Blog

ဇွန် ၂၅၊ ၂၀၂၁
M-Media

-ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း ဖြစ်ပေါ်လာတဲ့ တိုက်ခိုက်မှုတွေကြောင့် မြန်မာနိုင်ငံမှာ အိုးအိမ်စွန့်ခွာ ထွက်ပြေးလာရသူ အရေအတွက်ဟာ ၂ သိန်း ၃ သောင်းလောက် ရှိနေပြီလို့ ကုလသမဂ္ဂက ပြောကြားလိုက်ပါတယ်။

အာဏာသိမ်းမှုကို ဆန့်ကျင်တဲ့ ပြည်သူလူထုကို စစ်ကောင်စီက အကြမ်းဖက်သတ်ဖြတ်ရာကနေ လူထုအကြားမှာ လက်နက်ကိုင်တော်လှန်မှု ပေါ်ပေါက်လာတာ ဖြစ်ပါတယ်။ စစ်ကောင်စီလက်ချက်ကြောင့် သေဆုံးသူအရေအတွက်ဟာ ၅ လအတွင်း ၉၀၀ ကျော် ရှိလာပါပြီ။

ကုလသမဂ္ဂ လူသားချင်း စာနာထောက်ထားမှုဆိုင်ရာရုံး OCHA က အိုးအိမ်စွန့်ခွာထွက်ပြေးရသူတွေ၊ မတည်မငြိမ်မှု ဖြစ်နေတဲ့ ဒေသတွေမှာ ပြည်သူတွေဟာ စားနပ်ရိက္ခာ၊ အိမ်သုံးပစ္စည်း၊ ကျန်းမာရေးစောင့်ရှောက်မှု၊ ရေနဲ့ တစ်ကိုယ်ရည်သန့်ရှင်းရေးပစ္စည်း စသဖြင့် နေရာတိုင်းမှာ အကူအညီတွေ လိုအပ်နေတယ်လို့ ဒီကနေ့ထုတ်ပြန်တဲ့ အစီရင်ခံစာမှာ ဖော်ပြထားပါတယ်။

“စိတ်ပိုင်းဆိုင်ရာ ကုစားမှုအပါအဝင် ပြည်သူတွေကို ကာကွယ်ပေးမယ့် အစီအမံတွေလည်း ချက်ခြင်း လိုအပ်နေပါတယ်”

အကူအညီပေးရေးလုပ်ငန်းတွေကို ကုလသမဂ္ဂက ဆက်လက်လုပ်ဆောင်နေပေမယ့် တိုက်ခိုက်မှု၊ အကြမ်းဖက်မှုနဲ့ မလုံခြုံမှုတွေက အတားအဆီးတွေ ဖြစ်နေတယ်လို့လည်း OCHA က ပြောပါတယ်။

ကရင်ပြည်နယ်မှာ အနည်းဆုံး လူပေါင်း ၁၇၇၀၀၀ လောက် အိုးအိမ်စွန့်ခွာ ထွက်ပြေးခဲ့ရပြီး၊ ချင်းပြည်နယ်မှာလည်း လူပေါင်း ၂ သောင်းကျော်လောက် ဘေးလွတ်ရာနေရာ ၁၀၀ လောက်မှာ ခိုလှုံနေရတယ်လို့ အစီရင်ခံစာမှာ ဖော်ပြထားပါတယ်။

ကချင်ပြည်နယ်နဲ့ ရှမ်းပြည်နယ်မှာ တိုက်ပွဲတွေ ပြန်ဖြစ်လာတာကြောင့် လူထောင်သောင်းချီ အိုးအိမ်စွန့်ခွာ ထွက်ပြေးနေရပါတယ်။

Ref: Aljazeera

ဇွန် ၂၄၊ ၂၀၂၁
M-Media

-မြန်မာနိုင်ငံကနေ ဆန်တွေကို ဘင်္ဂလားဒေ့ရှ်က ဆက်လက်တင်သွင်းနေတယ်လို့ သိရပါတယ်။

ဘင်္ဂလားဒေ့ရှ်ဟာ မြန်မာနိုင်ငံကနေ ဆန်တန်ချိန် ၁ သိန်း တင်သွင်းဖို့ အရင် NLD အစိုးရလက်ထက် ဇန်နဝါရီလမှာ သဘောတူညီချက် ရခဲ့တာပါ။ ဖေဖော်ဝါရီ ၁ ရက်နေ့ စစ်တပ်က အာဏာသိမ်းမှု ဖြစ်ပွားပြီးနောက်ပိုင်း ဘင်္ဂလားဒေ့ရှ်က ဒီအစီအစဉ်ကို ခေတ္တ ဆိုင်းငံ့ခဲ့ပါတယ်။

ဒါပေမယ့် ဧပြီလနှောင်းပိုင်းကစတင်ပြီး ပြန်အကောင်အထည်ဖော်နေတယ်လို့ အမေရိကန် လယ်ယာစိုက်ပျိုးရေးဝန်ကြီးဌာန USDA က ထုတ်ပြန်တဲ့ အစီရင်ခံစာမှာ ဖော်ပြထားပါတယ်။

ဧပြီလနှောင်းပိုင်းမှာ မြန်မာနိုင်ငံကနေ ဆန် တန်ချိန် ၁၁၁၉၃ တန် ဘင်္ဂလားဒေ့ရှ်ဖက်ကို ပို့ခဲ့တာပါ။ အခုလအစောပိုင်းမှာ ထပ်ပို့ဖို့ စီစဉ်ခဲ့ပေမယ့် မပို့ဖြစ်ခဲ့ဘူးလို့ USDA က ပြောပါတယ်။

မြန်မာနိုင်ငံမှာဖြစ်ပေါ်နေတဲ့ အခြေအနေတွေကြောင့် NLD အစိုးရလက်ထက်မှာ သဘောတူညီချက်ရခဲ့တဲ့ ဆန်တင်သွင်းမှုကို ရပ်ဆိုင်းထားတယ်လို့ ဘင်္ဂလားဒေ့ရှ် အစိုးရက ဖေဖော်ဝါရီလမှာ တရားဝင်ထုတ်ပြောထားပေမယ့်၊ ဘယ်အချက်နဲ့ ဒီအစီအစဉ် ပြန်အကောင်အထည်ဖော်လည်း တိတိကျကျ မသိရပါဘူး။

FDA ရဲ့ ဒီဖော်ပြချက်ကို ဘင်္ဂလားဒေ့ရှ်ဖက်က တုန့်ပြန်တာမျိုး မရှိသေးပါဘူး။

Ref : Dhaka Tribune

ဇွန် ၂၃၊ ၂၀၂၁
M-Media

-မိမိတို့ကို အင်အားတောင့်တင်းအောင် ကူညီပံ့ပိုးပေးတဲ့ ရုရှားနိုင်ငံကို ကျေးဇူးတင်တယ်လို့ မြန်မာ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောကြားလိုက်ပါတယ်။

ဗိုလ်ချုပ်မှူးကြီးဟာ မော်စကိုမြို့မှာ ပြုလုပ်တဲ့ နိုင်ငံတကာ လုံခြုံရေးဆိုင်ရာ အစည်းအဝေးကို တက်ရောက်ဖို့ ရုရှားနိုင်ငံကို ရောက်ရှိနေတာ ဖြစ်ပါတယ်။

“ရုရှားရဲ့ ကျေးဇူးကြောင့် ကျွန်တော်တို့ စစ်တပ်ဟာ ဒေသတွင်း အတောင့်တင်းဆုံးစစ်တပ်တစ်ခု ဖြစ်လာတာပါ” လို့ ရုရှားကာကွယ်ရေးဝန်ကြီး ဆာဂျီ ရှိုဂူနဲ့ တွေ့ဆုံစဉ်မှာ စစ်ကောင်စီဥက္ကဌက ပြောကြားခဲ့ပါတယ်။

ရုရှားနဲ့ မြန်မာတို့ရဲ့ မိတ်ဖက်ဆက်ဆံရေးဟာ ခိုင်မာသထက် ခိုင်မာလာတယ်လို့လည်း သူက ပြောပါတယ်။

ရုရှားဟာ ခေတ်ခေတ်အဆက်ဆက် မြန်မာစစ်အာဏာရှင်တွေကို စစ်လက်နက်၊ နည်းပညာတွေ ထောက်ပံ့ပေးခဲ့တာပါ။ ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်းမှာလည်း စစ်အာဏာရှင်ကို ဆက်လက်ကူညီသွားမယ့်အကြောင်း ရုရှားက လူသိရှင်ကြား ပြောကြားခဲ့ပါတယ်။

“ကျွန်တော်တို့အတွက် မြန်မာနိုင်ငံဟာ မဟာဗျူဟာမြောက် မိတ်ဟောင်းဆွေဟောင်း၊ ယုံကြည်စိတ်ချရတဲ့ မဟာမိတ်ပါ။ နှစ်နိုင်ငံ ဆက်ဆံရေး ပိုမိုခိုင်မာအောင် ဆက်လက်ဆောင်ရွက်သွားဖို့ ကျွန်တော်တို့ စိတ်ပိုင်းဖြတ်ထားပါတယ်” လို့ ရုရှား ကာကွယ်ရေးဝန်ကြီးက ပြောကြားခဲ့ပါတယ်။

မော်စကိုရောက်နေတဲ့ စစ်ကောင်စီဥက္ကဌဟာ ရုရှား လုံခြုံရေးကောင်စီ အကြီးအကဲ နီကိုလိုင်း ပက်ထရူးရှက်နဲ့ တွေ့ဆုံခဲ့သလို၊ ရုရှားနိုင်ငံပိုင် လက်နက်ကုမ္ပဏီ Rosoboronexport အကြီးအကဲ အလက်ဇန်းဒါး မီခီယက်ဗ်နဲ့တွေ့ဆုံပြီး စစ်လက်နက်နည်းပညာ ပူးပေါင်းဆောင်ရွက်ရေးကိစ္စတွေကို ဆွေးနွေးခဲ့ပါတယ်။

ဒီခရီးစဉ်ဟာ အာဏာသိမ်းပြီးနောက်ပိုင်း စစ်ကောင်စီဥက္ကဌရဲ့ ဒုတိယမြောက် နိုင်ငံခြားခရီးစဉ် ဖြစ်ပါတယ်။

ဗိုလ်ချုပ်မှူးကြီးမင်းအောင်လှိုင်ဦးဆောင်တဲ့ စစ်ကောင်စီတပ်တွေရဲ့ အကြမ်းဖက်မှုကြောင့် ဖေဖော်ဝါရီ ၁ ရက်နေ့နောက်ပိုင်း နိုင်ငံတစ်ဝှမ်း ပြည်သူ အနည်းဆုံး ၉၀၀ လောက် သေဆုံးကာ၊ ဒဏ်ရာရသူနဲ့ မတရား ဖမ်းဆီး ထိန်းသိမ်းခံရသူ ထောင်ချီ ရှိနေပါတယ်။ ိ

Ref: Reuters