ဇွန်လ ၂၄ ရက်၊ ၂၀၁၄
M-Media
.ရေးသူ- အိမ်ဝေးသူ (KZ)
အင်္ဂလိပ်ကားတွေကို မိသားစုတွေထိုင်ပြီး ကြည့်ရတာ သိပ်အဆင်မပြေလှပါဘူး။
18+ အခန်းတွေပါလာလို့ ကမန်းကတန်း ရစ်ကြည့်ရတာမျိုးတွေ ဖြစ်လေ့ဖြစ်ထ ရှိပါတယ်။
အိန္ဒိယကားတွေဆိုလည်း သူတို့ပြတဲ့ ပြကွက်တွေက တိုက်ရိုက်မဟုတ်တဲ့ 18+ တွေနဲ့ ပြည့်နေတတ်တယ်။ ပေါင်သားတွေ၊ ရင်သားတွေ၊ အနမ်းမိုးရွာခန်းတွေ၊ ရေစိုခန်းတွေကြောင့် အဖေက မသိချင်ယောင်ဆောင်ပြီး ထ,သွားရတာမျိုး၊ အမေက မသိချင်ယောင်ဆောင်ပြီး မီးဖိုချောင် ဝင်သွားရတာမျိုးတွေ ရှိပါတယ်။
ဟော။ အခု ရွှေမြန်မာတို့လည်း ပွင့်လင်းမြင်သာတဲ့ ခေတ်နဲ့အတူ ပါးစပ် porn 18+ တွေ ရိုက်လာနေပါပြီ။ အခုနောက်ပိုင်းထွက်တဲ့ မြန်မာကားတွေမှာ ဟာသတစ်ခုပြောရင် အဲဒီဟာသက အမြဲတမ်းလိုလို အဓိပ္ပါယ်နှစ်ခွ ထွက်တဲ့ ဝေါဟာရတွေကိုပဲ သုံးနေကြတယ်။
ခါးအောက်ပိုင်းနဲ့ ဆိုင်တဲ့ ဝေါဟာရတွေကို မသိချင်ယောင်ဆောင်ပြီးဖြစ်စေ၊ တမင်ဖြစ်စေ သုံးလာပါပြီ။ တစ်ချို့ ဟာသသရုပ်ဆောင်တွေဆိုရင် (*^**ချရမလား)၊ (*^**ခံလိုက်ပါလား) တို့ဆိုတာကို ထဲထဲဝင်ဝင် သုံးလာကြပါပြီ။
အထူးသဖြင့် အခုနောက်ပိုင်း မြန်မာ့အငြိမ့်တွေက ပါးစပ် porn ပိုဆန်လာတယ်။ အရင်တုန်းကဆို ဟာသပြက်လုံးတွေက သန့်သန့်လေးတွေပါ။ ရယ်ရတာလည်း သန့်သန့်ရှင်းရှင်း ရယ်ရတယ်။ ဒါပေမယ့် အခုကျတော့ အငြိမ့်ပြက်လုံးတွေက ကိုယ်လုံးချွတ်တွေ၊ ဟိုပေါ်ဒီပေါ်တွေ မဟုတ်ဘူးဆိုပေမယ့် စကားလုံးတွေ ကတော့ ကိုယ်လုံးချွတ် စကားလုံးတွေက အများစု။ အငြိမ့်မင်းသမီးတွေဆိုရင်လည်း အငြိမ့်ကတာနဲ့မတူတော့ဘူး။ စင်ပေါ်တက်ပြီး သားပြော မယားပြော အပြောခံနေရသလို ဖြစ်နေတယ်။ အဲလိုပြောမှလည်း အောက်က ပရိတ်သတ်က တဝါးဝါးနဲ့ အားပေးတယ်။
မြန်မာကားတွေ၊ အငြိမ့်တွေမှာ သုံးတဲ့ ဟာသတွေကို မွေးခါစကလေးတွေ နားမလည်ပေမယ့် အရွယ်အသင့်အတင့် ရှိတဲ့ မိန်းကလေး၊ ယောက်ျားလေးတိုင်း နားလည်ကြပါတယ်။ မိဘကလည်း ဒါက ကလေးတွေ ပျက်စီးစရာမရှိဘူးလို့ ထင်ကြ တယ်။
အမှန်တကယ်က ဒါမျိုးကလည်း ကလေးတွေအတွက် အင်မတန် အကျိုးယုတ်ပါတယ်။ ကလေးတွေက စကားပြောရင် သန့်သန့်ရှင်းရှင်း မပြောတတ်တော့ဘူး။ အဓိပ္ပါယ်နှစ်ခွ ဖြစ်တတ်တဲ့ စကားလုံးမျိုးတွေ၊ ခါးအောက်ပိုင်းစကားလုံးတွေကို ရယ်ရယ်မောမောနဲ့ အခက်အခဲမရှိဘဲ အလွယ်တကူ မှတ်ဥာဏ်ထဲမှာ မှတ်သားမိ တတ်ကြပြီး အပြင်ဘဝမှာလည်း လိုအပ်သလို သုံးရင်း ၊ ကလေးလူပြက်လေးတွ၊ ကျောင်းသားလူပြက်လေးတွေ ဖြစ်လာတော့တယ်။
အဲဒီတော့ ဟာသကား ကြည့်တဲ့သူတွေကို အပြစ်တင်ရမလား?
ဟာသကား ရိုက်တဲ့သူတွေကို အပြစ်တင်ရမလား?
အနည်းဆုံးတော့ 18+ မြန်မာဟာသကား ဆိုပြီး စတေကာကပ်မယ် ဆိုရင်တော့ ရှောင်ချင်သူတွေ၊ ရှောင်သင့်သူတွေ ရှောင် လို့ရတာပေါ့။
နောက်ဆုံးအနေနဲ့ကတော့…မြန်မာဟာသကားတွေနဲ့ အငြိမ့်တွေမှာ ပါးစပ် porn ဆန်တဲ့ အပြောအဆိုတွေ တစ်နေ့တခြား များလာပြီဆိုတာကတော့ ငြင်းလို့မရနိုင်ပါဘူး။
Leave a Reply
You must be logged in to post a comment.