အောက်တိုဘာ ၃၁၊ ၂၀၁၈
M-Media
– ပထမကမ္ဘာစစ်အတွင်း ဗြိတိန်မွတ်စလင်တွေရဲ့ ပေးဆပ်မှုတွေကို စာသင်ကျောင်းက သင်ခန်းစာတွေမှာ ထည့်သွင်း သင်ကြားသင့်တယ်လို့ ဗြိတိန် လွှတ်တော်အမတ်တစ်ဦးက ပြောကြားလိုက်ပါတယ်။
ကမ္ဘာစစ်အတွင်း တိုက်ပွဲဝင်ခဲ့ကြတဲ့ ဗြိတိန်မွတ်စလင်စစ်သားတွေအတွက် လွှတ်တော်မှာ တနင်္လာနေ့က အောက်မေ့ဖွယ် အခမ်းအနားတစ်ခုကို ကျင်းပခဲ့ပါတယ်။ မေ့ဖျောက်ခံထားရတဲ့ သူရဲကောင်းတွေကို ဖော်ထုတ်နေတဲ့ Forgotten Heroes 14-19 ဖောင်ဒေးရှင်းက အခမ်းအနားကို စီစဉ် ကျင်းပတာ ဖြစ်ပါတယ်။
အခမ်းအနားကို ဘုရင်မကြီးရဲ့ OBE ဘွဲ့ ရရှိထားတဲ့ ရှေ့ဆောင်အီမာမ် အာဆင် ဟာဖစ်ဇ်အပါအ၀င် နိုင်ငံတစ်ဝှမ်းက ထင်ရှားကျော်ကြားသူ အချို့နဲ့ စစ်ပြန်တွေ တက်ရောက်ခဲ့ကြပါတယ်။
“လေးစားမှု၊ သည်းညည်းခံမှု၊ လူသားဆန်မှု၊ ညီညွတ်မှု၊ မိတ်ဆွေဖြစ်မှု၊ သူရသတ္တိ၊ မေတ္တာတရား၊ ဖက်စစ်ဆန့်ကျင်ရေးနဲ့ လူမျိုးရေးခွဲခြားမှု တိုက်ဖျက်ရေး စတာတွေဟာ ပထမကမ္ဘာစစ်မှာ မွတ်စလင်စစ်သားတွေ ပြသခဲ့တဲ့ တန်ဖိုးတွေ ဖြစ်ပါတယ်။ ဒါတွေဟာ စစ်တပ်ရဲ့ တန်ဖိုးတွေလည်း ဖြစ်ပါတယ်” လို့ အီမာမ် အာဆင်က ပြောကြားခဲ့ပါတယ်။
ဝိုဆက်စတာမြို့ လွှတ်တော်အမတ် ဝေါလ်ကာက ဒီအခမ်းနားရဲ့ အဓိက ရည်ရွယ်ချက်ဟာ မွတ်စလင်တွေနဲ့ အခြား လူနည်းစုတွေရဲ့ ကြိုးပမ်းအားထုတ်မှုတွေ၊ သမိုင်းဖျောက်ခံထားရတာတွေကို ဖော်ထုတ်ဖို့အတွက် ဖြစ်တယ်လို့ ပြောကြားခဲ့ပါတယ်။
“ပထမကမ္ဘာစစ်အတွင်း စစ်ပွဲတွေမှာရော၊ စစ်ပွဲပြင်ပမှာပါ မွတ်စလင်စစ်သားတွေရဲ့ ကြိုးပမ်းအားထုတ်မှုတွေကို ဂုဏ်ပြုတဲ့ မနေ့ညနေက အခမ်းအနားကို တက်ခွင့်ရတဲ့အတွက် ကျေနပ်မိပါတယ်။ ဗြိတိန်နဲ့ ၀ိုဆက်စတာဒေသတွေဟာ ပိုပြီး ဘာသာလူမျိုး စုံတာကြောင့် အားလုံး ပူးပေါင်းဆောင်ရွက်ခဲ့ကြတဲ့ သမိုင်းမှတ်တမ်းတွေကို အသိအမှတ်ပြုဖို့ အရေးကြီးပါတယ်။ ဒီဟာတွေကနေ အနာဂတ်မှာ စည်းလုံးညီညွတ်လာအောင် လုပ်ရမှာပါ။ ဒီနှစ်မှာ ပထမဆုံးအကြိမ်အဖြစ် ၀ိုဆက်စတာမြို့တော်ဝန်နဲ့ ဒုတိယမြို့တော်ဝန်တွေဟာ မွတ်စလင်တွေ ဖြစ်လာပါတယ်” လို့ တနင်္ဂနွေနေ့ညနေပိုင်းက ကျင်းပခဲ့တဲ့ Gheluvelt Remembrance အောက်မေ့ဖွယ် အခမ်းအနားတစ်ခုကို ရည်ညွှန်းပြီး ဝေါလ်ကာက ပြောကြားခဲ့ပါတယ်။
Gheluvelt Remembrance အခမ်းအနားဟာ အရေးပါတဲ့ Channel ဆိပ်ကမ်းကို ဂျာမန်တပ်တွေ ထိုးစစ်ဆင်မှု ရပ်တန့်အောင် အသက်ပေး ကာကွယ်ခဲ့တဲ့ ၀ိုဆက်စတာရှိုင်းယားဒေသက မွတ်စလင်စစ်သားတွေကို ဂုဏ်ပြုတာ ဖြစ်ပါတယ်။ လွှတ်တော်အမတ် ဝေါလ်ကာဟာ အခမ်းအနားကို ၀ိုဆက်စတာ မြို့တော်ဝန် ဂျက်ဘာ ရီအက်ဇ်နဲ့အတူ တက်ရောက်ခဲ့ပါတယ်။
မွတ်စလင်တွေရဲ့ ကြိုးပမ်းအားထုတ်မှုတွေကို စာသင်ကျောင်းတွေမှာ ထည့်သွင်းသင်ကြားသင့်တယ်လို့လည်း ဝေါလ်ကာက ဆိုပါတယ်။
“ဒီကနေ့ ကျွန်တော်တို့ ရရှိခံစားနေတဲ့ လွတ်လပ်ခွင့်အတွက် တိုက်ပွဲဝင်အသက်ပေးခဲ့ကြသူတွေကို သတိရဖို့၊ ဂုဏ်ပြုဖို့ ဒီအခမ်းအနားတွေကို ကျင်းပတာ ဖြစ်ပါတယ်။ ဒါ့ကြောင့် သူတို့တွေရဲ့အကြောင်းကို နိုင်ငံတစ်ဝှမ်းက စာသင်ကျောင်းတွေမှာ သင်ကြားဖို့အတွက် အရေးကြီးတယ်လို့ ကျွန်တော်ယုံကြည်ပါတယ်”
Ref: Worcester News
