Blog

ဩဂုတ် ၁၅၊ ၂၀၂၁
M-Media

-သမ္မတ အက်ရှ်ရက်ဖ်ဂါနီဟာ တိုင်းပြည်ကနေ ထွက်ခွာသွားပြီလို့ အာဖဂန်နစ္စတန်အစိုးရ အကြီးတန်းတာဝန်ရှိသူ၊ သံတမန်တစ်ဦးက CNN သတင်းဌာနကို အတည်ပြု ပြောကြားလိုက်ပါတယ်။

ပြီးခဲ့တဲ့နှစ်ပတ်အတွင်း နိုင်ငံတစ်ဝှမ်းက မြို့ကြီးတွေကို တာလီဘန်အဖွဲ့က သိမ်းပိုက်နိုင်ခဲ့ပြီး မြို့တော်ကဘူးလ်ကို ဝိုင်းထားခဲ့ပြီးတဲ့နောက် တာလီဘန်နဲ့ ငြိမ်းချမ်းစွာ အာဏာလွှဲပြောင်းပေးရေး ဆွေးနွေးနေတယ်လို့ အာဖဂန်အစိုးရက သတင်းထုတ်ပြန်ထားတာပါ။

အာဖဂန်အစိုးရရဲ့ အမျိုးသားရင်ကြားစေ့ရေးကောင်စီ ဥက္ကဌ အဘ်ဒူလာ အဘ်ဒူလာကလည်း သမ္မတဂါနီ တိုင်းပြည်ကနေထွက်ခွာသွားကြောင်း ဗီဒီယိုနဲ့ ကြေငြာချက်ထုတ်ပြန်ခဲ့ပြီး ဂါနီကို ‘သမ္မတဟောင်း’ လို့ သုံးနှုန်းသွားပါတယ်။

စီးပွားရေးပညာရှင်တစ်ယောက်ဖြစ်တဲ့ ဂါနီဟာ ၂၀၁၄ ခုနှစ်ကစတင်ပြီး သမ္မတတာဝန် ရယူခဲ့တာပါ။ ၂၀၁၉ ခုနှစ်မှာ ပြန်လည်ရွေးကောက်ခံခဲ့ရပါတယ်။

Ref: CNN

ဩဂုတ် ၁၅၊ ၂၀၂၁
M-Media

-တာလီဘန်အဖွဲ့က မြို့တော်ကဘူးလ်ကို ဝန်းရံထားလိုက်ပြီးတဲ့​နောက် ငြိမ်းချမ်းစွာ အာဏာလွှဲပြောင်းရေး ဆွေးနွေးနေတယ်လို့ အာဖဂန်နစ္စတန် အစိုးရတာဝန်ရှိသူတွေက ထုတ်ပြန်ပြောဆိုပါတယ်။

တာလီဘန်အဖွဲ့ဟာ ​မြို့တော်ကဘူးလ်ရဲ့ ဆင်ခြေဖုံးတွေအထိ ရောက်ရှိလာပြီး အဖက်ဖက်က ဝန်ရံထားလိုက်တာဖြစ်ပါတယ်။ အဖွဲ့ရဲ့ ပြောရေးဆိုခွင့်ရှိသူ ဆူဟေးလ် ဆာဟင်က လက်ရှိမှာ သူတို့အဖွဲ့ဝင်တွေကို မြို့ထဲဝင်မတိုက်ဖို့ ညွှန်ကြားထားပြီး မြို့ကို ငြိမ်းချမ်းစွာ လွှဲပြောင်းနိုင်ရေး ဆွေးနွေးမှုတွေ လုပ်ဆောင်နေတယ်လို့ ပြောပါတယ်။

အာဖဂန် ပြည်ထဲရေးဝန်ကြီး အဘ်ဒူလ် ဆက်သားရ် မီရ်ဇက်ဝဲလ်က ငြိမ်းချမ်းစွာ အာဏာလွှဲပြောင်းမှု ဖြစ်နေပြီး အသွင်ကူးပြောင်းရေးအစိုးရ ပေါ်လာလိမ့်မယ်လို့ ပြောကြားခဲ့ပါတယ်။ သမ္မတဂါနီဟာ အခြေအနေ ဖြစ်ပေါ်တိုးတက်မှုနဲ့ပတ်သက်လို့ အာဖဂန်ဆိုင်ရာ အမေရိကန်ကိုယ်စားလှယ်၊ နေတိုးအဖွဲ့ဝင် ထိပ်တန်း တာဝန်ရှိသူတွေနဲ့ ဆွေးနွေးမှုတွေ ပြုလုပ်နေပါတယ်။

တာလီဘန်အဖွဲ့ဟာ ပြီးခဲ့တဲ့ သီတင်းနှစ်ပတ်အတွင်းမှာ အဓိကမြို့ကြီး တော်တော်များများကို သိမ်းပိုက်နိုင်ခဲ့ပြီး မြို့တော်ကဘူးလ်ကိုသိမ်းပိုက်ဖို့ တစ်လလောက်ကြာမယ်လို့ အမေရိကန်က ခန့်မှန်းထားပေမယ့် ရက်ပိုင်းအတွင်း ရောက်ရှိလာခဲ့တာ ဖြစ်ပါတယ်။

ကဘူးလ်က နိုင်ငံခြားသံတမန်တွေနဲ့ နိုင်ငံခြားသားတွေကို ကယ်ထုတ်ဖို့ အမေရိကန်က တပ်ဖွဲ့ဝင် ၅ ထောင်လောက် စေလွှတ်ထားပြီး ရဟတ်ယာဉ်တွေနဲ့ ကယ်ဆယ်ရေးလုပ်ငန်း လုပ်ဆောင်နေပါတယ်။

Ref: Aljazeera

ဩဂုတ် ၁၄၊ ၂၀၂၁

M-Media 

-အာဖဂန်နစ္စတန်က တာလီဘန်အဖွဲ့ သိမ်းပိုက်ထားတဲ့ ဒေသတွေမှာ လူ့အခွင့်အရေး ချိုးဖောက်မှုတွေကို မြင်လာရပြီး၊ လက်နက်နဲ့ အာဏာရဖို့ကြိုးစားတာဟာ အောင်မြင်မှာမဟုတ်တဲ့ ကြိုးပမ်းမှု ဖြစ်တယ်လို့ ကုလသမဂ္ဂ အထွေထွေအတွင်းရေးမှူး အန်တိုနီယို ဂူတာရက်စ်က သတိပေး ပြောကြားလိုက်ပါတယ်။ 

အမေရိကန်ဦးဆောင်တဲ့ နိုင်ငံခြားတပ်ဖွဲ့တွေ တစ်ဖြည်းဖြည်းဆုတ်ခွာနေချိန်မှာ တာလီဘန်အဖွဲ့က ထိုးစစ်ဆင်ကာ နယ်မြေတွေ ပိုမိုသိမ်းယူလာပြီး ပြီးခဲ့တဲ့သီတင်းနှစ်ပတ်အတွင်း တတိယအကြီးဆုံးမြို့ ဟီရတ်နဲ့ ဒုတိယအကြီးဆုံးမြို့ ကန်ဒါဟာတို့အပါအဝင် အဓိကမြို့ကြီး ၁၈ မြို့လောက်ကို လွယ်လွယ်ကူကူပဲ သိမ်းပိုက်နိုင်ခဲ့ပါတယ်။ 

ကုလအတွင်းရေးမှူး ဂူတာရက်စ်က နိုင်ငံတကာအသိုင်းအ၀ိုင်းဟာ လက်နက်နဲ့ အာဏာရယူဖို့ ကြိုးပမ်းမှုကို ထောက်ခံမှာမဟုတ်ဘဲ၊ အာဖဂန်နစ္စတန်အနေနဲ့ နောက်ထပ် ရှည်ကြာတဲ့ ပြည်တွင်းစစ်ကို ကြုံရပြီး နိုင်ငံတကာ အသိုင်းအဝိုင်းရဲ့ လုံး၀ဖယ်ကျဉ်ခြင်းကို ခံရလိမ့်မယ်လို့ မနေ့ကထုတ်ပြန်တဲ့ ကြေငြာချက်မှာ သတိပေးခဲ့ပါတယ်။

တာလီဘန်သိမ်းပိုက်ထားတဲ့ ဒေသတွေမှာ အမျိုးသမီးတွေနဲ့ ဂျာနယ်လစ်တွေအပေါ် ပစ်မှတ်ထား ဖိနှိပ်တာမျိုးလို လူ့အခွင့်အရေး ချိုးဖောက်မှုကို မြင်လာရပြီး အာဖဂန်က လက်နက်ကိုင်အဖွဲ့တွေအားလုံး အရပ်သားတွေကို ကာကွယ်ကြဖို့လည်း တိုက်တွန်းခဲ့ပါတယ်။

“အာဖဂန်မိန်းကလေးငယ်တွေ၊ အမျိုးသမီးတွေ ခက်ခက်ခဲခဲ့ရယူထားရတဲ့ အခွင့်အရေးတွေ ဆုံးရှုံးနေတယ်ဆိုတာ ကြောက်မက်ဖွယ်၊ စိတ်မကောင်းဖြစ်ဖွယ် ကြားသိနေရပါတယ်”

ကုလသမဂ္ဂဟာ အာဖဂန်နစ္စတန်က လုံခြုံရေးအခြေအနေကို နာရီတိုင်း လေ့လာသုံးသပ်နေပြီး တစ်ချိုု့ဝန်ထမ်းတွေကို ကဘူးလ်မြို့ ရွှေ့ထားပေမယ့် ကယ်ထုတ်မှာ မဟုတ်သေးဘူးလို့ ကုလသမဂ္ဂ ပြောရေးဆိုခွင့်ရှိသူက သောကြာနေ့မှာ ပြောကြားခဲ့ပါတယ်။ 

Ref : Aljazeera