Blog

ဩဂုတ် ၂၁၊ ၂၀၂၁
M-Media

-မြန်မာ့အရေး အာဆီယံအသင်းရဲ့ ဆောင်ရွက်မှုမှာ မျှော်လင့်ထားသလို တိုးတက်မှုမရှိဘူးလို့ စင်ကာပူ နိုင်ငံခြားရေးဝန်ကြီး ဗီဗီယံ ဘာလာ ကရှစ်ရှ်နန်က ပြောကြားလိုက်ပါတယ်။

၂၀၂၀ နိုဝင်ဘာရွေးကောက်ပွဲမှာ အနိုင်ရပြီးတက်လာတဲ့ အစိုးရကို ဖြုတ်ချပြီး စစ်တပ်က ဖေဖော်ဝါရီ ၁ ရက်နေ့ အာဏာသိမ်းလိုက်ပြီးတဲ့နောက် မြန်မာနိုင်ငံမှာ မတည်ငြိမ်မှုတွေ ဖြစ်လာခဲ့တာပါ။ အာဏာသိမ်းမှုကို ဆန့်ကျင်တဲ့ လှုပ်ရှားမှုတွေ နိုင်ငံအနှံ့ဖြစ်လာပြီး စစ်ကောင်စီတပ်တွေ အကြမ်းဖက်သတ်ဖြတ်တာကြောင့် သေဆုံးသူ အရပ်သားအရေအတွက်က တစ်ထောင်ကျော်လာပြီ ဖြစ်ပါတယ်။

ကုလသမဂ္ဂနဲ့ နိုင်ငံတကာအသိုင်းအ၀ိုင်းက မြန်မာပြဿနာကို အာဆီယံအဖွဲ့က ဦးဆောင်ကာ ဖြေရှင်းစေချင်နေပါတယ်။ ဧပြီလမှာ အာဆီယံထိပ်သီးအစည်းအဝေး ကျင်းပကာ မြန်မာ့အရေး ဖြေရှင်းဖို့ အချက် ၅ ချက် သဘောတူခဲ့ပြီး အခုလအစောပိုင်းမှာ မြန်မာနိုင်ငံအတွက် အာဆီယံအထူးကိုယ်စားလှယ်တစ်ဦး ခန့်အပ်ခဲ့ပါတယ်။

စင်ကာပူနိုင်ငံခြားရေးဝန်ကြီး ဗီဗီယံ ဘာလာ ကရှစ်ရှ်နန်က အာဆီယံအဖွဲ့ရဲ့ ဆောင်ရွက်ချက်ဟာ မျှော်လင့်ထားသလောက် တိုးတက်မှုမရှိဘူးလို့ ရိုက်တာသတင်းဌာနကို ပြောကြားခဲ့ပါတယ်။

“အာဆီယံဟာ ကျွန်တော်တို့မျှော်လင့်ထားသလို မြန်မြန်ဆန်ဆန်နဲ့ ထိထိရောက်ရောက် မဆောင်ရွက်နိုင်ဘူး။ ခက်ခဲတဲ့အခြေအနေ ဖြစ်လို့လည်း ပါပါတယ်”

နိုဝင်ဘာမှာလုပ်မယ့် အာဆီယံထိပ်သီးအစည်းအဝေးမတိုင်ခင် အာဆီယံ အထူးကိုယ်စားလှယ် မြန်မာနိုင်ငံကို သွားရောက်ပြီးတဲ့နောက် ထွက်ပေါ်လာမယ့် အစီရင်ခံစာမှာ တိုးတက်မှုတွေ မျှော်လင့်တယ်လို့လည်း ဝန်ကြီးက ထည့်သွင်းပြောဆိုခဲ့ပါတယ်။

“ကျွန်တော်တို့ရဲ့ အထူးကိုယ်စားလှယ်ကို သူတို့ ဘယ်လို ထိတွေ့ဆက်ဆံလဲဆိုတာ မှတ်ကျောက်ဖြစ်လာမှာပါ”

မြန်မာနိုင်ငံကအခြေအနေ ပိုဆိုးလာပြီး အာဆီယံအဖွဲ့အနေနဲ့ အပြုသဘောဆောင်ကာ၊ စေ့စပ်ဆွေးနွေးရေး၊ လူသားချင်းစာနာထောက်ထားမှုဆိုင်ရာ အကူအညီပေးရေးတွေ လုပ်ဆောင်ပေးသင့်တယ်လို့လည်း ဘာလာကရစ်ရှ်နန်က ဆိုပါတယ်။

“အဖွဲ့အစည်းအားလုံးနဲ့ ကျွန်တော်တို့ ဆက်သွယ်ထားတယ်။ အခြေအနေ ခက်ခဲသွားအောင် မလုပ်ပါဘူး။ တစ်ဖက်တည်းမှာလည်း ကျွန်တော်တို့မရပါဘူး။ လူတိုင်းနဲ့ ဆက်သွယ်ဆောင်ရွက်နေတယ်ဆိုတာကို မြန်မာစစ်တပ်ကလည်း သိပါတယ်”

မြန်မာနိုင်ငံမှာ ရင်းနှီးမြှုပ်နှံမှုအများဆုံး လုပ်ဆောင်ထားတဲ့ နိုင်ငံတွေထဲက တစ်ခုဖြစ်တဲ့ စင်ကာပူဟာ စစ်အာဏာရှင်တွေအပေါ် နိုင်ငံတကာက အရေးယူပိတ်ဆို့မှုတွေ လုပ်ဆောင်တာကို မထောက်ခံပါဘူး။

စင်ကာပူနိုင်ငံခြားရေးဝန်ကြီးက ဒီလို စီးပွားရေးပိတ်ဆို့မှုတွေ လုပ်ဆောင်တာဟာ သာမန်ပြည်သူလူထုကိုသာ ထိခိုက်မှာဖြစ်ပြီး စစ်ခေါင်းဆောင်တွေကို ထိခိုက်မှာမဟုတ်ဘူးလို့ ထည့်သွင်းပြောဆိုခဲ့ပါတယ်။

Ref: The Star

ဩဂုတ် ၂၀၊ ၂၀၂၁
M-Media

-စစ်အာဏာသိမ်းမှုနောက်ဆက်တွဲ ဖိနှိပ်မှု၊ ကိုဗစ်ကပ်ရောဂါတွေကို တစ်ပြိုင်နက်တည်း ခံစားနေရတဲ့ မြန်မာနိုင်ငံအတွက် ကမ္ဘောဒီးယားက ငွေကြေးနဲ့ ဆေးဝါးပစ္စည်းတွေ မနေ့က လှူဒါန်းခဲ့ပါတယ်။

ကမ္ဘောဒီးယား ကျန်းမာရေးဝန်ကြီး Mam Bun Heng က ဒီလိုလှူဒါန်းမှုဟာ နှစ်နိုင်ငံအကြား တည်ရှိတဲ့ ခိုင်မာတဲ့ ​ရင်းနှီးချစ်ကြည်မှုကို ဖော်ကျူးတာဖြစ်တယ်လို့ ပြောပါတယ်။

“ဆိုးရွားတဲ့ ကိုဗစ်ကပ်ရောဂါကို ကိုယ်တိုင် ရင်ဆိုင်ကြုံတွေ့နေရပေမယ့်လည်း ကမ္ဘောဒီးယားဟာ အခြားနိုင်ငံတွေကို ကူညီပေးနိုင်ပါတယ်။ ဒါဟာ ဒေသတွင်းနိုင်ငံတွေတင်မကဘဲ၊ ကမ္ဘာတစ်ဝှမ်းက ပြည်သူတွေနဲ့တစ်သားတည်းရှိတယ်ဆိုတာကို ပြသတဲ့ ဝန်ကြီးချုပ်ဟွန်ဆန်ရဲ့ ကြင်နာမှု၊ နှလုံးသားကြီးမှုကို ဖော်ကျူးနေတာလည်း ဖြစ်ပါတယ်”

ကမ္ဘောဒီးယားဟာ စီးပွားရေးအကန့်အသတ်ရှိတဲ့ နိုင်ငံငယ်လေးဖြစ်ပေမယ့်လည်း ခက်ခဲကြမ်းတမ်းတဲ့ အချိန်ကာလတွေမှာ စာနာထောက်ထား၊ ကူညီပံ့ပိုးပေးချင်တဲ့ စိတ်ဓာတ်မျိုးရှိတဲ့နိုင်ငံ ဖြစ်တယ်လို့လည်း Mam Bun Heng က ထည့်သွင်းပြောဆိုခဲ့ပါတယ်။

ကမ္ဘောဒီးယားကလှူဒါန်းတဲ့ ဆေးဝါးပစ္စည်းတွေထဲမှာ နှာခေါင်းစည်း ၃ သန်း၊ အရေးပေါ် ကိုဗစ်စစ်ဆေးမှုကိရိယာ ၅ သိန်း၊ PPE ဝတ်စုံ ၂ ထောင်၊ အောက်ဆီဂျင်စက် ၁၀၀၊ အသက်ရှုစက် ၂၀ နဲ့၊ အရေးပေါ် စောင့်ကြည့်ရေးစက် ၂၀ တို့ ပါဝင်ပါတယ်။

လှူဒါန်းတဲ့ ငွေကြေးကတော့ အမေရိကန်ဒေါ်လာ ၂ သိန်း ဖြစ်ပါတယ်။ ကမ္ဘောဒီးယားဟာ အာဆီယံအဖွဲ့ကနေတစ်ဆင့် မြန်မာနိုင်ငံအတွက် ဒေါ်လာ ၁ သိန်း သိပ်မကြာခင်က လှူဒါန်းဖူးပါတယ်။ ကမ္ဘောဒီးယား ကြက်ခြေနီအဖွဲ့က ကိုဗစ်ကုသရေးမှာ အသုံးပြုရေးအတွက် ဒေါ်လာ ၁ သိန်း သီးခြား လှူဒါန်းခဲ့ပါတယ်။

၂၀၂၀ ခုနှစ် နိုဝင်ဘာတုန်းက ကမ္ဘောဒီးယားဟာ မြန်မာနိုင်ငံအတွင် နှာခေါင်းစည်း ၂ သန်းနဲ့ ဆေးဝါးပစ္စည်းတွေ လှူဒါန်းခဲ့ပါတယ်။ ကိုဗစ်ကာလအတွင်း ဗီယက်နမ်၊ လာအို၊ နီပေါနဲ့ တီမောလက်စ်တေနိုင်ငံတို့ကိုလည်း ကမ္ဘာဒီးယားက ငွေကြေးနဲ့ ဆေးဝါးပစ္စည်းတွေ လှူဒါန်းထားပါတယ်။

Ref: The Star