စစ်လက်နက် တင်ပို့ရောင်းချမှု ၃ ဆ မြင့်တက်အောင် အိန္ဒိယ ဆောင်ရွက်မည်

ဖေဖော်၀ါရီ ၁၄၊ ၂၀၂၃

M-Media 

-၂၀၂၄-၂၅ ဘဏ္ဍာရေးနှစ်မှာ နိုင်ငံရဲ့ စစ်လက်နက်တင်ပို့ရောင်းချမှုတန်ဖိုး ကန်ဒေါ်လာ ၅ ဘီလီယံကျော်ထိရှိအောင် ဆောင်ရွက်သွားမယ်လို့ အိန္ဒိယ၀န်ကြီးချုပ် နရန်ဒရာမိုဒီက ပြောကြားလိုက်ပါတယ်။ 

အိန္ဒိယရဲ့ လက်နက်တင်ပို့မှုတန်ဖိုးဟာ လက်ရှိမှာ ၁.၅ ဘီလီယံရှိပြီး ၃ ဆ ကျော်တက်အောင် မိုဒီက ရည်ရွယ်နေတာဖြစ်ပါတယ်။ 

မနေ့က Aero India Show လေကြောင်းပြပွဲ ဖွင့်ပွဲအခမ်းအနားမှာ မိုဒီက အိန္ဒိယ စစ်လက်နက်ထုတ်လုပ်မှုလုပ်ငန်းရဲ့ အောင်မြင်မှုကို ထည့်သွင်းပြောကြားခဲ့ပါတယ်။ 

၅ ရက်ကြာမြင့်မယ့် ဒီလေကြောင်းပြပွဲမှာ အိန္ဒိယဟာ နိုင်ငံခြားတိုင်းပြည်တွေနဲ့ ကန်ဒေါ်လာ ၉ ဘီလီယံဖိုး စစ်လက်နက်ရောင်းချရေးဆိုင်ရာ သဘောတူညီချက်တွေ လက်မှတ်ရေးထိုးဖို့ ရှိနေပါတယ်။ 

အရင်က ကမ္ဘာ့အကြီးဆုံး လက်နက်တင်သွင်းတဲ့ နိုင်ငံတွေထဲကတစ်ခုဖြစ်တဲ့ အိန္ဒိယဟာ လက်ရှိအချိန်မှာ တင်ပို့ရောင်းချတဲ့ နိုင်ငံတစ်ခု ဖြစ်လာခဲ့ပြီး နိုင်ငံပေါင်း ၇၅ နိုင်ငံလောက်ကို လက်နက်တွေ တင်ပို့နေပါတယ်။ 

တင်ပို့တဲ့ စစ်လက်နက် ပစ္စည်းတွေထဲမှာ Dhruv ရဟတ်ယာဥ်တွေ၊ BrahMos ဒုံးကျည်တွေ၊ Tejas လို အပေါ့စား တိုက်ပွဲ၀င် တိုက်လေယာဥ်တွေ ပါ၀င်ပါတယ်။ 

Ref: Arab News