စက်တင်ဘာ ၁၈ ၊ ၂၀၁၄
M-Media
လောကနှစ်ခု၊ အသွင်နှစ်မျိုးနှင့် နှစ်ဖက်ခွတည်ရှိနေခြင်းက သေတွင်းနှင့် လက်တစ်ကမ်းအကွာ ရှင်သန်ခြင်းပင်။
ဤသည်မှာ မော်တင် စတောမ်း Morten Storm ၏ ဘ၀ ဖြစ်သည်။ အစွန်းရောက်အစ္စလာမစ်သမားအဖြစ်မှ နှစ်ဖက်ခွ သူလျှိုလုပ်ခဲ့သူ ၎င်းက ကမ္ဘာ့ အတွင်းရေး လျှို့ဝှက်ချက်အချို့ကို လှစ်ဟဖွင့်ချလိုက်လေပြီ။
သူ့ဘ၀ဖြစ်စဉ်သည် သူလျှိုဝတ္ထုများမှ ဇာတ်ကောင်အတိုင်း ဖြစ်ကြောင်း သူ၏ “Agent Storm: My Life Inside al Qaeda and the CIA” ၌ ဖွင့်ပြောထား၏။ ထိုစာအုပ်ကို တွဲဖက်ရေးသားသူမှာ CNN မှ အကြမ်းဖက်ဝါဒ သုတေသီ ပေါလ် ခရွစ်ရှန့် (Paul Cruickshank)နှင့် တင်မ် လစ္စတာ (Tim Lister)တို့ ဖြစ်ကြပြီး သူတို့နှစ်ဦးစလုံးက CNN ၏ သတင်းထောက်များဖြစ်သည်။
မကြာသေးမီကပင် CNN နိုင်ငံတကာရေးရာ အကြီးတန်းသတင်းထောက်ဖြစ်သူ နစ် ရောဘတ်ဆင် (Nic Robertson)နှင့် ခေတ္တထိုင်ခဲ့သေး၏။
“ကျွန်တော့်မှာ နာမည် အမျိုးမျိုးရှိပြီး အသွင် အမျိုးမျိုး ဆောင်ခဲ့တယ်။ မော်တင် စတောမ်း၊ မုရဒ် စတောမ်း၊ အဘူ အိုစာမာ၊ အဘူ မုဂျာဟစ်ဒ် ဆိုတာ ကျွန်တော်ပါပဲ”ဟု စတောမ်းက ဆိုသည်။
သူ့အား အလ်ကိုင်ဒါ ထိပ်တန်းခေါင်းဆောင်များက အလွန်ကိုးစား ယုံကြည်ခဲ့ကြသည်။ အလ်ကိုင်ဒါခေါင်းဆောင်တွေထဲ က တယောက်အတွက် ဥရောပသူ ဇနီးတစ်ဦး သူရှာပေးခဲ့ဘူးသည်။ အလ်ကိုင်ဒါ စည်းဝိုင်းထဲ ရှိနေစဉ် တလျှောက်လုံး အနောက်တိုင်း ထောက်လှမ်းရေး အဖွဲ့များအတွက် လုပ်ကိုင်ပေးနေခဲ့ကြောင်း စတောမ်းက ပြောပြ၏။
“ဆယ်စုနှစ် တစ်ဝက်လောက် ကျွန်တော်ဟာ လောက နှစ်ခုထဲ အသွင်နှစ်မျိုးနဲ့ ခေါက်တုန့်ခေါက်ပြန် လှုပ်ရှားနေခဲ့ပါတယ်။ တစ်ချက်လောက် လွဲချော်တာနဲ့ အသက်ပါပြီးသားပါပဲ။ ဘုရားမဲ့ ၀ါဒ၊ အပြင်းစား အစ္စလာမ်ဝါဒ၊ အင်္ဂလိပ်စကား၊ အရဗီစကား တွေ အကြားမှာ လျှောက်လှမ်းနေခဲ့တယ်။ ဒါဟာ လူတစ်ကိုယ်ဘ၀ကွဲ ဘ၀ပုံဟန်မျိုး ဖြစ်ပါတယ်” ဟူ၍ သူ့စာအုပ်တွင် ရေးသားသည်။
ကြီးပြင်းလာပုံ
————–
စတောမ်း၏ ထူးခြားသောခရီးစဉ်သည် ဒိန်းမတ်နိုင်ငံ၊ ကော်ဆာ Korsor အမည်ရှိမြို့မှ မထင်မရှားဘ၀ဖြင့်သာ စတင်လာခဲ့သည်။
ထိုဒေသသည် ကလေးငယ်တစ်ဦးအဖို့ ကစားခုန်စားနေရာပေါများသည့်အရပ်ဖြစ်ကြောင်း၊ သူသည် တောတန်းနှင့်ကမ်းခြေတွင် ပျော်မွေ့ခဲ့ကြောင်း၊ ဖခင်မဲ့သွားသည့်အချိန်တွင် ရုန်းကန်ခဲ့ရကြောင်း စတောမ်းက မှတ်မိနေဆဲ။
ဘ၀အစပိုင်းမှာပင် စတောမ်းမှာ ဒုက္ခနွံထဲ နစ်ရသည်။ ဆယ်ကျော်သက်အရွယ်က မသိစိတ်၏ထိုးဆွမှုကို ခံရလေတိုင်း သူသည် လက်နက်ကိုင်ဓားပြတိုက်ခြင်းနှင့် တိုက်ခိုက်ခြင်းကို ကျူးလွန်ခဲ့သည်။
“လက်ဝှေ့ထိုးခြင်းက ကျွန်တော့်အတွက် နိုင်လိုမင်းထက်ပြုလိုမှုကို ဖယ်ရှားတဲ့နည်းလမ်း တစ်ခုဖြစ်ခဲ့တယ်” ဟု အကန့်အသတ်မဲ့ တိုက်ခိုက်လိုခဲ့သူ စတောမ်းက ဆိုသည်။
သူ၏ (၁၈)နှစ်မြောက်မွေးနေ့တွင် အကျဉ်းထောင်ထဲ ခြေချခဲ့၏။ ပြန်ထွက်လာပြီးနောက် စတောမ်းသည် Bandidos အမည်ရှိ ဆိုင်ကယ်စီးလူဆိုးဂိုဏ်းသို့ ၀င်ရောက်သည်။ အဓိကအဖွဲ့ဝင်အဖြစ် လုပ်ကိုင်ခဲ့သည်။
သစ္စာကို ဖွေရှာခြင်း
———————-
ကော်ဆာစာကြည့်တိုက်ရှိ ဘာသာရေးစာအုပ်စင်ငယ်လေးတွင် တမန်တော် မုဟမ္မဒ်၏ ထေရုပ္ပတ္ထိတော် စာအုပ်ကို တွေ့ရှိရာမှ စတောမ်း၏ ဘ၀အချိုးအကွေ့ အပြောင်းအလဲဖြစ်ခဲ့သည်။
“အဲ့ဒါက ကျွန်တော့်ကို ပြောင်းလဲစေခဲ့တယ်။ သစ္စာတရားတွေ ရှာဖွေတွေ့ရှိသွားတယ်။ အဲ့ဒီစာအုပ်က ကျွန်တော့်ကို ပြောပြခဲ့တာပါ”။
သို့နှင့် စတောမ်းသည် မုရဒ် စတောမ်း ဖြစ်လာ၍ ယီမင်သို့ သွားသည်။ ၎င်းတွင် အရဗီစာပေနှင့်တစ်ကွ အစ္စလာမ်ကို ပြင်းထန် တင်းကြပ်စွာ အဓိပ္ပာယ်ဖွင့်ချက်များကို သင်ကြားခဲ့သည်။ သူ့သားဖြစ်သူအား အိုစာမာ ဘင်လာဒင် ဟု အမည်ပေးခဲ့သည်။
၎င်းနောက် ဂျိဟာ့ဒ်လောကသို့ ဦးစိုက်ဝင်ရောက်သည်။ ယီမင်၌ မုဂျာဟစ်ဒင်များ အကြောင်း ရုပ်ရှင်ဖန်တီးလိုသော ဒိန်းမတ်နိုင်ငံသား ဂျာနယ်လစ် နဂျီးဘ် ခါဂျာ Nagieb Khaja နှင့် ခရီးနှင်ခဲ့သည်။
ထိုဒေသ၌ရှိစဉ် အာရေဗျကျွန်းဆွယ် အလ်ကိုင်ဒါပင်မအဖွဲ့ဝင်အဖြစ် လျာထားခံရသူ၊ ထို့ပြင် အမေရိကန်၏ အဓိကပစ်မှတ်ဖြစ်သူ ယီမင်-အမေရိကန်ကပြား တရားဟောဆရာ အန်ဝါရုလ် အောင်လာကီနှင့် စတောမ်းတို့သည် အလွန်ရင်းနှီးကျွမ်းဝင်သွားခဲ့သည်။
“သူတို့ဟာ နောက်နောက်ပြောင်ပြောင် ရှိတယ်၊ ဖြစ်စဉ်တွေ ထိုင်ပြောကြတယ်။ အနောက်နိုင်ငံတွေက သူတို့ စိတ်တိုင်း မကျတဲ့အရာတချို့အကြောင်းတွေကို ဟာသလုပ်ကြတယ်။ ဂျိဟာ့ဒ်အကြောင်းအရာကို ဆွေးနွေးပြောဆိုခဲ့တယ်။ ဒီ့နောက် စတောမ်းဟာ အစွန်းရောက်သူ ဖြစ်လာတော့တယ်။ အန်ဝါရုလ် အောင်လာကီက တောက်လျှောက်နားချခဲ့တယ်။ သွေးအေးအေးနဲ့ အသင့်ရှိနေဖို့ ပြောဆိုလိုက်တယ်” ဟု ခါဂျာမှ ပြောပြသည်။
စတောမ်းက ဆိုမားလီးယားရှိ ဂျိဟာ့ဒ်သမားတို့နှင့် ပူးပေါင်းရန် မတုန့်မဆိုင်း ဆုံးဖြတ်ခဲ့၏။ သို့သော် နောက်ဆုံးအချိန်ကျမှ သူ့အား မလာရောက်ရန် ဖုန်းအဆက်အသွယ်ရခဲ့သည်။ တောက်မည့်မီးခဲ တရဲရဲမှ အန္တရာယ်ကြီးလှသည့်အနေအထားသို့ တက်လှမ်းသွားလေသည်။
“ကျွန်တော် အလွန်အမင်းကို ကသိကအောက်ဖြစ်လို့ စိတ်ပျက်သွားရတယ်။ ဘက်ကန်ချင်စိတ် ဖြစ်သွားပါတော့တယ်”ဟု CNN သို့ စတောမ်းမှ ပြောပြ၏။ စိတ်ပျက်ခြင်းမှသည် သံသယစိတ်ကို ကြီးထွားလာစေတော့သည်။
ဘက်ပြောင်းခြင်း
——————-
သူသည် လက်ပ်တော့တစ်လုံးရှေ့ထိုင်လျက် သူ့သောကများကို ဖြေဖျောက်ရန် ရိုက်နှိပ်နေခဲ့၏။
“ကုရ်အာန်ထဲက ကွဲပြားဆန့် ကျင်နေတဲ့ အချက်တွေ အကြောင်း ပြောထားတဲ့ ဝက်ဘ်ဆိုဒ်တွေ အများကြီးကို တွေ့ ခဲ့ပါတယ်။ အဲ့ဒါတွေကို စူးစမ်းလေ့လာဖို့ အချိန်ကာလတစ်ရပ်ကြာခဲ့တယ်။ ဒါပေမယ့် အဲ့ဒါတွေက တကယ်ကို ဆန့်ကျင်နေကြောင်း ကောက်ချက်ချ မိလိုက်တာနဲ့ တပြိုင်နက် ကျွန်တော့်ယုံကြည်ချက်ဟာ တစ်စမကျန် လွင့်စင်သွားတယ်။ ကျွန်တော့်နှလုံးသားနဲ့ ယုံကြည်မှုထဲကနေ မွတ်စ်လင်မ်ဖြစ်ခြင်းက ရပ်တန့်လိုက်ပါတော့တယ်” ဟု သူကဆိုသည်။
ထို့နောက် သူသည် ဒိန်းမတ်ထောက်လှမ်းရေးသမားတို့နှင့် ဆက်သွယ်ပြီး လုပ်ငန်းသစ် တစ်ရပ်ဆောင်ရွက်လိုကြောင်း ပြောပြသည်။ မွတ်စ်လင်မ် မဟုတ်တော့သဖြင့် အကြမ်းဖက် တိုက်ဖျက်ရေး စစ်ပွဲတွင် ပါဝင်လိုစိတ်ဖြစ်ခဲ့သည်။
၎င်းတို့က သူ့အတွက် အလုပ်ရစေရန် အချိန်မဖြုန်းခဲ့၊ အရေးပေါ်သူလျှိုတစ်ဦးအဖြစ် သူ့ကို ဖန်တီးပေးလိုက်၏။ များမကြာမီ သူ့အောင်မြင်မှုများက CIA မှ မျက်စေ့ကျစေခဲ့သည်။
PET ဟုကျော်ကြားသော ဒိန်းမတ်ထောက်လှမ်းရေး အေဂျင်စီအကြီးအကဲဟောင်း Hans Jorgen Bonnichesen က “သူဟာ အဖိုးတန်မဖြတ်နိုင်တဲ့ အေးဂျင့်တစ်ဦး၊ အလိုရှိနေတဲ့ သတင်းရင်းမြစ်အချို့ကို ရအောင်စွမ်းဆောင်ပေးနိုင်ခဲ့သူ သံသယမရှိပါဘူး” ဟု ပြောပြခဲ့သည်။
ထိုစဉ်အခါက သူလျှို အသိုင်းအ၀ိုင်း၌ အလ်ကိုင်ဒါ ကွန်ရက်သားတို့နှင့် ပခုံးချင်း ယှဉ်နိုင်သော နှစ်ဖက်ခွအေးဂျင့် တစ်ဦး လိုအပ်နေလျက်ရှိသည်။ စတောမ်းသည် ထိုသို့သောလူစားပင် ကွက်တိဖြစ်နေခဲ့၏။
စတောမ်း၏ဖြစ်စဉ်အပေါ် မှတ်ချက်ပေးရန် CIA မှ ငြင်းဆိုထားသည်။ အလားတူပင် သူ၏စကားများအပေါ် ဒိန်းမတ်အာဏာပိုင်များကလည်း အတည်ပြုခြင်း သို့မဟုတ် ငြင်းပယ်ခြင်းကို အလျဉ်းမပြုလုပ်ကြ။
စကင်ဒီနေဗီးယား၏ အကြမ်းဖက်တန်ပြန်ရေး ထိပ်တန်းကျွမ်းကျင်သူ Magnus Ranstorp က စတောမ်းနှင့်ပတ်သက်ပြီး “ထပ်တိုးပြောရရင် သူဟာ နေရာများစွာကို ရောက်ခဲ့တယ်၊ တကယ်တွေ့ရမယ့်လူတွေအားလုံးနဲ့ ဆုံခဲ့တယ်။ ဒါက သူ့ရဲ့ သူမတူတဲ့ ကံကောင်းမှု ဖြစ်တယ်။ သူ့လို ဘက်စုံ အရည်အချင်းပြည့်ဝသူ များများစားစား ရှိမယ်လို့ ကျွန်တော် မထင်ဘူး။ သူဟာ တကယ့် စံပြပုဂ္ဂိုလ်ပါပဲ” ဟုပင် ဆိုခဲ့သည်။
အံဝင်ခွင်ကျ ဇာတ်ကသူ
—————————
စတောမ်း၏ ဘက်တော်သားပီသမှု စစ်မစစ်ကို နှစ်ဖက်စလုံးမှ စမ်းသပ်ခဲ့ကြသည်။ ရွှေရောင်ဆံပင်နှင့် ဥရောပသူတစ်ဦးကို မိမိ၏တတိယဇနီးအဖြစ် ရှာယူပေးရန် အလ်အောင်လာကီမှ သူ့အား ခိုင်းစေခဲ့သည်။
သူက အစ္စလာမ်သို့ကူးပြောင်းပြီးကာစ၊ မိမိကိုယ်ကို အာမီနဟ်ဟု အမည်ပေးထားသော ခရိုအေးရှားသူ Irena Horak ကို ရအောင် ရှာဖွေပေးခဲ့သည်။ ၎င်းမှာ နတ်သမီးထောင်ချောက် တစ်ခု အခြေတည်လိုက်ခြင်းတည်း။
ထိုသူမမှာ ငါးစာ ဖြစ်၏။ တဏှာကြီးသည့် အလ်ကိုင်ဒါခေါင်းဆောင် တစ်ဦးကို မြူဆွယ် သတ်ဖြတ်မည့် သံသယမ၀င်အောင် သွေးသားကို စတေးပေးဆပ်သူတစ်ဦးပင်ဖြစ်၏။
စတောမ်းကိုကြားခံ၍ အလ်အောင်လာကီနှင့် အာမီနဟ်သို့ လျှို့ဝှက်အီးမေးလ်များ၊ ဗီဒီယိုများ အပြန်အလှန် ဖလှယ်ခဲ့ပြီးနောက် ထိမ်းမြားဖို့ သဘောတူညီမှု ရခဲ့သည်။
အာမီနဟ်သည် ယီမင်သို့ ဖြတ်ကျော် ၀င်ရောက်နိုင်ပါက သူ၏ကြိုးပမ်းမှုများ အတွက် ဒေါ်လာနှစ်သိန်းခွဲလက်ခံရရှိခဲ့သည်။ အာမီနဟ်၏ အ၀တ်သေတ္တာအတွင်း လျှို့ဝှက်ခြေရာခံ ကိရိယာတစ်ခုကို တိတ်တဆိတ်ထည့်သွင်းသယ်ဆောင်စေခဲ့သည်။
နောင်သောအခါ အလ်အောင်လာကီထံမှ အီးမေးလ်တစ်စောင် ရခဲ့၏။ သူသည် အာမီနဟ်နှင့်ထိမ်းမြားလိုက်ပြီး ထင်ထားသည်ထက်သာကြောင်း ၎င်း၌ ရေးသားထားသည်။
သို့သော် အာမီနဟ်ထံမှလည်း အီးမေးလ်တစ်စာင် ရပြန်၏။ သူမရေးသားထားသည်မှာ အလ်အောင်လာကီက သူတို့ မဆုံခင် အဝတ်သေတ္တာကို ပစ်ခဲ့ဖို့ ပြောခဲ့ကြောင်း ဒါကြောင့် သူမက ပစ်ခဲ့သည့်အတွက် ထောက်လှမ်းရေးကိရိယာပါ ကျန်ခဲ့တော့သည်။
မိမိ၏ စီအိုင်အေ ခေါင်းကိုင်ကြီးများမှာ အမျက်ချောင်းချောင်း ထွက်ခဲ့ကြောင်း၊ မိမိအား ခြောက်လ အထိ စကားပြောရန် ငြင်းပယ်ခဲ့ကြောင်း၊ သို့သော် ခြေဦးပြန် လှည့်လာကြောင်း စတောမ်းက ဆိုသည်။
စတောမ်း၏စကာအရ အလ်ကိုင်ဒါနှင့် ပတ်သက်သည့် မည်သည့်သတင်းမဆို အနံ့ခံနိုင်ရေး အတွက် အလ်အောင်လာကီအား အသေရရ အရှင်ရရ သတင်းပေးနိုင်မည် ဆိုလျှင် ဒေါ်လာငါးသန်းပေးမည်ဟု ကတိပြုကာ စီအိုင်အေသည် သူ့အကူအညီကိုပင် ဆက်လက်ယူနေခဲ့ရသည်။
လူလုံးထွက်ပြခြင်း
——————
အလ်အောင်လာကီမှာ နောက်ဆုံးတွင် ခြေရာခံမိသွားသည်။ ၂၀၁၁ ခုနှစ်တွင် အမေရိကန် မောင်းသူမဲ့ယာဉ် တိုက်ခိုက်မှုဖြင့် သေဆုံးခဲ့သည်။ ၎င်း၏ဇနီးဖြစ်သူ အာမီနဟ်က စတောမ်းထံ အီးမေးလ်ဖြင့် ဆက်သွယ်သည်။ သူမသည် အသေခံဗုံးခွဲသမား အဖြစ် ခံယူမည်ဟု ဆိုသော်လည်း ပယ်ချခံရကြောင်း ပြောပြခဲ့သည်။ CNN က သူမ၏ မိသားစုမှ တဆင့် အာမီနဟ်နှင့် ဆက်သွယ်နိုင်ရန် ကြိုးစားခဲ့သော်လည်း ၎င်းတို့မှ အတွေ့မခံခဲ့ဟု ဆိုသည်။ အကြမ်းဖက် တန်ပြန်ရေး ဥရောပသား အရာရှိတစ်ဦးက ထိုအချိန်တွင် အာမီနဟ်အဖို့ အန္တရာယ် ကျရောက်နိုင်ကြောင်း သတိပေးသည့် သတင်းတစ်ပုဒ် ထုတ်လွှင့်ခဲ့သည်ဟု CNN သို့ ပြောပြသည်။
အလ်အောင်လာကီအား အဆုံးသတ် ရှာဖွေပေးနိုင်သည့် အလုပ်ကို မိမိလုပ်ခဲ့ကြောင်း စတောမ်းက တသွင်သွင် ဆိုသော်လည်း၊ ထိုနှစ်အတွင်း ဟိုတယ်တစ်ခု၌ စတောမ်း၏ အသံသွင်းချက်တစ်ရပ်တွင် သီးခြား သူလျှိုလမ်းကြောင်းတစ်ခုမှ ယင်း အကြမ်းဖက်ခေါင်းဆောင်ကို ခြေရာခံနိုင်ခဲ့သည်ဟု ငြင်းဆိုပြောကြားထားသည်။ ဆိုလိုရင်းမှာ စတောမ်းမှ မိမိရပိုင်ခွင့်ဟု ထင်မှတ်ထားသည့် ဒေါ်လာ ငါးသန်းကို ပေးခြင်းခံရမည်မဟုတ် ဟူ၏။
သူနှင့် သူ့ခေါင်းကိုင်တို့အကြား ဆက်ဆံရေး ယိုယွင်းခဲ့ပြီး၊ နောင်သောအခါ သူသည် CIA နှင့် PET အတွက် အလုပ်လုပ်ပေးခြင်းကို ရပ်တန့်လိုက်သည်။
ဆိတ်ဆိတ်နေမည့်အစား မိမိ၏ဖြစ်စဉ်နှင့်တစ်ကွ လူလုံးထွက်ပြရန် စတောမ်းမှ ဆုံးဖြတ်လိုက်ပေသည်။
ငါးနှစ်တာကာလအလွန်က စုစုပေါင်း ဒိန်းမတ်ငွေ ခရိုနီ ၁.၅ သန်း (ဒေါ်လာ နှစ်သိန်းခြောက်သောင်း)ကို ဒိန်းမတ်ထောက်လှမ်းရေးအေဂျင်စီမှ PET က သူ့အား အခွန်ကင်းလွတ်ငွေအဖြစ် ပေးမည်ဟု ကမ်းလှမ်းသည့်အကြောင်း ဒိန်းမတ်သတင်းစာ Jyllands-Posten ထံ သူက ဖွင့်ပြောခဲ့သည်။
သို့သော် သူ၏နိုင်ငံခြားသူဇနီးသည်အတွက် ဒိန်းမတ်၌ အတည်တကျနေထိုင်ခွင့် အပါအ၀င် ကတိက၀တ်ပေါင်းများစွာကို PET မှ ချိုးဖောက်ခဲ့သဖြင့် ယင်းကမ်းလှမ်းမှုကို ပယ်ချခဲ့သည်ဟု သူက ဆိုသည်။
နှစ်များစွာအတွင်း အသွင်အမျိုးမျိုးဖြင့် အသုံးတော်ခံခဲ့သော်လည်း စတောမ်းမှာ သက်ဆိုးရှည်နေဆဲ။
တစ်ချိန်က သူ၏သွေးသောက်ရဲဘော်များဖြစ်ခဲ့သော အစ္စလာမ်စစ်သွေးကြွတို့ထံမှ သူ့အား လုပ်ကြံသတ်ဖြတ်မည့် ခြိမ်းခြောက်မှုများ ထွက်လာပြီးနောက် သူသည် ပုန်းလျှိုးကွယ်လျှိုး နေထိုင်နေရသည်။ ဆီးရီးယား ISIS တိုက်ခိုက်ရေးသမားတို့သည် နံရံတွင်ချိတ်ထားသည့် သူ့ဓာတ်ပုံအား ပစ်ခတ်ပြသည့် ဗီဒီယို ထုတ်လွှင့်သောအခါ ယမန်နှစ်က ယင်းခြိမ်းခြောက်မှုမှာ အမှန်ပင် ဖြစ်ကြောင်း ရှင်းလင်းထင်ရှားသွားခဲ့လေသည်။
“သူတို့က ခင်ဗျားတို့လည်ပင်းကိုပိုင်းပြီး ခေါင်းဖြတ်နိုင်သည်ဖြစ်စေ၊ ခင်ဗျားတို့ကို ပစ်သတ်ပြီး ကားစင်တင်ချိတ်ဆွဲနိုင်သည်ဖြစ်စေ ကျွန်တော်ကတော့ ကွပ်မျက်ခံရမှာပါပဲ” ဟု သူ၏သူလျှိုလုပ်စဉ်ကာလအကြောင်းကို စတောမ်းမှ ပြောပြခဲ့၏။
xxxxxxxxxxxxxx
CNN မှ Agent Storm: Inside al Qaeda for the CIA ဆောင်းပါးကို မြင့်မိုရ်မောင်မောင် မှ ဆီလျော်အောင်ပြန်ဆိုရေးသားသည်။
