Tag: SaudiArabia

ဧပြီ ၁၊ ၂၀၂၃

M-Media 

-ဆော်ဒီကလပ် အလ်-ဟီလာလ်အသင်းဟာ မက်ဆီကို ရော်နယ်ဒိုထက် မြင့်မားတဲ့ လုပ်ခလစာနဲ့ ခေါ်ယူဖို့ ကမ်းလှမ်းလိုက်ပါတယ်။ 

ဇွန်လမှာ ပီအက်စ်ဂျီအသင်းနဲ့ စာချုပ်ပြည့်တော့မယ့် မက်ဆီဟာ စာချုပ်သစ်ကိစ္စအတွက် ဆွေးနွေးနေပမယ့် အဆင်မပြေသေးပါဘူး။ 

အသင်းက လစာလျှော့ယူစေချင်ပြီး မက်ဆီက ဒါကို လက်မခံလိုပါဘူး။  

ဆော်ဒီကလပ် အလ်-နဆာရ်အသင်းဟာ ဇန်န၀ါရီလက ရော်နယ်ဒိုကို တစ်နှစ်လုပ်ခ ပေါင် ၁၇၃ သန်းနဲ့ ခေါ်ယူခဲ့ပြီး ကမ္ဘာ့လစာအများဆုံးလည်းဖြစ်ပါတယ်။ 

အလ်-နဆာရ်ရဲ့ ပြိုင်ဖက် အလ်-ဟီလာလ်အသင်းက မက်ဆီကို ဒီပမာဏထက်ပိုပေးပြီး ခေါ်ယူဖို့ ကမ်းလှမ်းခဲ့တာဖြစ်ပါတယ်။ 

မက်ဆီရဲ့ဖခင်ဟာ မတ်လအစောပိုင်းက ဆော်ဒီကို သွားရောက်ခဲ့ပါသေးတယ်။ မက်ဆီဖက်ကတော့ ဒီကိစ္စနဲ့ပတ်သက်ပြီး ဘာမှထုတ်ပြန်တာ မရှိသေးပါဘူး။ 

ပီအက်စ်ဂျီနောက်ခံလူ ရာမို့စ်လည်း စာချုပ်သစ်ကိစ္စ အဆင်မပြေသေးဘဲ ဆော်ဒီကလပ်ကို သွားကစားနိုင်ခြေရှိတယ်ဆိုတဲ့ သတင်းတွေ ထွက်နေပါတယ်။ 

Ref: Mirror

မတ် ၁၄၊ ၂၀၂၃

M-Media 

-တစ်ပတ် ၄ ရက်အလုပ်လုပ်ပြီး ၃ ရက်ပိတ်တဲ့စနစ်ကို ကျင့်သုံးနိုင်ဖို့အတွက် စဥ်းစားသုံးသပ်မှုတွေ လုပ်နေတယ်လို့ ဆော်ဒီအာရေဗျ လူ့စွမ်းအားအရင်းအမြစ်နဲ့ ဖွံ့ဖြိုးတိုးတက်ရေး ၀န်ကြီးဌာနက ထုတ်ပြန်ပါတယ်။ 

၀န်ကြီးဌာနဟာ အလုပ်အကိုင် ပိုမိုဖန်တီးနိုင်ရေး၊ ပြည်တွင်း၊ ပြည်ပက ရင်းနှီးမြှုပ်နှံသူတွေကို စွဲဆောင်နိုင်ရေးအတွက် နိုင်ငံအတွင်း အလုပ်အကိုင်ဆိုင်ရာ သုံးသပ်မှုတွေ ပြုလုပ်နေတာ ဖြစ်ပါတယ်။

စဥ်စားချက်တွေထဲမှာ တစ်ပတ် ပိတ်ရက် ၃ ရက်အထိ ထားဖို့လည်း ပါ၀င်ပါတယ်။ ဒီအတွက် စစ်တမ်းကောက်ယူမှုတွေလည်း လုပ်နေတယ်လို့ ၀န်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။ 

ဒီစနစ်ကို အတည်ပြုနိုင်ရင် ဆော်ဒီဟာ ယူအေအီးနောက်ပိုင်း တစ်ပတ်တာ အလုပ်လုပ်ရက် နည်းသွားတဲ့ ဒုတိယမြောက် အာရပ်နိုင်ငံ ဖြစ်လာမှာပါ။

အာရပ်စော်ဘွားများပြည်ထောင်စု (ယူအေအီး) ဟာ ၂၀၂၂ ခုနှစ် ဇန်န၀ါရီလ ၁ ရက်နေ့က စတင်ပြီး တစ်ပတ် ၄ ရက်ခွဲသာ အလုပ်ဆင်းရတဲ့စနစ်ကို စတင်ခဲ့ပြီး သောကြာနေ့ နေ့တစ်၀က်နဲ့ စနေ၊ တနင်္ဂနွေ ၂ ရက်ကို ပိတ်ရက်အဖြစ် သတ်မှတ်ခဲ့ပါတယ်။ 

ယူအေအီးရဲ့ ပြည်နယ်တစ်ခုဖြစ်တဲ့ ရှာဂျာမှာတော့ တစ်ပတ် ၃ ရက်ပိတ်တဲ့စနစ် ကျင့်သုံးနေပါတယ်။ 

Ref: Al Arabiya 

မတ် ၁၀၊ ၂၀၂၃

M-Media

– အစ္စရေးနဲ့ ဆက်ဆံရေး တည်ဆောက်စေချင်နေတဲ့ အမေရိကန်ကို ဆော်ဒီအာရဗျက ကမ်းလှမ်းမှုတစ်ချို့ လုပ်ဆောင်ထားတယ်လို့ အရှေ့အလယ်ပိုင်းသံတမန်ရပ်၀န်းက ရင်းမြစ်တွေကို ကိုးကားပြီး အမေရိကန်မီဒီယာတွေက ဖော်ပြလာပါတယ်။ 

ဒီကမ်းလှမ်းမှုတွေကတော့ အရပ်ဖက် နျူစီမံကိန်း တည်ဆောက်ခွင့်ပေးဖို့၊ ဆော်ဒီရဲ့ လုံခြုံရေးကို အမေရိကန်က အပြည့်အ၀ အာမခံပေးဖို့၊ လက်နက်ရောင်းချရာမှာ ကန့်သတ်မှုတွေ ဖြေလျှော့ပေးဖို့ စတာတွေ ဖြစ်ပါတယ်။ 

လွတ်လပ်တဲ့ပါလက်စတိုင်းနိုင်ငံ မပေါ်မချင်း အစ္စရေးနဲ့ ဆက်ဆံရေး တည်ဆောက်မှာမဟုတ်ဘူးလို့ ဆော်ဒီအာရေဗျက အကြိမ်ကြိမ် ပြောထားတာပါ။ 

အမေရိကန်ဟာ ဆော်ဒီကို အစ္စရေးနဲ့ သံအဆက်အသွယ် မြန်မြန်ဆန်ဆန် လုပ်ဆောင်ချင်နေပြီး၊ ဆော်ဒီကလည်း ဒီအတွက် အပေးအယူလုပ်ဖို့ ကြိုးစားနေတာ ဖြစ်ပါတယ်။ 

ဒီကိစ္စအတွက် ဆော်ဒီဟာ ပြီးခဲ့တဲ့နှစ်ကစတင်ကာ ဘိုင်ဒန်အစိုးရနဲ့ ဆွေးနွေးနေပြီး ဆော်ဒီရဲ့တောင်းဆိုမှုမှာ ပါလက်စတိုင်းကိစ္စက အဓိက ကျတဲ့နေရာကနေ မပါ၀င်တော့ပါဘူး။

အရပ်ဖက်နျူကလီးယားစီမံကိန်းကို အမေရိကန်ရဲ့ စောင့်ကြည့်မှုအောက်မှာ ဆော်ဒီက အကောင်အထည်ဖော်ချင်နေတာ ဖြစ်ပါတယ်။ ဒီတောင်းဆိုမှုဟာ အရှေ့အလယ်ပိုင်းမှာ နျူလက်နက်ပြိုင်ဆိုင်မှုကို ပိုမိုပြင်းထန်နိုင်တယ်လို့ ဘိုင်ဒန်အစိုးရက ရှုမြင်နေပါတယ်။

လတ်တလောမှာ အမေရိကန်က ဒီတောင်းဆိုမှုတွေကို လိုက်လျောမယ့် အနေအထားမျိုး မရှိသေးဘဲ၊ ဆော်ဒီကလည်း ဒီမိုကရက်တစ်ပါတီဦးဆောင်တဲ့ အမေရိကန်အစိုးရထက် ရီပက်ဘလစ်ကန်ပါတီ ဦးဆောင်တဲ့ အမေရိကန်အစိုးရထံကနေ လိုက်လျောမှု ပိုရမယ်လို့ ရှုမြင်နေကြောင်း သံတမန်အသိုင်းအ၀ိုင်း ရင်းမြစ်တွေက ဆိုပါတယ်။ 

Ref: New York Times 

မတ် ၁၊ ၂၀၂၃

M-Media 

-ပေါ်တူဂီတိုက်စစ်မှူး ခရစ္စတီယာနို ရော်နယ်ဒို ရောက်လာပြီးနောက်ပိုင်း အသင်းမှာ သိသာတဲ့ ပြောင်းလဲမှု ၂ ခု ဖြစ်ခဲ့တယ်လို့ ဆော်ဒီကလပ် အလ်နဆာရ်အသင်းရဲ့ အဟာရပညာရှင် ဟိုဆေး ဘလီဆာက ပြောပါတယ်။ 

တစ်ခုက အသင်းသားတွေရဲ့ စားသောက်နေထိုင်မှုဖြစ်ပြီး၊ နောက်တစ်ခုက လေ့ကျင့်မှုပါ။ 

“ခရစ္စတီယာနို ရော်နယ်ဒိုဟာ ကျွန်တော့်အတွက် တော်တော်လေး အထောက်အကူဖြစ်ပါတယ်။ ကျွန်တော်တို့က သူ့ကို သင်စရာမလိုဘူး။ သူ့ဆီကပဲ ပြန်သင်ယူရတာပါ။ သူလုပ်တဲ့အရာတွေက စွမ်းဆောင်ရည်ကောင်းမွန်ဖို့ အထောက်အကူဖြစ်တာကြောင့် အခြားကစားသမားတွေကလည်း လိုက်လုပ်ကြပါတယ်” လို့ ဘလီဆာက ဆိုပါတယ်။ 

ရော်နယ်ဒိုလို ပရော်ဖက်ရှင်နယ် အလွန်ပီသတဲ့ ကစားသမားမျိုး အရင်က မမြင်ဖူးခဲ့ဘဲ၊ သူနဲ့ပြောတဲ့စကားတိုင်းဟာ သင်ယူစရာတွေပဲလို့ သူက ထည့်သွင်းပြောဆိုခဲ့ပါတယ်။ 

အသင်းမှာ ရော်နယ်ဒိုရောက်ပြီးနောက်ပိုင်း အဓိက ပြောင်းလဲမှုနှစ်ခု ဖြစ်ခဲ့ကြောင်း အလ်နဆာရ်ဆေးမှူးက ဖွင့်ဟပါတယ်။ 

“သူဒီကိုရောက်လာပြီးနောက်ပိုင်း အခြားကစားသမားတွေအားလုံး လေ့ကျင့်ရေးကို ပိုမို ကြိုးကြိုးစားစားလုပ်လာကြပြီး၊ စားသောက်နေထိုင်မှုကိုလည်း ပိုကောင်းအောင် ဆောင်ရွက်လာပါတယ်။ တစ်နေ့ထက်တစ်နေ့ ခန္ဓာကိုယ်အနေအထား ပျမ်းမျှ ၉၀ ရာခိုင်နှုန်းလောက် ပိုကောင်းအောင် လုပ်နိုင်တာမျိုး ဒီအသင်းမှာ အရင်က ကျွန်တော် မတွေ့ဖူးပါဘူး။ အဆီတွေနည်းသွားတယ်။ ကြွက်သားတွေ ပိုတောင့်တင်းလာတယ်။ လုပ်နိုင်သမျှလေ့ကျင်ခန်းတွေကိုလည်း အသင်းသားတွေက လုပ်လာကြပါတယ်။ ဒီမှာအလုပ်လုပ်ရတာ တော်တော်ကို အဆင်ပြေပါတယ်”

Ref: The Mirror