အောက်တိုဘာ ၂၇၊ ၂၀၂၁
M-Media
-အရှေ့အလယ်ပိုင်းဒေသဆိုင်ရာ ရုံးချုပ်တွေ မြို့တော်ရီယာ့ဒ်မှာ ဖွင့်လှစ်နိုင်ဖို့အတွက် နိုင်ငံတကာလုပ်ငန်း ၄၄ ခုကို လိုင်စင်ထုတ်ပေးထားတယ်လို့ ဆော်ဒီအာရေဗျက ကြေငြာလိုက်ပါတယ်။
ဒါဟာ ဒေသတွင်း ရေနံမဟုတ်တဲ့ စီးပွားရေးကို လွှမ်းမိုးထားတဲ့ အာရပ်စော်ဘွားများပြည်ထောင်စု (ယူအေအီး) နိုင်ငံကို ယှဉ်ပြိုင်နိုင်ရေး ဆော်ဒီအာရေဗျရဲ့ ကြိုးပမ်းမှုတွေထဲက တစ်ခုပါ။
နိုင်ငံအတွင်း ရင်းနှီးမြှုပ်နှံမှုတွေ ဆက်လုပ်ချင်ရင် နိုင်ငံတကာလုပ်ငန်းတွေအနေနဲ့ ၂၀၂၄ ခုနှစ်မတိုင်ခင် ဒေသတွင်းရုံးချုပ် ဖွင့်လှစ်ရမယ်လို့ ဆော်ဒီအစိုးရက အခုနှစ် ဖေဖော်ဝါရီလမှာ ကြေငြာခဲ့တာပါ။
ဆော်ဒီ ရင်းနှီးမြှုပ်နှံမှုရေးရာဝန်ကြီး ခါလစ် အလ်-ဖာလီက နယ်ပယ်အသီးသီးက နိုင်ငံတကာကုမ္ပဏီ စုစုပေါင်း ၄၄ ခုလောက်ဟာ သူတို့ရဲ့ ဒေသဆိုင်ရာ ရုံးချုပ်တွေကို ဆော်ဒီမှာ ပြောင်းဖွင့်ဖို့ အစိုးရနဲ့ သဘောတူညီချက် ရရှိကာ လိုင်စင်လည်း ထုတ်ပေးလိုက်ပြီလို့ ရီယာ့ဒ်မြို့မှာပြုလုပ်တဲ့ ရင်းနှီးမြှုပ်နှံမှုဖိုရမ် FII အပြီးမှာ ပြောကြားခဲ့ပါတယ်။
အနည်းဆုံး နိုင်ငံတကာလုပ်ငန်းပေါင်း ၄၀၀ ကနေ ၅၀၀ လောက်အထိ ဆော်ဒီမှာ ရုံးချုပ်ဖွင့်လာဖို့အတွက် ရည်မှန်းထားတယ်လို့လည်း အလ်-ဖာလီက ဆိုပါတယ်။
ဒီလို ရင်းနှီးမြှုပ်နှံမှုတွေ လုပ်နိုင်အောင် နှစ်ပေါင်း ၅၀ အခွန်ပေးစရာမလိုတာ၊ ဆော်ဒီနိုင်ငံသား ဘယ်လောက်ရာခိုင်နှုန်းကို အလုပ်ခန့်ရမယ်ဆိုတဲ့ ကန့်သတ်ချက်ကို ၁၀ နှစ် လျော့ပေါ့ပေးတာ၊ အစိုးရစီမံကိန်းတွေမှာ အထူးအခွင့်အရေးပေးတာ စတဲ့ မက်လုံးတွေကိုလည်း ဆော်ဒီက ပေးထားပါတယ်။
ကုမ္ပဏီ ၄၄ ခု ဆော်ဒီမှာ ရုံးချုပ်လာဖွင့်တဲ့အတွက် တိုက်ရိုက်၊ ဒါမှမဟုတ် သွယ်၀ိုက်ရရှိမယ့် အကျိုးကျေးဇူးဟာ ဆော်ဒီရီယဲလ် ၁၇၀ ဘီလီယံ (ဒေါ်လာ ၄၅ ဘီလီယံ) ရှိလိမ့်မယ်လို့လည်း အလ်-ဖာလီက ပြောပါတယ်။
၂၀၀၆ ခုနှစ်ကတည်းက စတင်ဖော်ဆောင်နေတဲ့ ဒေါ်လာဘီလီယံချီ စီးပွားရေးမြို့ ကင်းအဘ်ဒူလာ ဘဏ္ဍာရေးရပ်ဝန်း (KAFD) မကြာခင် ပြီးစီးတော့မှာဖြစ်ပြီး နိုင်ငံတကာကုမ္ပဏီတွေဟာ အဲဒီမှာ အခြေစိုက်ဖို့ ရှိနေပါတယ်။
စီးပွားရေးမှာ ဆော်ဒီဟာ ယူအေအီးကို ပြိုင်နေတယ်လို့ သတင်းတွေထွက်နေပေမယ့် ရင်းနှီးမြှုပ်နှံမှုဝန်ကြီး အလ်-ဖာလီက မိမိတို့ဟာ ယူအေအီးနဲ့ ပေါင်းစည်းနိုင်အောင် ဆောင်ရွက်နေတာဖြစ်တယ်လို့ တုန့်ပြန်ပြောဆိုခဲ့ပါတယ်။
Ref: CNA
