IS အကြမ်းဖက်အဖွဲ့က ခေါင်းဆောင်အသစ်တင်မြှောက်

နိုဝင်ဘာ ၁၊ ၂၀၁၉
M-Media

-ခေါင်းဆောင် အဘူ ဘာကာ အလ်-ဘဂ္ဂဒါဒီ သေဆုံးကြောင်း IS အကြမ်းဖက်အဖွဲ့က အတည်ပြုလိုက်ပြီး အဘူ အီဘရာဟင် အလ်-ဟာရှီမီ အလ်-ကူရိုက်ရှီကို ခေါင်းဆောင်သစ်အဖြစ် ခန့်အပ်လိုက်တယ်လို့ မနေ့မှာ ကြေငြာလိုက်ပါတယ်။

အမေရိကန် အထူးတပ်ဖွဲ့ဝင်တွေဟာ ပြီးခဲ့တဲ့တစ်ပတ် ဆီးရီးယားနိုင်ငံ အနောက်မြောက်ပိုင်းမှာ ဘဂ္ဂဒါဒီကို ဖမ်းဆီးရေး စစ်ဆင်ရေးတစ်ခု ပြုလုပ်ခဲ့ပြီး ဘဂ္ဂဒါဒီကတော့ အသေခံဗုံးခွဲကာ သတ်သေသွားခဲ့ပါတယ်။

IS အကြမ်းဖက်အဖွဲ့က Telegram ကနေတစ်ဆင့် မနေ့က ထုတ်ပြန်တဲ့ ကြေငြာချက်မှာ ဘဂ္ဂဒါဒီနဲ့ သူ့ရဲ့ညာလက်ရုံး အဘူ အလ်-ဟာဆန် အလ်-မူဟာဂျီရ်တို့ သေဆုံးသွားပြီလို့ အတည်ပြုခဲ့ပါတယ်။

ဆော်ဒီနိုင်ငံသားဖြစ်တဲ့ အလ်-မူဟာဂျီရ်ဟာ ဘဂ္ဂဒါဒီနေရာကို ဆက်ခံမယ့်သူလို့ နာမည်ကြီးပြီး ဘဂ္ဂဒါဒီသေဆုံးပြီးနောက် ဆီးရီးယားနိုင်ငံ အခြားတစ်နေရာမှာ ကာ့ဒ်တပ်ဖွဲ့တွေနဲ့ အမေရိကန်တို့ရဲ့ ပူးပေါင်းစစ်ဆင်ရေးအတွင်း သေဆုံးခဲ့တာဖြစ်ပါတယ်။

ခေါင်းဆောင်သစ်အဖြစ် အဘူ အီဘရာဟင် အလ်-ဟာရှီမီကို တင်မြှောက်ကြောင်း IS က ကြေငြာခဲ့သလို အလ်-မူဟာဂျီရ်နေရာကို ဆက်ခံတဲ့ အဘူ ဟမ်ဇာ အလ်-ကိုရိုက်ရှီကလည်း IS အဖွဲ့ကို သစ္စာခံဖို့ မွတ်စလင်တွေအားလုံးကို တိုက်တွန်းခဲ့ပါတယ်။

အလ်-ဟာရှီမီဟာ IS ရဲ့ တိုက်ခိုက်မှုတွေမှာ ပါဝင်ခဲ့ကြောင်း ကမ္ဘာ့လုံခြုံရေးဆိုင်ရာ ရင်းမြစ်တွေမှာ မှတ်တမ်းရှိနေပြီး IS ကတော့ ဂျီဟတ်လှုပ်ရှားမှုမှာ အလ်-ဟာရှီမီဟာ ထင်ရှားတဲ့ခေါင်းဆောင်တစ်ဦးဖြစ်ကာ အရင်က အမေရိကန်တပ်ဖွဲ့ဝင်တွေကို တိုက်ခိုက်ခဲ့ဖူးတယ်လို့ ဆိုပါတယ်။ ဒါပေမယ့် အသေးစိတ်အချက်အလက်နဲ့ ဓာတ်ပုံတွေကို ထုတ်ပြန်ခြင်း မရှိပါဘူး။

Ref: BBC