ရိုဟင်ဂျာများနေရပ်ပြန်ရေး တရုတ်အစီအစဉ်ကို လက်ခံရန် မြန်မာစဉ်းစား

နိုဝင်ဘာ ၂၆၊ ၂၀၁၉
M-Media

-ဘင်္ဂလားဒေ့ရှက်ဖက်ကို ထွက်ပြေးရတဲ့ ရိုဟင်ဂျာတွေ နေရပ်ပြန်ရေးအတွက် တရုတ်က အဆိုပြုတဲ့ နည်းလမ်းတစ်ခုကို လက်ခံဖို့ စဉ်စားနေတယ်လို့ မြန်မာအာဏာပိုင်တွေက ပြောကြားလိုက်ပါတယ်။

ရိုဟင်ဂျာတွေ ရခိုင်ပြည်နယ်က သူတို့နေရပ်တွေပြန်ရေး ကိစ္စဟာ နှောင့်နှေးမှုတွေ ဖြစ်နေပြီး ဘင်္ဂလားဒေ့ရှ်နဲ့ မြန်မာတို့ကလည်း အပြန်အလှန် ပြစ်တင်ပြောဆိုမှုတွေ ရှိနေပါတယ်။

တနင်္ဂနွေနေ့က ဘင်္ဂလားဒေ့ရှ်နိုင်ငံ မြို့တော်ဒါကာမှာပြုလုပ်တဲ့ ရိုဟင်ဂျာတွေနေရပ်ပြန်ရေး ဆွေးနွေးပွဲမှာ ဘင်္ဂလားဒေ့ရှ်ဆိုင်ရာ တရုတ်သံအမတ်‌ကြီး လီကျီမင်းက နည်းလမ်းတစ်ခုကို အဆိုပြုခဲ့ပါတယ်။ ဘင်္ဂလားဒေ့ရှ် ဒုက္ခသည်စခန်းမှာ နေထိုင်နေရတဲ့ ရိုဟင်ဂျာမိသားစုတွေထဲက တစ်ဦးစီ အရင်နေရပ်ပြန်ပြီး အခြေအနေကို ကျန်ခဲ့တဲ့ မိသားစုတွေထံ ပြန်လည်ပြောပြရမယ့် နည်းလမ်း ဖြစ်ပါတယ်။

လီက မိသားစုတစ်စုချင်းစီဟာ အရင်ဆုံး နေရပ်ပြန်မယ့်လူတွေကို ရွေးချယ်ပေးရမှာဖြစ်ပြီး အဲဒီလူတွေ ရခိုင်ပြည်နယ်က အရင်နေထိုင်ခဲ့ရာ ရွာတွေကို ပြန်ရောက်သွားတဲ့အခါ လက်ရှိအခြေအနေ၊ လုံခြုံမှု ရှိ၊ မရှိ စတာတွေကို မိသားစုတွေထံ ပြန်လည်ပြောကြားရမှာဖြစ်ကြောင်း၊ လိုအပ်တဲ့ဖုန်းတွေကို တရုတ်အစိုးရက ထုတ်ပေးသွားမှာဖြစ်ကာ ဒုက္ခသည်စခန်းမှာ ကျန်ခဲ့တဲ့ မိသားစုဝင်တွေက ပြန်သင့်၊ မပြန်သင့် ဆုံးဖြတ်ရမှာဖြစ်ကြောင်း ပြောကြားခဲ့ပါတယ်။

နိုင်ငံခြားရေးဝန်ကြီးဌာနက ညွှန်ကြားရေးမှူးချုပ် ဦးချမ်းအေးက ရိုဟင်ဂျာဒုက္ခသည်တွေ နေရပ်ပြန်ရေးအတွက် ဘင်္ဂလားဒေ့ရှ်နဲ့ ဆွေးနွေးညှိနှိုင်းမှုတွေ လုပ်ဆောင်နေပြီး တရုတ်သံအမတ်ရဲ့ အဆိုပြုချက်ကို လက်ခံသင့်လားဆိုတာ အရင်ဆုံး ဆွေးနွေးသွားမယ်လို့ ပြောကြားခဲ့ပါတယ်။

၂ နှစ်အတွင်း ရိုဟင်ဂျာတွေ နေရပ်ပြန်နိုင်ရေး သဘောတူညီချက်တစ်ခုကို မြန်မာနဲ့ ဘင်္ဂလားဒေ့ရှ်နိုင်ငံတို့က လက်မှတ်ရေးထိုးထားပေမယ့် ထိထိရောက်ရောက် အကောင်အထည် မဖော်နိုင်သေးပါဘူး။

ရိုဟင်ဂျာအရေး တက်ကြွလှုပ်ရှားသူ ကိုသာအေးက တရုတ်သံအမတ်ရဲ့ အဆိုပြုချက်ဟာ အလုပ်ဖြစ်မှာမဟုတ်ဘဲ နိုင်ငံသားဖြစ်ရေး၊ ပညာသင်ကြားခွင့်တွေလို အခွင့်အရေး ကန့်သတ်ခံရမှုကို အရင်ဆုံး ဖြေရှင်းဖို့ လိုအပ်တယ်လို့ ပြောကြားခဲ့ပါတယ်။

တရုတ်က ဒီနည်းလမ်းကို အဆိုပြုတာ ဒုတိယအကြိမ်ဖြစ်ပါတယ်။ စက်တင်ဘာလ ကော့ဇ်ဘဇားက ရိုဟင်ဂျာဒုက္ခသည်စခန်းတွေကို သွားရောက်ရာမှာ လီက ဒီနည်းလမ်းကို ပြောပြခဲ့ဖူးပါတယ်။

Ref: RFA