ဆိုရှယ်မီဒီယာနှင့် အွန်လိုင်းစာပို့ အက်ပလီကေးရှင်းများကို မလေးရှားက ထိန်းချုပ်တော့မည်

ဇူလိုင် ၂၇၊ ၂၀၂၄
M-Media

-အသုံးပြုသူ အနည်းဆုံး ၈ သန်းရှိတဲ့ ဆိုရှယ်မီဒီယာနဲ့ စာပို့ အက်ပလီကေးရှင်းတွေအနေနဲ့ သြဂုတ်လ ၁ ရက်နေ့ကစပြီး လိုင်စင်လုပ်ဖို့ မလေးရှားအစိုးရက ဇူလိုင်လ ၂၇ ရက်နေ့က ကြေငြာချက် ထုတ်ပြန်ပါတယ်။

နာမည်ကျော် အက်ပလီကေးရှင်းတွေဖြစ်တဲ့ Facebook၊ TikTok၊ X၊ Wechat နဲ့ WahtsApp တို့ လိုင်စင်လုပ်ဖို့ အကြုံး၀င်လာမှာဖြစ်ပါတယ်။

မလေးရှား ဆက်သွယ်ရေးနဲ့ မီဒီယာ ကော်မရှင်(MCMC) ရဲ့ ထုတ်ပြန်ချက်မှာ အွန်လိုင်းကမ္ဘာ ပိုမိုလုံခြုံစေဖို့အတွက် ဒီလို ဥပဒေမျိုး ထုတ်ပြန်ရတာလို့ ဖော်ပြထားပါတယ်။ ၂၀၂၅ ခုနှစ် ဇန်န၀ါရီ ၁ ရက်နေ့က စတင်ကာ ဥပဒေအကျုံး၀င်မှာဖြစ်ပြီး လိုင်စင်မလုပ်ထားတဲ့ ဆိုရှယ်မီဒီယာတွေ၊ အွန်လိုင်း စာပို့ အက်ပလီကေးရှင်းတွေကို ဥပဒေကြောင်းအရ အရေးယူသွားမယ်လို့လည်း ကော်မရှင်က ပြာပါတယ်။

အွန်လိုင်းကနေတစ်ဆင့် ငွေကြေးလိမ်လည်မှု၊ ဆိုက်ဘာ အနိုင်ကျင့်မှုတွေ၊ ကလေးငယ်တွေကို ပစ်မှတ်ထားတဲ့ လိင်ပိုင်းဆိုင်ရာ ရာဇ၀တ်မှုတွေကို နှိမ်နှင်းနိုင်ဖို့ မလေးရှားအစိုးရရဲ့ ကြိုးစားမှုကနေ အခုလို ကန့်သတ်ချက် ထွက်ပေါ်လာတာ ဖြစ်ပါတယ်။

“၂၀၀၀ ခုနှစ် ဆက်သွယ်ရေးဥပဒေအရ ဒီလုပ်ငန်းတွေဟာ လိုင်စင်ကင်းလွတ်ခွင့် ရှိနေတယ်။ အခု ဥပဒေသစ်မှာ သတ်မှတ်ချက်နဲ့ ပြည့်မီတဲ့ အက်ပလီကေးရှင်းတွေသာ လိုင်စင်လုပ်ရမှာဖြစ်ပြီး အသုံးပြုသူတွေက လုပ်ဖို့ မလိုပါဘူး” လို့ MCMC ရဲ့ ထုတ်ပြန်ချက်မှာ ဖော်ပြထားပါတယ်။

Ref : New Straits Times