ဇွန် ၂၂၊ ၂၀၂၁
M-Media
-မြန်မာအိမ်အကူတစ်ဦးကို ညှင်းပမ်းနှိပ်စက် သတ်ဖြတ်ခဲ့တဲ့ အမျိုးသမီးတစ်ဦးကို စင်ကာပူက ဒီကနေ့မှာ ထောင်ဒဏ် နှစ် ၃၀ ချမှတ်လိုက်ပါတယ်။
ကျူးလွန်ခဲ့သူ အသက် ၄၀ အရွယ် ဂိုင်ယာသီရိ မူရူဂါယန်ဟာ ရဲတပ်ဖွဲ့ဝင်တစ်ဦးရဲ့ ဇနီးပါ။ တရားသူကြီးတွေက မူရူဂါယန်ဟာ ‘ရက်စက်ယုတ်မာပြီး လူမဆန်တဲ့လုပ်ရပ်ကို’ လုပ်ဆောင်ခဲ့တယ်လို့ ပြောကြားခဲ့ပါတယ်။
ချင်းပြည်နယ်က အသက် ၂၄ နှစ်အရွယ် Piang Ngaih Don ဟာ ၂၀၁၅ ခုနှစ်မေလမှာ စင်ကာပူနိုင်ငံကို ရောက်ရှိလာခဲ့ပြီး ၂၀၁၆ ခုနှစ် ဇူလိုင်လမှာ ကွယ်လွန်ခဲ့တာ ဖြစ်ပါတယ်။
စတင်ရောက်ရှိချိန် ကိုယ်အလေးချိန် ၃၉ ကီလိုဂရမ်ရှိတဲ့ Piang Ngaih Don ဟာ မူရူဂါယန်နဲ့ မိခင်ဖြစ်သူတို့ရဲ့ ညှင်းပမ်းနှိပ်စက်ရိုက်နှက်မှု၊ အစာအငတ်ထားမှုတွေကို ပြင်းပြင်းထန်ထန် ခံစားခဲ့ရပြီးတဲ့နောက် ကွယ်လွန်ချိန်မှာ ၂၄ ကီလိုဂရမ်သာ ရှိပါတော့တယ်။
“ကျူးလွန်သူရဲ့ ရက်စက်မှုတွေ၊ ကမ်းကုန်အောင်ယုတ်မာမှုတွေအတွက် ပြောစရာစကားကို မရှိတော့ပါဘူး” လို့ တရားသူကြီး စီကီအွန်က အမိန့်ချမှတ်မှုမှာ ထည့်သွင်း ပြောဆိုခဲ့ပါတယ်။
Piang Ngaih Don ဟာ ရုပ်ပိုင်းဆိုင်ရာ၊ စိတ်ပိုင်းဆိုင်ရာ ဆိုးဆိုးရွားရွား နှိပ်စက်ညှင်းပမ်းမှုကို မသေဆုံးခင် အချိန်အတော်ကြာ ခံစားသွားခဲ့ရကြောင်း၊ ဒါဟာ နိုင်ငံသမိုင်းက အဆိုးရွားဆုံး လူသတ်မှုတွေထဲက တစ်ခုဖြစ်ကြောင်း တရားသူကြီးက ဆိုပါတယ်။
မူရူဂါယန်ရဲ့ မိခင်ဖြစ်သူလည်း ညှင်းပမ်းနှိပ်စက်မှုမှာ ပါဝင်ပါတယ်။ မသေဆုံးခင်တစ်လလောက်မှာ Piang Ngaih Don တစ်ယောက် နှိပ်စက်မှုဒဏ်ကို အဆိုးဆုံးခံစားခဲ့ရပြီး နောက်ဆုံးမှာ လည်ပင်းညှစ်အသတ်ခံလိုက်ရတာ ဖြစ်ပါတယ်။
တရားလိုရှေ့နေတွေက မူရူဂါယန်ကို ထောင်ဒဏ်တစ်သက်ချဖို့ တောင်းဆိုခဲ့တာပါ။ ဒီကိစ္စနဲ့ဆက်စက်ပြီး သူမရဲ့ ခင်ပွန်း ရဲတပ်ဖွဲ့ဝင်ဟာ ရာထူးကနေ ရပ်ဆိုင်းခံရပြီး ခင်ပွန်းနဲ့ မိခင် ၂ ယောက်စလုံး တရားစွဲခံထားရပါတယ်။
Ref: CNA
