Tag: SaudiArabia

ဒီဇင်ဘာ ၈၊ ၂၀၂၁
M-Media

-ဒေါ်လာ သန်းပေါင်း ၆၅၀ တန်ဖိုးရှိမယ့် ဒုံးကျည်တွေ၊ လေကြောင်းရန် ကာကွယ်ရေးစနစ်တွေ ဆော်ဒီကို မရောင်းဖို့ ပိတ်ပင်တဲ့ ဆုံးဖြတ်ချက် မူကြမ်းတစ်ခုကို ​အမေရိကန် အထက်လွှတ်တော်က ဒီကနေ့မှာ မဲခွဲ ပယ်ချလိုက်ပါတယ်။

သမ္မတ ဂျိုးဘိုင်ဒန်က ဒီအစီအစဉ်ကို နိုဝင်ဘာလမှာ အတည်ပြုခဲ့တာပါ။ ဒါပေမယ့် ဒီလိုရောင်းချလိုက်ရင် ယီမင်စစ်ပွဲမှာ ဆော်ဒီအာရေဗျရဲ့ ပါဝင်မှုကို ပိုမိုအားကောင်းစေလိမ့်မယ်လို့ ထောက်ပြကာ ရီပက်ဘလစ်ကန်ပါတီ လွှတ်တော်အမတ်အချို့က ကန့်ကွက်တဲ့မူကြမ်းကို တင်ခဲ့တာ ဖြစ်ပါတယ်။

ဒီကနေ့ မဲခွဲရာမှာ ထောက်ခံမဲ ၃၀၊ ကန့်ကွက်မဲ ၆၇ မဲနဲ့ ပယ်ချခံလိုက်ရပါတယ်။ ဆုံးဖြတ်ချက်မူကြမ်းရေးသားရာမှာ ပါဝင်ခဲ့တဲ့ တစ်သီးပုဂ္ဂလိ လွှတ်တော်အမတ် ဘာနီ ဆန်းဒါးစ်က ဆော်ဒီကို ဒုံးကျည်တွေရောင်းတာဟာ မီးပုံထဲ ဓာတ်ဆီလောင်းထည့်တာသာ ဖြစ်လိမ့်မယ်လို့ မဲခွဲမှုအပြီးမှာ ပြောကြားခဲ့ပါတယ်။

ယီမင်ပြည်တွင်းစစ်မှာ ဆော်ဒီဦးဆောင်တဲ့ ပင်လယ်ကွေ့မဟာမိတ်အဖွဲ့ဟာ ၂၀၁၅ ခုနှစ်က စတင်ပါဝင်ခဲ့ပြီး ယီမင်အစိုးရဖက်ကနေ အီရန်ကျောထောက်နောက်ခံပြုထားတဲ့ ဟူသီသူပုန်တွေကို တိုက်ခိုက်ပေးနေတာ ဖြစ်ပါတယ်။

ဆော်ဒီကို လက်နက်မရောင်းဖို့ တားမြစ်တဲ့ ဆုံးဖြတ်ချက်မူကြမ်းကို မထောက်ခံကြောင်း သမ္မတဘိုင်ဒန်က မနေ့မှာ ပြောကြားခဲ့ပြီး ဆော်ဒီအာရေဗျက အရပ်သားတွေ ဒုံးကျည်၊ ဒရုန်းနဲ့ တိုက်ခိုက်ခံရမှု ပိုမိုမြ​င့်တက်လာတဲ့အချိန် မဟာမိတ်တွေကို ကူညီရေး မိမိတို့ကတိကဝတ်ကို ထိခိုက်စေလိမ့်မယ်လို့ တုန့်ပြန်ခဲ့ပါတယ်။

ဆော်ဒီကဝယ်ယူမယ့် လက်နက်တွေထဲမှာ Raytheon ဒုံးကျည်တွေ၊ ပက်ထရီယော့ ဒုံးခွင်းစနစ်တွေ ပါဝင်မှာ ဖြစ်ပါတယ်။

Ref: Aljazeera

နိုဝင်ဘာ ၁၈၊ ၂၀၂၁
M-Media

-ကမ္ဘာပေါ်မှာ​ အကြီးဆုံးရေပေါ်စက်မှုမြို့ဖြစ်လာမယ့် ‘အဌဂံမြို့တော်’ (OXAGON) တည်ဆောက်ရေး စီမံကိန်းကို ဆော်ဒီအာရေဗျနိုင်ငံက အခုတစ်ပတ်မှာ ထုတ်ဖော်ကြေငြာလိုက်ပါတယ်။

၂၀၃၀ ရည်မှန်းချက်အတိုင်း ဆော်ဒီအစိုးရက အကောင်အထည်ဖော်နေတဲ့ နောက်ဆုံးပေါ်မြို့တော်သစ် ‘နီအွန်’ (NEOM) ရဲ့ အစွန်ဘက် ပင်လယ်နီထဲမှာ အဌဂံစက်မှုမြို့ကို တည်ဆောက်သွားမှာပါ။ လက်ရှိ နေထိုင်ရပ်တည်နေတဲ့ ပုံစံမျိုးနဲ့ မတူဘဲ အနာဂတ်မှာ လူသားတွေ နေထိုင်၊ အလုပ်လုပ်ကိုင်မှုပုံစံကို တစ်ခေတ်ဆန်းစေရေး ရည်ရွယ်တည်ဆောက်တာဖြစ်ပါတယ်။

အိမ်ရှေ့မင်းသား မိုဟာမက် ဘင် ဆလ်မန်က နီအွန်နဲ့ ဆော်ဒီအာရေဗျရဲ့ စီးပွားရေး တိုးတက်ဖို့နဲ့ ၂၀၃၀ ရည်မှန်းချက် ပြည့်မီရေး အထောက်အကူဖြစ်စေဖို့အတွက် အဌဂံစက်မှုမြို့ကို အကောင်အထည်ဖော်ရခြင်းဖြစ်တယ်လို့ အင်္ဂါနေ့ စီမံကိန်းမိတ်ဆက်ပွဲမှာ ပြောကြားခဲ့ပါတယ်။

လူသားတွေ သဘာ၀တရားနဲ့ လိုက်လျောညီထွေစွာ နေနိုင်ရေးမူကို အခြေခံတည်ဆောက်မှာဖြစ်ပြီး ကမ္ဘာ့ နောက်ဆုံးပေါ်နည်းပညာတွေ အသုံးပြုထားတဲ့ လေဆိပ်နဲ့ သင်္ဘောဆိပ်ပါဝင်တဲ့ နည်းပညာမြင့် ကုန်စည်ပို့ဆောင်ရေး အချက်အခြာနေရာဖြစ်လာဖို့ ဆော်ဒီအစိုးရက ရည်မှန်းထားပါတယ်။

အဌဂံစက်မှုမြို့မှာ ပြည့်ဖြိုးမြဲစွမ်းအင်ကို ၁၀၀ ရာခိုင်နှုန်း သုံးမှာဖြစ်ပြီး ကာဘွန်ထုတ်လွှတ်မှု လုံး၀ရှိမှာ မဟုတ်ပါဘူး။ သန့်ရှင်းတဲ့ စွမ်းအင်သုံးစွဲမှု၊ သဘာ၀ပတ်ဝန်းကျင်ကို ထိန်းသိမ်းစောင့်ရှောက်မှုတို့မှာ ကမ္ဘာ့စံနမူနာမြို့ ဖြစ်လာမှာပါ။

ဉာဏ်ရည်တုနည်းပညာ၊ IoT စတဲ့ နောက်ဆုံးပေါ် နည်းပညာတွေကို အသုံးပြုမှာဖြစ်ပြီး၊ ပြည့်ဖြိုးမြဲစွမ်းအင်၊ ရေအရင်းအမြစ် တီထွင်ဖန်တီးရေး၊ အစားအသောက်ထုတ်လုပ်ရေး၊ ကျန်းမာရေး၊ နည်းပညာ၊ ဒစ်ဂျစ်တယ်ပစ္စည်းထုတ်လုပ်ရေး စတဲ့ စက်မှုဇုန်နဲ့ သုတေသနဌာန ၇ ခု အဌဂံစက်မှုမြို့မှာ ပါဝင်မှာ ဖြစ်ပါတယ်။

ဒီမြို့ကို အလုပ်အကိုင်အခွင့်အလမ်း ဖန်တီးပေးနိုင်ရေး၊ ဆော်ဒီဟာ ဒေသတွင်း ကုန်သွယ်ရေး အချက်အခြာနိုင်ငံတစ်ခု ဖြစ်လာရေး၊ ကမ္ဘာ့ကုန်သွယ်ရေးမှာ အဓိကအခန်းကဏ္ဍကနေ ပါဝင်လာရေး ရည်ရွယ်ပြီး တည်ဆောက်တာဖြစ်တယ်လို့ အိမ်ရှေ့မင်းသားက ထည့်သွင်းပြောဆိုခဲ့ပါတယ်။

ဆော်ဒီဟာ The Line လို့အမည်ပေးထားပြီး ကာဘွန်ထုတ်လွှတ်မှု လုံး၀မရှိတဲ့ နောက်ဆုံးပေါ် နည်းပညာသုံး အဆင့်မြင့်မြို့တော်တစ်ခုကိုလည်း တည်ဆောက်နေပါတယ်။

Ref: Reuters

နိုဝင်ဘာ ၁၃၊ ၂၀၂၁
M-Media

-ပညာရပ်ပိုင်းဆိုင်ရာမှာ ကျွမ်းကျင်တဲ့ နိုင်ငံခြားသားတွေကို နိုင်ငံသားပေးမယ့် အမိန့်တစ်ခုကို ဆော်ဒီဘုရင် ဆလ်မန်က ကြာသာပတေးနေ့မှာ ထုတ်ပြန်လိုက်ပါတယ်။

ဆော်ဒီအစိုးရရဲ့ ‘၂၀၃၀ ရည်မှန်းချက်’ (Vision 2030) အရ နိုင်ငံတကာ ပရော်ဖက်ရှင်နယ်တွေ မျက်စိကျစေမယ့် စီးပွားရေး နယ်ပယ်တစ်ခု ဖန်တီးရေး စီမံချက်ကို အကောင်အထည်ဖော်ဖို့ ဒီဥပဒေကို ပြဌာန်းလိုက်တာပါ။ ကျွမ်းကျင်နိုင်ငံခြားသားတွေကို နိုင်ငံသားပေးဖို့ စီစဉ်နေတာကို ဆော်ဒီက ၂၀၁၉ ခုနှစ်ကတည်းက ထုတ်ပြန်ထားပါတယ်။

ဥပဒေ၊ ဆေးဘက်ဆိုင်ရာ၊ သိပ္ပံနယ်ပယ်၊ ယဉ်ကျေးမှု၊ အနုပညာ၊ အားကစား၊ နည်းပညာ၊ မှုခင်းဗေဒ၊ စိုက်ပျိုးရေး၊ နျူကလီးယားနဲ့ ပြည့်ဖြိုးမြဲစွမ်းအင်၊ ရေနံနဲ့ သဘာ၀ဓာတ်ငွေ့၊ ဉာဏ်ရည်တုနည်းပညာ စတဲ့ကဏ္ဍတွေမှာ ကျွမ်းကျင်သူ နိုင်ငံခြားသား ပညာရှင်တွေဟာ ဆော်ဒီနိုင်ငံသား လျှောက်လို့ရမှာ ဖြစ်ပါတယ်။

​ဘုရင် ဆလ်မန်နဲ့ အိမ်ရှေ့မင်းသား မိုဟာမက်ဘင် ဆလ်မန်တို့ ဦးဆောင်တဲ့ ဆော်ဒီအစိုးရဟာ တိုင်းပြည်စီးပွားရေး ရေနံအပေါ် မှီခိုနေရမှုကို လျှော့ချနိုင်ရေး ဘက်စုံ စီးပွားရေး ဖွံ့ဖြိုးတိုးတက်ဖို့အတွက် လုပ်ဆောင်နေတာ ဖြစ်ပါတယ်။

ကမ္ဘာတစ်ဝှမ်းက သိပ္ပံပညာရှင်၊ တတ်သိပညာရှင်၊ တီထွင်စွန့်စားသူတွေကို ဆွဲဆောင်နိုင်တဲ့ အာရပ်ကမ္ဘာက ဂုဏ်ယူဖွယ်ရာ အချက်အခြာနိုင်ငံတစ်ခု ဖြစ်လာရေး ဆော်ဒီအာရေဗျက ရည်မှန်းထားတယ်လို့ ဒီအမိန့် ထွက်လာပြီးနောက်ပိုင်း ဆော်ဒီအစိုးရ အဖွဲ့အစည်းတစ်ခုဖြစ်တဲ့ Saudi Project က သူတို့ရဲ့ Twitter စာမျက်နှာမှာ ရေးသားထားပါတယ်။

နိုင်ငံအတွင်းမှာ လက်ရှိ ရှိနေတဲ့ နိုင်ငံခြားသားတွေ၊ နိုင်ငံခြားက မျိုးနွယ်စုတွေလည်း ပညာရပ်ပိုင်းဆိုင်ရာ ကျွမ်းကျင်မှုရှိရင် နိုင်ငံသား လျှောက်ထားနိုင်တယ်လို့ ဆော်ဒီအစိုးရက ပြောပါတယ်။

Ref: Arab News

အောက်တိုဘာ ၃၀၊ ၂၀၂၁
M-Media

-ယီမင်စစ်ပွဲအတွက် ဆော်ဒီဦးဆောင်တဲ့ မဟာမိတ်အဖွဲ့ကို လက်ဘနွန် ပြန်ကြားရေးဝန်ကြီးက ဝေဖန်တဲ့ဗီဒီယို ထွက်လာပြီးတဲ့နောက် ဆော်ဒီအာရေဗျက လက်ဘနွန်ကနေ ကုန်ပစ္စည်းတင်သွင်းမှုအားလုံးကို ပိတ်ကာ သံအမတ်ကိုလည်း တိုင်းပြည်က နှင်ထုတ်လိုက်ပါတယ်။

မန်ဆူရ်ဟာဒီဦးဆောင်တဲ့ ယီမင်အစိုးရကို ဟူသီလက်နက်ကိုင်အဖွဲ့က ဖြုတ်ချခဲ့တဲ့ ၂၀၁၄ ခုနှစ်ကစတင်ပြီး ယီမင်မှာ ပြည်တွင်းစစ် စဖြစ်လာတာပါ။ ဆော်ဒီနဲ့ ယူအေအီး ဦးဆောင်တဲ့ မဟာမိတ်အဖွဲ့ဟာ ၂၀၁၅ ခုနှစ်မှာ ဒီစစ်ပွဲထဲ ပါဝင်လာခဲ့ပြီး မန်ဆူရ်ဟာဒီအစိုးရဖက်က တိုက်ပေးတာ ဖြစ်ပါတယ်။

လက်ဘနွန် ပြန်ကြားရေးဝန်ကြီး ဂျော့ ကိုဒါဟီက ဟူသီတွေဟာ ပြည်ပကျူးကျော်မှုကို ကာကွယ်နေတာဖြစ်ပြီး အတ္တတွေကြောင့် ယီမင်စစ်ပွဲကြာရှည်နေတာဖြစ်ကြောင်း မီဒီယာတစ်ခုနဲ့ အင်တာဗျူးမှာ ပြောခဲ့ပြီး အင်္ဂါနေ့က ဒီဗီဒီယို အွန်လိုင်းမှာ ပြန့်နှံ့ပြီးနောက်ပိုင်း ဆော်ဒီဖက်က အခုလို တုန့်ပြန်လာတာ​ ဖြစ်ပါတယ်။

ဆော်ဒီနဲ့ လက်ဘနွန်တို့ဟာ အရင်ကတည်းက တင်းမာမှုတွေရှိထားပြီး အခုမှတ်ချက်ကြောင့် ပိုမိုဆိုးရွားလာတာပါ။ ဝန်ကြီးချုပ် နာဂျစ်မီကာတီ ဦးဆောင်တဲ့ လက်ဘနွန်အစိုးရက ကိုဒါဟီရဲ့ ဒီအင်တာဗျူးဟာ သူတို့အစိုးရမှာ မပါဝင်ခင် တစ်လအရင်က ပြောကြားမှုဖြစ်ပြီး ပုဂ္ဂလအမြင်သာဖြစ်တယ်လို့ တုန့်ပြန်ထားပါတယ်။

ယီမင်စစ်ပွဲမှာ ပါဝင်နေတဲ့ ဆော်ဒီအာရေဗျ၊ ယူအေအီး၊ ကူဝိတ်နဲ့ ဘာရိန်းတို့ဟာ လက်ဘနွန်သံအမတ်ကို အခုတစ်ပတ်အစောပိုင်းမှာ ဆင့်ခေါ်ဖြေရှင်းချက်တောင်းခဲ့သလို၊ ပင်လယ်ကွေ့အဖွဲ့ဝင်နိုင်ငံတွေဖြစ်တဲ့ ကာတာနဲ့ အိုမန်တို့ကလည်း ကိုဒါဟီရဲ့ ပြောကြားမှုကို ရှုတ်ချကြောင်း ကြေငြာချက် ထုတ်ခဲ့ပါတယ်။

ဆော်ဒီအစိုးရက လက်ဘနွန်နိုင်ငံက သွင်းကုန်အားလုံးပိတ်ကြောင်း မနေ့က ထုတ်ပြန်ခဲ့ပြီး၊ လက်ဘနွန်သံအမတ်ကိုလည်း ၄၈ နာရီအတွင်း တိုင်းပြည်ကထွက်ခွာဖို့ ရာဇသံ ပေးခဲ့ပါတယ်။ ဆော်ဒီရဲ့ မဟာမိတ်နိုင်ငံဖြစ်တဲ့ ဘာရိန်းကလည်း လက်ဘနွန်သံအမတ်ကို နှင်ထုတ်ခဲ့ပါတယ်။

Ref: Aljazeera