Category: ျမန္မာသတင္း

နို၀င်ဘာ ၁၂၊ ၂၀၂၃

M-Media 

-ဂါဇာက တိုက်ခိုက်သတ်ဖြတ်မှုတွေဟာ ကိုယ့်ကိုယ်ကို ခုခံကာကွယ်မှုလို့ အစ္စရေးရဲ့ ပြောဆိုမှုကို လက်မခံဘူးလို့ အာရပ်နိုင်ငံတွေက ပြောကြားလိုက်ပါတယ်။ 

အာရပ်နဲ့ အခြား အစ္စလာမ့်မစ် နိုင်ငံတွေဟာ နို၀င်ဘာ ၁၁ ရက်နေ့က ဆော်ဒီအာရေဗျမှာ ထိပ်သီးအစည်းအ၀ေးတစ်ခု ကျင်းပကာ ဂါဇာကမ်းမြှောင်ကိစ္စကို ဆွေးနွေးခဲ့ကြပါတယ်။ 

ဂါဇာမှာ အစ္စရေးရဲ့ တိုက်ခိုက်သတ်ဖြတ်မှုတွေဟာ စစ်ရာဇ၀တ်မှုမြောက်ပြီး၊ လူမဆန် ရက်စက်ကြမ်းကြုတ်တဲ့ လုပ်ရပ်တွေဖြစ်တယ်လို့ အစည်းအ၀ေးအပြီး ထုတ်ပြန်တဲ့ ကြေငြာချက်မှာ ဖော်ပြထားပါတယ်။ 

အစ္စရေးက ဂါဇာကို ပိတ်ဆို့ထားမှု အဆုံးသတ်ရေး၊ လူသားချင်း စာနာထောက်ထားမှုဆိုင်ရာ အကူအညီတွေ ၀င်ခွင့်ပေးရေး၊ အစ္စရေးကို လက်နက်ရောင်းချမှု ပိတ်ပင်ရေး အစည်းအ၀ေးမှာ တောင်းဆိုခဲ့သလို၊ ဂါဇာမှာ အစ္စရေးရဲ့ ကျူးကျော်သတ်ဖြတ်မှုတွေကို တားဆီးရေးအတွက် ခိုင်မာတဲ့ ဆုံးဖြတ်ချက်တစ်ခု ထွက်ပေါ်လာနိုင်ရေး ကုလလုံခြုံရေးကောင်စီက ဆောင်ရွက်ပေးဖို့လည်း တိုက်တွန်းခဲ့ပါတယ်။ 

အစည်းအ၀ေးကို အာရပ် ၂၂ နိုင်ငံနဲ့ အိုအိုင်စီအဖွဲ့၀င်နိုင်ငံတစ်ချို့ တက်ရောက်ခဲ့ကြပါတယ်။ 

Ref: Aljazeera 

နို၀င်ဘာ ၅၊ ၂၀၂၃

M-Media 

-ဂါဇာကမ်းမြှောင်က မဂ်ဟာဇီ ဒုက္ခသည်စခန်းကို အစ္စရေးက စနေနေ့ညမှာ ဒုံးကျည်နဲ့ တိုက်ခိုက်ခဲ့ပြီး အနည်းဆုံး ၃၀ ကျော် သေဆုံးကာ အများအပြား ဒဏ်ရာရခဲ့ပါတယ်။ 

သေဆုံး ဒဏ်ရာရသူ အများစုဟာ အမျိုးသမီးတွေနဲ့ ကလေးငယ်တွေ ဖြစ်ပါတယ်။ 

အစ္စရေးဟာ ဒုက္ခသည်စခန်းတွေ၊ ဆေးရုံ၊ စာသင်ကျောင်း၊ စစ်ရှောင်တွေ ခိုလှုံရာနေရာတွေကို အဓိက တိုက်ခိုက်နေတာဖြစ်ပါတယ်။ 

အကြီးဆုံး ဒုက္ခသည်စခန်းတစ်ခုဖြစ်တဲ့ ဂျဘာလီယာကို ပြီးခဲ့တဲ့ ၂ ရက်အတွင်း အနည်းဆုံး ၃ ကြိမ်တိုက်ခိုက်ခဲ့ပြီး ၂၀၀ နီးပါသေဆုံးကာ ထောင်နဲ့ချီ ဒဏ်ရာရရှိခဲ့ပါတယ်။ 

ဂါဇာမှာ ပါလက်စတိုင်း ဒုက္ခသည်စခန်း အများအပြား ရှိနေပါတယ်။ ၁၉၄၈ ခုနှစ် ဂျူးအစွန်းရောက် စစ်သွေးကြွအဖွဲ့တွေက ပါလက််စတိုင်းတွေကို သတ်ဖြတ်မောင်းထုတ် နယ်မြေလုကာ အစ္စရေးနိုင်ငံ ထူထောင်တဲ့အချိန် အိုးအိမ်စွန့်ခွာ ထွက်ပြေးခဲ့ရတဲ့ ပါလက်စတိုင်းတွေဟာ အဲဒီဒုက္ခသည်စခန်းတွေမှာ နေထိုင်နေကြတာဖြစ်ပါတယ်။ 

အစ္စရေးဟာ ဂါဇာကို အရင်ကလည်း အကြိမ်ကြိမ် ကျူးကျော်တိုက်ခိုက်ဖျက်ဆီးခဲ့ပါတယ်။ အောက်တိုဘာ ၇ ရက်နေ့က စတင်ခဲ့တဲ့ ကျူးကျော်တိုက်ခိုက်မှုကြောင့် ဂါဇာမှာ သတ်ဖြတ်ခံရသူ ပါလက်စတိုင်းအရေအတွက်ဟာ တစ်သောင်းနီးပါး ရှိလာပြီဖြစ်ပါတယ်။ 

Ref: Aljazeera

အောက်တိုဘာ ၂၉၊ ၂၀၂၃

M-Media 

-ဂါဇာကမ်းမြှောင်က အဓိက ဆေးရုံတစ်ခုဖြစ်တဲ့ အလ်-ကွဒ်စ် ဆေးရုံကို ဗုံးကြဲတိုက်ခိုက်မယ်လို့ အစ္စရေးတပ်ဖွဲ့က ခြိမ်းခြောက်ခဲ့ပြီး ချက်ခြင်းပြောင်းရွှေ့ခိုင်းခဲ့တယ်လို့ ပါလက်စတိုင်း လခြမ်းနီအဖွဲ့က ထုတ်ပြန်ပါတယ်။ 

ဂါဇာစီးတီးမှာ ရှိတဲ့ ဒီဆေးရုံဟာ အစ္စရေးရဲ့ အကြမ်းဖက်တိုက်ခိုက်မှုကြောင့် ဒဏ်ရာရသူတွေကို အဓိက ကုသပေးနေတဲ့ နေရာဖြစ်ပြီး အိုးအိမ်စွန့်ခွာ ထွက်ပြေးလာရသူ အများအပြားကိုလည်း ခိုလှုံခွင့်ပေးထားပါတယ်။ 

တနင်္ဂနွေနေနေ့ မနက်ပိုင်းကစပြီး ဆေးရုံရဲ့ မီတာ ၅၀ အကွာမှာ အစ္စရေးလေယာဥ်တွေက ဗုံးအလုံးပေါင်းများစွာ လာကြဲချနေတယ်လို့လည်း ပါလက်စတိုင်း လခြမ်းနီအဖွဲ့က ဆိုရှယ်မီဒီယာမှာ ရေးသားထုတ်ပြန်ခဲ့ပါတယ်။

ဂါဇာ အဓိကဆေးရုံတစ်ခုဖြစ်တဲ့ အလ်-အဟ်လီ အာရပ်ဆေးရုံဟာ အောက်တိုဘာ ၁၉ ရက်နေ့က အစ္စရေးရဲ့ ဒုံးကျည်နဲ့ ပစ်ခတ်တိုက်ခိုက်မှုကို ခံခဲ့ရပြီး ဒဏ်ရာရသူတွေနဲ့ စစ်ဘေးရှောင်တွေ အပါအ၀င် ပါလက်စတိုင်းပြည်သူ ၅၀၀ ကျော် သေဆုံးခဲ့ပါတယ်။ 

Ref: Aljazeera 

အောက်တိုဘာ ၂၂၊ ၂၀၂၃

M-Media 

-ဓားစားခံအဖြစ် ဖမ်းဆီးထားတဲ့ လူတွေထဲက အစ္စရေးနိုင်ငံသားနှစ်ဦးကို ပြန်လွှတ်ပေးမယ်လို့ မိမိတို့က ကမ်းလှမ်းခဲ့ပေမယ့် အစ္စရေးဖက်က လက်ခံဖို့ ငြင်းဆိုတယ်လို့ ဟားမက်စ်က ထုတ်ပြန်ပါတယ်။ 

နူရစ် ယစ်ရှက်နဲ့ ယုခ်ဖဒ် လစ်ဖ်ရှစ်တို့ဖြစ်ပြီး ဘာတောင်းဆိုမှုမှ မပါ၀င်ဘဲ လူသားချင်းစာနာထောက်ထားမှု အကြောင်းအရင်းတွေကြောင့် လွှတ်ပေးဖို့ စီစဥ်ခဲ့တာလို့ ဟားမက်စ်က ပြောပါတယ်။ 

အောက်တိုဘာ ၇ ရက်နေ့ အစ္စရေးကို ၀င်ရောက်တိုက်ခိုက်ခဲ့တဲ့ ဟားမက်စ်ဟာ အစ္စရေးစစ်သားနဲ့ အရန်တပ်သားတွေ အပါအ၀င် လူ ၂၁၀ လောက်ကို ဖမ်းဆီးသွားခဲ့တာဖြစ်ပါတယ်။ 

ကာတာရဲ့ ကြား၀င်ပေးမှုနဲ့ အမေရိကန်နိုင်ငံသား နှစ်ဦးကို အောက်တိုဘာ ၁၉ ရက်နေ့မှာ ဟားမက်စ်က ပြန်လွှတ်ပေးခဲ့ပါတယ်။ အစ္စရေးနိုင်ငံသား နှစ်ဦးကိုလည်း အဲဒီနေ့မှာပဲ ပြန်လွှတ်ပေးဖို့ ကာတာကတစ်ဆင့် ကမ်းလှမ်းခဲ့တာလို့ ဟားမက်စ်ရဲ့ လက်နက်ကိုင်အဖွဲ့ ပြောရေးဆိုခွင့်ရှိသူ အဘူ အိုဘိုက်ဒါက ပြောပါတယ်။ 

အစ္စရေးက ဟားမက်စ်ရဲ့ ဒီပြောကြားချက်ဟာ အလိမ်အညာ ၀ါဒဖြန့်မှုသာဖြစ်တယ်လို့ တုန့်ပြန်ပါတယ်။ 

စိတ်မ၀င်စား

—————

ဟားမက်စ် ပြောရေးဆိုခွင့်ရှိသူ ခါလစ် အလ်-ကဒ်ဒူမီက အစ္စရေးဟာ မိမိတို့ ဖမ်းထားသူတွေ ပြန်လွတ်ရေးအတွက် စိတ်မ၀င်စားဘူးလို့ ပြောပါတယ်။ 

“အဲဒီနှစ်ယောက်ကို လူသားချင်း စာနာထောက်ထားမှု ရှုထောင့်ကနေ လွှတ်ပေးဖို့ ကျွန်တော်တို့ ကမ်းလှမ်းခဲ့ပါတယ်။ သူတို့ မိသားစုတွေထံ ပြန်လွှဲပေးချင်တယ်။ အစ္စရေးအစိုးရက စိတ်မ၀င်စားပါဘူး။ ဒီလူတွေကို ပြန်လက်ခံဖို့ အစ္စရေးအစိုးရကိုယ်တိုင်က ငြင်းဆိုခဲ့တာပါ” 

ဘာ့ကြောင့် ပြန်လက်မခံတာလဲဆိုတာနဲ့ပတ်သက်ပြီး အစ္စရေးဖက်က အကြောင်းပြချက် မပေးခဲ့ဘူးလို့လည်း ကဒ်ဒူမီက ပြောပါတယ်။ 

Ref: Aljazeera