ဘင်္ဂလားဒေ့ရ်ှတွင် စာအုပ်တိုက်ပိုင်ရှင်တစ်ဦး အသတ်ခံရ

နိုဝင်ဘာ ၁၊ ၂၀၁၅
M-Media

– ဘာသာရေး အစွန်းရောက်မှုနှင့် ပတ်သက်၍ ဝေဖန်ရေးသားထားသည့် စာအုပ်ကို ထုတ်ဝေသော ဘင်္ဂလားဒေ့ရ်ှနိုင်ငံသား တစ်ဦးမှာ ယမန်နေ့က မြို့တော်ဒါကာတွင် ခေါင်းဖြတ်အသတ်ခံခဲ့ရသည်ဟု သိရသည်။

ဖေဆယ် အရီဖင်ဆိုသူဖြစ်ပြီး ၎င်းမှာ ပြီးခဲ့သည့် ဖေဖော်ဝါရီက ထိုနည်းလမ်းအတိုင်း အသတ်ခံခဲ့ရသည့် ဘင်္ဂလားဒေ့ရ်ှနွယ်ဖွား အမေရိကန်နိုင်ငံသား အဗီဂျစ် ရွိုင် ရေးသားထားသည့် စာအုပ်များကို ထုတ်ဝေသူဖြစ်သည်။ အရီဖင်မှာ ၎င်း၏ ရုံးခန်းထဲတွင် ထိုကဲ့သို့ အသတ်ခံခဲ့ရခြင်း ဖြစ်သည်။

ရဲတပ်ဖွဲ့တာဝန်ရှိသူတစ်ဦးကမူ လူသတ်သမားများမှာ စာအုပ်ဝယ်သူဟန်ဆောင်၍ ပုံနှိပ်တိုက်သို့ ၀င်ရောက်လာခဲ့ပြီး ရုံးခန်းတံခါးအား သော့ခတ်ကာ အခင်းဖြစ်ပွားချိန်တွင် နည်းဆုံး လူ ၇ ဦးခန့် ထို စာအုပ်တိုက်တွင် ပိတ်မိခဲ့သည်ဟု ပြောကြားခဲ့သည်။

ယမန်နေ့မနက်ပိုင်းကလည်း ရွိုင်၏ စာအုပ်ကို ထုတ်ဝေသည့် အခြားစာအုပ်တိုက်ပိုင်ရှင် အဟ်မဒ် ရာဟင်မ် တူတူလ်နှင့် စာရေးဆရာနှစ်ဦးကို ၎င်းတို့၏ စာအုပ်တိုက်တွင် လူ ၃ ဦးက သေနတ်၊ ဓားတို့ဖြင့် တိုက်ခိုက်မှုကြောင့် ဒဏ်ရာများရရှိခဲ့သည်။ ထိုတိုက်ခိုက်မှုများအတွက် မည်သည့်အဖွဲ့မှ တာဝန်ယူခြင်း မရှိသေးပေ။

Ref: Aljazeera