ဧပြီ ၃၀၊ ၂၀၁၆
M-Media
– ဗြိတိန်အခြေစိုက် လူ့အခွင့်အရးအဖွဲ့တစ်ခုဖြစ်သည့် Burma Campaign က ဘာသာပေါင်းစုံ ညီညွတ်ရေး တက်ကြွလှုပ်ရှားသူများဖြစ်သော ကိုဇော်ဇော်လတ်၊ မပွင့်ဖြူလတ်နှင့် ကိုဇော်ဝင်းဘိုတို့အား ခြွင်းချက်မရှိ ချက်ခြင်းလွှတ်ပေးရန် တောင်းဆိုလိုက်သည်။
ယမန်နေ့က ပြုလုပ်ခဲ့သည့် သတင်းစာရှင်းလင်းပွဲတွင် ထိုကဲ့သို့ တောင်းဆိုလိုက်ခြင်းဖြစ်ပြီး ၎င်းတို့ ၃ ဦးနှင့် ကျန်ရှိနိုင်ငံရေးအကျဉ်းသားများ လွတ်မြောက်ရေးအတွက် နိုင်ငံရေး အကျဉ်းသားများဆိုင်ရာ ကော်မတီကိုလည်း ပြုပြင်ပြောင်းလဲမှုပြုလုပ်ရန် အစိုးရအား တိုက်တွန်းခဲ့သည်။
အစ္စလာမ်ဘာသာဝင်များဖြစ်သည့် ကိုဇော်ဇော်လတ်နှင့် မပွင့်ဖြူလတ်၊ ဟိန္ဒူဘာသာဝင်ဖြစ်သည့် ကိုဇော်ဝင်းဘိုတို့မှာ ဗုဒ္ဓဘာသာဘုန်းတော်ကြီးတစ်ဦး တည်ထောင်ထားသည့် ‘သင့်မြတ်လိုသူများ’ ဘာသာပေါင်းစုံ ငြိမ်းချမ်းရေးအဖွဲ့၏ အဖွဲ့ဝင်များလည်းဖြစ်သည်။
ကိုဇော်ဇော်လတ်မှာ ဗုဒ္ဓ၀ါဒနှင့် သွေဖည်နေသော ဘုန်းကြီးတစ်ပါးနှင့် လက်တွဲကာ ဘာသာပေါင်းစုံချစ်ကြည်ရေး ဆောင်ရွက်ခြင်းဖြင့် ဗုဒ္ဓဘာသာအား စော်ကားနေသည်ဟု အမျိုးသားရေးအစွန်းရောက်များက အွန်လိုင်းတွင် လှုံ့ဆော်ပြီးနောက် ၂၀၁၅ ခုနှစ်တွင် ဖမ်းဆီးခြင်းခံခဲ့ရပြီး တရားမ၀င်နယ်စပ်ဖြတ်ကျော်မှု၊ တရားမ၀င်အဖွဲ့အစည်းဖြင့် ဆက်သွယ်မှုပုဒ်မများဖြင့် တရားစွဲဆိုခံခဲ့ရသည်။ ထို့နောက်ပိုင်းတွင် မပွင့်ဖြူလတ်နှင့် ကိုဇော်ဝင်းဘိုတို့ကို အာဏာပိုင်များက ဖမ်းဆီးခဲ့ကြသည်။
၂၀၁၆ ခုနှစ် ဖေဖော်ဝါရီလကတွင် ၎င်းတို့ ၃ ဦးအား တရားမ၀င်နယ်စပ်ဖြတ်ကျော်မှုဖြင့် ထောင်ဒဏ် ၂ နှစ်စီ ချမျတ်ခဲ့ပြီး ဧပြီလ ၈ ရက်နေ့တွင် ကိုဇော်ဇော်လတ်နှင့် မပွင့်ဖြူလတ်တို့မှာ တရားမ၀င်အဖွဲ့အစည်းဆိုင်ရာ အက်ဥပဒေဖြင့် ထောင်ဒဏ် ၂ နှစ် ထပ်မံ ချမှတ်ခြင်းခံခဲ့ရကာ လက်ရှိတွင် မန္တလေးရှိ အိုးဘိုထောင်၌ ပြစ်ဒဏ်ကျခံနေရသည်။
“အခြားသော တက်ကြွလှုပ်ရှားသူတွေ ထောင်ကလွတ်လာတဲ့အချိန်မှာ ဒီဘာသာပေါင်းစုံ ချစ်ကျည်ရေး တက်ကြွလှုပ်ရှားသူတွေ ထောင်ထပ်ကျတာကိုမြင်ရတဲ့အတွက် ကျွန်မ တော်တော်လေး စိတ်မကောင်းဖြစ်မိပါတယ်။ လက်ရှိ မြန်မာနိုင်ငံမှာ ဘာသာရေးလွတ်လပ်ခွင့်ကို မြှင့်ပေးဖို့ဟာ တော်တော်အရေးကြီးတဲ့ ကိစ္စပါ။ ဇော်ဇော်လတ်၊ ပွင့်ဖြူလတ်နဲ့ ဇော်ဝင်းဘိုတို့လို တက်ကြွလှုပ်ရှားသူတွေ အများကြီး ကျွန်မတို့လိုပါတယ်။ သူတို့ကို ချက်ခြင်းလွှတ်ပေးမှ နိုင်ငံအတွင်းမှာ ဘာသာရေး သဟဇာတဖြစ်ဖို့အတွက် သူတို့ရဲ့ ငြိမ်းချမ်းရေး လှုပ်ရှားမှုတွေကို ဆက်လက်လုပ်ဆောင်နိုင်မှာပါ” ဟု Burma Campaign UK မှ တာဝန်ရှိသူတစ်ဦးဖြစ်သူ ဒေါ်ဝေနှင်းက ပြောကြားခဲ့သည်။
Ref: Mizzima
Leave a Reply
You must be logged in to post a comment.