အောက်တိုဘာ ၂၃၊ ၂၀၂၀
M-Media
-ပြည်တွင်းဖြစ် Bavar-373 ဒုံးခွင်းစနစ်ကို အောင်မြင်စွာ စမ်းသပ်နိုင်ခဲ့တယ်လို့ အီရန်က မနေ့မှာ ထုတ်ပြန်ပါတယ်။
Modafe’an-e Aseman-e Velayat 99 လို့ အမည်ပေးထားပြီး နိုင်ငံတစ်၀က်လောက်မှာ ပြုလုပ်နေတဲ့ စစ်ရေးလေ့ကျင့်မှုမှာ ဒီစနစ်ကို စမ်းသပ်ခဲ့ပြီး ပစ်မှတ်ကို တိတိကျကျ ရှာဖွေဖျက်ဆီးနိုင်ခဲ့တယ်လို့ အီရန် နိုင်ငံပိုင်သတင်းဌာနက ထုတ်ပြန်ပါတယ်။
စစ်ရေးလေ့ကျင့်မှု ကြီးကြပ်ရေးအဖွဲ့ရဲ့ ပြောရေးဆိုခွင့်ရှိသူ ဗိုလ်မှူးချုပ် အဘတ်စ် ဖာရက်ဂျ်ပူးရ်က နည်းပညာမြင့် ဒုံးခွင်းစနစ်တွေ အောင်မြင်စွာထုတ်လုပ်နိုင်တဲ့ တိုင်းပြည်ရဲ့လုပ်နိုင်စွမ်းကို ချီးကျူးခဲ့ပါတယ်။
“လေပိုင်နက်ထဲ ကျူးကျော်မှု သေးသေးလေးပင်ဖြစ်ပါစေ ကျွန်တော်တို့ရဲ့ ဒုံးခွင်းနစ်တွေက ပြင်းပြင်းထန်ထန် တုန့်ပြန်သွားမယ်ဆိုတာ ရန်သူတွေက သိနေပါပြီ”
ရွေ့လျားလို့ရတဲ့ Bavar-373 ဒုံးခွင်းစနစ်ကို အီရန်က ၂၀၁၉ ခုနှစ် ဩဂုတ်လမှာ ထုတ်ပြခဲ့ပါတယ်။ ကီလိုမီတာ ၃၀၀ လောက်အထိရောက်နိုင်တဲ့ ဒုံးကျည်တွေကို တပ်ဆင်အသုံးပြုနိုင်ပြီး၊ ပစ်မှတ် ၃၀၀ လောက်အထိ ရှာဖွေနိုင်ပါတယ်။ ပစ်မှတ် ၆၀ လောက်ကို တစ်ကြိမ်တည်း ရှာဖွေ ဖျက်ဆီးနိုင်ပါတယ်။
Bavar-373 ရဲ့ရေဒါဟာ လကြောင်းရန်ကာကွယ်ရေးစနစ် တွေကို ဖျက်ဆီးရာမှာ အသုံးပြုတဲ့ ARM ဒုံးကျည်တွေကို ထောက်လှမ်းနိုင်တယ်လို့ ဆိုပါတယ်။
စစ်ရေးလေ့ကျင့်မှုမှာ အီရန်ရဲ့ ထိပ်တန်းတပ်ဖွဲ့ဖြစ်တဲ့ တော်လှန်ရေးအစောင့်တပ် ပါဝင်ပြီး ခေတ်သစ် အီလက်ထရောနစ်စစ်ပွဲမှာ အသုံးပြုတဲ့ စစ်ရေးနည်းလမ်းတွေကိုလည်း လေ့ကျင့်ခဲ့ပါတယ်။
Ref: Press TV
