ဆော်ဒီအိမ်ရှေ့မင်းသား၏ ရွှေပြည်အေးမှတ်ချက်ကို အီရန်ချီးကျူး

မတ် ၇၊ ၂၀၂၂

M-Media 

-နှစ်နိုင်ငံ ဆက်ဆံရေး ပြန်လည်ထူထောင်ဖို့ အဆင်သင့်ရှိတယ်ဆိုတဲ့ ဆော်ဒီအိမ်ရှေ့မင်းသား မိုဟာမက်ဘင် ဆလ်မန်ရဲ့ မှတ်ချက်ကို  နှစ်ခြိုက်အားရတယ်လို့ အီရန်နိုင်ငံခြားရေး၀န်ကြီး ဟိုစိန် အမီရ် အဘ်ဒူလာဟီယန်က ပြောကြားလိုက်ပါတယ်။ 

Atlantic သတင်းဌာနနဲ့ ပြီးခဲ့တဲ့တစ်ပတ် အင်တာဗျူးမှာ ဘင်ဆလ်မန်က အီရန်ဟာ ထာ၀ရအိမ်နီးချင်းနိုင်ငံဖြစ်ပြီး ဆက်ဆံရေးကောင်းမွန်အောင် ကြိုးပမ်းသွားမယ်လို့ မှတ်ချက်ပေးခဲ့ပါတယ်။

“ဆော်ဒီ ထိပ်တန်းပုဂ္ဂိုလ်တစ်ဦးရဲ့ လတ်တလောမှတ်ချက်မှာ အီရန်နဲ့ ဆက်ဆံရေး ထူထောင်ဖို့ သဘောဆန္ဒကို တွေ့ရပါတယ်။ ဒီအတွက် ကျွန်တော်တို့ ကြိုဆိုပါတယ်” လို့ အဘ်ဒူလာဟီယန်က နိုင်ငံပိုင် သတင်းဌာနကို IRNA ကို ပြောကြားခဲ့ပါတယ်။ 

၂၀၁၆ ခုနှစ် ဆော်ဒီက ရှီအာဘာသာရေးခေါင်းတစ်ဦးကို ကွပ်မျက်ခဲ့မှုနဲ့ ပတ်သက်ပြီး အီရန်ပြည်သူတွေ မကျေနပ်တဲ့အတွက် မြို့တော် တီဟီရန်မှာ ဆန္ဒပြပြီး ဆော်ဒီသံရုံးကို ၀င်ရောက်စီးနင်းခဲ့ပါတယ်။ 

အဲဒီနောက်ပိုင်း နှစ်နိုင်ငံဆက်ဆံရေး ရပ်ဆိုင်းသွားခဲ့တာ ဖြစ်ပါတယ်။ 

ဒါပေမယ့် အီရတ်ရဲ့ ကြား၀င်ပေးမှုနဲ့အတူ ပြီးခဲ့တဲ့နှစ်ကစပြီး ဆော်ဒီ-အီရန် အဆင့်မြင့်အရာရှိတွေ တွေ့ဆုံဆွေးနွေးမှု အနည်းဆုံး ၄ ကြိမ်လောက် လုပ်ခဲ့ပြီး ဆက်ဆံရေးကောင်းမွန်အောင် ကြိုးစားခဲ့ကြပါတယ်။ 

အဒ်ဒူလာဟီယန်က ဆော်ဒီအနေနဲ့ တွေ့ဆုံဆွေးနွေးရေး လမ်းကြောင်းပေါ်ကို လျှောက်လှမ်းလာတဲ့အတွက် ပျော်ရွှင်မိတယ်လို့ ထည့်သွင်းပြောဆိုခဲ့ပါတယ်။

Ref : Teheran Tiems