News @ M-Media

စီးပွားရေးတွင် ရေနံအပေါ်မှီခိုနေရမှုကို အာရပ်နိုင်ငံများ လျှော့ချလာနိုင်

ဖေဖော်၀ါရီ ၁၄၊ ၂၀၂၃

M-Media 


ကုန်ထုတ်လုပ်မှုလုပ်ငန်း အဓိကတည်ရှိရာ ယူအေအီးနိုင်ငံ ရှာဂျာမြို့

-နိုင်ငံစီးပွားရေး ရေနံအပေါ်မှီခိုနေရမှုကို လျှော့ချနိုင်ရေး ပင်လယ်ကွေ့ အာရပ်နိုင်ငံတွေရဲ့ ကြိုးပမ်းမှုမှာ တိုးတက်မှုတွေ ရှိနေတယ်လို့ နိုင်ငံတကာ ငွေကြေးရန်ပုံငွေအဖွဲ့ IMF က ပြောပါတယ်။ 

ပုဂ္ဂလိက ရင်းနှီးမြှုပ်နှံမှု၊ ကုန်ထုတ်လုပ်မှု၊ နည်းပညာကဏ္ဍ ချဲ့ထွင်မှု၊  အခွန်ဆိုင်ရာ ပြုပြင်ပြောင်းလဲမှုတွေ၊ ခရီးသွားလုပ်ငန်းတိုးချဲ့မှုတွေကို ပင်လယ်ကွေ့နိုင်ငံတွေက ပြီးခဲ့တဲ့နှစ်အနည်းငယ်မှာ အဓိကထား လုပ်ဆောင်လာကြတာ ဖြစ်ပါတယ်။ 

“ငွေကြေးတန်ဖိုး ဘယ်လိုမြှင့်တင်ရမလဲ၊ ငွေကြေးကို ဘယ်လို စီမံသုံးစွဲရမလဲဆိုတာတွေမှာ ပြုပြင်ပြောင်းလဲမှုတွေ မရပ်မနား လုပ်ဆောင်နေကြတာ ဖြစ်ပါတယ်” လို့ IMF အကြီးအကဲ ခရစ္စတီးနား ဂျော်ဂျီဗာက မနေ့က ဒူဘိုင်းမှာပြုလုပ်တဲ့ အစည်းအ၀ေးမှာ ပြောကြားခဲ့ပါတယ်။ 

ပြီးခဲ့တဲ့တစ်နှစ်အတွင်း ပင်လယ်ကွေ့ဒေသမှာ ဆော်ဒီက ရေနံမဟုတ်တဲ့ စီးပွားရေး အမြန်ဆုံးတိုးတက်တဲ့နိုင်ငံ ဖြစ်လာပါတယ်။ ဆော်ဒီဟာ ဒေသတွင်း စီးပွားရေးအကြီးဆုံးနိုင်ငံလည်း ဖြစ်ပါတယ်။ 

ဘက်ပေါင်းစုံ စီးပွားရေးလုပ်ငန်းတွေရှိတဲ့ အာရပ်စော်ဘွားများ ပြည်ထောင်စု (ယူအေအီး) က အခွန်မူ၀ါဒ၊ နိုင်ငံခြား အလုပ်သမားဆိုင်ရာ မူ၀ါဒတွေကို ပြုပြင်ပြောင်းလဲခဲ့ပြီး ကုန်ထုတ်လုပ်ရေး၊ နည်းပညာနဲ့ ပြည့်ဖြိုးမြဲစွမ်းအင်ထုတ်လုပ်ရေး ဖက်မှာ ရင်းနှီးမြှုပ်နှံမှု အမြောက်အများပြုလုပ်လာပါတယ်။ 

ခရစ္စတီးနားက အာရပ်နိုင်ငံတွေဟာ ရေနံနဲ့ ဓာတ်ငွေ့စျေး တက်ဖို့ပဲ လုပ်တတ်တယ်ဆိုတဲ့ ထင်မြင်ယူဆချက်တွေ မမှန်ဘူးလို့ ထည့်သွင်းပြောဆိုခဲ့ပါတယ်။ 

Ref: Arab News