ယူဂန်ဒါတွင် ဧရာမအမှိုက်ပုံ ပြိုကျမှုဖြစ်ပြီး အနည်းဆုံး လူ တစ်ဒါဇင် သေဆုံး

သြဂုတ် ၁၁၊ ၂၀၂၄
M-Media

-အာဖရိက ယူဂန်ဒါနိုင်ငံ မြို့တော် ကမ်ပါလာမှာ သြဂုတ်လ ၁၀ ရက်နေ့ မနက်အစောပိုင်းက ဧရာမ အမှိုက်ပုံကြီး ပြိုကျမှု ဖြစ်ပွားခဲ့ပြီး အနည်းဆုံး လူ ၁၃ ဦး သေဆုံးခဲ့ပါတယ်။

မြို့တွင်းက အမှိုက်တွေကို ဆယ်စုနှစ်ချီ စုပုံလွှင့်ပစ်ထားတာကြောင့် အဲဒီအမှိုက်ပုံကြီးဟာ တောင်သဖွယ် ဖြစ်နေတာပါ။ ပြီးခဲ့တဲ့ရက်ပိုင်း မိုးသည်းထန်စွာ ရွာသွန်းမှုကြောင့် အမှိုက်ပုံကြီး ပြိုကျကာ ပတ်၀န်းကျင်မှာရှိတဲ့ လူနေအိမ်တွေကို ဖုံးလွှမ်းသွားခဲ့ပါတယ်။

ပြိုကျလာတဲ့ အမှိုက်ပုံထဲ ပိတ်မိ ပျောက်ဆုံးနေသူတွေလည်း ရှိနေပြီး အာဏာပိုင်တွေက ရှာဖွေကယ်ဆယ်ရေး လုပ်ငန်းတွေကို လုပ်ဆောင်နေပါတယ်။

ဒီအမှိုက်ပုံကြီးဟာ လူတွေရဲ့ ကျန်းမာရေးနဲ့ အသက်အိုးအိမ်ကို တစ်ချိန်မှာ ထိခိုက်လာနိုင်တယ်လို့ ကျွမ်းကျင်သူတွေက နှစ်ပေါင်းများစွာ သတိပေးထားခဲ့ပေမယ့် အာဏာပိုင်တွေက လစ်လျူရှုထားခဲ့တာ ဖြစ်ပါတယ်။

Ref: Reuters