Tag: SaudiArabia

အောက်တိုဘာ ၁၀၊ ၂၀၂၁
M-Media

-မက္ကာနဲ့ မဒီနာမြို့က မြင့်မြတ်ရာ ဗလီဝတ်ကျောင်းတော်နှစ်ခုမှာ အွမ္မရာ​ပြုဖို့နဲ့ ဝတ်ပြုဆုတောင်းဖို့အတွက် ကိုဗစ်ကာကွယ်ဆေး ၂ ကြိမ် ထိုးထားပြီးသားသူတွေကိုသာ ခွင့်ပြုမယ်လို့ ဆော်ဒီအာရေဗျက ထုတ်ပြန်လိုက်ပါတယ်။

ဆော်ဒီ ဟဂျ်နဲ့ အွမ္မရာဝန်ကြီးဌာနရဲ့ မနေ့က ထုတ်ပြန်ချက်ဟာ မက္ကာမြို့က မတ်စ်ဂျစ်ဒ် ဟရာမ် ဗလီဝတ်ကျောင်းတော်၊ မဒီနာမြို့က မတ်စ်ဂျစ်ဒ် နဗဝီ ဗလီဝတ်ကျောင်းတော်နဲ့ တမန်တော်မိုဟာမက်ရဲ့ ဂူဗိမာန်စတဲ့ မြင့်မြတ်ရာနေရာတွေအားလုံမှာ အကြုံးဝင်မှာ ဖြစ်ပါတယ်။

အဲဒီနေရာတွေမှာ အွမ္မရာဟ်ပြုဖို့၊ ဝတ်ပြုဆုတောင်းဖို့ လျှောက်ထားလိုသူတွေဟာ Pfizer-BionTech၊ Oxford-AstraZeneca နဲ့ Moderna ကိုဗစ်ကာကွယ်ဆေး ၂ ကြိမ်စီ၊ ဒါမှမဟုတ် Johnson & Johnson ကာကွယ်ဆေးတစ်ကြိမ် ထိုးထားဖို့ လိုအပ်ပါတယ်။ Tawakkalna အက်ပလီကေးရှင်းကနေ လျှောက်ထားရမှာပါ။

ကာကွယ်ဆေးမထိုးထားပေမယ့် ချွင်းချက်နဲ့ခွင့်ပြုထားသူတွေကတော့ အရင်အတိုင်း ဝင်ရောက်ခွင့်ရမှာ ဖြစ်ပါတယ်။

အရင်က အွမ္မရာပြုခွင့်ရထားပြီး ဒုတိယအကြိမ်ကာကွယ်ဆေး မထိုးရသူတွေအနေနဲ့ ခွင့်ပြုရက်စွဲ မတိုင်ခင် ၄၈ ရှိနာရီ နောက်ဆုံးထားကာ ကာကွယ်ဆေးထိုးဖို့လည်း ဟဂျ်နဲ့ အွမ္မရာဝန်ကြီးဌာနက တိုက်တွန်းထားပါတယ်။

Ref: Khaleej Times

စက်တင်ဘာ ၁၈၊ ၂၀၂၁
M-Media

-ဆော်ဒီအာရေဗျက ကျောထောက်ခံပြု လျှပ်စစ်ကားကုမ္ပဏီ Lucid Motors က ထုတ်လုပ်တဲ့ ကားမော်ဒယ်သစ်တစ်ခုဟာ လျှပ်စစ်ကားနယ်ပယ်မှာ အဝေးဆုံး မောင်းနိုင်တဲ့စံချိန်ကို ရရှိခဲ့ပါတယ်။

ဒီကားကို Lucid Air Dream Edition R လို့ အမည်ပေးထားပြီး မိုင်ပေါင်း ၅၂၀ အထိ ဘထ္ထရီအားသွင်းစရာမလိုဘဲ မောင်းနိုင်တဲ့ မှတ်တမ်းကို နိုင်ငံတကာ သဘာ၀ပတ်ဝန်းကျင် ထိန်းသိမ်းစောင့်ရှောက်ရေး အေဂျင်စီ (EPA) ကနေ ရရှိခဲ့တာဖြစ်ပါတယ်။

ဒါဟာ လျှပ်စစ်ကားလောကကို ဦးဆောင်နေတဲ့ Tesla ရဲ့ မိုင် ၁၀၀ ကျော်မောင်းနိုင်တဲ့ စံချိန်ကို ကျော်သွားတာလည်း ဖြစ်ပါတယ်။

Lucid Motors ဟာ အမေရိကန် ကုမ္ပဏီတစ်ခုဖြစ်ပြီး ၂၀၁၉ ခုနှစ် ဧပြီလမှာ ဆော်ဒီ နိုင်ငံပိုင် ရင်းနှီးမြှုပ်နှံမှုအဖွဲ့ (PIF) က ကန်ဒေါ်လာ ၁ ဘီလီယံ ရင်းနှီးမြှုပ်နှံခဲ့ကာ ရှယ်ယာ ၆၇ ရာခိုင်နှုန်းကို ပိုင်ဆိုင်ထားပါတယ်။ ၂၀၂၄ ခုနှစ်ရောက်ရင် Lucid Motors က ဆော်ဒီအာရေဗျမှာ ကားတွေထုတ်လုပ်ဖို့ စီစဉ်ထားပါတယ်။

Lucid Motors ရဲ့ စီအီးအိုး ပီတာ ရော်လင်ဆန်က EPA ကနေ ဒီလို အသိအမှတ်ပြုမှုမျိုး ရရှိတဲ့အတွက် အလွန်အမင်း ဝမ်းမြောက်မိကြောင်း၊ ဘထ္ထရီကြီးကြီးထည့်နိုင်ရင် ဝေးဝေးသွားနိုင်မယ်ဆိုတဲ့ သဘောတရားကို ကျော်ဖြတ်စွမ်းဆောင်ပြနိုင်တဲ့ ဒီအောင်မြင်မှုဟာ လျှပ်စစ်ကားလောကမှာ မှတ်တိုင်သစ် စိုက်ထူလိုက်တာဖြစ်ကြောင်း ပြောကြားခဲ့ပါတယ်။

Lucid Air Dream Edition R ကားဟာ လော့စ်အိန်ဂျလိစ်ကနေ ဆန်ဖရန်စစ္စကို၊ အဲဒီကမှတစ်ဆင့် Lucid ရုံးချုပ်ရှိရာ နယူးဂျာစီက နီ၀ါ့က်မြို့ စုစုပေါင်း ၄၄၅ မိုခရီးကို အဲကွန်းတောက်လျှောက်ဖွင့်ကာ တစ်နာရီ ၆၇ မိုင် အမြန်နှုန်းအထိ စမ်းသပ်မောင်းနှင်ပြခဲ့တာ ဖြစ်ပါတယ်။

ဒီကားကို လာမယ့်နှစ်မှာ စျေးကွက်တင်ဖို့ စီစဉ်ထားပြီး တန်ဖိုး ဒေါ်လာ ၇ သောင်း ကျသင့်မှာဖြစ်ကာ လက်ရှိအချိန်အထိ ကြိုတင်အမှာ ၁၁၀၀၀ သာ ရရှိထားပါတယ်။ EPA ရဲ့ အခု အသိအမှတ်ပြုမှုကြောင့် အမှာတွေ ပိုရလာလိမ့်မယ်လို့ ကုမ္ပဏီက မျှော်လင့်ထားပါတယ်။

Ref: Arab News

စက်တင်ဘာ ၁၁၊ ၂၀၂၁
M-Media

-ဆော်ဒီအာရေဗျမှာ ထားရှိတဲ့ အဆင့်မြင့်ဒုံးခွင်းစနစ်တွေကို အမေရိကန်က ပြီးခဲ့တဲ့ သီတင်းပတ်အနည်းငယ်အတွင်းမှာ ပြန်သိမ်းလိုက်တယ်လို့ သတင်းတွေ ထွက်လာပါတယ်။

ယီမင်က ဟူသီသူပုန်တွေက ဆော်ဒီကို ဒုံးကျည်နဲ့တိုက်ခိုက်မှု၊ ဒရုန်းနဲ့တိုက်ခိုက်မှုတွေ မြင့်တက်လာတဲ့အချိန် ဘာ့ကြောင့် ဒီလိုရုပ်သိမ်းလိုက်လဲဆိုတာ အတိအကျ မသိရပါဘူး။ အမေရိကန်က အရှေ့အလယ်ပိုင်းထက် ခြိမ်းခြောက်မှုပိုများလာတဲ့ အာရှမှာ ဒီဒုံးခွင်းစနစ်တွေ လိုအပ်လာတယ်လို့ ရှုမြင်နေတယ်လို့ သုံးသပ်မှုတွေလည်း ရှိနေပါတယ်။

၂၀၁၉ ခုနှစ်က ဆော်ဒီရဲ့ရေနံထုတ်တဲ့ အဓိကစက်ရုံတွေကို ဟူသီတွေက တိုက်ခိုက်ပြီးတဲ့နောက်ပိုင်း မြို့တော်ရီယာ့ဒ်အပြင်ဘက် ပရင့်စ်ဆူလ်တန်လေတပ်စခန်းမှာ တပ်ဖွဲ့ဝင် ထောင်ချီနဲ့ ဒုံးခွင်းစနစ်တွေကို အမေရိကန်က ချထားခဲ့တာဖြစ်ပါတယ်။

ဒုံးခွင်းနစ်တွေက Patriot နဲ့ နောက်ဆုံးပေါ် THAAD စနစ်တွေ ဖြစ်ပါတယ်။ ဆော်ဒီကနေ ဒီဒုံးခွင်းနစ်တွေ ရုပ်သိမ်းမယ်ဆိုတဲ့သတင်း ထွက်လာတာ လနဲ့ချီရှိနေပါပြီ။

အမေရိကန်စစ်ဌာနချုပ် ပင်တဂွန်ရဲ့ ပြောရေးဆိုခွင့်ရှိသူ ဂျွန်ကီရ်ဘီက ဒုံးခွင်းစနစ်တွေ ရုပ်သိမ်းကြောင်း အတည်ပြုခဲ့ပေမယ့် အရှေ့အလယ်ပိုင်းက မဟာမိတ်အတွက် မိမိတို့ထားရှိတဲ့ ကတိကဝတ်တွေကို ဆက်လက်စောင့်ထိန်းသွားမယ်လို့ ပြောကြားခဲ့ပါတယ်။

ဆော်ဒီဖက်က ထုတ်ပြန်တဲ့ ကြေငြာချက်မှာလည်း ဒီသတင်းကို အတည်ပြုခဲ့ပြီး၊ မိမိတို့နဲ့ အမေရိကန်ရဲ့ ဆက်ဆံရေးဟာ အရင်ကအတိုင်း ခိုင်ခိုင်မာမာ ရှိနေဆဲဖြစ်ကြောင်း၊ ဆော်ဒီစစ်တပ်ဟာ မိမိတို့ရဲ့ ပိုင်နက်နဲ့ ပြည်သူတွေကို အပြည့်အ၀​ ကာကွယ်နိုင်စွမ်းရှိကြောင်း ဖော်ပြထားပါတယ်။

Ref: Aljazeera

စက်တင်ဘာ ၂၊ ၂၀၂၁
M-Media

-ဆော်ဒီအာရေဗျရဲ့ ပထမဆုံး စစ်သမီးတွေဟာ မနေ့က အမျိုးသမီးစစ်သင်တန်းကျောင်းကနေ အောင်မြင်စွာ သင်တန်းဆင်းခဲ့ပြီ ဖြစ်ပါတယ်။

သင်တန်းဆင်းပွဲအခမ်းအနားကို စစ်ဦးစီးအရာရှိချုပ် ဖေယဒ် အလ်-၇ူဝေလီအပါအဝင် စစ်ဖက် ထိပ်တန်းပုဂ္ဂိုလ်တွေ တက်ရောက်ခဲ့ကြပါတယ်။

ဆော်ဒီစစ်တပ်ရဲ့ ပညာရေးနဲ့ လေ့ကျင့်သင်ကြားမှုဆိုင်ရာ အကြီးအကဲ ​ဗိုလ်ချုပ် အဒဲလ် အလ်-ဘာလာဝီက အမျိုးသမီးစစ်သည်တွေကို နိုင်ငံကာ စံချိန်စံညွှန်းနဲ့အညီ သင်ရိုးရေးဆွဲကာ စစ်ပညာ၊ ကာကွယ်ရေးနဲ့ပတ်သက်တဲ့ ပညာရပ်တွေကို သင်ကြားပေးခဲ့ကြောင်း၊ အနာဂတ် စစ်တပ်ရဲ့ ရည်မှန်းချက် ရည်ရွယ်ချက် အောင်မြင်ရေးမှာ အမျိုးသမီးတွေရဲ့ စွမ်းဆောင်ရည်က အထောက်အကူပေးနိုင်မှာဖြစ်ကြောင်း ပြောကြားခဲ့ပါတယ်။

တိုင်းပြည်ရဲ့ စီးပွားရေးနဲ့ လူမှုရေးမှာ ပြုပြင်ပြောင်းလဲမှုတွေ လုပ်ဆောင်နေတဲ့ ဆော်ဒီအာရေဗျဟာ အမျိုးသမီးတွေနဲ့ပတ်သက်ပြီး နိုင်ငံအတွင်းရှိနေတဲ့ ရှေးရိုးစွဲအမြင်တွေ၊ ကန့်သတ်မှုတွေ ပယ်ဖျက်တာကိုလည်း လုပ်ဆောင်နေပါတယ်။

နှစ်ပေါင်းများစွာ ရှိလာတဲ့ အမျိုးသမီးကားမောင်းခွင့် ပိတ်ပင်ထားမှုကို ၂၀၁၈ ခုနှစ်မှာ ပယ်ဖျက်ခဲ့သလို၊ အမျိုးသားအုပ်ထိန်းသူပါမှ ခရီးသွားခွင့်ရှိတဲ့ ကန့်သတ်ချက်ကိုလည်း ၂၀၁၇ ခုနှစ်မှာ ပယ်ဖျက်ခဲ့ပါတယ်။

နိုင်ငံစစ်တပ်မှာ အမျိုးသမီးတွေ စစ်မှုထမ်းခွင့်ကို အခုနှစ်အစောပိုင်းကစတင်ပြီး ခွင်ပြုခဲ့ပါတယ်။ အသက် ၂၁ နှစ်ကနေ ၄၀ အရွယ်အတွင်းရှိတဲ့ အမျိုးသမီးတွေဟာ ဆော်ဒီကြည်းတပ်၊ ရေတပ်၊ လေတပ်၊ ဒုံးကျည်တပ်နဲ့ လေကြောင်းရန်ကာကွယ်ရေးတပ်ဖွဲ့တွေမှာ တာဝန်ထမ်းဆောင်နိုင်မှာ ဖြစ်ပါတယ်။

Ref: Al Arabiya