ကံမသတင်း နောက်ဆက်တွဲ အင်တာဗျူး နှင့် မြန်မာနိုင်ငံလုံးဆိုင်ရာ အစ္စလာမ်ဘာသာရေး အဖွဲ့ကြီးမှ နိုင်ငံတော် သမ္မတထံ မေတ္တာရပ်ခံစာပို့

မကွေးတိုင်း၊ သရက်ခရိုင်၊ ကံမမြို့နေ မြန်မာမွတ်စလင်မ်တို့၏ ဝတ်ကျောင်းတော်၊ အိုးအိမ်များနှင့် ပိုင်ဆိုင်မှုများ ဥပဒေမဲ့ ဖျက်ဆီး လုယက်ခံရမှုနှင့် ပတ်သက်ပြီး ထိုလုယက်ဖျက်ဆီးသူတို့၏ ဘက်တော်သားများနှင့် ပြည်ထောင်စု သမ္မတမြန်မာနိုင်ငံတော်၏ ဥပဒေစိုးမိုးမှုကို မလေးစားမလိုက်နာသော သူအချို့တို့မှာ စာနာမှုကင်းမဲ့စွာဖြင့် ခံစားခဲ့ရသူများကိုပင် တရားခံများသဖွယ်လုပ်ကာ သားပုပ်လေလွင့် သတင်းများ ဖြန့်ဝေလျက် ရှိနေပေသည်။

ဖျက်ဆီးခံတို့အနက်မှာ တစ်ဦးဖြစ်သူ ဒေါ်ဝါဝါ၏ မောင်လည်းဖြစ်သူ ကိုဌေးလွင်က “ကျွန်တော်တို့ မြို့မှာ မွတ်စလင်မ်အိမ်ခြေက နည်းပါတယ်။ နှစ်စဉ် အစ္စလာမ့်ဘာသာရေးဆိုင်ရာ အခါကြီး ရက်ကြီးပွဲတော်တွေဆိုရင်လည်း မွတ်စလင်မ်တွေအပြင် ကျန်တဲ့ မွတ်စလင်မ် မဟုတ်တဲ့ အိမ်နီးချင်းတွေနဲ့ အားလုံးကိုပါ အလှူပစ္စည်းတွေ ဝေငှပေးတာပါ။ ဝေငှပေးတဲ့အထဲမှာ အဲ့ဒီနေ့တွေက မွတ်စလင်မ်မိသားစုတွေနဲ့ ဗလီကို တိုက်ခိုက်တဲ့ သူတွေ တောင်ပါသေးတယ်။” ဟု M-Media ကို ဝမ်းနည်းညှိုးငယ်စွာဖြင့် ရင်ဖွင့်သွားခဲ့ပါသည်။

ကိုဌေးလွင်က ဆက်ပြောပြသည်မှာ “လာဖျက်ဆီးတဲ့နေ့က လူအုပ်နဲ့လာပြီး ခဲတွေနဲ့ ဝိုင်းထု၊ ပြီးတော့ ရဲဒင်းတွေ ပုဆိန်တွေနဲ့ အိမ်ထဲ အတင်းဝင် ဖျက်ဆီးပြီး ပစ္စည်းတွေ သယ်ကြတာ။ လူအုပ်အများကြီးက  ရဲဒင်းတွေ ပုဆိန်တွေ နဲ့ဆိုတော့ အိမ်နီးချင်းတွေရော ဘယ်သူမှ မတားရဲ မကူရဲကြဘူး။”

“အိမ်နီးချင်းတွေမပြောနဲ့ အစ်မ့ဝါဝါအိမ်ကို ဖျက်တုန်းကဆို ခြံထဲမှာ ရှိတဲ့ ကပ်လျက်အိမ်က သူတွေကတောင် တံခါးမဖွင့်ပေးရဲကြဘူး၊ ကြောက်လန့်နေကြလို့လေ။”

ဒေါ်ဝါဝါ့ ခြံထဲတွင် အိမ်နှစ်လုံးရှိကြောင်း၊ တစ်လုံးတွင် ဒေါ်ဝါဝါနှင့် မိသားစုနေထိုင်ပြီး ကျန်တစ်လုံးကို လူမှုရေးအဖွဲ့အစည်းတစ်ခုကို ငှားထားကြောင်းသိရပါသည်။

မွတ်စလင်မ်တို့၏ အိမ်များနှင့် ဆိုင်များကို ဖျက်ဆီးအပြီးတွင် ဗလီကျန်သေးတယ်ဆိုကာ ထွက်သွားကြပြီး ဗလီကို သွားရောက် ထုနှက်ဖျက်ဆီးကြခြင်းဖြစ်သည်ဟု ကိုဌေးလွင်က ပြောပြပါသည်။

လူများအနေဖြင့် ပြင်းထန်စွာ ထိခိုက်ဒဏ်ရာ ရခြင်းမရှိသော်လည်း ခဲများနှင့် ထုစဉ် ခိုက်မိခြင်းများ ရှိကြောင်း သိရပါသည်။

နိုင်ငံတော်နှင့် စာဖတ်ပရိသတ်ပြည်သူတို့ အပေါ် မရိုးသားသော မီဒီယာများမှ ရေးသားဖြန့်လွှင့်နေသော ဒေါ်ဝါဝါ၏ မောက်မာမှုကြောင့်၊ သာမန် လုယက်မှု၊ ဓားပြမှုသက်သက်စသည့် အမျိုးမျိုးသော သတင်းအမှားများနှင့် လက်တွေ့အထက်ပါဖြစ်ရပ်မှာ အရှေ့အနောက်သဖွယ်ဆန့်ကျင်နေပါသည်။   ထိုအပြင် ပြည်တွင်း ပြည်ပမှ မီဒီယာကြီးများမှာ ဖြစ်စဉ်သတင်းအမှန်ကို တင်ပြရန် ပျက်ကွက်ခဲ့ပြီး၊ နိုင်ငံတော်၏ စတုတ္တမဏ္ဍိုင်ဖြစ်သော ပြည်တွင်းပြည်ပ မီဒီယာကြီးများ၏ ရပ်တည်ချက်မှာ ဗုဒ္ဓဘာသာသာမဟုတ်သော တခြားလူနည်းစု အစ္စလာမ်၊ ခရစ်ယာန်၊ဟိန္ဒု ဘာသာများကို သက်ဝင်ယုံကြည်သူများ၊ လူနည်းစု တိုင်းရင်းသားများနှင့် ပတ်သက်သည့် ဖိနှိပ်ခံရမူသတင်းများကို ထိန်ချန် ဘက်လိုက်ရေးသားမူများရှိသည်ဟုပင် သံသယဝင်စရာများဖြစ်ပေါ်နေပေသည်။

ဒေါ်ဝါဝါ့အိမ်သာမက ကျန်မွတ်စလင်မ်ကိုးဦးတို့၏ အိုးအိမ်နှင့် ဆိုင်များကို ဖျက်ဆီးခြင်း၊ ထိုမျှမက ဗလီဝတ်ကျောင်းတော်ကို ဖျက်ဆီးခြင်းနှင့် ရဲစခန်းကို အကြောင်းကြားသော်လည်း လာရောက်မတားဆီး မကူညီခြင်း၊ တစ်ရက်လုပ်ရပ်မဟုတ်ဘဲ ကျန်ရက်များတွင်ပါ ဆက်လက် ဖျက်ဆီးခြင်းစသည့် အချက်များမှာ ရှင်းလင်းထင်ရှားလှပေသည်။

ထို့ပြင့် ပြည်ထောင်စုသမ္မတ မြန်မာနိုင်ငံတော်အစိုးရ အသိအမှတ်ပြု မြန်မာနိုင်ငံလုံးဆိုင်ရာ အစ္စလာမ် ဘာသာရေးအဖွဲ့ကြီးမှ အဆိုပါ ကံမကိစ္စအပြင် ၂၀၁၂ ဧပြီလ ၁၂ရက်နေ့ကဖြစ်ပွားခဲ့သော ကချင်ပြည်နယ်၊ မိုးညှင်းခရိုင်၊ ဖားကန့်မြို့၊ စဥ့်ငူရပ်၊ ဆိုင်းတောင် အစ္စလာမ့်ဝတ်ကျောင်းတော် ဖျက်ဆီးခံရခြင်း ကိစ္စနှစ်ခုစလုံးကို အတည်ပြုခဲ့ပြီး ၂၀၁၂ ဧပြီလ ၁၆ရက်နေ့ နေ့စွဲ၊ စာအမှတ် မအဘ/စီမံ/၀၀၁-၄/၂၀၁၂(အစ ၅)ဖြင့် အရေးယူဆောင်ရွက်ပေးပါရန် မေတ္တာရပ်ခံစာကို နိုင်ငံတော် သမ္မတကြီး ထံသို့ တရားဝင် ပေးပို့ခဲ့ကြောင်း သိရပါသည်။

ကိုဌေးလွင်တို့ အနေဖြင့်လည်း မိမိတို့ အသက်အိုးအိမ်စည်းစိမ်လုံခြုံမှုနှင့် ဆုံးရှုံးနစ်နာမှုများအတွက် တရားမျှတသော အရေးယူမှု ရရှိနိုင်ရန် သမ္မတကြီးနှင့်တကွ သက်ဆိုင်ရာ အာဏာပိုင်များထံသို့ စာပို့ အကြောင်းကြား တိုင်ကြားရန် စီစဉ်နေကြောင်း သိရပါသည်။

မြန်မာမွတ်စလင်မ်ပြည်သူတို့ ၏ အစိတ်အပိုင်းဖြစ်သော M-Media  အနေဖြင့်လည်း အဆိုပါ ဥပဒေမဲ့ မင်းမဲ့စရိုက်ဆန်သော ဖြစ်ရပ်ဆိုးများနှင့်ပတ်သက်ပြီး ခံစားရသူများကို ကူညီကာကွယ်မှု ပေးကြပါရန်နှင့် ကြိုးကိုင်လှုံ့ဆော်သူနှင့် လုယက်ဖျက်ဆီးသူစသော ဥပဒေမဲ့ ကျူးလွန်သူများအားလုံးတို့ကို ထိရောက်စွာ အရေးယူဆောင်ရွက်ပေးပါရန် နိုင်ငံတော် သမ္မတကြီးနှင့် တကွ တာဝန်ရှိသူအားလုံးတို့ကို လေးစားစွာ မေတ္တာရပ်ခံ တောင်းဆိုအပ်ပါသည်။