မေ ၃၁၊ ၂၀၁၈
M-Media
– သမ္မတပူတင်ကို ဝေဖန်တဲ့ ရုရှားဂျာနယ်လစ် အသတ်ခံရတယ်ဆိုတဲ့ကိစ္စဟာ သူ့ကိုသတ်ဖို့ ကြိုးစားသူကို အကွက်ဆင်ဖမ်းဆီးမှုတစ်ခုဖြစ်တယ်လို့ ယူကရိန်းအာဏာပိုင်တွေက မနေ့မှာ ထုတ်ပြန်ပြောကြားလိုက်ပါတယ်။
ဂျာနယ်လစ် အာကာဒီ ဘာ့ဘ်ချန်ကိုတစ်ယောက် မြို့တော်ကိဗ်က နေအိမ်မှာ သေနတ်နဲ့ အချက်ပေါင်းများစွာ ပစ်ခံခဲ့ရပြီး ဆေးရုံကိုပို့ဆောင်စဉ် ကွယ်လွန်ခဲ့တယ်လို့ ယူကရိန်းက အင်္ဂါနေ့မှာ သတင်းထုတ်ခဲ့ပါတယ်။
ဒါပေမယ့် မနေ့က ယူကရိန်းလုံခြုံရေးအဖွဲ့ရဲ့ သတင်းရှင်းစာလင်းပွဲအတွင်း ဘာ့ဘ်ချန်ကိုတစ်ယောက် အသက်ရှင်လျက် တက်ရောက်ခဲ့ပါတယ်။
ယူကရိန်းလုံခြုံရေးအကြီးအကဲ ဗာဆီလီ ဟာ့တ်ဆက်က ဘာ့ဘ်ချန်ကိုကို သတ်ဖြတ်မယ့် အစီအစဉ်ကို ကြိုသိနေတဲ့အတွက် လုပ်ကြံမှု အထမြောက်တဲ့ပုံစံမျိုး အထူးစစ်ဆင်ရေးတစ်ခု ဖန်တီးကာ လူသတ်သမားကို အကွက်ဆင်ဖမ်းဆီးခဲ့တာဖြစ်တယ်လို့ ပြောကြားခဲ့ပါတယ်။
ရုရှားလုံခြုံရေးအဖွဲ့တွေဟာ ဘာ့ဘ်ချန်ကိုကိုသတ်ဖြတ်ဖို့အတွက် ယူကရိန်းနိုင်ငံသားတစ်ဦးကို ကန်ဒေါ်လာ ၄ သောင်းပေးကာ ခိုင်းစေခဲ့ကြောင်း၊ ကျူးလွန်သူကို ဖမ်းဆီးထားပြီး စုံစမ်းစစ်ဆေးမှုတွေ ပြုလုပ်နေကြောင် သူက ထည့်သွင်းပြောဆိုခဲ့ပါတယ်။
ဘာ့ဘ်ချန်ကိုက စစ်ဆင်ရေးအသေးစိတ်ကို ထုတ်ပြောမှာမဟုတ်ဘူးလို့ ပြောကြားခဲ့ပြီး သူ့ကိုသတ်မယ့် အစီအစဉ်ကို ယူကရိန်းရဲတပ်ဖွဲ့က လွန်ခဲ့တဲ့ ၂ လလောက်ကတည်းက ကြိုတင်သိရှိခဲ့ကြောင်း၊ ပြီးခဲ့တဲ့တစ်လအရင် စစ်ဆင်ရေးကိစ္စအတွက် သူ့ကို ဆက်သွယ်ခဲ့ကြောင်း သတင်းစာရှင်းလင်းပွဲမှာ ပြောကြားခဲ့ပါတယ်။
ဒီအကွက်ဆင်ဖမ်းဆီးမှုကို ဇနီးဖြစ်သူတောင်မှ သိရှိခြင်းမရှိဘဲ သူ့ကြောင့် စိတ်ထိခိုက်ရသူတွေကို ဘာ့ဘ်ချန်ကိုက တောင်းပန်ခဲ့ပါတယ်။
ဘာ့ဘ်ချန်ကိုကို သတ်ဖြတ်မှုမှာ ရုရှားပါဝင်တဲ့ဆိုတဲ့သတင်းတွေကို ရုရှားနိုင်ငံခြားရေးဝန်ကြီး ဆာဂျီလာဗရော့ဗ်က ငြင်းဆိုခဲ့ပြီး ဒါဟာ ရုရှားဆန့်ကျင်ရေး ၀ါဒဖြန့်မှုဖြစ်တယ်လို့ ပြောကြားခဲ့ပါတယ်။
Ref: Aljazeera
