တရုတ်ထုတ် Sinopharm ကိုဗစ်ကာကွယ်ဆေး ၄ သန်း မြန်မာကို ထပ်ရောက်

စက်တင်ဘာ ၂၇၊ ၂၀၂၁
M-Media

-တရုတ်နိုင်ငံကနေ ဝယ်ယူထားတဲ့ ကိုဗစ်ကာကွယ်ဆေး Sinopharm အလုံးရေ ၄ သန်း မနေ့က ရန်ကုန် အပြည်ပြည်ဆိုင်ရာလေဆိပ်ကို ရောက်ရှိလာတယ်လို့ သိရပါတယ်။

မြန်မာနိုင်ငံဟာ တရုတ်ထုတ်ကာကွယ်ဆေး စုစုပေါင်း အလုံးရေ ၁၆.၆ သန်း ရရှိထားပြီး အဲဒီအထဲက ၃.၉ သန်းကို တရုတ်နိုင်ငံက လှူဒါန်းတာလို့ မြန်မာနိုင်ငံ တရုတ်သံရုံးရဲ့ ထုတ်ပြန်ချက်မှာ ဖော်ပြထားပါတယ်။

စစ်ကောင်စီရဲ့ မှတ်တမ်းတွေအရ နိုင်ငံတစ်ဝှမ်း ကိုဗစ်ကာကွယ်ဆေး ၂ ကြိမ်စလုံးထိုးပြီးသူ ၃.၇၂ သန်း ရှိနေပြီး တစ်ကြိမ်ထိုးထားသူက ၃.၄၇ သန်း ရှိတယ်လို့ ဆိုပါတယ်။

NLD အစိုးရလက်ထက်က ဝယ်ယူထားတဲ့ ကိုဗစ်ကာကွယ်ဆေးတွေ၊ ပြည်သူလူထုက လှူဒါန်းထားတဲ့ ကာကွယ်ဆေးဝယ်ဖို့ အလှူငွေတွေကို ဘယ်လို သုံးစွဲသလဲဆိုတာတွေနဲ့ပတ်သက်လို့ အာဏာသိမ်းပြီး ၉ လအထိ စစ်ကောင်စီက ထုတ်ပြန်ခြင်း မရှိသေးပါဘူး။

Ref: CGTN