ဒီဇင်ဘာ ၂၈ ၊ ၂၀၁၅
M-Media
ဆောင်ပါးရှင် – ဦးခင်မောင်ချို (တရားလွှတ်တော်ရှေ့နေ)
လူမှန်နေရာမှန် (အပိုင်း -၁) Right man in the right place
“အဲတော့ ဒီကပုဂ္ဂိုလ်တွေကလည်း တစ်ချို့ ကျွန်တော်ကိုယ်တိုင် သိခဲ့တဲ့ ပုဂ္ဂိုလ်တွေရှိတယ်။ ခုနက ရက်ရက်စက်စက်နှိပ် ကွပ်ခံနေရတုန်းကပါခဲ့တဲ့ ပုဂ္ဂိုလ်တွေ ရှိသလို၊ နောက်ပိုင်းမှ ပါခဲ့တဲ့ပုဂ္ဂိုလ်တွေရှိပါတယ်။ အဲတော့ဘယ်လိ်ုပဲရှိရှိ အခုကျွန်တော်တို့ တိုင်းပြည်ကို ပြန်လည်ပြီးတော့မှ ပြုစုပျိုးထောင်ရမယ့် အခြေအနေတွေ ပြောင်းလဲရမယ့် အခြေအနေတွေ ရောက်တဲ့အခါမှာ အားလုံးဟာ ဒီကဏ္ဍနဲ့သင့်တော်တယ်လို့ ကျွန်တော်ယူဆတယ်။”
ဟု (၁၈.၁၂.၂၀၁၅) ရက်နေ့က အမျိုးသားဒီမိုကရေစီ အဖွဲ့ချုပ်ပါတီ ကိုယ်စားလှယ်လောင်းများ စွမ်းရည်မြှင့်သင်တန်းအပါတ်စဉ် (၁) ဆင်းပွဲအခမ်းအနားမှာ အဖွဲ့ချုပ်ဗဟိုအလုပ်အမှုဆောင်အဖွဲ့ ဦးဝင်းထိန်က ပြောကြားခဲ့ပါတယ်။
အဲဒီလိုပြောကြားရာမှာ ဗိုလ်ချုပ်အောင်ဆန်းက ဦးဖေခင်ကိုတိုင်းပြည်ပြုပြင်ပြောင်းလဲရေးမှာ ပါဝင်စေခဲ့တာကို ဥပမာပေးပြီး ပြောကြား ခဲ့ပါတယ်။
အဲဒီလို ဗိုလ်ချုပ်အောင်ဆန်းရွေးချယ်ခဲ့တဲ့ ပုဂ္ဂိုလ်ဟာ ၁၉၄၇ ခုနှစ်၊ ပင်လုံစာချုပ်ချုပ်ဆိုရာမှာ ဖေဖော်ဝါရီ (၁၁) ရက်နေ့အထိ မသေချာ လိပ်ခဲတည်းလည်း ဖြစ်ပြီး၊ ဗိုလ်ချုပ်လည်း ရန်ကုန်ပြန်ဖို့လေယာဉ်ပျံ စီစဉ်ခိုင်းနေတဲ့အခြေအနေမှာ ပင်လုံစာချုပ်ကို အောင်မြင်စွာ ချုပ်ဆိုနိုင်အောင် ညှိနိူင်းဆောင်ရွက်ခဲ့ကြတဲ့ အဓိကပုဂ္ဂိုလ်တွေထဲမှာ ဦးဖေခင်ဟာ တစ်ဦးအပါအ၀င်ဖြစ်ပါတယ်။
၁၉၄၆ ခုနှစ်၊ ရွှေတိဂုံအလယ်ပစ္စယံမှာ ကျင်းပတဲ့ ဖဆပလညီလာခံကို တက်ရောက်ခဲ့တဲ့ ဗမာမွတ်စလင်မ် ကွန်ဂရက် (ဗ.မ.က) ဒုဥက္ကဌ ဖြစ်သူ ဦးဖေခင်က “ပြည်နယ်/ပြည်မ ပူးပေါင်းရေး” (အဆို အမှတ် – ၇ ) အဆိုတင်သွင်းခဲ့ပါတယ်။ ဦးဖေခင်က အဲဒီအဆိုတင်သွင်းပြီး မကြာခင်မှာ ဗိုလ်ချုပ်အောင်ဆန်းက ခေါ်တွေ့ခဲ့ပါတယ်။ တွေ့ဆုံစဉ် ဗိုလ်ချုပ်က “ကိုဖေခင် – ခင်ဗျားကို ကျွန်တော်ပြောစရာရှိတယ်။ တော်လှန်ရေးသမားဆိုတာ သုံးမျိုးသုံးစားရှိတယ်။ ခင်ဗျားသိလား၊ ပထမတစ်မျိုးက လက်နက်ကိုင်ပြီး
တိုက်ရဲတယ်၊ သတ်ရဲ ဖြတ်ရဲ အသေခံရဲတယ်။ ဒုတိယအမျိုးအစားက လက်နက်ကိုင်ပြီး မတိုက်ရဲ၊ မခိုက်ရဲ မသတ်ရဲ မဖြတ်ရဲဘူး၊ အသေလဲ မခံရဲဘူး။ ဒါပေမယ့် တစ်ရွာဝင် တစ်ရွာထွက် အပင်ပန်းခံ အဆင်းရဲခံပြီးစည်းရုံးရေး လုပ်နိုင်တယ်။ စားစရာ ရရင်စား၊ မရရင် မစားဘဲ ဇွဲနပဲ နဲ့ အငတ်ခံနိုင်တယ်။ တတိယအမျိုးစားက တိုက်လဲမတိုက်ရဲ အသေလည်းမခံရဲ အပင်ပန်းအဆင်းရဲ အငတ်အပတ်လဲ မခံနိုင်ဘူး။ ခပ်ကြော့ကြော့လေးဝတ်စားပြီး ဦးနောက်သုံးပြီး တိုင်းပြည်အတွက် ဘာလုပ်ပေးရမလဲ၊ လုပ်ပေးနိုင်တဲ့ဆိုတဲ့ လူစားမျိုးဖြစ်တယ်။ ခင်းဗျားက အဲဒီအမျိုးအစားထဲပါတယ်။ ခင်ဗျားကို ကျုပ်တာဝန်ပေးစရာရှိတယ်။” ပြောခဲ့ပါတယ်။
အဲဒီနောက်ပိုင်းမှာ ဖဆပလဌာနချုပ်၊ နယ်ခြားဒေသခွဲ ဖွင့်လှစ်ပြီး ဦးဖေခင်ကို အတွင်းရေးမှုးတာဝန်ပေးခဲ့ပါတယ်။ “ဦးဖေခင်သည် ရွှေတိဂုံ အလယ်ပစ္စယံညီလာခံကြီးမှသည် ၁၂-၂-၄၇ နေ့ ပင်လုံစာချုပ်လက်မှတ်ရေးထိုးချုပ်ဆို ပြီးသည်အထိ သူကိုယ်တိုင် တောက်လျှောက် ပါဝင်ခဲ့သော တိုင်းရင်းသား စည်းလုံးညီညွှတ်မှုများ အကြောင်းကို ကွက်ကွက်ကွင်းကွင်း အသေးစိတ် ရေးသားဖော်ပြခဲ့ပါတယ်” လို့ ဗိုလ်ချုပ်အောင်ဆန်းအပါးတော်မြဲ အတွင်းဝန်ဟောင်း ဗိုလ်ထွန်းလှ (တက္ကသိုလ်နေ၀င်း)၊ နိုင်ငံဂုဏ်ရည် ပထမဆင့် က ချီးကျုးခဲ့ပါတယ်။
ဦးဖေခင်သည် ၁၉၄၆ ခုနှစ် ပထမ ပင်လုံညီလာခံ၊ ၁၉၄၇ ခုနှစ် ဒုတိယ ပင်လုံညီလာခံ များတွင် ပါဝင်ခဲ့သူ ဖြစ်ပါတယ်။ ၂၈.၁.၁၉၈၉ ရက်နေ့မှ ၁၀.၂.၁၉၈၉ ရက်နေ့အထိ “ရွှေတိဂုံညီလာခံ-ပင်လုံစာချုပ်၏ မျိုးစေ့” အခန်းဆက်ဆောင်းပါးရှည်ကြီးကိုလည်း အင်္ဂလိပ်/မြန်မာ လုပ်သားပြည်သူ့နေ့စဉ် သတင်းစာများမှာ ရေးသားခဲ့ပါတယ်။ ပင်လုံညီလာခံအကြောင်း ပြည့်ပြည့်စုံစုံ မှတ်တမ်းတင်နိုင်သူ ဖြစ်ပါတယ်။
ဦးဖေခင်သည် မဟာသရေစည်သူ၊ နိုင်ငံဂုဏ်ရည်ပထမဆင့်၊ ၁၉၄၇ ဖွဲ့စည်းပုံအခြေခံ ဥပဒေရေးဆွဲရေး ကော်မတီဝင် ဖြစ်ခဲ့တယ်။ ၁၉၄၇ ခုနှစ်မှာ ပထမဦးဆုံး ပါကစ္စတန်နိုင်ငံဆိုင်ရာ မြန်မာသံအမတ်ကြီး အဖြစ်လည်းကောင်း၊ ၁၉၅၃ခုနှစ်မှ ၁၉၅၆ ခုနှစ်အထိ ထိုင်းနိုင်ငံဆိုင်ရာ မြန်မာ သံအမတ်ကြီးအဖြစ်လည်းကောင်း၊ နောက်ပိုင်းမှာ လာအို၊ ကမ္ဘောဒီးယား၊ ရုရှား၊ ချက်ကိုစလိုဗက်ကီးယား၊ ပိုလန်၊ မလေးရှား နဲ့ စင်ကာပူနိုင်ငံများမှာ မြန်မာသံအမတ်ကြီးအဖြစ် တာဝန်ထမ်းဆောင်ခဲ့ပါတယ်။ ၁၉၇၂ ခုနှစ်မှာ အငြိမ်းစားယူခဲ့ပါတယ်။
ဗိုလ်ချုပ်အောင်ဆန်းက လူရွေးတဲ့နေရာမှာ လည်း အင်မတန်တော်တယ်လို့ မှတ်ချက်ပြုကြပါတယ်။ သူရွေးတဲ့ ဦးဖေခင်လို ပုဂ္ဂိုလ်မျိုးဟာ မြန်မာနိုင်ငံ့သားကောင်းအဖြစ် မြန်မာနိုင်ငံ့တာဝန်များကို စွမ်းစွမ်းတမံထမ်းဆောင်ခဲ့ပုံများကို သိမြင် နိုင်ပါတယ်။
ကျွန်တော်တို့ရဲ့ အထက်လူကြီးများက မြန်မာ့နိုင်ငံရေးမှာ ထဲထဲဝင်ဝင် ပါဝင်ခဲ့သူများရဲ့ ရွှေသမိုင်းများဖြစ်ပါတယ်။
ဆက်လက်ပြီးတော့ ဗိုလ်ချုပ်အောင်ဆန်းရွေးခဲ့တဲ့ လူတော် လူကောင်း နောက်ပုဂ္ဂိုလ်တစ်ယောက်အကြောင်းကို “လူမှန် နေရာမှန်” (အပိုင်း ၂) အဖြစ် ဆက်လက်ဖော်ပြပါဦးမယ်။
အားလုံးကို ကျေးဇူးတင်ပါတယ်။
ဦးခင်မောင်ချို
ဆက်စပ် အကြောင်း အရာများ ဖတ်ဖို့
Leave a Reply
You must be logged in to post a comment.