အေးနဲ့ ဒီကနေ့ မော်စကိုမှာတွေ့ဆုံစဉ် အခုလို ပြောကြားလိုက်တာပါ။ ရုရှားဟာ မြန်မာနိုင်ငံက စစ်အာဏာသိမ်းမှုကို လူသိရှင်ကြား ထောက်ခံထားတဲ့ နိုင်ငံလည်း ဖြစ်ပါတယ်။

“စစ်ဖက်နဲ့ စစ်ဖက်ဆိုင်ရာ နည်းပညာအပါအဝင် နှစ်နိုင်ငံဆက်ဆံရေးကို ပိုမိုအားကောင်းဖွံ့ဖြိုးအောင် ဆက်လက်ဆောင်ရွက်သွားမှာ ဖြစ်ပါတယ်။ အာရှပစိဖိတ်နဲ့ အရှေ့တောင်အာရှဒေသမှာ မြန်မာနိုင်ငံဟာ ကျွန်တော်တို့ရဲ့ မဟာဗျူဟာမြောက်ပြီး စိတ်ချရတဲ့ မိတ်ဖက်နိုင်ငံမျိုး ဖြစ်ပါတယ်။ ကံမကောင်းတာက ပြည်တွင်းနိုင်ငံရေးအခြေအနေ တော်တော်လေး ဆိုးရွားနေတယ်။ မြန်မာခေါင်းဆောင်ပိုင်းဟာ တည်ငြိမ်အေးချမ်းရေးအတွက် အစွမ်းကုန် ဆောင်ရွက်နေတယ်ဆိုတာ ကျွန်တော်တို့ သိပါတယ်”

မြန်မာစစ်တပ်ကအဖွဲ့ဟာ စစ်ရေးကျွမ်းကျင်မှုပြိုင်ပွဲ Army-2021 ကို ဝင်ရောက်ယှဉ်ပြိုင်ဖို့ ရုရှားနိုင်ငံကို ရောက်ရှိနေတာ ဖြစ်ပါတယ်။ အလက်ဇန်းဒါးဖိုမင်က ဒီပြိုင်ပွဲကို ဝင်ရောက်ယှဉ်ပြိုင်ခြင်းအားဖြင့် ရုရှားထုတ် လက်နက်မျိုးစုံကို ကြည့်ရှုလေ့လာခွင့် ရမယ်လို့ ထည့်သွင်းပြောဆိုခဲ့ပါတယ်။

ဗိုလ်ချုပ်ကြီး​ မောင်မောင်အေးက မိမိတို့စစ်တပ် ခိုင်မာတောင့်တင်းအောင် နည်းပညာတွေ၊ ကျွမ်းကျင်သူတွေနဲ့ ကူညီပံ့ပိုးပေးတဲ့ ရုရှားကို ကျေးဇူးတင်တယ်လို့ ပြောကြားခဲ့ပါတယ်။

“ရုရှားရဲ့ အရပ်ဖက်နဲ့ စစ်ဖက်ဆိုင်ရာ တက္ကသိုလ်တွေမှာ မြန်မာကျောင်းသားတွေ လေ့လာဆည်းပူးခွင့် ရရှိတဲ့အတွက် အထူးကျေးဇူးတင်ကြောင်း ပြောချင်ပါတယ်”

ဆွေးနွေးပွဲအပြီး ရုရှား ကာကွယ်ရေး ဝန်ကြီးဌာနက ထုတ်ပြန်တဲ့ ကြေငြာချက်မှာ ဒီဆွေးနွေးပွဲဟာ နှစ်နိုင်ငံ ကာကွယ်ရေးဝန်ကြီးဌာနတွေအကြား အရင်ကတည်းက ရှိခဲ့တဲ့ ပူးပေါင်းဆောင်ရွက်မှု တစ်ဖြည်းဖြည်းတိုးတက်အောင် ဆောင်ရွက်မယ်ဆိုတဲ့ စိတ်ပိုင်းဖြတ်ထားမှုကို ထပ်လောင်း အတည်ပြုလိုက်တာဖြစ်တယ်လို့ ဖော်ပြထားပါတယ်။

Ref: TASS