မတ် ၉၊ ၂၀၂၂
M-Media
-ရုရှားထံကနေ ရေနံနဲ့ သဘာ၀ဓာတ်ငွေ့ တင်သွင်း၀ယ်ယူမှုတွေ လုပ်တော့မှာမဟုတ်ဘူးလို့ အမေရိကန်နဲ့ ဗြိတိန်တို့က အင်္ဂါနေ့မှာ သီးခြားစီ ကြေငြာလိုက်ပါတယ်။
ဒါဟာ ယူကရိန်းကို ကျူးကျော်မှုအတွက် ဒဏ်ခတ်တာလို့ နှစ်နိုင်ငံ တာ၀န်ရှိသူတွေက ပြောပါတယ်။
အမေရိကန်သမ္မတ ဂျိုးဘိုင်ဒန်က ဒီလိုပိတ်မှုအတွက် နိုင်ငံအတွင်း ဆီစျေး၊ ဓာတ်ငွေ့စျေးတွေ တက်လာနိုင်တယ်လို့ ပြည်သူကို အသိပေးခဲ့ပါတယ်။
“ရုရှားထံက ရေနံနဲ့ သဘာ၀ဓာတ်ငွေ့ တင်ပို့မှု အားလုံးကို ကျွန်တော်တို့ ပိတ်ပင်လိုက်ပါတယ်။ ရုရှားရဲ့ ရေနံသင်္ဘောတွေ အမေရိကန်ဆိပ်ကမ်းမှာ ကပ်လို့ရမှာ မဟုတ်တော့ပါဘူး။ ပူတင်ရဲ့ စစ်ယန္တရားအပေါ် ပြင်းထန်တဲ့ ဒီထိုးနှက်ချက်မှာ အမေရိကန်ပြည်သူတွေလည်း ရင်ဆိုင်ကျော်ဖြတ်ရမှာ ဖြစ်ပါတယ်”
အမေရိကန်ရဲ့ ဒီထုတ်ပြန်ချက် ထွက်မလာခင်လေးမှာပဲ ဗြိတိန်က ရုရှားရဲ့ ရေနံနဲ့ ရေနံထွက်ပစ္စည်းအားလုံးကို ၂၀၂၂ ခုနှစ် နှစ်ကုန်အထိ ပိတ်ပင်ကြောင်း ကြေငြာခဲ့ပါတယ်။
ဗြိတိန်အပါအ၀င် ဥရောပနိုင်ငံတော်တော်များများဟာ စွမ်းအင်အတွက် ရုရှားထံက ရေနံနဲ့ သဘာ၀ဓာတ်ငွေ့ကို အဓိက မှီခိုအားထားနေရတာ ဖြစ်ပါတယ်။
သမ္မတဘိုင်ဒန်ကတော့ ရုရှားရဲ့ ရေနံနဲ့ သဘာ၀ဓာတ်ငွေ့တင်ပို့မှုကို အလုံးစုံ ပိတ်ပင်နိုင်ရေး ဥရောပက မဟာမိတ်နိုင်ငံတွေနဲ့ ပူးပေါင်းလုပ်ဆောင်သွားမယ်လို့ ပြောကြားခဲ့ပါတယ်။
အမေရိကန်နဲ့ မဟာမိတ်တွေရဲ့ ရုရှားအပေါ် ပိတ်ဆို့အရေးယူမှုတွေကြောင့် ရုရှားစီးပွားရေးဟာ သိသိသာသာ ထိခိုက်ကျဆင်းသွားပြီး အခုနောက်ဆုံး ဆောင်ရွက်မှုကို ကမ္ဘာတစ်၀ှမ်းက မဟာမိတ်တွေနဲ့ တိုင်ပင် ဆောင်ရွက်တာလို့လည်း ထည့်သွင်းပြောဆိုခဲ့ပါတယ်။
Ref : Reuters
