ဩဂုတ် ၁၇၊ ၂၀၂၁
M-Media
-အာရပ်စော်ဘွားများပြည်ထောင်စု (ယူအေအီး) နိုင်ငံမှာ ဝီဂါတွေကို တရုတ်အစိုးရအလိုကျ ဖမ်းဆီးထိန်းသိမ်းထားတဲ့ သီးသန့်ထောင်တစ်ခု ရှိနေတယ်လို့ ဖမ်းခံရသူ အမျိုးသမီးတစ်ဦးက ထုတ်ဖော်ပြောဆိုလိုက်ပြီး နိုင်ငံခြားမှာ ဝီဂါတွေ၊ သဘောထားမတိုက်ဆိုင်သူတွေကို နှိပ်ကွပ်ဖို့ တရုတ်အစိုးရက ‘အမှောင်ကမ္ဘာ’’ ဖန်တီးထားတယ်ဆိုတဲ့ အထောက်အထား ပထမဆုံး ထွက်ပေါ်လာတာ ဖြစ်ပါတယ်။
ခင်ပွန်းလောင်းက တရုတ်အစိုးရကို ဆန့်ကျင်သူဖြစ်တယ်ဆိုတဲ့ စွဲချက်နဲ့ ယူအေအီးမှာ ဖမ်းဆီးခံခဲ့ရတဲ့ အသက် ၂၆ နှစ်အရွယ် ၀ူဟွမ်ဆိုတဲ့ အမျိုးသမီးက သူကြုံတွေ့ရတာတွေကို AP သတင်းဌာနထံ ထုတ်ဖော်ပြောဆိုခဲ့တာ ဖြစ်ပါတယ်။ သူမဟာ ဒူဘိုင်းက ဟိုတယ်တစ်ခုမှာ ဖမ်းဆီးခံလိုက်ရပြီး ထောင်အဖြစ် အသွင်ပြောင်းထားကာ တရုတ်အာဏာပိုင်တွေစီမံတဲ့ အဆောက်အဦးတစ်ခုမှာ ထိန်းသိမ်းခံခဲ့ရတာပါ။
အဲဒီမှာ ဝီဂါလူမျိုး အကျဉ်းသားနှစ်ဦးကို တွေ့ခဲ့ရတယ်လို့ ၀ူဟွမ်က ပြောပါတယ်။ ခင်ပွန်းလောင်း အသက် ၁၉ နှစ်အရွယ် ဝမ်ကျင်းယူက အရှက်ရအောင် လုပ်တယ်ဆိုပြီး တရုတ်အာဏာပိုင်တွေက ၀ူဟွမ်ကို အဓမ္မ လက်မှတ်ရေးထိုးခိုင်းခဲ့ပြီးတဲ့နောက် ဇွန်လ ၈ ရက်နေ့မှာ ပြန်လွှတ်ပေးခဲ့ပါတယ်။ ၀ူဟွမ်ဟာ လက်ရှိ နယ်သာလန်နိုင်ငံမှာ ခိုလှုံနေရသူပါ။
တရုတ်နိုင်ငံအနောက်ပိုင်း ရှင်ကျန်းပြည်နယ်မှာ ဝီဂါနဲ့ အခြားလူမျိူးစုတွေကို တရုတ်အစိုးရက သန်းနဲ့ချီ အကျဉ်းစခန်းမှာ ထိန်းသိမ်းထားတာ၊ လူမျိုးရေး အမှတ်သညာ၊ ယဉ်ကျေးမှု၊ ဘာသာစကားနဲ့ ဘာသာတရား ပျောက်သွားအောင် လုပ်ဆောင်တာ၊ ညှင်းပမ်းနှိပ်စက်တာတွေ ရှိနေတယ်ဆိုတဲ့ အထောက်အထားတွေကို ကမ္ဘာ့မီဒီယာတွေ၊ လူ့အခွင့်အရေး အဖွဲ့အစည်းတွေက ပြီးခဲ့တဲ့ ၂ နှစ်အတွင်း ဖော်ထုတ်ခဲ့ကြပါတယ်။
နိုင်ငံရပ်ခြားမှာလည်း ဝီဂါလိုလူမျိုးစုတွေ၊ သူတို့ကို ဆန့်ကျင်သူတွေကို ဖမ်းဆီးနှိပ်ကွပ်ဖို့ တရုတ်အစိုးရက ‘အမှောင်ကမ္ဘာတွေ’ ဖန်တီးထားတယ်ဆိုတဲ့ သတင်းတွေ ထွက်နေပြီး ၀ူဟွမ်ရဲ့ အခုပြောကြားမှုက ပထမဆုံး သက်သေအထောက်အထား ဖြစ်ပါတယ်။
ဝီဂါတွေကို လွှဲပြောင်းပေး
ဒူဘိုင်းက တရုတ်အကျဉ်းထောင် ဘယ်နေရာမှာ ရှိလဲဆိုတာ အတိအကျ မပြနိုင်တာကြောင့် ၀ူဟွမ်ရဲ့ ပြောကြားမှုတွေကို AP သတင်းဌာနက သီးခြားအတည်ပြုနိုင်ခြင်း မရှိပေမယ့် သူမရဲ့ နိုင်ငံကူးလက်မှတ်မှာ တုံးထုထားတာ၊ တရုတ်အာဏာပိုင်တစ်ဦးက သူမကို မေးခွန်းမေးတဲ့ ဖုန်းအသံဖိုင်၊ ဖမ်းခံထားရတဲ့ ဝီဂါနှစ်ယောက်ကို ကယ်တင်ဖို့ ကြားလူတစ်ဦးနဲ့ ဆက်သွယ်ပေးတဲ့ သူမရဲ့ မက်ဆေ့ချ် စတဲ့ ၀ူဟွမ်ရဲ့ ပြောကြားမှုကို ခိုင်လုံစေမယ့် အထောက်အထားတွေကို AP သတင်းဌာနက ရရှိခဲ့ပါတယ်။
တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဟွာချွမ်ယင်က ၀ူဟွမ်ရဲ့ ဒီပြောကြားမှုတွေဟာ မဟုတ်မှန်ဘူးလို့ AP သတင်းဌာနကို ဖြေကြားခဲ့ပါတယ်။ ယူအေအီးကတော့ တုန့်ပြန်ပြောဆိုခြင်း မရှိသေးပါဘူး။
ထိုင်ဝမ် Academia Sinica အသင်းက လက်ထောက် ပရော်ဖက်ဆာ ချန်ယုကျီက နိုင်ငံခြားထွက်ပြေးသွားတဲ့ ဝီဂါတွေကို တရုတ်အစိုးရက ပြန်ရအောင် နည်းလမ်းပေါင်းစုံနဲ့ လုပ်ဆောင်နေပြီး၊ ဘုရားရှိခိုးတာလို လုပ်ရပ်မျိုးကို အကြမ်းဖက်စွဲချက်နဲ့ တရားစွဲထောင်ချတာတွေ ရှိတယ်လို့ ပြောကြားခဲ့ပါတယ်။ ဒူဘိုင်းမှာ ဖမ်းခံရတဲ့ ၀ူဟွမ်နဲ့ သူမရဲ့ ခင်ပွန်းလောင်းတို့ဟာ တရုတ်နိုင်ငံက လူများစုဖြစ်တဲ့ ဟန်တရုတ်လူမျိုးတွေ ဖြစ်ပါတယ်။
ယူအေအီးဟာ ဝီဂါတွေကို ဖမ်းဆီးစစ်ဆေးကာ တရုတ်အလိုကျ ပြန်ပို့တာတွေ လုပ်နေတယ်ဆိုတာ အရင်ကတည်းက သတင်းထွက်နေတာ ဖြစ်ပါတယ်။
Detained in Dubai ဆိုတဲ့ အကြံပေးရေးအဖွဲ့ကို ဖွဲ့စည်းထားတဲ့ ရဒ်ဟာ စတီလင်းက အကျဉ်းထောင်တစ်ဖြစ်လဲ ယူအေအီးက အဆောက်အဦးတွေမှာ ဖမ်းဆီးထိန်းသိမ်းခံခဲ့ရသူ တစ်ဒါဇင်လောက်နဲ့ ဆက်သွယ်ဆောင်ရွက်ဖူးပြီး၊ အဲဒီအထဲမှာ ကနေဒါ၊ အိန္ဒိယနဲ့ ဂျော်ဒန်နိုင်ငံသားတွေ ပါဝင်ပေမယ့် တရုတ်နိုင်ငံကလူ မပါဝင်ဘူးလို့ ဆိုပါတယ်။
“သူတို့နဲ့ မဟာမိတ်ဖြစ်တဲ့ နိုင်ငံခြားအစိုးရတွေအလိုကျ ယူအေအီးက လူတွေဖမ်းဆီးပေးတယ်ဆိုတာကိုတော့ သံသယဖြစ်စရာ မလိုပါဘူး”
ဒူဘိုင်းက အကျဉ်းစခန်း
မေလ ၂၇ နေ့မှာ ၀ူဟွမ်ကို ဒူဘိုင်းက သူမတည်းရာ ဟိုတယ်မှာ တရုတ်အာဏာပိုင်တွေက လာရောက်မေးမြန်းခဲ့ပြီး နောက်ပိုင်းမှာ ဒူဘိုင်းရဲတပ်ဖွဲ့က ရဲစခန်းကို ခေါ်ဆောင်သွားခဲ့ပါတယ်။
၃ ရက်မြောက်နေ့မှာတော့ ဒူဘိုင်း တရုတ်ကောင်စစ်ဝန်ရုံးက ကောင်စစ်ဝန် လီရှုဟန် ရောက်လာပြီး တရုတ်အစိုးရကို ဆန့်ကျင်ဖို့ နိုင်ငံခြားအဖွဲ့အစည်းတွေထံကနေ ငွေကြေးရယူခဲ့လားဆိုတာ သူမကို မေးမြန်းခဲ့တယ်လို့ ဆိုပါတယ်။
အဲဒီနောက်မှာတော့ သူမကို လက်ထိပ်ခပ်ကာ ကားနဲ့ နာရီဝက်လောက်မောင်းရတဲ့ ၃ ထပ်အဆောက်အဦးတစ်ခုစီ ခေါ်ဆောင်သွားခဲ့ပါတယ်။ အဲဒီအဆောက်အဦးက အခန်းတိုင်းကို အချုပ်ခန်းအဖြစ် ဖန်တီးထားတယ်လို့ ၀ူဟွမ်က ပြောပါတယ်။
အဲဒီမှာ ၀ူဟွမ်ဟာ ဝီဂါလူမျိုးအမျိုးသမီးနှစ်ဦးကို တွေ့ခဲ့ပြီး တစ်ဦးက ‘တရုတ်ပြည်မပြန်ချင်ဘူး တူရကီပဲ သွားချင်တယ်’ လို့ ပြောတာကို ကြားခဲ့တယ်လို့ သူမက ဆိုပါတယ်။
အဲဒီထောင်မှာရှိတဲ့ အစောင့်တွေက ၀ူဟွမ်ကို ဖုန်းနဲ့ ဆင်းကတ်တစ်ခုပေးပြီး ခင်ပွန်းလောင်းနဲ့ အကူအညီပေးရေးအဖွဲ့ ChinaAid က အကြီးအကဲ ခရစ်ယာန်တရားဟောဆရာ ဘော့ဘ်ဖူကို ဖုန်းခေါ်ဖို့ ပြောခဲ့ပါတယ်။ ChinaAid ဟာ အကျိုးအမြတ်မယူတဲ့ ခရစ်ယာန် အကူအညီပေးရေးအဖွဲ့ဖြစ်ပြီး ၀ူဟွမ်တို့ကို ကူညီနေတာပါ။
ခင်ပွန်းလောင်း ဝမ်နဲ့ ခရစ်ယာန်တရားဟောဆရာတို့က ၀ူဟွမ်ထံကနေ ဖုန်းခေါ်ဆိုမှု ရခဲ့ကြောင်း AP သတင်းဌာနကို အတည်ပြု ပြောဆိုခဲ့ပါတယ်။
နောက်ဆုံးမှာ ၀ူဟွမ်ဟာ ခင်ပွန်းလောင်းက အရှက်ရအောင်လုပ်ပါတဲ့ဆိုတဲ့ ထွက်ဆိုချက်ကို လက်မှတ်ထိုးပေးခဲ့ရပြီး ပြန်လွတ်လာတဲ့အချိန်မှာ ယူကရိန်းကို သွားကာ ခင်ပွန်းလောင်း ဝမ်နဲ့ ပြန်လည်ပေါင်းစည်းနိုင်ခဲ့ပါတယ်။
တရုတ်အာဏာပိုင်တွေက ယူကရိန်းအထိလိုက်ကာ ပြန်ခေါ်မယ်လို့ သူတို့နှစ်ဦးကို ခြိမ်းခြောက်တာကြောင့် ၀ူဟွမ်နဲ့ ခင်ပွန်းလောင်းတို့ဟာ နယ်သာလန်နိုင်ငံကို ထွက်ပြေးခိုလှုံခဲ့ရပါတယ်။
Ref: AP
