ဇန်နဝါရီ ၂၂၊ ၂၀၂၁
M-Media
-ပြည်တွင်းဖြစ် Shaheen III တာလတ်ပစ်ဒုံးကျည် စမ်းသပ်ပစ်ခတ်မှု အောင်မြင်ခဲ့တယ်လို့ ပါကစ္စတန်က ဗုဒ္ဓဟူးနေ့မှာ ကြေငြာလိုက်ပါတယ်။
စမ်းသပ်မှုကို အာရေဗျပင်လယ်မှာ ပြုလုပ်ခဲ့တာဖြစ်ပြီး ဒုံးကျည်ရဲ့ဒီဇိုင်း၊ ဒုံးကျည်ပစ်စနစ်ရဲ့ နည်းပညာဆိုင်ရာ တိကျမှုတွေကို သေချာအောင် စမ်းသပ်တာဖြစ်တယ်လို့ ပါကစ္စတန်စစ်တပ် ပြန်ကြားရေးဌာနရဲ့ ထုတ်ပြန်ချက်မှာ ဖော်ပြထားပါတယ်။
အခုစမ်းသပ်ခဲတဲ့ Shaheen III ဒုံးကျည်ဟာ နျူထိပ်ဖူးတပ်ဆင်နိုင်လားဆိုတာ ပါကစ္စတန်က မပြောခဲ့ပါဘူး။
Shaheen ဒုံးကျည် ပါကစ္စတန်ပိုင်ဆိုင်ထားတဲ့ ဒုံးကျည်စနစ်တွေထဲမှာ အဝေးဆုံးအထိပစ်ခတ်နိုင်တဲ့ စနစ်တစ်ခုဖြစ်ပြီး အိန္ဒိယပိုင်နက်တွေထဲအထိ ထိုးဖောက်ရောက်နိုင်ဖို့ ရည်ရွယ်ဖန်တီးထားတာ ဖြစ်ပါတယ်။ ဒီဒုံးကျည်တွေမှာ နျူထိပ်ဖူး တပ်ဆင်နိုင်စွမ်းရှိတယ်လို့ အရင်က ပြောကြားဖူးပါတယ်။
ကမ္ဘာပေါ်က နျူလက်နက်ပိုင်ဆိုင်တဲ့ နိုင်ငံ ၈ နိုင်ငံထဲမှာ ပါကစ္စတန်လည်း ပါဝင်ပါတယ်။
ဒုံးကျည်စမ်းသပ်မှုကို ကြည့်ရှုစစ်ဆေးခဲ့တဲ့ စစ်ဦးစီးအရာရှိချုပ် ဒုတိယဗိုလ်ချုပ်ကြီး နဒင်း ဇာကီ မန့်ဂျ်က ဒေသတွင်းငြိမ်းချမ်းစွာ အတူယှဉ်တွဲနေထိုင်ရေး ပါကစ္စတန်ရဲ့ မူဝါဒကို ထပ်လောင်းအတည်ပြုခဲ့ပြီး စစ်အင်အားဟာ အချုပ်အခြာအာဏာ ကျူးကျော်မှုကို တားဆီးဟန့်တားဖို့ ဖြစ်တယ်လို့ ပြောကြားခဲ့ကြောင်း စစ်တပ်ရဲ့ ထုတ်ပြန်ချက်မှာ ဖော်ပြထားပါတယ်။
စမ်းသပ်မှုမှာ ပါဝင်ခဲ့တဲ့ စစ်ဖက်ဆိုင်ရာ အရာရှိတွေ၊ သိပ္ပံပညာရှင်တွေကို သမ္မတ အာရစ်ဖ် အလ်ဗီနဲ့ ဝန်ကြီးချုပ် အင်မရန်းခန်းတို့က ချီးကျူးဂုဏ်ပြုခဲ့ပါတယ်။
Ref: Reuters
